Ħajti Bħala Artista

KIF RAKKONTAT MINN SHIZUKO KAWABATA

“Ix-​Xhieda taʼ Jehovah, in-​Nies Eċċellenti li Qed Jiddikjaraw l-​Aħbar Tajba mad-​Dinja Kollha”

kien it-​titlu taʼ waħda mill-​pitturi tiegħi li dehru  f’wirja taʼ l-​arti f’Versailles, Franza, fl-​1999.

INQAS minn ġimgħa qabel il-​wirja, ix-​Xhieda taʼ Jehovah fi Franza kienu qassmu 12-il miljun fuljett madwar il-​pajjiż kollu li bih inġibdet l-​attenzjoni għall-​mod inġust kif ittrattahom il-​gvern. Għall-​pittura tiegħi li kienet tfaħħar lix-​Xhieda, qlajt premju speċjali. Iktar tard, il-​persuna li ħadet ħsieb tippreżentah qalet: “Int għandek kuraġġ, imma jien għandi kuraġġ ukoll. Għalhekk qed nippremjak b’dan il-​premju speċjali.”

Ħafna artisti jipprovaw iwasslu sensazzjonijiet u emozzjonijiet fil-​pitturi tagħhom. Jien hekk nipprova nagħmel. Inpinġi skond kif inħossni, u l-​pitturi li nagħmel huma vivaċi, għax jirriflettu l-​ferħ u l-​hena tiegħi. Meta kont tifla skoprejt kemm hu sabiħ li tgħaqqad il-​kreattività mat-​tpinġija.

Għala Bdejt Inpitter

Twelidt fl-​1920 f’Morioka, il-​Ġappun, u l-​ġenituri tiegħi kienu tat-​tajjeb. Jien u oħti l-​kbira kellna għalliema privati li kienu jgħallmuna ż-​żfin Ġappuniż, l-​arranġamenti tal-​fjuri, iċ-​ċerimonja tat-​te, il-​koto (strument mużikali Ġappuniż), il-​pjanu, il-​kant, u affarijiet bħal dawn. Kollox kien idejjaqni. Meta kienu jiġu l-​għalliema, kont naħarbilhom u ninħeba. Is-​sefturi kien ikollhom joqogħdu jfittxuni u jkaxkruni lura.

Ħaġa li kont nobgħod kienet li l-​lezzjonijiet kienu riġidi. Nies li qatt ma rajthom qabel kienu jiddeċiedu kif għandi niżfen, nirranġa l-​fjuri, u nservi t-​te. Kont inħossni fgata, bħallikieku bl-​ebda mod ma kont kapaċi nimmaġina l-​affarijiet jien stess u nagħmel miri persunali. Imma meta kont inpitter, ħadd ma kien joqgħod għassa tiegħi. Ħadd ma kien jgħidli x’għandi nagħmel. Kont insib il-​libertà li tant kont nixxennaq għaliha.

Peress li ma kelli l-​ebda għalliem privat għall-​arti, stajt inkun kreattiva u nivvinta jien, u ħadd ma kien jikkritikani. Bil-​mod il-​mod sirt iktar kuraġġuża fit-​tpinġija tiegħi. Meta kelli madwar 12-il sena, bdejt nieħu l-​ingravati tal-​ħarir li kellu missieri u npinġi direttament fuqhom. Ftit wara, fl-​iskola bdejna nħitu l-​ilbiesi. L-​għalliema baqgħet imbellha meta rat li kont qasqast in-​nofs taʼ quddiem u bdiltu b’materjal abjad. Iżda bħal missieri hi ma qalet xejn.

Il-​Ħolm u r-​Realtà

Minn mindu kont l-​iskola primarja, kont ngħid li nixtieq insir artista meta nikber. Il-​mira tiegħi ma kinitx inbidlet, u ridt immur l-​università biex nistudja l-​arti; imma l-​ġenituri tiegħi ma ridunix. Qalu li fil-​Ġappun lawrjata fl-​arti ma kinitx tiġi aċċettata bħala għarusa. Għalhekk ħadt kors fl-​affarijiet tad-​dar.

Il-poeżiji barranin u l-​kotba barranin kienu jogħġbuni u kont naqra ħafna minnhom. Madankollu, dak iż-​żmien dawn kienu jiġu kritikati bħala letteratura taʼ l-​għadu. Anki li jkollok din il-​letteratura kien perikoluż. Fl-​iskola kont għamilt ħames snin nistudja l-​Franċiż m’għalliema Franċiża, imma l-​affarijiet inbidlu fil-​Ġappun tant li jekk wieħed kien juri interess fil-​lingwi barranin kien jitqies b’suspett. Konna mċaħħdin mil-​libertà tal-​kelma.

Fl-1943, hekk kif it-​Tieni Gwerra Dinjija kienet fl-​aqwa tagħha, wieħed raġel li kien ra 40 ritratt taʼ nisa żgħażagħ taʼ l-​età taż-​żwieġ, kien għażel lili biex forsi nkun il-​mara tiegħu u dan ħassejtu kumpliment kbir għalija. Iktar tard sirt naf li ommu u l-​ħabiba tagħha kienu ġew fl-​inħawi tagħna u qagħdu jgħassuli baxx baxx. Wara, il-​familja tagħhom bagħtet proposta formali taż-​żwieġ lill-​familja tagħna, u lili pperswadewni biex naċċettaha. Jien iltqajt maʼ dan ir-​raġel darba biss qabel it-​tieġ tagħna.

Wara li żżewwiġna, ħajjitna kuljum kienet tkun fil-​periklu minħabba attakki mill-​ajru, u fl-​aħħar id-​dar tagħna saret ħuġġieġa nar bħall-​bqija tal-​belt. Dawk minna li baqgħu ħajjin fittixna l-​kenn fil-​muntanji, imma anki hemmhekk konna nisimgħu s-​sireni u naraw l-​ajruplani tal-​gwerra. Kienet ħaġa ferm tal-​biżaʼ. Kulħadd kien qed ibati. L-​għaxar snin taʼ wara l-​gwerra wkoll kienu martirju.

Minbarra t-​tlett itfal tagħna, magħna kienu joqogħdu wkoll il-​kunjata tiegħi u sitta minn ħut ir-​raġel tiegħi. Għalkemm konna nħaddmu s-​sefturi magħna, ilkoll kemm aħna kellna naħdmu fir-​rabaʼ sabiex nieklu. Matul dak il-​perijodu kont qalbi sewda ħafna u kont insejt kif nidħaq. Imma kont nibżaʼ li jekk nesprimi s-​sentimenti tiegħi bil-​kliem x’aktarx li kont se niġi mifhuma ħażin. Iżda, bil-​mod il-​mod sibt li stajt nesprimi dak li nħoss permezz taʼ l-​arti tiegħi.

Kif Sirt Magħrufa Bħala Artista

Persuna li jkollha talent artistiku wkoll trid tagħmel sforz kbir biex tikseb riżultati tajbin. Allura kont nixtri kotba dwar l-​arti, u studjajt taħt il-​ħarsien taʼ diversi artisti mill-​aqwa fil-​Ġappun. Ħadd minnhom ma ssuġġerieli li nibdel l-​istil li kont diġà żviluppajt bħala żagħżugħa.

Il-kritiċi taʼ l-​arti bdew jinnotaw xogħli, però kont inpitter għas-​sodisfazzjon tiegħi stess u mhux biex nuri l-​pitturi lil ħaddieħor. Iżda, maż-​żmien qamitli l-​kurżità dwar x’jaħsbu n-​nies dwar il-​pitturi tiegħi. Għalhekk, fl-​1955, tellajt l-​ewwel wirja tiegħi fil-​Ginza taʼ Tokjo. Kien jisimha “Taħbit Sieket, Kliem Sieket, Id-​Djarju Tiegħi,” u kienet tesprimi l-​ħajja taʼ kuljum bil-​pitturi. Il-​wirja kellha suċċess.

Kif Iltqajt max-​Xhieda

Fl-​1958 morna bħala familja noqogħdu f’Tokjo għax jien u r-​raġel xtaqna li wliedna jattendu skejjel tajbin u jkollhom l-​aħjar edukazzjoni possibbli. Ħajti kienet tiċċentra fuq il-​pittura. Kienet saret id-​drawwa tiegħi li nqattaʼ madwar ħames sigħat kuljum inpitter. Bil-​lejl jien kont noħroġ maʼ ħbiebi artisti, u r-​raġel kien joħroġ m’oħrajn. Ma kellna l-​ebda idea kif irrabbu lil uliedna.

Ir-raġel ħafna drabi ma kienx ikun magħna minħabba x-​xogħol, allura r-​responsabbiltà tat-​trobbija tat-​tfal waqgħet fuqi, u għalhekk tlift il-​fiduċja fija nnifsi. Meta kont tifla, kont nattendi l-​iskola tal-​missjoni Kattolika, u bdejt naħseb jekk xi tip t’edukazzjoni Biblika kinitx se tgħinhom. Faċċata tad-​dar tagħna f’Omori, Tokjo, kien hemm knisja Luterana, u ssuġġerejt lit-​tfal li nibdew immorru hemm. Imma qatt ma rnexxielna mmorru.

Minflok, l-għada stess—fil-​bidu taʼ l1959—waħda mix-​Xhieda taʼ Jehovah ġiet id-​dar tagħna. Malajr sejjaħt lit-​tfal kollha, u nġbarna bil-​qiegħda nisimgħu. Ix-​Xhud spjegatilna mill-​Bibbja li qed ngħixu fi żmien speċjali meta Alla dalwaqt se jqaċċat il-​ħażen minn fuq l-​art. Jien ordnajt erbaʼ Bibbji kif ukoll xi letteratura mill-​Bibbja, u mill-​ewwel aċċettajt l-​offerta tagħha li żżurna kull ġimgħa biex tgħallimna. Staqsejtha kemm kienet se tiħodilna kull xahar għat-​tagħlim u bqajt skantata meta sirt naf li x-​Xhieda taʼ Jehovah ma jaċċettawx ħlas għax-​xogħol taʼ tagħlim tagħhom. Kemm kienu differenti mill-​għalliema kollha li kont naf!

Uliedi l-​bniet mill-​ewwel aċċettaw il-​veritajiet Bibliċi, u saħansitra beda jkollna grupp taʼ studju regulari fid-​dar tagħna kull ġimgħa. Imma wara ftit studji, bdejt inħossni skomda. Għalija l-​waqt taʼ l-​istudju kien perijodu iebes, allura xi kultant kont nipprova ninħeba jew noħroġ meta kien imiss l-​istudju persunali tiegħi tal-​Bibbja.

Il-problema tiegħi kienet li stajt nara li kulma kienet qed tgħid il-​Bibbja kien tajjeb u li kelli ninbidel biex niġi naqbel mal-​gwida tagħha. Imma fl-​istess ħin, kont determinata li nsir artista brava, u kont nemmen li kelli nibqaʼ naħseb b’mod liberu biex inkun kreattiva. Minħabba t-​taqlib li kont għaddejja minnu, il-​pittura tiegħi bdiet tbati. Fil-​wirjiet, il-​pitturi tiegħi kienu qed jintefgħu fuq waranett.

Il-​Vjaġġ Tiegħi Lejn Pariġi

Ħassejt li żjara f’Pariġi kienet se tgħinni ntejjeb il-​pitturi tiegħi. Għalhekk, fl-​1960 mort hemmhekk, peress li kienet qed tinżamm wirja kbira biex tintroduċi l-​arti Ġappuniża fi Franza. Jien kont l-​unika artista mara mill-​Ġappun li attendejt. F’Pariġi, id-​differenza fil-​kundizzjonijiet t’għajxien, fl-​ilbies, fl-​ideat ġenerali, fil-​kulur—f’kollox—kont insibha eċċitanti ħafna. Il-​wirja damet għaddejja erbat ijiem, u b’sorpriża għalija l-​mexxejja tal-​pajjiż attendew għaliha. Madankollu, sorpriża oħra għalija kienet li lin-​nisa kienu jogħġbuhom ħafna l-​kimoni li kont nilbes. Qtajtha li ndum iżjed.

Billi ma kontx naf kif se nagħmel biex jibagħtuli l-​flus mill-​Ġappun, bdejt inbigħ il-​kimoni tiegħi. B’hekk, stajt inqattaʼ t-​tliet xhur taʼ wara nistudja xi xogħlijiet murijin fil-​galleriji taʼ l-​arti. Taʼ spiss kont niftakar il-​kliem taʼ l-​artist li l-​pittura tiegħu kienet imdendla ħdejn dik tiegħi fil-​wirja. Hu qalli: “Jien inpinġi d-​dija tax-​xemx. Il-​pittura tiegħek hija ovvjament skura u sewda għax hija influwenzata mill-​filosfi taʼ l-​Orjent.”

Koppja miżżewġa mill-​uffiċċju tal-​fergħa tax-​Xhieda taʼ Jehovah f’Pariġi ġiet iżżurni fl-​appartament tiegħi. Wara li dawn it-​tnejn ġew kemm-il darba, fl-​aħħar qbilt li mmur magħhom għal laqgħa Kristjana. Meta wasalt, bqajt mgħaġġba b’dak li rajt. Waħda mara kienet liebsa kappell kbir aħmar u sabiħ. Oħra kienet liebsa libsa ħadra tgħajjat. Il-​ħwejjeġ li kienu lebsin kienu jirriflettu sens taʼ stil u taʼ gosti sbieħ, u għalhekk il-​ħarsa tiegħi dwar ix-​Xhieda nbidlet kompletament.

Il-programm ukoll impressjonani ħafna. Meta rajt li kienu qed isiru l-​istess proċeduri fuq iż-​żewġ naħat tad-​dinja, bl-​istess tagħlim, intbaħt li dan il-​grupp u l-​attività tiegħu ma kinux tas-​soltu. Qalbi tqanqlet għax indunajt li kont qed nissieħeb maʼ nies gwidati minn Alla.

Nieħu d-​Deċiżjonijiet

Meta wasalt il-​Ġappun, bdejt nieħu l-​istudju tal-​Bibbja bis-​serjetà. Skoprejt li l-​linji taʼ gwida tal-​Ħallieq tagħna jippermettulna iktar libertà milli kont immaġinajt. B’imħabba, hu tana personalitajiet u talenti individwali kif ukoll il-​libertà li niżviluppawhom. Allura rrealizzajt li jekk wieħed isir Xhud taʼ Jehovah ma jfissirx li kellu jċedi l-​imħabba tiegħu għall-​arti.

Jien u wliedi l-​bniet għamilna progress fl-​istudju tagħna tal-​Bibbja. Waħda minnhom issimbolizzat id-​dedikazzjoni tagħha lil Jehovah bil-​magħmudija taʼ l-​ilma fl-​1961, u l-​oħra fl-​1962. Sa llum il-​ġurnata, it-​tnejn li huma għadhom jaqdu lil Alla fedelment. Madankollu, jien bqajt inżomm lura. Fl-​1965, Lloyd Barry, li dak iż-​żmien kien jindokra x-​xogħol taʼ l-​ippridkar tax-​Xhieda taʼ Jehovah fil-​Ġappun, inkuraġġieni billi qalli: “Aħseb ftit kemm stampi sbieħ se jpinġu n-​nies perfetti fil-​Ġenna taʼ l-​art!” Is-​sena taʼ wara tgħammidt.

L-​Effett fuq il-​Pitturi Tiegħi

Meta nħares lura, nistaʼ nara kif il-​bidliet f’ħajti u fil-​personalità tiegħi effettwaw il-​pitturi tiegħi. Dawk li kont inpinġi fil-​bidu kienu mudlama u skuri, għax kienu jirriflettu l-​uġigħ, it-​tbatija, u d-​disprament li kont inħoss. Imma mbagħad tgħallimt mill-​Bibbja dwar il-​Ħallieq tagħna, il-​kwalitajiet taʼ l-​għaġeb tiegħu, il-​ferħ li jiġi meta nfaħħruh, u l-​livelli xierqa li rridu ngħixu bihom. Hekk kif is-​sentimenti tiegħi bdew jinbidlu, il-​pitturi tiegħi nbidlu wkoll.

Issa nqattaʼ ħafna ħin naqsam il-​messaġġ tal-​Bibbja m’oħrajn, u dan nagħmlu regolarment. Inħoss ħafna ferħ u kuntentizza meta nitkellem man-​nies dwar il-​kwalitajiet t’Alla, kif ukoll dwar l-​iskop meraviljuż tiegħu li jibdel din l-​art f’ġenna taħt il-​ħakma taʼ Ibnu, Ġesù Kristu. Din l-​attività bbażata fuq il-​Bibbja tagħtini ħafna enerġija, u mbagħad kemm naqbad pinzell u nesprimi dak li nħoss. U hekk kif il-​ferħ tiegħi kompla jiżdied u jikber matul is-​snin, il-​pitturi tiegħi saru iktar vivaċi.

L-​Enfasi Hi fuq il-​Bibbja

Jien nirċievi talbiet biex nuri l-​pitturi tiegħi minn madwar id-​dinja kollha—minn Sydney, Vienna, Londra, New York. Imma huma l-​Ewropej li l-​iktar jammiraw il-​pitturi tiegħi. L-​esperti mill-​Akkademja Rjali taʼ l-​Arti f’Louvre ġewwa Pariġi staqsewni: “Kif jistaʼ jkun li Ġappuniża tistaʼ tant titqanqal mill-​Bibbja u mill-​Kristjanità li l-​pitturi tagħha jesprimu ferħ li qatt ma deher f’sekli sħaħ taʼ arti reliġjuża?”

Is-salmista tal-​Bibbja, David, esprima s-​sentimenti tiegħu permezz tal-​mużika, u uża t-​talenti mużikali tiegħu biex jgħallem lil oħrajn dwar l-​affarijiet taʼ l-​għaġeb t’Alla. Il-​mira tiegħi hija l-​istess. Irrid infaħħar lil Jehovah. Nixtieq minn qalbi li mill-​pitturi tiegħi n-​nies jindunaw bil-​ferħ li jistaʼ jkollhom jekk ikunu jafu lil Jehovah u l-​kwalitajiet meraviljużi tiegħu. Kritiku taʼ l-​arti qal dwar it-​titli tiegħi: “Il-​kliem stess taʼ l-​artista jiġu evitati bis-​sengħa, u b’mod eżatt iġġiegħel lill-​Bibbja titkellem.” Inħossni eċċitata ferm meta nara lin-​nies jagħrfu l-​qawwa tal-​Bibbja fil-​pitturi tiegħi.

Fl-1995 il-​Kunsill Dinji taʼ l-​Arti, li huwa organizzazzjoni internazzjonali taʼ l-​arti li għandha l-​kwartieri ġenerali tagħha f’Tokjo, tani l-​premju taʼ l-​ewwel post fost l-​aqwa artisti fid-​dinja. Il-​kunsill irrapporta fuq il-​pitturi tiegħi: “L-​artista tikkwota kliem mill-​Bibbja għat-​titli . . . Fil-​pitturi kollha tagħha tidher il-​Bibbja mpinġija, imma dan hu eżatt xi tfisser il-​ħajja għal artista li tgħix kif irid Alla.”

Dan t’hawn fuq jirreferi għall-​fatt li jien taʼ spiss indaħħal stampa taʼ Bibbja miftuħa fil-​pitturi tiegħi. Dan l-​aħħar għaqqadt xi paġni stampati tal-​Bibbja mal-​pitturi tiegħi. Għalhekk niġbed l-​attenzjoni taʼ min jara l-​pittura lejn it-​titlu li nkun għażilt kif ukoll lejn il-​kliem tal-​Bibbja u mbagħad lejn il-​mod kif jien dan noħorġu fil-​pitturi tiegħi.

Fl-1999 xi wħud mill-​pitturi tiegħi intwerew f’Bangkok, fit-​Tajlandja. Waħda minnhom semmejtha “Kemm Jehovah Għamel l-​Art b’Mod Meraviljuż, Waqt li Taha lill-​Bniedem biex Jgħammar Fiha,” u oħra, “Talba tas-​Sultan David: ‘Jehovah Ħalli Qalb Dan il-​Poplu Tkun Ħaġa Waħda Miegħek.’” Ġejt mistiedna fil-​palazz tas-​sultan tat-​Tajlandja flimkien maʼ xi artisti oħrajn. Is-​sultan ried jiddiskuti miegħi l-​pitturi tiegħi, u staqsieni ħafna mistoqsijiet. Stajt nitkellem miegħu fit-​tul u ninkludi xi kummenti dwar it-​twemmin tiegħi bbażat fuq il-​Bibbja. Wara tajtu pittura bħala rigal.

Matul dawn l-​aħħar 35 sena, jien ukoll ħdimt f’kumitati li jiġġudikaw ix-​xogħol t’artisti oħrajn. Il-​pitturi li nħobb jesprimu emozzjoni. Għalija pittura tkun tajba meta tħallili togħma tajba, billi ġġagħalni nħoss paċi ġewwinija. Jien nammira ħafna l-​pitturi li jidhru fil-​pubblikazzjonijiet tax-​Xhieda taʼ Jehovah, li jwettqu l-​iskop tagħhom taʼ li jirrappreżentaw fedelment il-​messaġġ tal-​Bibbja.

Barkiet Bħala Qaddejja taʼ Jehovah

Minħabba li npitter, gawdejt opportunitajiet uniċi li nagħti xiehda dwar Alla Jehovah u l-​iskopijiet grandjużi tiegħu għall-​art. Dan għamiltu waqt intervisti għal artikli f’xi rivisti u fuq programmi televiżivi. Fil-​fatt, immur fejn immur u nitkellem maʼ min nitkellem, nipprova nuri lin-​nies li huwa permezz tal-​fidi, il-​ferħ, u l-​hena li jiġu milli naqdi lil Alla Jehovah li nistaʼ nagħmel il-​pitturi tiegħi.

Jien konvinta illi kieku kelli nċedi l-​fidi tiegħi, ma nkunx nistaʼ npitter bħalma nagħmel issa. Imma peress li jien Xhud taʼ Jehovah u peress li l-​verità tal-​Kelma t’Alla timlieni bil-​ferħ u bl-​hena, jien nistaʼ npitter.

[Stampa f’paġna 21]

Meta kont f’Pariġi

[Stampa f’paġna 22]

Maż-​żewġ uliedi bniet illum