Il-Ġwejdin Għad Jirtu l-Art
‘Jien nimmaġina li n-natura se tiġi mibdula u restawrata. . . . Mhux issa, imma fil-futur imbiegħed, meta jkun hemm sema ġdid u art ġdida.’ —Jean-Marie Pelt, speċjalista Franċiż taʼ l-ambjent.
IMNIKKTIN minħabba l-kundizzjonijiet ambjentali u soċjali fuq l-art, ħafna nies jixtiequ jaraw il-pjaneta tagħna mibdula f’ġenna. Madankollu, din ix-xewqa m’hijiex biss ħolma tas-seklu 21. Ħafna żmien ilu, il-Bibbja wiegħdet ir-restawrazzjoni tal-Ġenna fuq l-art. Id-dikjarazzjonijiet taʼ Ġesù, “il-ġwejdin . . . għad jirtu l-art” u “ħa jkun li trid int, kif fis-sema, ukoll fuq l-art,” huma fost l-iktar siltiet magħrufin fl-Iskrittura. (Mattew 5:5; 6:10) Iżda llum, ftit huma dawk li jemmnu f’ġenna taʼ l-art abitata minn uħud ġwejdin. Għal ħafna li jistqarru li huma Kristjani, il-prospett taʼ Ġenna taʼ l-art intilef.
Ir-rivista Franċiża La Vie li toħroġ kull ġimgħa tispjega għala t-twemmin dwar ġenna—sew fuq l-art u sew fis-sema—ġie abbandunat, għallinqas fil-Knisja Kattolika: “Wara li kienet parti dominanti mit-tagħlim pastorali Kattoliku għal minn taʼ l-inqas 1900 sena, [l-idea taʼ] ġenna għabet mill-irtir spiritwali, mill-quddies taʼ nhar taʼ Ħadd, mill-korsijiet tat-teoloġija, u mill-klassijiet tal-katekiżmu.” Jingħad li l-kelma ‘ġenna’ hi moħbija fi “ċpar oħxon” taʼ “misteru u konfużjoni.” Minn jeddhom, xi predikaturi jevitawha għax din “tagħti wisq ideat taʼ hena fuq l-art.”
Għal Frédéric Lenoir, soċjologu li jispeċjalizza fir-reliġjon, l-ideat taʼ ġenna saru stampi ideali fil-moħħ. Bl-istess mod, Jean Delumeau, kittieb taʼ l-istorja u awtur taʼ diversi kotba fuq dan is-suġġett, jaħseb li l-wegħdi tal-Bibbja mhux se jitwettqu b’mod letterali. Hu jikteb: “Għall-mistoqsija, ‘X’sar minnha l-Ġenna taʼ l-art?’ il-fidi Kristjana tipprovdi din it-tweġiba: Grazzi għall-irxoxt tas-Salvatur, xi darba aħna lkoll se naqbdu idejn xulxin u għajnejna se jaraw l-hena.”
Għadu jgħodd il-messaġġ taʼ ġenna taʼ l-art? X’futur għandha l-pjaneta tagħna? Hija l-viżjoni tal-futur waħda mċajpra, jew tistaʼ din tintgħamel tidher ċara? L-artiklu li jmiss se jwieġeb dawn il-mistoqsijiet.
[Sors tal-Istampa f’paġna 2]
QOXRA: Emma Lee/Life File/Getty Images