Mingħand il-​Qarrejja

L-​Irquqija L-​artiklu “Iż-​Żgħażagħ Jistaqsu . . . Għala Jien Daqshekk Irqiq?” kien taʼ interess kbir għalija. (8 t’Ottubru, 2000) Jien mara taʼ 32 sena, imma minn dejjem kont niexfa għuda u nistħi ħafna minħabba d-​dehra tiegħi. Minn dejjem kienu jinkuni b’ismijiet bħal Zokk taʼ Sulfarina u Saqajn l-​Għasfur. Dan taʼ spiss kien jagħmilni dipressa. Għoġobni meta għedtu li għandna nfittxu nies li japprezzaw dak li aħna minn ġewwa. Il-​Kristjani m’għandhomx iċekknu lil oħrajn minħabba d-​difetti fiżiċi tagħhom.

W. L., Stati Uniti

L-​Univers Grazzi ħafna għas-​serje “L-​Univers—Beda Dan Jeżisti b’Kumbinazzjoni?” (8 t’Ottubru, 2000) Jien qegħda fl-​ewwel sena tiegħi bħala studenta tal-​bijoloġija, u l-​artikli kienu bħall-​kotba taʼ l-​iskola—imma miktubin bit-​tema taʼ Ħallieq intelliġenti minflok bit-​teorija taʼ l-​evoluzzjoni. Kemm hu pjaċevoli li tara dan it-​tagħrif preżentat b’mod veru u raġunevoli!

K. L., Stati Uniti

Ħadt ħafna gost bis-​serje “L-​Univers—Beda Dan Jeżisti b’Kumbinazzjoni?” (8 t’Ottubru, 2000) Kien tassew interessanti li nara kif Alla Jehovah ħalaq kollox b’mod daqshekk organizzat. L-​artiklu juri biċ-​ċar li aħna ġejna permezz tal-​ħolqien u mhux taʼ l-​evoluzzjoni.

E. V., Stati Uniti

Il-​Borża Grazzi għall-​artiklu realistiku “Is It Wise to Invest in the Stock Market?” (Awake! tat-​8 t’Ottubru, 2000) L-​esperjenza għallmitni biex noqgħod attent minn informazzjoni kunfidenzjali tat-​titoli li ma jkunux ċerti minnha. Din taʼ spiss twassal għal telfiet kbar. Qabel ma wieħed ikun se jixtri t-​titoli, ikun għaqli li jikkunsidra s-​sitwazzjoni ġenerali tas-​suq.

N. B., Ġermanja

Jien ma naqbilx maʼ dak li ntqal li meta wieħed jinvesti fil-​Borża ma jkunx qed ipoġġi fiduċja f’alla tal-​“Fortuna.” (Isaija 65:11, KŻ) Meta dak li jkun jinvesti flusu f’sistema li tinbidel b’rata mgħaġġla u taħdem mingħajr stabbilità taʼ xejn ikun qed jinvolvi ruħu fil-​logħob taʼ l-​ażżard.

P. B., Stati Uniti

Nammettu li meta wieħed jinvesti fil-​Borża jkun qed jirriskja bil-​kbir li jitlef. U, bħal fi kwalunkwe intrapriża tan-​negozju, dejjem ikun hemm involuti fatturi taʼ nuqqas taʼ stabbilità. Madankollu, ma jkunx xieraq li jingħad li n-​negozju tat-​titoli jfisser logħob taʼ l-​ażżard. Il-​logħob taʼ l-​ażżard jinvolvi li tilgħab il-​flus mingħajr ma tieħu lura flokhom affarijiet reali. Madankollu, it-​titoli jirrappreżentaw sehem attwali fil-​pussess taʼ negozju. B’hekk, in-​negozju tat-​titoli jistaʼ jitqies bħala l-​bejgħ u x-​xiri t’affarijiet leġittimi.—ED.

Sport Estrem Reċentement ngħatajt l-​opportunità biex nittajjar mill-​għoli permezz taʼ tip taʼ ‘tajra’ kbira ħafna. Bdejt nitħajjar imma kont kurjuża dwar xi tgħid il-​Bibbja fuq din il-​kwistjoni. Ftit jiem wara, irċivejt it-​tweġiba fl-​artiklu tagħkom “‘Sport Estrem’—Għandek Tieħu r-​Riskju?” (8 t’Ottubru, 2000) Ovvjament li wieħed jieħu sehem f’dan l-​isport jistaʼ jidher bħala esperjenza taʼ l-​għaġeb. Imma r-​relazzjoni tiegħi maʼ Jehovah hija wisq importanti biex nirriskja ħajti f’dan l-​isport.

M.M.S., Brażil

Intom għedtu li t-​tentazzjoni taʼ Satana lil Ġesù kienet “x’aktarx permezz taʼ viżjoni.” It-​tentazzjonijiet ma kinux esperjenzi veri?

C.G.H., Stati Uniti

Diversi aspetti mir-​rakkonti Bibliċi huma diffiċli biex tifhimhom jekk tiħodhom letterali. Per eżempju, m’hemm l-​ebda muntanja daqshekk għolja biex Satana juri lil Ġesù “s-​saltniet kollha tad-​dinja u l-​glorja tagħhom.” U x’aktarx lanqas Ġesù ma kien verament se jħalli lil Satana ‘jieħdu miegħu fil-​Belt imqaddsa’ jew iqegħdu “fuq il-​quċċata tat-​tempju.” (Mattew 4:5-8) Mela dan juri biċ-​ċar li kien hemm involuta xi tip taʼ viżjoni. Saret kif saret, Satana tassew ittantah lil Kristu. Il-​fatt li Ġesù rrifjuta li jċedi għal tentazzjoni bħal din juri l-​integrità soda tiegħu.—ED.