Lezzjonijiet Importanti għat-​Tfal

GLADYS taħdem fi skola f’Mendoza, l-​Arġentina. Darba minnhom kienet għaddejja minn ħdejn klassi u nnotat għalliema taqra lill-​istudenti tagħha taʼ bejn id-​disaʼ u l-​għaxar snin mill-​Ktieb Tiegħi taʼ Stejjer mill-​Bibbja.a Gladys introduċiet lilha nfisha lill-​għalliema bħala waħda mix-​Xhieda taʼ Ġeħova u offritilha biex turiha kif tistaʼ tikseb l-​akbar benefiċċju mill-​pubblikazzjoni. L-​għalliema kienet impressjonata b’dak li spjegatilha Gladys, u għalhekk riedet li l-​ktieb isir parti regulari mill-​kurrikulu. Madankollu, hi kellha bżonn permess mill-​amministrazzjoni taʼ l-​iskola. B’ferħ għaliha, ngħatalha l-​permess.

Iktar tard, f’attività taʼ l-​iskola biex tinkuraġġixxi l-​qari, l-​għalliema inkarigat lill-​istudenti tagħha biex jaqraw kapitlu mill-​ktieb quddiem sħabhom taʼ l-​iskola. Minħabba li dan il-​programm ġie milqugħ tajjeb, l-​għalliema ġiet mistiedna biex tidher fuq programm tat-​televixin lokali. Meta ssemmiet il-​kondotta tat-​tfal, dak li kien qed jippreżenta l-​programm staqsieha, “Kif jirnexxilek tgħin lit-​tfal biex iġibu ruħhom sew?” L-​għalliema spjegat li hi kienet qed tuża pubblikazzjoni intitolata Il-​Ktieb Tiegħi taʼ Stejjer mill-​Bibbja. Hi spjegat li għalkemm ma kinitx qed tgħallem ir-​reliġjon fil-​klassi tagħha, permezz taʼ dan il-​ktieb, hi kienet qed tnaqqax valuri morali bħar-​rispett, it-​tolleranza, l-​unità, il-​kooperazzjoni, l-​ubbidjenza, u l-​imħabba. Kollha qablu li dawn huma lezzjonijiet importanti li t-​tfal iridu jitgħallmu.

Tixtieq int li tnaqqax valuri bħal dawn f’uliedek? Int tistaʼ tistaqsi lil wieħed mix-​Xhieda taʼ Ġeħova għal kopja taʼ din il-​pubblikazzjoni meraviljuża Il-​Ktieb Tiegħi taʼ Stejjer mill-​Bibbja.

[Nota taʼ taħt]