Mistoqsijiet mill-Qarrejja
X’inhi r-responsabbiltà tal-kongregazzjoni jekk Kristjan li jkun qed isuq karozza jkollu aċċident li jirriżulta fil-mewt taʼ xi ħadd?
Il-possibbiltà taʼ ħtija tad-demm jistħoqqilha tiġi kunsidrata għaliex il-kongregazzjoni trid tevita li titqies responsabbli għal ħtija tad-demm bħala komunità. (Dewteronomju 21:1-9; 22:8) Sewwieq li hu responsabbli għal aċċident fatali jistaʼ jġib fuqu l-ħtija tad-demm jekk kien traskurat jew jekk minn jeddu kiser xi waħda mil-liġijiet tat-traffiku tal-pajjiż. (Marku 12:14) Imma hemm fatturi oħrajn li jridu jiġu kunsidrati.
Qattiel li jkun ħarab lejn waħda mill-bliet taʼ kenn taʼ Iżrael kien ikollu jgħaddi ġuri. Jekk kien jinstab li l-qtil ma kienx intenzjonat, hu kien jitħalla jibqaʼ fil-belt, protett mill-wieħed li setaʼ jfittex vendetta għall-ħtija tad-demm. (Numri 35:6-25) Allura, jekk Kristjan hu responsabbli għall-mewt taʼ xi ħadd f’aċċident, l-anzjani għandhom jinvestigaw il-kwistjoni biex jiddeterminaw jekk hemmx xi tip taʼ ħtija tad-demm. Il-ħarsa tal-gvern jew id-deċiżjoni tal-qorti ma tiddeterminax għalkollox liema azzjoni se tieħu l-kongregazzjoni.
Per eżempju, il-qorti tistaʼ tiddikjara li l-individwu hu ħati li b’xi mod tekniku kiser il-liġi tat-traffiku, imma l-anzjani li jkunu qed jinvestigaw jistgħu jiddeterminaw li m’hemm ebda ħtija tad-demm għaliex is-sewwieq kellu ftit jew xejn kontroll fuq iċ-ċirkustanzi li wasslu għad-diżgrazzja. Però, anki jekk il-qorti tiddeċiedi li ma teżaminax il-każ, l-anzjani jistgħu jikkonkludu li fil-fatt hu ħati tad-demm.
Id-deċiżjoni taʼ l-anzjani li qed jinvestigaw il-każ għandha tkun ibbażata fuq l-Iskrittura u l-fatti stabbiliti biċ-ċar—is-sewwieq li jkun ammetta l-ħtija tad-demm u/jew ix-xiehda taʼ żewġ jew tliet individwi li huma taʼ min joqgħod fuqhom. (Dewteronomju 17:6; Mattew 18:15, 16) Jekk jiġi stabbilit li hemm ħtija tad-demm, għandu jiġi fformat kumitat ġudizzjarju. Jekk il-kumitat jiddetermina li l-individwu ħati tad-demm hu niedem, hu jirċievi t-twiddib xieraq mill-Iskrittura u jsirulu restrizzjonijiet fejn jidħlu l-privileġġi fil-kongregazzjoni. Hu ma jibqax jaqdi bħala anzjan jew qaddej ministerjali. Isirulu wkoll restrizzjonijiet oħrajn. Hu jrid jagħti kont lil Alla għat-traskuraġni, in-nuqqas taʼ ħsieb, jew in-nuqqas t’attenzjoni li rriżultaw fl-aċċident u t-traġedja.—Galatin 6:5, 7.
Biex nagħtu eżempju: Jekk il-kundizzjonijiet tat-temp kienu ħżiena fil-ħin taʼ l-aċċident, is-sewwieq kellu joqgħod saħansitra iktar attent. Jekk kien għajjien, imissu waqaf jistrieħ sakemm ma jibqax iħossu bi ngħas, jew imissu qabbad lil ħaddieħor biex isuq.
Ejja ngħidu li s-sewwieq qabeż il-limitu tal-veloċità fis-sewqan. Jekk kwalunkwe Kristjan jaqbeż il-limitu tal-veloċità, hu jkun naqas milli jagħti “lil Ċesari dak li hu taʼ Ċesari.” Dan juri wkoll li hu ma jimpurtahx mill-qdusija tal-ħajja, għaliex hemm il-possibbiltà taʼ konsegwenzi fatali. (Mattew 22:21) Dwar dan il-fatt, ikkunsidra xi ħaġa oħra. Liema tip t’eżempju jkun qed jagħti anzjan lill-merħla jekk jittraskura l-liġijiet taʼ Ċesari dwar it-traffiku u minn jeddu jonqos li jobdihom?—1 Pietru 5:3.
Il-Kristjani m’għandhomx jistennew li oħrajn ikunu f’ċertu post u ħin partikulari meta dan ikun impossibbli li jagħmluh jekk ma jaqbżux il-limitu tal-veloċità fis-sewqan. Però, ħafna drabi l-kwistjoni tkun li individwu jkollu jibda l-vjaġġ kmieni biżżejjed jew inkella jibdel l-iskeda tiegħu sabiex iħalli biżżejjed ħin għas-sewqan. Jekk Kristjan jagħmel dan, mhux se jkollu għalfejn isuq b’iktar veloċità milli suppost, imma hu se jkun jistaʼ jżomm mal-liġijiet tat-traffiku tal-gvernijiet li huma “l-awtoritajiet superjuri.” (Rumani 13:1, 5) Dan se jgħin lis-sewwieq biex joqgħod attent li ma jinvolvix ruħu f’aċċidenti fatali bil-possibbiltà li jġib fuqu ħtija tad-demm. Ukoll, se jkun jistaʼ jagħti eżempju xieraq u jżomm kuxjenza nadifa.—1 Pietru 3:16.