Kommemorazzjoni mad-​Dinja Kollha tal-​Mewt taʼ Kristu

¹ Jehovah ferraʼ fuqna ruxxmata t’għotjiet. Ir-​riżultat tat-​tjubija u l-​qalb tajba bl-​imħabba tiegħu huwa deskritt b’mod vivaċi bħala d-​“don tiegħu li ma jitfissirx bil-​kliem.” Iva, il-​“grazzja bla qjies taʼ Alla” tant hija meraviljuża li m’għandniex l-​abbiltà li niddeskrivuha.​—2 Kor. 9:​14, 15.

² L-​Akbar Għotja Tiegħu: Ġesù Kristu, bħala l-​Feddej taʼ l-​umanità, huwa l-​akbar għotja minnhom kollha. Biex jesprimi l-​imħabba kbira tiegħu għad-​dinja taʼ bnedmin, Jehovah ta lil Ibnu l-​maħbub u l-​waħdieni. (Ġw. 3:16) Barka mhix mistħoqqa bħal din mingħand Alla jixirqilha kommemorazzjoni mad-​dinja kollha. Meta u kif? Fil-​lejla tal-​Ħamis, l-​1 t’April, 1999, il-​Kristjani madwar id-​dinja se jikkommemoraw l-​Ikla taʼ Fil-​Għaxija tal-​Mulej, billi josservaw il-​Mafkar taʼ l-​akbar sagrifiċċju li qatt seħħ.​—1 Kor. 11:​20, 23-26.

³ Kristu miet għalina saħansitra “meta . . . konna għadna midinbin,” u nistgħu nuru l-​gratitudni persunali tagħna billi nosservaw il-​Mafkar taʼ mewtu u billi nistiednu lil ħaddieħor biex ikun preżenti magħna f’din l-​okkażjoni taʼ importanza kbira.​—Rum. 5:8.

⁴ L-​Iktar Ġrajja Importanti: L-​osservanza tal-​mewt taʼ Kristu tenfasizza primarjament li hu appoġġa s-​sovranità t’Alla mingħajr tebgħa. Tfakkarna wkoll li nistgħu ngawdu waqfa nadifa quddiem Jehovah billi neżerċitaw fidi fis-​sagrifiċċju taʼ Ġesù, u b’hekk inkunu żgurati mis-​salvazzjoni. (Atti 4:12) Verament, din hija l-​iktar ġrajja importanti tas-​sena!

⁵ Imħabba għal għajrna tintwera billi lil dak li jkun nistidnuh josserva magħna l-​Ikla taʼ Fil-​Għaxija tal-​Mulej. Il-​benefiċċji tal-​prezz tal-​fidwa għadhom disponibbli għal miljuni taʼ nies li jitgħallmu dwar il-​valur eċċellenti tiegħu. (Flp. 3:8) Dawk li jeżerċitaw fidi fis-​sagrifiċċju taʼ Kristu jistgħu jiksbu t-​tama soda taʼ ħajja taʼ dejjem.​—Ġw. 17:3.

⁶ L-​istaġun tal-​Mafkar jipprovdilna opportunitajiet speċjali biex nuru apprezzament għall-​qalb tajba mhix mistħoqqa li tisboq t’Alla. Dan huwa żmien eċċellenti biex nieħdu sehem biż-​żelu fl-​ippridkar taʼ l-​aħbar tajba tas-​Saltna t’Alla. Benefiċċji kbar jistennew lil dawk kollha li jirriflettu bit-​talb fuq l-​għotja b’xejn taʼ Jehovah li ma titfissirx bil-​kliem u jagħmlu arranġamenti biex ikunu preżenti għaċ-​ċelebrazzjoni taʼ din is-​sena taʼ l-​Ikla taʼ Fil-​Għaxija tal-​Mulej!