Epidemija Globali taʼ Mibegħda

HEMM mostru għaddej ħieles. Qed jiġri kemm jiflaħ mal-​globu kollu. Dan il-​mostru jissejjaħ mibegħda.

Fil-Balkani hemm provinċja li għadha ma rkupratx mill-​konsegwenzi koroh taʼ kampanja taʼ tindif etniku li seħħet dan l-​aħħar. L-​istmerrija li ilha tinġemaʼ għal sekli sħaħ wasslet għall-​qtil tal-​massa, stupri, nies imkeċċijin, ħruq u serq taʼ djar u rħula, qerda taʼ l-​uċuħ tar-​rabaʼ u l-​annimali, u ġuħ kiefer. Għad hemm ukoll ħafna mini splussivi taħt l-​art.

F’Timor tal-​Lvant, fix-​xlokk taʼ l-​Asja, 700,000 ruħ imwerwrin kellhom jaħarbu mill-​kefrija tal-​qtil, swat, sparar bl-​addoċċ, u t-​tkeċċija bil-​forza. Ħallew warajhom art irvinata minn gruppi militari m’humiex awtorizzati. “Inħossni qisni annimal ikkaċċjat,” qal imbikki wieħed mill-​vittmi.

F’Moska bini t’appartamenti sar ragħad bi splużjoni taʼ bomba kbira mit-​terroristi. Inqatlu 94 ruħ innoċenti—fosthom tfal—u l-​iġsma tagħhom xterdu ’l hemm u ’l hawn bl-​isplużjoni. Iktar minn 150 ruħ sfaw feruti. Wara ġrajja taʼ tkexkix bħal din, in-​nies qed jistaqsu, ‘Min imissu issa?’

F’Los Angeles, Kalifornja, razzist spara fuq grupp taʼ tfal żgħar Lhud li għadhom ma jmorrux l-​iskola u iktar tard qatel pustier Filippin.

Il-mibegħda jixirqilha li tissejjaħ epidemija globali. Kważi kuljum, ir-​rapporti taʼ l-​aħbarijiet juru x’jiġri meta l-​istmerrija razzjali, etnika, jew reliġjuża tingħaqad mal-​ksur tal-​liġi. Naraw ġnus, komunitajiet, u familji mfarrkin. Naraw pajjiżi involuti f’ġenoċidju fuq skala kbira. Naraw atti terribbli li ma jixirqux lill-​bnedmin, u dawn jitwettqu sempliċement għax xi nies jitqiesu “differenti.”

Biex xi darba l-​mostru msejjaħ mibegħda jissakkar f’gaġġa, irridu nifhmu minfejn hi ġejja din il-​vjolenza mimlija mibegħda. Il-​mibegħda tinsab fil-​ġeni tan-​nies? Hija mġiba li n-​nies jitgħallmuha? Huwa possibbli li jintemm iċ-​ċiklu tal-​mibegħda?

[Sors taʼ l-​Istampa f’paġna 3]

Kemal Jufri/Sipa Press