Ġenerazzjoni li Tinsab fil-​Periklu

“Sa xahrejn ilu, kont ferħan u attiv. Issa kull x’ħin ikolli ċans nagħmel xi ħaġa, inħossni wisq bla saħħa biex nagħmilha. Inħossni mdejjaq ferm u tant nitlef it-​tempra malajr li ma nafx kif l-​oħrajn jissaportuni. Diffiċli biex ngħid għala f’daqqa waħda qed inħossni daqshekk mhux f’sikkti.”—Paul.

“Tgħidx kemm nibki u nħossni muġugħa minn ġewwa. Meta ma nkunx muġugħa, inħossni qisni mejta. Ma nieħu gost b’xejn. Sirt niddejjaq mal-​ħbieb. Tgħidx kemm sirt norqod. Kważi kuljum ma nkunx niflaħ inqum biex immur l-​iskola, u l-​marki taʼ l-​iskola tgħidx kemm tbaxxew.”—Melanie.

PAUL u Melanie m’humiex l-​uniċi li jħossuhom hekk. L-​istudji li jsiru juru li kważi 8 fil-​mija taʼ l-​adolexxenti fl-​Istati Uniti qed ibatu minn xi għamla taʼ dipressjoni u li kull sena madwar 4 fil-​mija jgħaddu minn dipressjoni serja. Imma l-​istatistiċi ma jgħidux il-​verità kollha, għax taʼ spiss id-​dipressjoni jaħsbuha xi marda oħra jew ma jagħtux kasha. “Fil-​fatt,” jgħid David G. Fassler, psikologu taʼ l-​adolexxenti, “wara li flejt ir-​riċerka li saret fost it-​tfal u l-​adolexxenti, jien nemmen li iktar minn kwart taż-​żgħażagħ jgħaddu minn fażi serja taʼ dipressjoni sakemm ikunu għalqu t-​tmintax-il sena.”

Effetti li Jħarbtu lil Dak li Jkun

L-​effetti tad-​dipressjoni jħarbtu lill-​adolexxenti. Fil-​fatt, l-​esperti jemmnu li d-​dipressjoni għandha sehem kbir f’li tikkaġuna problemi fl-​adolexxenti bħat-​taqlib konness maʼ l-​ikel, mard fiżiku kaġunat minn problema mentali, diffikultajiet fl-​iskola, u l-​abbuż taʼ prodotti li jwaqqgħuhom fil-​vizzju.

Xi ħaġa iktar traġika hi li d-​dipressjoni ġiet marbuta mas-​suwiċidju fost l-​adolexxenti. Skond l-​Istitut Nazzjonali Amerikan għas-​Saħħa Mentali, 7 fil-​mija taż-​żgħażagħ dipressi serjament joqtlu ruħhom b’idejhom.a Saħansitra dan ma jikxifx kemm hija verament kbira din il-​problema, peress li huwa maħsub li għal kull żagħżugħ li jagħmel suwiċidju, hemm ħafna iktar li jipprovaw jagħmluh. Mela mhux taʼ b’xejn li rapport mill-​Kunsill taʼ Carnegie fuq l-​Iżvilupp taʼ l-​Adolexxenti jgħid: “Jekk wieħed illum jittratta l-​problemi taʼ l-​adolexxenti ħafif ħafif ikun qed jistieden l-​għawġ. Traskuraġni bħal din tassew tpoġġi ġenerazzjoni fil-​periklu.”

Bla Problemi taʼ Xejn?

Xi wħud ma jistgħux iniżżluha kif l-​adolexxenti jistgħu tassew ikunu dipressi. Il-​kbar forsi jirraġunaw: ‘Għadhom tfal. Bla problemi taʼ xejn, u żgur m’għandhomx l-​inkwiet tal-​kbar.’ Imma għandhom jew m’għandhomx inkwiet? Il-​fatt hu li l-​adolexxenti jiffaċċjaw pressjonijiet li huma iktar qawwija milli jistgħu jaħsbu l-​kbar. Dr. Daniel Goleman jgħid kif mill-​bidu tas-​seklu 20, ġenerazzjoni wara oħra mad-​dinja kollha għexet b’riskju li tbati minn dipressjoni qawwija matul il-​ħajja iktar milli kellhom il-​ġenituri. Jgħid li din id-​dipressjoni m’hijiex sempliċement dwejjaq imma tinvolvi nuqqas taʼ interess li jmewwet lil dak li jkun, swied il-​qalb, li wieħed jitħassar lilu nnifsu, u li jħoss disperazzjoni tal-​biżaʼ. Iżid ukoll li dawn il-​fażijiet taʼ dipressjoni qegħdin jibdew minn età dejjem iżgħar.

Xorta waħda, ħafna ġenituri jistgħu ma jaqblux maʼ dan u jgħidu: ‘Aħna għaddejna mill-​adolexxenza mingħajr ma waqajna f’dipressjoni. It-​tifel tagħna għala qed iħalli s-​sentimenti negattivi jirkbuh?’ Imma l-​kbar m’għandhomx iqabblu dak li għaddew minnu huma bħala adolexxenti maʼ dak li jgħaddu minnu ż-​żgħażagħ taʼ llum. Wara kollox, kull individwu huwa differenti fil-​mod kif jara d-​dinja taʼ madwaru u kif jirreaġixxi.

Barra minn hekk, l-​adolexxenti llum jiffaċċjaw sfida oħra. “Dawn qed jikbru f’dinja ferm differenti minn dik taʼ meta l-​ġenituri tagħhom kienu żgħażagħ,” tikteb Dr. Kathleen McCoy fil-​ktieb tagħha Understanding Your Teenager’s Depression (Kif Tifhem id-​Dipressjoni taʼ l-​Adolexxent Tiegħek). Wara li ssemmi għadd taʼ bidliet sinifikanti li saru f’dawn l-​aħħar snin, Dr. McCoy tikkonkludi: “L-​adolexxenti llum iħossuhom inqas fis-​sigurtà, inqas kunfidenti u b’inqas tama milli konna nħossuna aħna ġenerazzjoni ilu.”

Minħabba l-​fatt li d-​dipressjoni hija komuni fost l-​adolexxenti, l-​artikli li jmiss se jwieġbu dawn it-​tliet mistoqsijiet:

• X’inhuma xi sintomi tad-​dipressjoni fost l-​adolexxenti?

• Xi jġagħalhom jaqgħu f’din il-​kundizzjoni?

• Kif tistaʼ tingħata għajnuna lill-​adolexxenti dipressi?

[Nota taʼ taħt]