Statistiċi dwar l-​AIDS li Jaħsduk!

MINN KITTIEB TAʼ STENBAĦ! FL-​AFRIKA T’ISFEL

THEMBEKA hija tifla taʼ 12-il sena li tgħix f’raħal imwarrab fin-​nofsinhar taʼ l-​Afrika. Il-​ġenituri tagħha mietu bl-​AIDS, u hi issa trid tieħu ħsieb tat-​tliet ħutha bniet iżgħar minnha, waħda t’għaxar snin, waħda taʼ sitta u l-​oħra t’erbgħa. “Dawn il-​bniet ma jaqilgħu xejn u jiddependu għalkollox fuq il-​qalb tajba tal-​ġirien . . . xi ħobża, ftit patata,” qalet riporter taʼ gazzetta. Intwera ritratt taʼ dawn l-​erbat ibniet orfni fuq il-​faċċata taʼ gazzetta fl-​Afrika t’Isfel, li rrapportat dwar it-​tlettax-il Konferenza Internazzjonali dwar l-​Aids, konferenza li nżammet matul Lulju taʼ l-​2000 f’Durban fl-​Afrika t’Isfel.

Miljuni taʼ tfal li spiċċaw orfni minħabba l-​AIDS, jiffaċċjaw sitwazzjoni li tixbah lil dik taʼ Thembeka u ħutha ż-​żgħar. Il-​konferenza ddiskutiet xi metodi kif għandha tiġi trattata l-​kriżi li dejjem qed tikber taʼ l-​AIDS. Fosthom issemmew l-​edukazzjoni fuq il-​prevenzjoni taʼ l-​AIDS billi jintużaw il-​kondoms; l-​użu taʼ kura inqas għalja għall-​AIDS, li issa tistaʼ tinkiseb; u li jkun hemm iktar fondi għall-​iżvilupp taʼ titqib kontra l-​AIDS. Ġie diskuss ukoll il-​fatt li n-​nisa, speċjalment it-​tfajliet żgħar, għandhom iktar ċans li jintlaqtu minn din il-​marda.

B’dispjaċir, ħafna li saru orfni minħabba l-​AIDS jiġu mfittxijin minn irġiel li jemmnu li jekk ikollhom x’jaqsmu sesswalment maʼ verġni se jfiqu mill-​mard trasmess sesswalment. Iktar minn hekk, ħafna rġiel ma jiżżewġux tfajla jekk l-​ewwel ma tkunx diġà kellha tarbija. Għalhekk, l-​użu tal-​kondoms jitqies bħala ostaklu kemm għaż-​żwieġ u kemm għal li jsiru ommijiet.

Sfortunatament, ħafna tfajliet ma jafux bir-​riskju taʼ l-​AIDS. Il-​gazzetta Sowetan taʼ l-​Afrika t’Isfel ikkummentat dwar rapport li nħareġ fil-​konferenza mill-​Fond tal-​Ġnus Magħquda għat-​Tfal (UNICEF): “L-​istħarriġ li sar mill-​Unicef sab li 51 fil-​mija tat-​tfajliet taʼ bejn il-​15 u d-​19-il sena fl-​Afrika t’Isfel ma kinux jafu li xi ħadd li jidher b’saħħtu jistaʼ jkun infettat bl-​HIV u jgħaddihulhom.”

Fattur ieħor li huwa involut fit-​tixrid taʼ l-​AIDS huwa l-​abbuż sesswali fuq in-​nisa. Ranjeni Munusamy, li attendiet din il-​konferenza, irrapportat dan fis-​Sunday Times taʼ Johannesburg, l-​Afrika t’Isfel: “Il-​vjolenza fuq in-​nisa, l-​iktar forma kerha tal-​poter taʼ l-​irġiel, tibqaʼ ostaklu prinċipali għall-​prevenzjoni u l-​kura taʼ l-​HIV. Il-​ħafna forom tagħha—stupru, inċest, swat fuq nisa miżżewġin, u abbuż sesswali—ifissru li s-​sess ħafna drabi jsir bil-​forza, u fih innifsu dan huwa fattur taʼ riskju għall-​infezzjoni taʼ l-​HIV.”

L-istatistiċi li ħarġu fil-​konferenza kienu tal-​biżaʼ, kif turi t-​tabella li qed tidher hawnhekk. Kuljum huwa stmat li 7,000 żagħżugħ u żagħżugħa u 1,000 tarbija jiġu infettati bl-​HIV. F’sena waħda, l-​1999, xi 860,000 tifel u tifla fil-​pajjiżi fl-​Afrika ’l isfel mid-​deżert tas-​Saħara tilfu l-​għalliema tagħhom minħabba l-​AIDS.

Skond stħarriġ pubblikat mill-​Kunsill tar-​Riċerka Medika taʼ l-​Afrika t’Isfel, 4.2 miljun ruħ fl-​Afrika t’Isfel huma infettati bl-​HIV, u dan jirrappreżenta wieħed minn kull 10 ċittadini. Is-​sitwazzjoni fil-​pajjiżi ġirien hija agħar. Il-​gazzetta The Natal Witness irrapportat fuq kalkolu li ngħata mill-​Uffiċċju taċ-​Ċensiment taʼ l-​Istati Uniti: “Il-​popolazzjonijiet taʼ xi pajjiżi Afrikani milqutin bl-​Aids dalwaqt se jibdew jinżlu hekk kif miljuni jmutu bil-​marda, u sa għaxar snin oħra t-​tul taʼ ħajja mistenni se jinżel għal madwar 30 sena.”

It-traġedja taʼ l-​AIDS hija evidenza oħra li l-​bnedmin qed jgħixu fiż-​“żmien iebes” li l-​Bibbja bassret li kellu jiġi fl-​“aħħar tad-​dinja.” (2 Timotju 3:​1-5) Dawk li jħobbu l-​Kelma t’Alla, il-​Bibbja, iħarsu ’l quddiem lejn soluzzjoni kompleta u permanenti għall-​AIDS u għall-​problemi l-​oħrajn kollha li jifilġu lill-​bnedmin. Dalwaqt, is-​Saltna t’Alla se tieħu t-​tmexxija taʼ l-​affarijiet taʼ l-​art f’idejha. Fid-​dinja l-​ġdida taʼ tjieba, il-​faqar u l-​moħqrija se jkunu affarijiet taʼ l-​imgħoddi. (Salm 72:​12-14; 2 Pietru 3:13) Minflok, dawk li jgħammru fuq l-​art se jerġgħu jingħataw saħħa perfetta, u ħadd minnhom m’hu qatt se jgħid: “Jien marid.”—Isaija 33:24.

[Kumment f’paġna 14]

Mad-​dinja kollha hemm xi 13,000,000 orfni minħabba l-​AIDS

[Tabella/Mappa f’paġna 15]

(Ghall-formazzjoni shiha tat-​test, ara pubblikazzjoni)

NUMRU T’ADULTI (BEJN 15 u 49 SENA) BL-​HIV/AIDS, SA L-​AĦĦAR TAʼ L-​1999

L-​Amerika taʼ Fuq 890,000

Il-​Karibew 350,000

L-​Amerika Latina 1,200,000

L-​Ewropa tal-​Punent 520,000

L-​Ewropa tal-​Lvant u Ċentrali 410,000

L-​Afrika taʼ Fuq u l-​Lvant Nofsani 210,000

L-​Asja t’Isfel u tax-​Xlokk 5,400,000

L-​Asja tal-​Lvant u l-​Paċifiku 530,000

L-​Awstralja u n-​New Zealand 15,000

[Sors]

Sors: UNAIDS

[Graff/Stampa f’paġna 15]

(Ghall-formazzjoni shiha tat-​test, ara pubblikazzjoni)

PERSENTAĠĠ T’ADULTI (BEJN 15 u 49 SENA) BL-​HIV/AIDS F’16-IL PAJJIŻ AFRIKAN, SA L-​AĦĦAR TAʼ L-​1999

1 Il-​Botswana 35.8%

2 Is-​Sważiland 25.2

3 Żimbabwe 25.0

4 Il-​Lesoto 23.5

5 Iz-​Zambja 20.0

6 L-​Afrika t’Isfel 20.0

7 In-​Namibja 19.5

8 Il-​Malawi 16.0

9 Il-​Kenja 14.0

10 Ir-​Repubblika Afrikana Ċentrali 14.0

11 Il-​Możambik 13.2

12 Ġibuti 11.7

13 Il-​Burundi 11.3

14 L-​Irwanda 11.2

15 Côte d’Ivoire 10.7

16 L-​Etjopja 10.6

[Sors]

Sors: UNAIDS

[Stampa]

Thembeka flimkien maʼ ħutha

[Sors]

Ritratt: Brett Eloff