Inxerrdu L-​Għarfien Li Jwassal Għall-​Ħajja Taʼ Dejjem

¹ Jehovah hu “l-​Wieħed li qiegħed jgħallem għarfien lill-​bnedmin.” (Salm. 94:10) Hu juża lilna biex inxerrdu ­għarfien dwaru li jsalva l-​ħajja lil dawk li m’humiex ­konxji taʼ kif jaqduh b’mod aċċettabbli. Il-​ktieb Għarfien Li ­Jwassal Għall-​Ħajja Taʼ Dejjem huwa strument taʼ tagħlim mill-​aqwa li permezz tiegħu wħud taʼ qalb ­onesta ­jistgħu jiksbu fehma eżatta dwar Alla mill-​Kelma miktuba tiegħu, il-​Bibbja. (1 Tim. 2:​3, 4) L-​iżvilupp ċar u loġiku tal-​verità fil-​ktieb Għarfien se jgħin lin-​nies biex jifhmu dak li Jehovah qiegħed jipprova jgħallimhom. Dan ix-​xahar għandna ninkludu lin-​nies f’konversazzjonijiet li se jġagħluhom jixtiequ jaqraw il-​ktieb. Hawn huma xi ftit suġġerimenti. Minflok ma tipprova titgħallimhom bl-​amment, ipprova esprimi l-​ħsibijiet fundamentali fi kliemek stess u bil-​mod kif normalment titkellem.

² Ladarba kważi kulħadd mietlu xi ħadd maħbub, tistaʼ ddaħħal it-​tama taʼ l-​irxoxt f’konversazzjoni billi l-​ewwel tgħid xi ħaġa hekk:

◼ “Il-​biċċa l-​kbira minna mitilna xi ħadd maħbub. Qatt ħsibt jekk intix se terġaʼ tara lil xi ħadd bħal dan? [Agħti ħin għal tweġiba.] Il-​mewt ma kenitx parti mill-​iskop oriġinali t’Alla għall-​bniedem. Ġesù ta prova li l-​maħbubin tagħna jistgħu jiġu meħlusin mill-​mewt. [Aqra Ġwann 11:​11, 25, 44.] Għalkemm seħħ ħafna sekli ilu, dan juri dak li Alla wiegħed li se jagħmel għalina. [Iftaħ il-​ktieb Għarfien fejn hemm l-​istampa f’paġna 85 u aqra dak li hemm miktub ħdejha. Imbagħad uri l-​istampa f’paġna 86 u għid xi ħaġa dwarha.] Jekk tixtieq taqra iktar dwar din it-​tama taʼ faraġ taʼ l-​irxoxt, nixtieq ħafna li nħallilek dan il-​ktieb.”

³ Wara l-​ewwel diskussjoni dwar it-​tama taʼ l-​irxoxt, tistaʼ tibda l-​konversazzjoni li jmiss maʼ l-​istess persuna b’dan il-​mod:

◼ “Forsi tiftakar li jien għedtlek li l-​mewt ma kenitx parti mill-​iskop oriġinali t’Alla għall-​bniedem. Jekk dan hu minnu, għala nixjieħu u mmutu? Xi fkieren jgħixu ’l fuq minn 100 sena, u hemm siġar li ilhom ħajjin għal eluf taʼ snin. Il-​bnedmin għala jgħixu biss 70 jew 80 sena? [Agħti ħin għal tweġiba.] Immutu għax l-​ewwel koppja umana m’obdewx ’l Alla.” Aqra Rumani 5:12. Mur f’paġna 53 fil-​ktieb Għarfien u aqra t-​titlu tal-​kapitlu. Ikkunsidra l-​ewwel tliet paragrafi, fil-​waqt li turi t-​tweġibiet għall-​mistoqsijiet miktubin. Agħmel appuntament biex terġaʼ tmur darb’oħra ħalli tiddiskuti l-​bqija tal-​kapitlu. Ħeġġeġ lil dak li jkun biex sadattant ikompli jaqrah sa l-​aħħar.

⁴ Jekk titkellem maʼ xi ħadd li jidher li hu reliġjuż, tistaʼ tgħid:

◼ “Illum hawn letteralment mijiet taʼ reliġjonijiet differenti. Jgħallmu kull xorta taʼ twemmin li ma jaqbilx maʼ xulxin. Xi nies jgħidu li r-​reliġjonijiet kollha huma tajbin u li ma jagħmilx differenza x’nemmnu. X’inhi l-​opinjoni tiegħek? [Agħti ħin għal tweġiba.] Ġesù għallem il-​vera reliġjon u wera li forom oħrajn taʼ qima m’humiex aċċettabbli għal Alla. [Aqra Mattew 7:​21-23.] Jekk irridu nogħġbu ’l Alla, irridu nqimuh fi qbil mar-​rieda tiegħu.” Iftaħ il-​ktieb Għarfien f’kapitlu 5, aqra t-​titlu, u uri xi ftit mis-​sottitli. Spjega kif din l-​informazzjoni se tgħin lil dak li jkun biex jitgħallem kif jogħġob ’l Alla. Offri li tħalli l-​ktieb jekk iwiegħdek li jaqrah, u semmi li taċċetta donazzjonijiet għax-​xogħol tagħna madwar id-​dinja.

⁵ Nies li huma mħawdin għax hawn daqstant reliġjonijiet forsi japprezzaw it-​tweġiba għal din il-​mistoqsija fuq iż-​żjara tiegħek lura:

◼ “B’daqstant reliġjonijiet differenti eżistenti llum, kif nistgħu ngħidu liema hija t-​tajba? Għalxiex kont tipprova tfittex int? [Agħti ħin għal tweġiba.] Ġesù qalilna kif nidentifikaw lis-​segwaċi veri tiegħu.” Aqra Ġwann 13:35. Ikkunsidra paragrafi 18 u 19 f’kapitlu 5 tal-​ktieb Għarfien. Uri kif billi wieħed juża dawn il-​gwidi Skritturali u billi jibda jneħħi waħda waħda, dak li jkun jistaʼ jagħraf il-​vera reliġjon. Semmi kif ix-​Xhieda taʼ Jehovah huma magħrufin mad-​dinja kollha għall-​imħabba ġenwina u għal-​livelli morali għoljin tagħhom. Spjega kif studju tal-​Bibbja, billi jiġi wżat il-​ktieb Għarfien, se jidentifika b’mod ċar il-​forma taʼ qima li Alla japprova.

⁶ Jekk tiltaqaʼ maʼ xi ġenitur, dan il-​metodu jistaʼ jkun effettiv:

◼ “Kuljum, nisimgħu rapporti dwar il-​kondotta diżubbidjenti taʼ żgħażagħ li donnu m’għandhom l-​ebda valuri morali. Xi adulti jridu jwaħħlu fis-​sistema skolastika talli t-​tfal ma jiġux mgħallmin id-​differenza bejn x’inhu tajjeb u x’inhu ħażin. Min taħseb int li għandu jipprovdi dan it-​taħriġ? [Agħti ħin għal tweġiba.] Agħti widen għal dak li tgħid il-​Bibbja fuq din il-​mistoqsija. [Aqra Efesin 6:4.] Hawnhekk jgħidilna li hija r-​responsabbiltà tal-​ġenituri li jdaħħlu ġewwa l-​ulied valuri morali.” Iftaħ il-​ktieb Għarfien f’paġna 145, aqra paragrafu 16, u ikkummenta fuq l-​istampi f’paġna 147. Spjega kif il-​ktieb huwa maħsub biex tistudjah il-​familja kollha. Billi tuża paragrafi 17 u 18 f’paġna 146, offri li turi kif nikkonduċu studju bħal dan mal-​familji.

⁷ Jekk fl-​ewwel żjara bdejt studju maʼ ġenitur imħasseb, fiż-​żjara lura tistaʼ tkomplih billi tgħid:

◼ “Id-​dinja tal-​lum tqiegħed ħafna tentazzjonijiet quddiem iż-​żgħażagħ tagħna. Dan jagħmilha ferm diffiċli għalihom biex ikollhom il-​biżaʼ t’Alla hekk kif jikbru. Forsi tiftakar li, fl-​aħħar diskussjoni li kellna, slitna żewġ prinċipji. Bħala ġenituri li nagħmlu kif irid Alla, jeħtieġ li nagħtu eżempji mill-​aqwa lil uliedna, u għandna nipprovdu espressjonijiet kontinwi taʼ mħabba lejhom. Hemm ħaġa oħra li l-​Bibbja tgħid li t-​tfal għandhom bżonn mingħand il-​ġenituri tagħhom.” Aqra Proverbji 1:​8. Mur f’paġna 148 fil-​ktieb Għarfien u kompli l-​istudju, billi tgħaddi paragrafi 19-23. Issuġġerixxi li terġaʼ tmur biex tistudja mal-​familja kollha, billi tibdew minn kapitlu 1.