Maqbudin fi Żwieġ bla Mħabba
“F’soċjetà fejn isiru ħafna divorzji, mhux talli hemm probabbiltà kbira li ħafna iktar żwiġijiet neqsin mill-ferħ jispiċċaw f’divorzju, imma iżjed minn hekk, il-probabbiltà hi li iktar żwiġijiet jispiċċaw neqsin mill-ferħ.”—KUNSILL TAL-FAMILJI FL-AMERIKA.
INTQAL li ħafna mill-ferħ fil-ħajja u ħafna mill-miżerja tagħha ġejjin mill-istess sors—iż-żwieġ. Fil-fatt, hemm ftit affarijiet oħra fil-ħajja li jistgħu jġibu daqstant gost—jew inkella daqstant imrar. Bħalma tindika l-kaxxa t’hawnhekk, ħafna koppji qed iġarrbu wisq imrar.
Imma l-istatistiċi rigward id-divorzju juru biss parti mill-problema. Għal kull żwieġ li jegħreq fil-maltemp, hemm għadd kbir taʼ żwiġijiet oħra li jkomplu għaddejjin imma mill-banda l-oħra jibqgħu fl-istess ilma, bil-problemi. “Xi darba konna familja ferħana, imma dawn l-aħħar 12-il sena kienu koroh ferm,” stqarret waħda mara li ilha miżżewġa għal iktar minn 30 sena. “Ir-raġel ma jimpurtahx minn kif inħossni. Tassew huwa l-akbar għadu taʼ l-emozzjonijiet tiegħi.” B’mod simili, raġel li ilu miżżewweġ 25 sena lmenta: “Marti qaltli li m’għadhiex tħobbni. Hi tgħid li jekk sempliċement nibqgħu neżistu bħala tnejn li jgħixu fl-istess dar u kull wieħed minna jmur għal rasu fil-ħin tad-divertiment, is-sitwazzjoni tkun waħda li nissaportuha.”
M’għandniex xi ngħidu, xi wħud li jkunu f’din is-sitwazzjoni mwegħra jtemmu ż-żwieġ tagħhom. Madankollu, għal ħafna d-divorzju huwa impossibbli. Għala? Skond Dr. Karen Kayser, ċerti fatturi bħat-tfal, il-fama ħażina fil-komunità, il-finanzi, il-ħbieb, il-qraba, u t-twemmin reliġjuż jistgħu jżommu lil koppja flimkien, anki jekk ma jkunx hemm imħabba bejniethom. Hi tgħid li billi ma tantx ikun hemm iċ-ċans li jiddivorzjaw legalment, dawn il-miżżewġin jagħżlu li jibqgħu flimkien bħala divorzjati emozzjonalment.
Għandhom tnejn miżżewġin li r-relazzjoni taʼ bejniethom tkun birdet jaqtgħu qalbhom li qatt se jkollhom ħajja sodisfaċenti? Huwa żwieġ bla mħabba l-unika għażla li għandek minflok id-divorzju? L-esperjenza turi li ħafna żwiġijiet li għandhom l-inkwiet jistgħu jiġu salvati—mhux biss mill-uġigħ tal-firda imma wkoll mill-miżerja li jġib miegħu n-nuqqas taʼ mħabba.
[Kaxxa f’paġna Nru 3]
ID-DIVORZJU MADWAR ID-DINJA
• L-Awstralja: Ir-rata tad-divorzji kważi żdiedet b’erbaʼ darbiet mill-bidu tas-snin 60 ’l hawn.
• Il-Britannja: Skond ma hu mbassar, 4 minn kull 10 żwiġijiet se jispiċċaw f’divorzju.
• Il-Ġappun u l-Kanada: Id-divorzju jolqot lil madwar terz taż-żwiġijiet.
• L-Istati Uniti: Mill-1970 ’l hawn, dawk li jiżżewġu sar għandhom biss 50 fil-mija ċans li jibqgħu flimkien.
• Iż-Żimbabwe: Id-divorzju jtemm madwar 2 minn kull 5 żwiġijiet.