Ittra Mingħand il-Ġemgħa li Tiggverna
“Qalb tajba mhix mistħoqqa u paċi lilkom mingħand Alla Missierna u l-Mulej Ġesù Kristu.” Din kienet it-tislima li Pawlu uża f’ħafna mill-ittri li kiteb lill-kongregazzjonijiet. Tesprimi eżatt dak li nixtiequ għal kull wieħed u waħda minnkom.—Efes. 1:2.
Kemm aħna grati għall-qalb tajba mhix mistħoqqa li jurina Ġeħova permezz tas-sagrifiċċju bħala fidwa taʼ Ġesù Kristu! Permezz tal-fidwa, aħna nistgħu nkunu approvati f’għajnejn Alla. Qatt ma nistgħu niksbu din l-approvazzjoni bil-ħila tagħna, inħabirku kemm inħabirku biex nistudjaw il-Bibbja, nippridkaw l-aħbar tajba, jew nagħmlu xogħlijiet tajbin oħrajn. Il-maħfra taʼ dnubietna u l-ħajja taʼ dejjem jingħatawlna, mhux bħala ħlas għall-isforzi tagħna, imma bħala għotjiet li jirriflettu l-qalb tajba mhix mistħoqqa taʼ Ġeħova permezz taʼ Ġesù Kristu.—Rum. 11:6.
Pawlu kiteb lil sħabu fit-twemmin: “Nitolbukom bil-ħrara . . . biex ma taċċettawx il-qalb tajba mhix mistħoqqa t’Alla u titilfu l-iskop tagħha. Għax hu jgħid: ‘Fi żmien aċċettabbli smajtek, u f’jum taʼ salvazzjoni għentek.’ Ara! Issa speċjalment hu ż-żmien aċċettabbli. Ara! Issa hu jum is-salvazzjoni.” Kien hemm “żmien aċċettabbli” qabel il-qerda taʼ Ġerusalemm fl-ewwel seklu. Nies taʼ qalb onesta li kienu jħobbu lil Ġeħova ġew salvati spiritwalment. Dan wassal biex iktar tard dawk l-uħud leali kollha li ħarbu minn Ġerusalemm qabel inqerdet fis-sena 70 E.K. ġew salvati fiżikament.—2 Kor. 6:1, 2.
Illum ukoll qed ngħixu fi “żmien aċċettabbli” u “jum taʼ salvazzjoni.” Dawk li jiġu aċċettati minn Ġeħova bħala l-qaddejja tiegħu u li qegħdin jiġu salvati spiritwalment għandhom il-prospett li jsalvaw fiżikament minn dan “il-Jum il-kbir tal-Mulej” li issa hu tant viċin.—Sof. 1:14.
Il-jum li riesaq taʼ Ġeħova jpoġġilna responsabbiltà serja fuq spallejna. Mhux biss irridu nwissu lin-nies dwaru imma rridu wkoll ngħinu lil uħud taʼ qalb onesta biex jibbenefikaw mill-qalb tajba mhix mistħoqqa taʼ Ġeħova, sabiex b’hekk huma wkoll ikunu jistgħu jiġu salvati. Pawlu għaraf sewwa x’kienet tfisser din ir-responsabbiltà. Hu kiteb: “Tassew, gwaj għalija jekk ma nxandarx l-aħbar tajba!” Hu wera wkoll kif kien iħossu billi qal: “Jien midjun . . . kemm lejn l-għorrief u kemm lejn il-boloh; għalhekk, jien ħerqan li nxandar l-aħbar tajba.”—1 Kor. 9:16; Rum. 1:14, 15.
Ġeħova se jżommna responsabbli jekk nittraskuraw dan ix-xogħol vitali taʼ twissija. Aħna nafu x’qal Ġeħova lill-profeta Eżekjel: “O bniedem, jiena [“għamiltek,” NW] għassies fuq dar Iżrael: kull meta tismaʼ kelma minn fommi, inti għandek twiddibhom f’ismi. Meta jiena ngħid lil xi bniedem ħażin: ‘Int tmut żgur’, jekk inti ma twiddibx il-ħażin u ma tgħidlux biex jerġaʼ lura minn triqtu l-ħażina ħalli huwa jgħix, il-ħażin imut minħabba l-ħażen tiegħu, imma jiena minn idejk infittex demmu.”—Eżek. 3:17, 18.
Dawn l-aħħar jiem huma diffiċli biex issib tarfhom. M’huwiex faċli li tieħu ħsieb il-kwistjonijiet tal-familja, l-attivitajiet sekulari, l-attivitajiet tal-kongregazzjoni, u l-ippridkar b’mod bilanċjat. Barra minn hekk, ħafna minnkom ikollkom tħabbtu wiċċkom mal-mard, id-dipressjoni, ix-xjuħija, u saħansitra l-oppożizzjoni. Il-biċċa l-kbira minnkom tinsabu “mgħobbijin.” Nixtiequ ngħidulkom li aħna nħossu għalikom, fi qbil maʼ dak li qal Ġesù: “Ejjew għandi, intom ilkoll li mħabbtin u mgħobbijin, u jien inserraħkom.” (Mt. 11:28) Minn qalbna nixtiequ ngħidu prosit lilkom ilkoll li tagħmlu tant sforz biex tibqgħu taqdu lil Ġeħova lealment minkejja l-isfidi kbar u żgħar li tiffaċċjaw.
B’riżultat taʼ l-attività żeluża tagħkom fl-ippridkar u t-tagħlim, kif ukoll minħabba l-barka taʼ Ġeħova, kull ġimgħa jitgħammdu medja taʼ 4,762 persuna madwar id-dinja. Matul l-aħħar sena taʼ servizz, ġew ifformati 1,375 kongregazzjoni ġdida. Nittamaw u nitolbu li l-ktieb il-ġdid Il-Bibbja X’Tgħallem Verament?, li diġà ġie pubblikat b’iktar minn 120 lingwa, se jkun t’għajnuna għal miljuni taʼ nies biex jibbenefikaw mill-qalb tajba mhix mistħoqqa u l-paċi mingħand Ġeħova matul dan il-“jum taʼ salvazzjoni.”
Ibqgħu żguri li ħutkom fil-Ġemgħa li Tiggverna jħobbukom u jitolbu għalikom. Nixtiequ wkoll nirringrazzjawkom talli titolbu għalina.
Ħutkom,
Il-Ġemgħa li Tiggverna tax-Xhieda taʼ Ġeħova