Uża Tajjeb Il-​Ktieb Tiegħi taʼ Stejjer mill-​Bibbja

¹ “Ħafif, imma titgħallem ħafna minnu!” Dan hu li ħafna qegħdin jgħidu dwar Il-​Ktieb Tiegħi taʼ Stejjer mill-​Bibbja. Bla dubju, din il-​pubblikazzjoni li hija għajnuna mill-​aħjar għall-​istudju tal-​Bibbja, tistaʼ tgħinna nilħqu lil ħafna iktar uħud sinċieri, kemm żgħar u kemm kbar, li għad iridu jifhmu l-​messaġġ tal-​Bibbja.

² Kif tistaʼ toffrih: Peress li l-​mewt taʼ xi ħadd maħbub effettwat lil ħafna nies, forsi tixtieq titkellem dwar il-​kundizzjoni tal-​mejtin u t-​tama taʼ l-​irxoxt, billi torbot Salm 146:​4, 5 maʼ Storja 92 tal-​ktieb Stejjer mill-​Bibbja.

³ Nistgħu nibdew il-​preżentazzjoni tagħna hekk: “Bonġu. Bħala proxxmu tiegħek nieħu pjaċir nagħtik aħbar tajba. Ilkoll kemm aħna ġarrabna t-​telfa taʼ xi ħabib tal-​qalb jew xi qarib fil-​mewt. Forsi staqsejt bejnek u bejn ruħek x’ġaralhom dawn l-​uħud. [Agħti ċans għal kumment.] Din l-​istampa [sib Storja 92] turi rxoxt li wettaq Kristu Ġesù mhux biss minħabba t-​tifla ż-​żgħira, imma wkoll biex jifirħu l-​ġenituri tagħha. Imma din ma kinitx l-​unika persuna li Ġesù qajjem. L-​aħħar paragrafu taʼ din l-​istorja juri li hu rxoxta t-​tifel t’armla u lil ħabibu tal-​qalb Lazzru. U innota l-​aħbar tajba li tissemma fl-​aħħar żewġ sentenzi. [Aqrahom u offri l-​ktieb.]” Tistaʼ taddatta din il-​preżentazzjoni skond iċ-​ċirkustanzi.

⁴ Mod ieħor kif tippreżenta l-​ktieb jistaʼ jkun billi tibda konversazzjoni dwar għala nkitbet il-​Bibbja. Tistaʼ tgħid: “Bonġu, illum qed inżuru lin-​nies biex ngħinuhom jifhmu għala nkitbet il-​Bibbja. Qatt ħsibt dwar dan? [Agħti ċans għal tweġiba.] Raġuni waħda li xi wħud m’humiex konxji tagħha hi li din inkitbet biex tagħti twiddiba. Dan huwa l-​ħsieb li jesprimi l-​1 Korintin 10:11. [Aqra.] It-​twiddib t’Alla mhux qiegħed biex ibeżżaʼ imma biex iqanqal lin-​nies ifittxu s-​salvazzjoni, li hi t-​tieni raġuni għala nkitbet il-​Bibbja. L-​iskrittura tat-​2 Timotju 3:15 tgħinna napprezzaw li kemm iż-​żgħar u kemm il-​kbar għandhom bżonn il-​Kotba Mqaddsa għas-​salvazzjoni. [Aqra.] Ħalli nurik eżempju taʼ salvazzjoni ferriħija li bassar kittieb wieħed tal-​Bibbja, Isaija, hawn f’waħda mill-​istejjer taʼ dan il-​ktieb, Il-​Ktieb Tiegħi taʼ Stejjer mill-​Bibbja.” Sib Storja 71 u aqra l-​ewwel u l-​aħħar paragrafi. Offri l-​ktieb.

⁵ Qassmu fl-​Idejn: Barra li noffru Il-​Ktieb Tiegħi taʼ Stejjer mill-​Bibbja minn dar għal dar, qis li toffrih meta żżur lura lil nies li taf li jħobbu jaqraw il-​pubblikazzjonijiet tagħna, inkluż dawk li huma fir-​rotta tar-​rivisti tiegħek.

⁶ Minflok ma nżommu Il-​Ktieb Tiegħi taʼ Stejjer mill-​Bibbja jew kotba antiki oħrajn tas-​Soċjetà merfugħin xi mkien, ejjew nużawhom tajjeb biex lin-​nies li niltaqgħu magħhom inqanqluhom ‘iħobbu lil Alla u jħarsu l-​kmandamenti tiegħu.’​—Koħ. 12:13.