‘Ibqaʼ Miexi Warajja’
1 Ħafna nies jiċċentraw ħajjithom fuq li jikkuntentaw lilhom infushom, madankollu spiss ma jkunux ferħanin. B’kuntrast maʼ dan, Ġesù ssuġġerixxa li meta wieħed jagħti mingħajr egoiżmu se jkollu l-hena veru. (Atti 20:35) Hu qal: “Jekk xi ħadd irid jiġi warajja, ħa jiċħad lilu nnifsu . . . u jibqaʼ miexi warajja.” (Mk. 8:34) Dan jinvolvi iktar milli niċċaħħdu minn ċerti pjaċiri minn żmien għal żmien. Pjuttost, dan ifisser li ngħixu kull ġurnata sabiex nogħġbu lil Ġeħova, u mhux lilna nfusna.—Rum. 14:8; 15:3.
2 Ikkunsidra l-eżempju taʼ Pawlu. “Minħabba l-valur imprezzabbli taʼ l-għarfien dwar Kristu Ġesù,” Pawlu waqaf milli jiġri wara xewqat persunali u ddedika ħajtu biex b’żelu javanza l-interessi tas-Saltna. (Flp. 3:7, 8) “Min-naħa tiegħi,” qal hu, “b’ferħ kbir nonfoq u nintefaq” biex naqdi lil ħaddieħor. (2 Kor. 12:15) Kull wieħed minna jagħmel tajjeb li jistaqsi: ‘Jien kif qiegħed nuża l-ħin, l-enerġija, l-abbiltajiet, u r-riżorsi tiegħi? Qiegħed iffokat biex navanza l-interessi tiegħi, jew qiegħed infittex li nogħġob lil Ġeħova?’
3 Opportunitajiet biex Tagħti: Kull sena, il-poplu t’Alla jiddedika iktar minn biljun siegħa fix-xogħol taʼ l-ippridkar tas-Saltna li jsalva l-ħajjiet tan-nies. Ġewwa l-kongregazzjoni, kemm iż-żgħar u kemm il-kbar iwettqu inkarigi differenti sabiex jibbenefika ħaddieħor. Hemm ukoll ħafna xogħol li jrid isir b’konnessjoni maʼ l-assembleat u l-konvenzjonijiet kif ukoll fil-kostruzzjoni u l-manutenzjoni taʼ bini użat biex javanza l-qima pura. U aħseb ftit dwar l-għajnuna bi mħabba li jipprovdulna l-aħwa li jaqdu fil-Kumitati taʼ Koordinazzjoni maʼ l-Isptarijiet jew li huma membri tal-Gruppi li Jżuru lill-Pazjenti. Dawn is-sagrifiċċji u l-isforzi persunali huma barka għall-fratellanza Kristjana tagħna!—Salm 110:3, Saydon.
4 Jistgħu jinqalgħu opportunitajiet biex nagħtu minna nfusna b’modi differenti meta jkun hemm xi diżastru jew xi emerġenza. Madankollu, spiss nistgħu sempliċement nindunaw li xi ħadd minn sħabna l-Kristjani għandu bżonn l-għajnuna jew l-inkuraġġiment. (Prov. 17:17) Meta noffru lilna nfusna minn jeddna biex naqdu lil oħrajn u navanzaw l-interessi tas-Saltna nkunu qed nimxu fuq l-eżempju taʼ Ġesù. (Flp. 2:5-8) Jalla nistinkaw biex nagħmlu dan kontinwament.