Indiċi Ġdid taʼ l-​Iskritturi bil-​Malti!

“Koħèlet fittex li jsib qwiel sbieħ u li jikteb bir-​reqqa kliem is-​sewwa.” (Koħ. 12:10) Kemm jistaʼ jkun prezzjuż dan il-​kliem ibbażat fuq l-​Iskrittura! Issa, għal għadd taʼ snin, kliem tal-​verità sabiħ u miktub bir-​reqqa li jkopri ħafna aspetti tal-​ħajja ġie preżentat fil-​pubblikazzjonijiet pubblikati mill-​organizzazzjoni taʼ Ġeħova bil-​lingwa Maltija. Għalhekk, ħafna familji u individwi rnexxielhom jakkumulaw f’darhom stess librerija taʼ xogħlijiet taʼ referenza taʼ min joqgħod fuqhom li jiffokaw fuq il-​Bibbja.

Sabiex niġu megħjunin nagħmlu riċerka fil-​pubblikazzjonijiet li huma disponibbli bil-​Malti, il-​Ġemgħa li Tiggverna approvat li jiġi pubblikat Indiċi taʼ l-​Iskrittura li se jidher bħala insert fil-​Ministeru tas-​Saltna. L-​ewwel indiċi li jkopri l-​pubblikazzjonijiet bil-​Malti li ħarġu matul l-​2004 jidher f’din il-​ħarġa. Dalwaqt se joħorġu l-​indiċi tas-​snin l-​oħrajn.

Kif tistaʼ tuża dan l-​indiċi biex tagħmel riċerka mill-​Bibbja? Ejja nieħdu eżempju. Forsi qrajt il-​vers fit-​2 Korintin 6:13 li jinkuraġġina biex ‘inwessgħu qalbna.’ Tixtieq tkun taf iktar dwar dan il-​vers u dwar kif tapplika d-​direzzjoni tiegħu? Iċċekkja l-​Indiċi taʼ l-​Iskritturi taħt it-​titlu 2 Korintin. Innota li għal kapitlu 6 u l-​vers 13, hemm referenza għall-​Ministeru tas-​Saltna taʼ Mejju 2004, paġna 4. F’dik il-​paġna se ssib artiklu bit-​titlu “Wessgħu Qalbkom” li jispjega kif nistgħu napplikaw il-​kliem ispirat taʼ Pawlu.

It-tfittxija għal kliem tal-​verità sabiħ u miktub bir-​reqqa hija tassew premjanti. Dan il-​kliem serva biex jinkuraġġixxi u jiggwida lill-​qaddejja taʼ Ġeħova sa llum. Ejja nużaw din l-​għodda ġdida, l-​Indiċi taʼ l-​Iskrittura, biex ikollna fehma tal-​Kelma taʼ Ġeħova u apprezzament iktar profond għaliha. L-​isforz tagħna biex nagħmlu dan iġib il-​barka taʼ Ġeħova, b’riżultati li jistgħu jdumu għall-​eternità.—Prov. 3:​13-18, 21-26.