Il-​Ħarsa tal-​Bibbja

Għandna Nattendu Laqgħat Kristjani?

“JIEN kont immur il-​knisja, imma issa m’għadnix.” “Naħseb li lil Alla tistaʼ taqdih tkun fejn tkun, mhux biss fi knisja.” “Jien nemmen f’Alla u fil-​Bibbja, imma ma nemminx li hemm għalfejn immur il-​knisja.” Qatt smajt espressjonijiet simili? Iktar u iktar nies illum jgħidu affarijiet bħal dawn, speċjalment f’pajjiżi tal-​Punent. Nies li kienu jmorru l-​knisja m’għadhomx jaħsbu li hemm għalfejn. Il-​Bibbja x’tgħid dwar li wieħed imur il-​knisja?

Il-​kliem “knisja” u “knejjes” jidhru 110 darbiet fit-​traduzzjoni Biblika tal-​King James Version. Traduzzjonijiet oħrajn, fosthom it-​traduzzjoni taʼ l-​Għaqda Biblika Maltija, ukoll jużaw dawn it-​termini. Il-​kelma Griega tradotta “knisja” letteralment tfisser “sejħa lejn,” jew, fi kliem ieħor, laqgħa taʼ nies. Per eżempju, Atti 7:​38, fil-​King James Version, jgħid li Mosè kien “fil-​knisja fid-​deżert,” jiġifieri, fost il-​ġens kongregat, jew miġbur, taʼ Iżrael. F’każ ieħor l-​Iskrittura tgħid li “qamet persekuzzjoni kbira kontra l-​Knisja,” li kienet tirreferi għall-​komunità taʼ Kristjani f’Ġerusalemm. (Atti 8:1) F’waħda mill-​ittri tiegħu, Pawlu jsellem “lill-​knisja li tinġabar [f’dar Filemon],” il-​kongregazzjoni lokali li kienet tiltaqaʼ hemm.—Filemon 2.

Jidher ċar li t-​terminu “knisja” kif inhu użat fil-​Bibbja jindika, mhux post għall-​qima, imma minflok, grupp taʼ nies li jqimu. Billi għaraf dan, Klement taʼ Lixandra, għalliem reliġjuż tat-​tieni seklu, kiteb: “Mhux il-​post, imma l-​kongregazzjoni tal-​magħżulin insejħilha l-​Knisja.” Xorta waħda, għandhom il-​Kristjani jkunu preżenti f’post jew f’xi bini speċifiku sabiex Alla jaċċetta l-​qima tagħhom?

Il-​Qima fil-​Ġens taʼ Iżrael

Il-​Liġi taʼ Mosè kienet teħtieġ li l-​irġiel Lhud kollha jkunu preżenti f’post speċifiku għal tliet festi fis-​sena. Ħafna nisa u tfal ukoll kienu jattendu. (Dewteronomju 16:16; Luqa 2:​41-44) F’ċerti okkażjonijiet il-​qassisin u l-​Leviti kienu jgħallmu lill-​folol miġburin, billi jaqrawlhom mil-​Liġi t’Alla. Huma ‘qrawh b’mod li jinftiehem, fissruh, u spjegaw il-​qari.’ (Neħemija 8:8) Għas-​snin tas-​Sabat, id-​direzzjoni t’Alla kienet tgħid: “Iġbor il-​poplu, l-​irġiel u n-​nisa, it-​tfal u l-​barranin, li jkunu fl-​ibliet tiegħek, biex jisimgħu u jitgħallmu, u jibżgħu mill-​Mulej, Alla tagħkom, u jqisu li jagħmlu l-​kliem kollu taʼ din il-​liġi.”—Dewteronomju 31:12.

L-uniku post fejn persuna setgħet toffri sagrifiċċji lil Alla u tirċievi tagħlim mill-​qassisin kien fit-​tempju f’Ġerusalemm. (Dewteronomju 12:​5-7; 2 Kronaki 7:12) Maż-​żmien, ġew stabbiliti djar oħra għall-​qima f’Iżrael—is-​sinagogi. Dawn kienu postijiet għall-​qari taʼ l-​Iskrittura u għat-​talb. Madankollu, it-​tempju f’Ġerusalemm xorta kien il-​post prinċipali għall-​qima. Dan jidher minn dak li jirrapporta l-​kittieb Bibliku Luqa. Hu jsemmi mara anzjana jisimha Anna, u din “ma kienet titwarrab qatt mit-​tempju, lejl u nhar taqdi lil Alla fis-​sawm u t-​talb.” (Luqa 2:​36, 37) Il-​qima vera flimkien maʼ nies devoti oħra kien il-​punt ċentrali fil-​ħajja taʼ Anna. Lhud oħrajn li kellhom il-​biżaʼ t’Alla kienu jaġixxu b’mod simili.

Il-​Qima Vera wara l-​Mewt taʼ Kristu

Wara l-​mewt taʼ Ġesù, is-​segwaċi tiegħu ma kinux għadhom taħt il-​Liġi Mosajka u lanqas ma kien meħtieġ minnhom li jqimu fit-​tempju. (Galatin 3:​23-25) Xorta waħda, huma komplew jiltaqgħu flimkien biex jitolbu u jistudjaw il-​Kelma t’Alla. Ma kellhomx bini elaborat, imma minflok kienu jużaw djar privati u postijiet pubbliċi. (Atti 2:​1, 2; 12:12; 19:9; Rumani 16:​4, 5) Dawk il-​laqgħat Kristjani taʼ l-​ewwel seklu, li ma kienx fihom ritwali u ċerimonji, kellhom sempliċità sabiħa wisq.

Fost il-​kundizzjonijiet morali koroh u mdallmin li kienu jeżistu matul l-​Imperu Ruman, il-​prinċipji Bibliċi li kienu jiġu mgħallmin f’dawk il-​laqgħat kienu tassew jispikkaw. Xi wħud li ma kinux jemmnu u li attendew għall-​ewwel darba setgħu biss jgħidu bi stagħġib: “Tassew li Alla f’nofskom!” (1 Korintin 14:​24, 25) Iva, Alla kien verament fosthom. “Hekk il-​knejjes [“kongregazzjonijiet,” NW] kienu jitwettqu fil-​fidi u jiżdiedu fl-​għadd kuljum.”—Atti 16:5.

Setaʼ Kristjan f’dak iż-​żmien ikollu l-​approvazzjoni t’Alla billi jqim f’tempji pagani jew waħdu? Il-​Bibbja tagħti direzzjoni ċara f’din il-​kwistjoni: Adoraturi approvati kellhom isiru parti mill-​unika knisja, jew kongregazzjoni, vera, il-​“ġisem wieħed” t’adoraturi ġenwini. Dawn kienu d-​dixxipli taʼ Ġesù, magħrufin bħala Kristjani.—Efesin 4:​4, 5; Atti 11:26.

Xi Ngħidu għal-​Lum?

Minflok ma tinkuraġġina nqimu fi knisja bħala bini, il-​Bibbja tinkuraġġina nqimu mal-​knisja, “il-​Knisja [“kongregazzjoni,” NW] taʼ Alla l-​ħaj,” in-​nies li “jadurawh fl-​ispirtu u l-​verità.” (1 Timotju 3:15; Ġwann 4:24) Il-​laqgħat reliġjużi approvati minn Alla għandhom jgħallmu lin-​nies biex ‘ħajjithom tkun qaddisa u tajba.’ (2 Pietru 3:11) Għandhom jgħinu lil dawk preżenti biex isiru Kristjani maturi, li jistgħu “jagħżlu bejn it-​tajjeb u l-​ħażin.”—Lhud 5:14. 

Ix-Xhieda taʼ Jehovah jistinkaw biex isegwu l-​eżempju tal-​Kristjani taʼ l-​ewwel seklu. Iktar minn 91,400 kongregazzjoni mad-​dinja kollha jiltaqgħu regolarment biex jistudjaw il-​Bibbja u jinkuraġġixxu wieħed lil ieħor, u dan jagħmluh fi Swali tas-​Saltna, djar privati, u postijiet oħrajn. Dan huwa fi qbil mal-​kliem taʼ l-​appostlu Pawlu: “Naraw kif nistgħu nħajjru lil xulxin għall-​imħabba u għall-​għemil tajjeb. Ma ninqatgħux mil-​laqgħat tagħna flimkien.”—Lhud 10:​24, 25.