L-​Abbuż tad-​Drogi—Teżisti Soluzzjoni!

“TINSTAB Kwantità Kbira taʼ Kokaina fil-​Fliexken taʼ l-​Inbid.” L-​artiklu tal-​gazzetta li kompla wara dan it-​titlu spjega kif il-​pulizija f’Johannesburg, fl-​Afrika t’Isfel, qabdet tagħbija li ntbagħtet bil-​vapur li kienet tikkonsisti fi 11,600 flixkun inbid magħmul fl-​Amerika t’Isfel. Imħallat maʼ l-​inbid kien hemm bejn 150 u 180 kilogramma kokaina. Jaħsbu li din kienet l-​akbar kwantità taʼ kokaina li qatt daħlet fil-​pajjiż sa llum.

Waqt li huwa inkuraġġanti li saru dawn is-​sejbiet, il-​verità hi li l-​pulizija taqbad biss madwar 10 sa 15 fil-​mija tad-​drogi illegali mad-​dinja kollha. Sfortunatament, dan jixbah lil ġardinar li jqaċċat ftit weraq mill-​ħaxix ħażin imma jħallilu l-​għeruq fil-​ħamrija.

Il-qligħ kbir li jsir mid-​drogi jfixkel l-​isforzi mill-​gvernijiet biex irażżnu l-​produzzjoni u l-​bejgħ tagħhom. Fl-​Istati Uniti biss, huwa stmat li n-​negozju illegali tad-​drogi kull sena jammonta għal eluf taʼ miljuni taʼ dollari. Billi hemm daqstant flus involuti, m’hijiex ħaġa kbira li l-​pulizija u l-​uffiċjali tal-​gvern, u anki xi wħud f’pożizzjonijiet għoljin, jaqgħu għall-​korruzzjoni.

Alex Bellos, fil-​gazzetta The Guardian Weekly, irrapporta mill-​Brażil li skond inkjesta parlamentari, “tliet membri tal-​kungress, 12-il deputat taʼ l-​istat u tliet sindki ssemmew . . . f’lista taʼ iktar minn 800 ruħ mixlijin li kienu involuti fi kriminalità organizzata u traffikar tad-​drogi fil-​Brażil.” Il-​lista kienet tinkludi wkoll “pulizija, avukati, nies tan-​negozju, u bdiewa fi 17-il stat mis-​27 stat.” Professur tal-​politika fl-​Università taʼ Brasìlia qal li dawn is-​sejbiet jakkużaw is-​sezzjonijiet kollha tas-​soċjetà Brażiljana. Jistaʼ jingħad l-​istess dwar ħafna soċjetajiet fejn il-​qabda tad-​drogi tinħass sew fuqhom. Ir-​regoli tas-​suq fuq il-​provvista u d-​domanda tad-​drogi jżiduha din il-​problema.

Meta jqisu li r-​restrizzjonijiet legali ftit li xejn huma taʼ suċċess, xi wħud huma favur li ċerti drogi ma jibqgħux kontra l-​liġi. L-​idea ġenerali hi li l-​individwi għandhom jitħallew ikollhom ammonti żgħar taʼ droga għall-​użu persunali. Dawn iħossu li l-​kontroll mill-​gvern imbagħad isir iktar faċli u jonqos ukoll il-​qligħ enormi li jagħmlu l-​barunijiet tad-​droga.

Xi Wħud Jirnexxilhom

Il-​kura li tingħata lid-​drogati biex jaqtgħu l-​vizzju tad-​drogi jistaʼ l-​ewwel jirnexxilha tbegħedhom minnhom u mbagħad ittejbilhom is-​saħħa fiżika tagħhom. Sfortunatament, x’aktarx jistaʼ jiġri li ladarba l-​individwu bil-​vizzju tad-​drogi jmur lura fl-​ambjent normali tiegħu, se jkollu t-​tentazzjoni li jerġaʼ jibda jiħodhom. Il-​kittieb Luigi Zoja jagħti r-​raġuni għal dan billi jispjega li ma jistax ikun li sempliċement titneħħa ċerta mġiba mingħajr ma pazjent jibdel totalment il-​mod kif jaħseb.

Darren, li semmejnieh fl-​artiklu taʼ qabel, sar jaħseb b’mod differenti u dan biddillu ħajtu. Hu jispjega: “Jien kont ateu, imma maż-​żmien, avolja kont qed nieħu d-​drogi minn fil-​għodu sa fil-​għaxija, bdejt nirrealizza li bilfors li hemm Alla. Matul perijodu taʼ xahrejn jew tlieta, ipprovajt naqtaʼ d-​drogi, imma ħbiebi ma kinux iħalluni nirrifjutahom. Għalkemm kont għadni nieħu d-​drogi, bdejt naqra l-​Bibbja regolarment qabel ma kont immur norqod. Bdejt nagħmilha inqas maʼ ħbiebi. Darba waħda kemm jien u kemm sieħbi li kont noqgħod miegħu konna mitlufin taħt l-​effett qawwi tad-​drogi. Jien semmejtlu l-​Bibbja. L-​għada hu ċempel lil ħuh, li kien wieħed mix-​Xhieda taʼ Jehovah. Hu bagħatna għand Xhud li kien jgħix fl-​istess belt tagħna, u jien mort s’għandu.

“Domna nitkellmu sal-​11:00 p.m., u tlaqt b’xi tużżana pubblikazzjonijiet bħala għajnuna għall-​istudju tal-​Bibbja. Bdejt nistudja l-​Bibbja miegħu u waqaft mill-​abbuż tad-​drogi u mit-​tipjip. Madwar disaʼ xhur wara, tgħammidt bħala wieħed mix-​Xhieda taʼ Jehovah.”

M’huwiex faċli li wieħed jaqtaʼ l-​vizzju tad-​drogi. Michael, li semmejnieh fl-​artiklu taʼ qabel, jgħid dwar id-​diffikultajiet li kellu meta waqaf jieħu d-​drogi wara li kien ilu 11-il sena jiħodhom: “Bdejt insibha bi tqila biex niekol u għalhekk inqast. Kont inħoss ukoll ħafna tingiż, f’daqqa waħda kien ixoqq l-​għaraq għalija, u kont nara bħal dija madwar in-​nies. Kien ikolli kilba kbira biex nerġaʼ lura għad-​drogi, imma l-​fatt li beda jkolli relazzjoni iktar mill-​qrib maʼ Jehovah permezz tat-​talb u l-​istudju tal-​Bibbja għenni nibqaʼ ħieles.” Dawn il-​persuni li qabel kienu jabbużaw mid-​drogi jaqblu li kien essenzjali għalihom li jinqatgħu kompletament minn maʼ dawk li kienu jagħmluha magħhom qabel.

Għala l-​Isforzi tal-​Bnedmin Ifallu

L-​abbuż illegali tad-​drogi huwa biss aspett wieħed taʼ problema globali li hija bil-​wisq akbar. Il-​ħażen, il-​vjolenza, u l-​krudeltà tant jinfluwenzaw lid-​dinja li qabdu qabda soda fuqha. Il-​Bibbja tgħid: “Id-​dinja kollha qiegħda taħt idejn il-​Ħażin.” (1 Ġwann 5:19) L-​appostlu Ġwanni jgħid min hu dan il-​wieħed “Ħażin” f’Apokalissi 12:9: “U kien imwaddab id-​Dragun il-​kbir, is-​Serp tal-​qedem li hu msejjaħ id-​Demonju u x-​Xitan [Satana], il-​qarrieq tad-​dinja kollha, kien imwaddab għal fuq l-​art, u miegħu kienu mwaddba l-​anġli tiegħu.”

Minbarra d-​dgħjufijiet tiegħu stess, il-​bniedem kellu jitħabat kontra dan l-​għadu qawwi. Satana huwa dak li kkaġuna l-​waqgħa tal-​bniedem fil-​bidu. Hu determinat li jkompli jagħmel il-​ħsara lill-​bnedmin u jbegħedhom minn Alla. Milli jidher, il-​fatt li l-​bnedmin jabbużaw mid-​drogi huwa parti mill-​istrateġija tiegħu. Hu qed jaġixxi b’rabja kbira għax jaf li “żmien ftit baqagħlu.”—Apokalissi  12:12.

X’Inhi s-​Soluzzjoni li Jipprovdi Alla?

Il-​Bibbja turi x’inhu l-​provvediment kollu mħabba t’Alla biex jifdi lill-​bnedmin mill-​qagħda midinba tagħhom. Fl-​1 Korintin 15:22 jintqalilna: “Bħalma l-​bnedmin kollha jmutu f’Adam, hekk ilkoll jiksbu l-​ħajja fi Kristu.” Ġesù kien lest li jiġi fid-​dinja bħala bniedem perfett u jissagrifika ħajtu fuq l-​art biex jifdi lill-​bnedmin mill-​effetti tad-​dnub u l-​mewt.

Ħafna, meta saru jafu r-​raġuni għala teżisti l-​mewt kif ukoll x’inhi s-​soluzzjoni għall-​problemi tal-​bnedmin, sabu l-​motivazzjoni u l-​kuraġġ biex jinqatgħu mill-​vizzju tad-​drogi. Imma l-​Bibbja ma tgħinniex biss insolvu l-​problema tad-​drogi issa individwalment. Din tgħidilna dwar żmien, wara li tispiċċa l-​influwenza minn Satana, meta l-​gwajijiet kollha tad-​dinja, inkluż l-​abbuż tad-​drogi, se jintemmu għal dejjem.

Il-ktieb taʼ l-​Apokalissi jiddeskrivi “xmara taʼ l-​ilma tal-​Ħajja, ċara daqs il-​kristall, tgelgel mit-​tron taʼ Alla u tal-​Ħaruf.” (Apokalissi 22:1) Din ix-​xmara simbolika tirrappreżenta l-​provvediment t’Alla permezz taʼ Ġesù Kristu biex jirrestawra l-​bniedem għall-​ħajja perfetta f’ġenna taʼ l-​art. Il-​ktieb taʼ l-​Apokalissi jiddeskrivi siġar tal-​ħajja fl-​aqwa tagħhom fuq kull naħa tax-​xmara u jgħid: “Il-​weraq tas-​siġra huma duwa tajba għall-​ġnus.” (Apokalissi 22:2) Dan il-​weraq simboliku jirrappreżenta l-​provvedimenti taʼ Jehovah biex ifejjaq lill-​bnedmin u jirrestawrahom għall-​perfezzjoni spiritwali u fiżika.

Sa fl-​aħħar il-​bnedmin se jkunu ħelsin, mhux biss mill-​abbuż tad-​drogi, imma wkoll mill-​gwajijiet u l-​problemi l-​oħra kollha li jifilġuhom f’din is-​sistema mħassra!

[Kaxxa/Stampa f’paġna 9]

Kemm Hija bla Periklu l-​Marijuana?

Għadd taʼ pajjiżi qed jaħsbuha jekk jillegalizzawx il-​marijuana, l-​iktar minħabba l-​użu tagħha fil-​mediċina. Instab li din id-​droga ttaffi d-​dardir kaġunat mill-​kimoterapija, u skond l-​evidenza din tgħin lil dawk li jkollhom l-​AIDS biex jiftħu l-​aptit. Intużat ukoll biex ittaffi l-​uġigħ.

Filwaqt li ħafna ma jaqblux bejniethom dwar ir-​riżultati minn dak li nstab fir-​riċerka, testijiet li ġew rapportati fir-​rivista New Scientist stabbilew xi wħud mill-​effetti tal-​marijuana li jagħmlu l-​ħsara.

Test li sar fl-​Università taʼ Harvard qabbel grupp li kien ipejjep il-​marijuana kuljum maʼ grupp li kien jużaha inqas spiss. Instab li ftit kien hemm differenza fit-​testijiet regulari tal-​moħħ. Madankollu, f’test minnhom li kien jittratta dwar kemm isibuha faċli biex jaddattaw ruħhom għal sitwazzjonijiet ġodda, dawk li kienu jużaw ħafna l-​marijuana ġabu ferm inqas punti.

Università oħra ttestjat grupp taʼ wħud li kienu jpejpu l-​marijuana regolarment u grupp taʼ wħud li kienu jpejpu sigaretti komuni, fuq perijodu taʼ iktar minn 15-il sena. Dawk li kienu jpejpu l-​marijuana ġeneralment kienu jieħdu tlieta jew erbaʼ sigaretti tal-​marijuana kuljum. Dawk li kienu jieħdu sigaretti komuni kienu jpejpu 20 sigarett jew iktar kuljum. L-​istess numru taʼ nies miż-​żewġ gruppi kellhom is-​sogħla u l-​bronkite. Meta sar eżami fuq il-​pulmuni nstab li kienet saret ħsara simili fiċ-​ċelluli tal-​pulmuni tan-​nies miż-​żewġ gruppi.

Għalkemm dawk li kienu jużaw il-​marijuana kienu jpejpuha ħafna inqas spiss, instab li sigarett wieħed biss tal-​marijuana jħalli tliet darbiet iktar qatran minn sigarett komuni. Iktar minn hekk, ir-​rivista New Scientist irrapportat: “Dawk li jpejpu l-​marijuana jieħdu nifs iktar ’il ġewwa u jżommu n-​nifs għal żmien itwal.”

Barra minn dan, instab li ċ-​ċelluli taʼ l-​immunità tal-​pulmuni taʼ dawk li kienu jpejpu l-​marijuana kienu 35 fil-​mija inqas kapaċi li jiġġieldu l-​batterji milli kienu jagħmlu ċ-​ċelluli taʼ dawk li kienu jpejpu s-​sigaretti komuni.

[Sors]

U.S. Navy photo

[Kaxxa f’paġna 11]

“Akkuża taʼ Niket” Kontra l-​Ġenituri

Editorjal fil-​gazzetta taʼ l-​Afrika t’Isfel Saturday Star esprima ċertu tħassib dwar iż-​żjieda kbira fl-​abbuż tad-​drogi fost iż-​żgħażagħ fl-​Afrika t’Isfel u kkummenta hekk:

“Li t-​tfal tagħna jagħmlu dan [jieħdu d-​drogi] taʼ spiss hija akkuża taʼ niket kontrina l-​ġenituri u s-​soċjetà b’mod ġenerali. Ġimgħa wara l-​oħra naqilgħu fwiedna għall-​flus, u nqimu fit-​tempju tas-​suċċess materjali. It-​tfal tagħna jiħdulna moħħna, u saħħitna. Ħin taʼ kwalità? Huwa faċli li nagħtuhom il-​flus biex neħilsu minnhom. Iktar faċli milli noqogħdu nisimgħuhom—nisimgħu minn xiex jibżgħu, x’qed jittamaw, fuqiex qed jinkwetaw. Il-​lejla, hekk kif inkunu bil-​qiegħda mal-​mejda f’xi restorant jew nirrilassaw quddiem it-​televixin, se nkunu nafu x’qegħdin jagħmlu?”

Jew, nistgħu nżidu aħna, se nkunu nafu x’qegħdin jaħsbu?

[Stampa f’paġna 10]

Ħafna sabu l-​motivazzjoni biex jinqatgħu mill-​abbuż tad-​drogi