Żammew Kelmithom!

ANTONIO, li kien fl-​aħħar sena skolastika tiegħu, ried jagħti xiehda informali lil sħabu tal-​klassi. Mela hu ssuġġerixxa lill-​għalliema tiegħu taʼ l-​istorja biex turi l-​vidjo Jehovah’s Witnesses Stand Firm Against Nazi Assault (Ix-Xhieda taʼ Jehovah Jieqfu Sod Kontra l-​Attakki tan-​Nazi). Għalkemm xettika, l-​għalliema qablet u qalet li kienet se turi l-​vidjo l-​għada.

“Għall-​ewwel,” jirrakkonta Antonio, “l-​għalliema qagħdet tara l-​vidjo b’arja taʼ superjorità; imma meta indunat li dawk li kienu qed jirrakkontaw l-​istorja tax-​Xhieda taʼ Jehovah fil-​kampijiet tal-​konċentrament kienu studjużi eminenti taʼ l-​istorja, hi bdiet toqgħod iktar attenta. Wara li rajnieh hi rringrazzjatni talli ssuġġerejt li naraw il-​vidjo flimkien.”

Fil-lezzjoni li kien imiss magħha, l-​għalliema pprovat tispjega x-​xogħol tal-​Bibelforscher, kif kienu magħrufin ix-​Xhieda taʼ Jehovah dak iż-​żmien fil-​Ġermanja; imma hi rrealizzat li kien ikun aħjar li dan jagħmlu Antonio. Antonio spjega l-​irwol tax-​Xhieda fis-​soċjetà u xi ftit mit-​twemmin tagħhom. Hu kkonkluda billi qal: “Ovvjament, ħadd ma jistaʼ jieħu benefiċċju mill-​messaġġ prezzjuż li aħna nġorru jekk ma jagħtuniex widen, jekk isabbtulna l-​bieb f’wiċċna, jew jekk ma jaqrawx il-​pubblikazzjonijiet tagħna.”

Il-klassi kollha taʼ Antonio qablet maʼ din ir-​riflessjoni, u l-​għalliema pproponiet riżoluzzjoni. Maʼ l-​ewwel opportunità, kienu se jagħtu widen għal dak li għandhom x’jgħidu x-​Xhieda u jaċċettaw il-​pubblikazzjonijiet tagħhom. Il-​klassi baqgħet titkellem dwar il-​vidjo għal xi żmien. Tistaʼ timmaġina x’sodisfazzjon ħass Antonio matul il-​jiem taʼ wara meta ra numru mhux ħażin minn sħabu ġejjin fil-​klassi bil-​pubblikazzjonijiet tal-​Watchtower u jismaʼ lil kull wieħed minnhom jgħid bi tbissima: “Qed tara kif żammejt kelmti!”