Daniel u l-​Badge Tiegħu tal-​Konvenzjoni

ĠESÙ ċanfar lill-​mexxejja reliġjużi, li kienu jidhru twajbin f’għajnejhom stess, għax għadbu meta osservaw lit-​tfal subien ifaħħru lil Alla pubblikament. B’mod xieraq, Ġesù staqsiehom: “Qatt ma qrajtuh dan, ‘Minn fomm iċ-​ċkejknin u t-​trabi tal-​ħalib int ipprovdejt it-​tifħir’?”—Mattew 21:​15, 16.

Daniel, li għandu sitt snin u li jissieħeb maʼ kongregazzjoni tal-​lingwa Russa fil-​Ġermanja, jagħti prova li t-​tfal żgħar illum għadhom qed ifaħħru lil Ġeħova. Flimkien m’ommu u oħtu, hu attenda konvenzjoni tax-​Xhieda taʼ Ġeħova f’Duisburg. Din kienet l-​ewwel darba li huma attendew konvenzjoni daqshekk kbira. Kollox kien jidher ġdid: il-​lukanda, l-​udjenza kbira, il-​fatt li jpoġġu bil-​qiegħda għal tlett ijiem, il-​magħmudija, biex ma nsemmux ukoll id-​drama. U Daniel kif ġab ruħu? Il-​kondotta tiegħu kienet eżemplari.

It-Tnejn taʼ wara l-​konvenzjoni, meta mar lura d-​dar, Daniel qam kmieni biex imur il-​kindergarten. Iżda x’kien għad għandu fuq il-​ġakketta? Il-​badge li identifikatu bħala delegat tal-​konvenzjoni! Ommu spjegatlu: “Il-​konvenzjoni spiċċat. Illum tistaʼ tneħħiha l-​badge.” Iżda Daniel qalilha: “Jien nixtieq li kulħadd ikun jaf fejn kont u x’tgħallimt.” Matul il-​jum kollu fil-​kindergarten, Daniel ħassu kburi li kellu fuqu l-​badge tiegħu. Meta l-​għalliema staqsietu dwarha, hu qalilha x’kien hemm fil-​programm tal-​konvenzjoni.

Billi għamel hekk, Daniel kien qed isegwi l-​eżempju t’eluf taʼ tfal subien u bniet li matul is-​sekli taw tifħir lil Ġeħova fil-​pubbliku.