“Kont Bħal Fekruna fil-​Qoxra Tagħha”

MATUL kampanja taʼ ppritkar li saret b’ħeffa liema bħalha u li damet disat ijiem matul Awwissu/Settembru tal-​1929, iktar minn 10,000 predikatur infirxu tul l-​Istati Uniti. Ħallew 250,000 ktieb u ktejjeb f’idejn in-​nies. Fost dawk il-​predikaturi tas-​Saltna kien hemm xi elf colporteur, jew, pijunier. Kemm kien żdied l-​għadd tagħhom! Il-​Bulletina qal li “kważi ma kienx jitwemmen” il-​fatt li n-​numru tal-​pijunieri kien it-​triplu fl-​1929 taʼ dak li kien fl-​1927.

Lejn l-​aħħar tal-​1929 kien hemm kriżi finanzjarja. Fid-​29 t’Ottubru, 1929—magħrufa bħala Black Tuesday—il-​kollass tal-​prezzijiet fil-​Borża Amerikana qajjem paniku kbir li tefaʼ s-​sistema ekonomika globali fid-​Dipressjoni l-​Kbira. Eluf taʼ banek fallew. L-​irziezet ma baqgħux jaħdmu. Fabbriki enormi għalqu. Miljuni taʼ nies tilfu l-​impjieg. Fl-​1933, fl-​Istati Uniti, sa elf dar kull jum kienu jittieħdu minħabba d-​dejn.

Il-​predikaturi full-​time kif setgħu jkampaw maʼ kriżi bħal din? Mod wieħed kien billi jkollhom karavan bħala d-​dar tagħhom. Il-​karavani, li ma tridx tħallsilhom kera jew taxxa, għamluha possibbli għal ħafna pijunieri biex ikomplu l-​ministeru tagħhom mingħajr ma jonfqu ħafna flus żejda.b U matul il-​konvenzjoni, karavan kien iservi bħala kamra f’lukanda bla ħlas. Fl-​1934, il-​Bulletin kien fih pjanijiet dettaljati għal dar żgħira imma komda b’affarijiet prattiċi bħalma huma sistema tal-​ilma, spiritiera, sodda li tingħalaq, u insulazzjoni kontra l-​kesħa.

Madwar id-​dinja, predikaturi kreattivi bdew jibnu l-​karavan tagħhom. “Noè ma kellu ebda esperjenza f’li jibni arka,” jiftakar Victor Blackwell, “u jien ma kelli ebda esperjenza jew għarfien f’li nibni karavan.” Imma xorta rnexxielhom!

Avery u Lovenia Bristow kellhom karavan. Avery qal, “Kont bħal fekruna fil-​qoxra tagħha—dari dejjem kienet miegħi.” Il-​koppja Bristow qdew bħala pijunieri maʼ Harvey u Anne Conrow, li l-​karavan tagħhom kellu ħitan mgħottijin b’karti tal-​qatran. Biċċiet mill-​karti kienu jaqgħu kull darba li mexxew il-​karavan tagħhom. Avery ftakar: “Ħadd qatt ma kien ra karavan bħal tagħhom, u ħadd qatt ma ra wieħed bħalu s’issa!” Imma Avery qal li l-​koppja Conrow u ż-​żewġ ulied subien tagħhom kienu “l-​iktar familja ferħana li qatt rajt.” Harvey Conrow kiteb, “Qatt ma naqasna xejn, u tassew ħassejna ruħna fis-​sigurtà fis-​servizz lil Ġeħova u taħt il-​ħarsien kollu mħabba tiegħu.” L-​erbaʼ membri tal-​familja Conrow iktar tard attendew l-​Iskola taʼ Gilegħad u ġew inkarigati biex jaqdu fil-​Perù bħala missjunarji.

Il-​familja Battaino wkoll qdew bħala pijunieri flimkien. Wara li Giusto u Vincenza saru jafu li kienu se jsiru ġenituri, biddlu t-​trakk tagħhom (1929 Model A Ford) f’dar li kienet “bħal lukanda mill-​isbaħ” meta mqabbla mat-​tined li fihom kienu jgħixu qabel. Flimkien mat-​tifla żgħira tagħhom, baqgħu fl-​inkarigu li tant kien jogħġobhom, jiġifieri, li jippritkaw lit-​Taljani li jgħixu fl-​Istati Uniti.

Ħafna nies taw widen għall-​aħbar tajba, imma nies fqar li ma kellhomx impjieg rari setgħu jagħtu xi flus għal-​letteratura Biblika. Minflok, offrew affarijiet oħra għal-​letteratura. Żewġ pijunieri għamlu lista taʼ 64 oġġett differenti li ngħataw minn uħud interessati. Il-​lista kienet mimlija b’affarijiet li ssibhom ġo ħanut tal-​kampanja.”

Fred Anderson iltaqaʼ maʼ bidwi li ried set taʼ kotba minn tagħna u offra li minflokhom jagħtih nuċċali li qabel kien t’ommu. Fir-​razzett li żar wara, kien hemm raġel li wera interess fil-​letteratura tagħna imma li qal, “M’għandix nuċċali biex naqra.” Però, meta libes in-​nuċċali tal-​ġar tiegħu setaʼ jaqra l-​kotba sew u bi pjaċir ta kontribuzzjoni għall-​kotba u n-​nuċċali.

Herbert Abbott kien iġorr gallinar tiġieġ miegħu fil-​karozza. Wara li kien jakkwista tliet tiġiġiet jew erbgħa permezz tat-​tpartit, kien jiħodhom sas-​suq, ibigħhom, u bil-​flus jimla t-​tank bil-​petrol. “Ġieli sibna ruħna kważi mingħajr sold? Iva,” kiteb hu, “imma ma ħallejniex dan il-​fatt iwaqqafna. Sakemm kellna xi petrol fit-​tank konna nibqgħu għaddejjin bix-​xogħol, filwaqt li npoġġu l-​fidi u l-​fiduċja tagħna f’Ġeħova.”

In-​nies taʼ Ġeħova rnexxielhom jibqgħu għaddejjin bix-​xogħol matul dawk iż-​żminijiet għax fdaw fih u għax kellhom determinazzjoni soda. Darba, matul maltempata, Maxwell u Emmy Lewis ħarbu mill-​karavan tagħhom eżatt fil-​ħin qabel ma waqgħet siġra u qasmet il-​karavan min-​nofs. Maxwell kiteb: “Dawn l-​affarijiet ma kinux ostakli imma sempliċement intoppi, u lanqas kien jgħaddilna minn moħħna li nieqfu. Kien għad fadal ħafna xogħol xi jsir, u konna beħsiebna nagħmluh.” Maxwell u Emmy ma ħallew xejn iwaqqafhom u, bl-​għajnuna t’aħwa għeżież, reġgħu bnew il-​karavan tagħhom.

Fi żminijietna, li wkoll huma taʼ sfida, l-​istess spirtu mhux egoist jikkaratterizza lil miljuni taʼ Xhieda taʼ Ġeħova żelużi. Wara kollox, bħal dawk il-​pijunieri bikrin, aħna determinati li nkomplu bl-​ippritkar sakemm Ġeħova jgħid li x-​xogħol lest.