Xi Ħaġa li Ebda Maltempata Ma Tistaʼ Tkissirha

MINN KITTIEBA GĦAL STENBAĦ! FIL-​ĠERMANJA, FL-​AWSTRIJA, FIL-​MESSIKU, U FIL-​KOREA

MATUL is-​sena 2002 għamel maltemp li ħalla ħerba f’ħafna pajjiżi. L-​Ewropa ntlaqtet minn serje taʼ għargħar diżastruż. F’partijiet oħra tal-​globu, il-​Messiku ntlaqat minn uragan qerriedi, u l-​Korea minn tempesta. Kienu kemm kienu traġiċi dawn il-​ġrajjiet, huma servew biex isaħħu r-​rabtiet taʼ l-​imħabba li hemm diġà bejn il-​Kristjani veri.

Wara l-​għargħar li seħħ fl-​Ewropa fl-​2002, Helmut Schmidt, li qabel kien il-​kanċillier tal-​Ġermanja tal-​Punent, ġie mistoqsi dwar liema tip t’għajnuna kellhom bżonn il-​vittmi. Hu wieġeb: “In-​nies għandhom bżonn l-​ikel u post fejn joqogħdu, għandhom bżonn xi ħaġa tal-​flus f’idejhom, u għandhom bżonn min jieħu ħsiebhom spiritwalment.” Ix-​Xhieda taʼ Jehovah kellhom sehem importanti biex jipprovdu lill-​vittmi tal-​maltemp kemm l-​għajnuna fiżika kif ukoll dik spiritwali. Ikkunsidra x-​xogħol li għamlu biex jagħtu l-​għajnuna fil-​Ġermanja, fl-​Awstrija, fil-​Messiku, u fil-​Korea.

Għajnuna mill-​Qalb fil-​Ġermanja

Meta saru jafu dwar it-​theddida taʼ l-​għargħar li kien riesaq, ħafna mix-​Xhieda taʼ Jehovah fil-​Ġermanja ngħaqdu mal-​pubbliku fl-​isforzi biex jikkontrollaw l-​ilma. Kathleen, li għandha 19-il sena u toqgħod fi Dresden, tgħid: “Ma stajtx noqgħod bil-​qiegħda u ma nagħmel xejn. Malli smajt li xi nies x’aktarx kienu se jitilfu kollox, bilfors kelli naqbad u mmur ngħinhom.”

Ix-Xhieda Ġermaniżi bdew jorganizzaw ruħhom biex mill-​ewwel jagħtu għajnuna effettiva. Bħala Kristjani, ħassewhom obbligati b’mod speċjali biex jgħinu lil ħuthom spiritwali. Iżda huma wrew ukoll imħabba għal għajrhom. (Mark 12:31) Għalhekk, iktar minn 2,000 volontier tqassmu fi gruppi taʼ bejn 8 u 12-il ruħ, fejn kull grupp ġie inkarigat biex jagħmel biċċa xogħol speċifika fl-​inħawi tad-​diżastru. Fl-​uffiċċju tal-​fergħa tax-​Xhieda taʼ Jehovah f’Selters, il-​Ġermanja, twarrbu 13-il linja tat-​telefon apposta biex jirċievu l-​eluf taʼ telefonati li saru min-​nies li staqsew dwar id-​diżastru u offrew l-​għajnuna.

Ronnie u Dina huma ministri full-time tax-​Xhieda taʼ Jehovah li jqattgħu l-​ħin tagħhom jgħinu lil sħabhom u lill-​ġirien jitgħallmu l-​veritajiet tal-​Bibbja. Meta saru jafu dwar l-​għargħar li kien riesaq, huma għall-​ewwel marru fiċ-​ċentru tal-​belt taʼ Dresden biex jgħinu fl-​isforzi kbar li saru ħalli jsalvaw il-​bini storiku li fiha. Ladarba l-​għargħar kien batta, Ronnie u Dina ngħaqdu maʼ Xhieda oħra biex inaddfu s-​Sala tas-​Saltna fil-​belt taʼ Freital, li sfat mgħarrqa b’ilma nkallat. Imbagħad il-​grupp beda jgħin lill-​ġirien. Is-​sid taʼ restorant faċċata tas-​sala ħa r-​ruħ meta x-​Xhieda naddfulu l-​kantina u s-​sular t’isfel mit-​terrapien u l-​ħama.

Siegfried u Hannelore jgħixu f’Colmnitz, raħal li jinsab xi 40 kilometru fil-​lbiċ taʼ Dresden. In-​nixxiegħa li s-​soltu tgħaddi mir-​raħal għoliet u għarrqet id-​dar u l-​ġnien tagħhom. Ladarba l-​ilma beda jbatti, il-​ġirien baqgħu skantati meta raw xi 30 Xhud, li ma kinux mil-​lokal, li waslu u taw l-​għajnuna biex inaddfu d-​dar taʼ Siegfried u Hannelore. Imbagħad, il-​grupp beda jnaddaf il-​ġonna li kienu fil-​qrib. Ħafna nies tal-​lokal staqsewhom x’qanqalhom jivvjaġġaw 100 kilometru biex jgħinu lil nies li qatt ma kienu ltaqgħu magħhom. Minħabba f’hekk, ix-​Xhieda setgħu jagħtu inkuraġġiment spiritwali lill-​vittmi f’Colmnitz.

L-irħula qrib taʼ Wittenberg intlaqtu wkoll mill-​għargħar. Żewġ Xhieda miżżewġin li jisimhom Frank u Elfriede ħadmu mal-​ġirien għal bosta ġranet qabel ma seħħ l-​għargħar billi mlew l-​ixkejjer bir-​ramel u qegħduhom fuq xulxin ħalli jsaħħu x-​xtut tax-​xmara. Ladarba l-​għargħar kien batta, Frank u Elfriede żaru lill-​vittmi u ħadulhom l-​ikel u farrġuhom. Frank jiftakar: “Waħda mara li żorna ma riditx temmen li aħna, nies li ma tafniex, ħadnielha x’tiekol mingħajr ma ridnieha tħallasna. Hi qaltilna li ħadd mill-​knisja tagħha ma kien mar iżurha. U l-​organizzazzjoni li ġabitilha x’tiekol talbitha tħallas kull darba. In-​nies baqgħu skantati meta raw li x-​Xhieda taʼ Jehovah marru għandhom b’ikla sħuna minflok bil-​letteratura tal-​Bibbja f’idejhom.”

L-​Awstrija​—Għajnuna fil-​Pront Minħabba d-​Diżastru

L-​ilma taʼ l-​għargħar għamel ħafna ħsara anki fl-​Awstrija li tinsab fil-​qrib. Twaqqfu tliet kumitati biex jindokraw l-​għajnuna li kellha tingħata. Ngħatat prijorità biex jissewwew il-​ħsarat kbar li ġarrbu tliet Swali tas-​Saltna. Ukoll, kważi 100 familja tax-​Xhieda ġiet effettwata mill-​għargħar, u 50 dar ġew mgħarrqa. Xi wħud tilfu kollox minbarra l-​ħwejjeġ taʼ fuqhom. L-​uffiċċju tal-​fergħa fl-​Awstrija informa lill-​kongregazzjonijiet lokali dwar is-​sitwazzjoni, u twaqqaf fond biex permezz tiegħu tingħata l-​għajnuna. Sa Settembru saru kontribuzzjonijiet taʼ iktar minn Lm13,171.

Waħda omm kitbet: “Ibni li għandu 8 snin joqgħod attent ħafna x’jonfoq u kien ġemmaʼ xi Lm5. Madankollu, meta semaʼ li xi wħud minn ħutna tilfu kulma kellhom, hu kien lest jagħti kulma ġemmaʼ għall-​fond tad-​diżastru.”

Bid-direzzjoni tal-​Kumitati Reġjonali tal-​Bini, li s-​soltu jieħdu ħsieb ix-​xogħol tal-​bini tas-​Swali tas-​Saltna tax-​Xhieda taʼ Jehovah, ġew organizzati gruppi biex jgħinu ħalli jirranġaw id-​djar li ġarrbu l-​ħsara minħabba l-​għargħar. Wieħed li kien qed josservahom qal: “Il-​gazzetti għandhom jirrapportaw dwar dak li intom qed twettqu hawnhekk.” Xi wħud saħansitra bidlu l-​ħarsa tagħhom lejn ix-​Xhieda taʼ Jehovah. Omm li hi Xhud qalet: “S’issa, uliedi, li m’humiex Xhieda, qatt ma kienu semgħuni meta pprovajt naqsam magħhom it-​twemmin tiegħi. Imma issa għall-​ewwel darba qed jisimgħuni!”

Saru l-​isforzi wkoll biex tingħata l-​għajnuna lil dawk li m’humiex Xhieda. Per eżempju, waħda mara tassew laqatha l-​fatt li wieħed Xhud mar għandha fis-​7.30 taʼ fil-​għodu u staqsieha jekk kellhiex bżonn l-​għajnuna. Il-​mara kellha tevakwa d-​dar għaliex l-​ilmijiet kienu diġà bdew deħlin f’darha. Madankollu, meta reġgħet lura hi sabet nota mingħand ix-​Xhieda mal-​grada tal-​ġnien tagħha. Fuqha kien hemm miktub: “Jekk għandek bżonn l-​għajnuna għidilna minnufih.” Ix-​Xhieda għenuha tnaddaf id-​dar u l-​proprjetà tagħha mit-​tajn u t-​terrapien.

Grupp taʼ 100 Xhud marru fir-​raħal t’Au biex jgħinu lix-​Xhieda lokali u l-​ġirien tagħhom. Dawk li mexxew il-​gruppi marru minn bieb għal bieb jistaqsu lir-​residenti jekk kellhomx bżonn l-​għajnuna. In-​nies baqgħu skantati meta raw li x-​Xhieda marru armati bl-​apparat tat-​tindif u li jneħħi l-​ilma, bħal pompi, xkupi, u pali. Ix-​xogħol li normalment lill-​inkwilini kien se jiħdilhom xi ġimgħa biex ilestuh, sar fi ftit sigħat. In-​nies qagħdu jarawhom bid-​dmugħ f’għajnejhom.

Xi 400 Xhud lokali kienu involuti fl-​għajnuna li ngħatat​—u spiss ħadmu lejl u nhar. Għal dawk li kienu qed jarawhom, din kienet xiehda li tispikka tal-​qawwa tal-​Kristjanità vera.

L-​Uragan Isidore Jolqot il-​Messiku

Isidore beda bħala tempesta tropikali fit-​tramuntana tal-​Venezwela. Fit-​22 taʼ Settembru, 2002, Isidore laqat il-​Peniżola Messikana taʼ Yucatán bħala uragan tat-​3 kategorija. B’riħ qawwi taʼ 190 kilometru fis-​siegħa u xita bil-​qliel, dan ikkaġuna fost l-​iktar ħsara gravi li qatt seħħet fl-​istorja taʼ l-​istati Messikani taʼ Yucatán u Campeche kif ukoll ikkaġuna xi ħsara fl-​istat taʼ Quintana Roo. F’Yucatán biss, xi 95,000 dar ġarrbu ħsarat kbar li effettwaw lil xi 500,000 ruħ.

Ix-Xhieda taʼ Jehovah tant kellhom irwol effettiv fl-​għajnuna li ngħatat f’Yucatán li titlu taʼ gazzetta fit-​tramuntana tal-​Messiku kien jgħid: “Ix-​Xhieda taʼ Jehovah Jiġu Jsalvaw lin-​Nies.” Qabel ma waslet il-​maltempata kien diġà ġie fformat kumitat biex joffri l-​għajnuna. Saru xi arranġamenti għall-​emerġenza biex mijiet taʼ Xhieda tal-​lokal ikollhom fejn joqogħdu. Il-​kongregazzjonijiet fil-​qrib ipprovdew il-​fondi għall-​emerġenza. Il-​ħwejjeġ, il-​mediċina, u iktar minn 22 tunnellata ikel tqassam lil dawk li salvaw mill-​maltempata, inkluż lil ħafna li m’humiex Xhieda. L-​anzjani tal-​lokal ġew inkarigati biex iżuru u jinkuraġġixxu lil dawk li sfaw vittmi taʼ Isidore.

Wara li t-​tempesta laqtet il-​pajjiż, ġew ifformati l-​kumitati taʼ l-​għajnuna lokali biex ifittxu lix-​Xhieda li kienu neqsin. Bosta wħud damu sa tlett ijiem iżolati fil-​foresta u f’postijiet oħra mingħajr ma kellhom x’jieklu u ilma x’jixorbu. F’xi nħawi l-​ilma tant telaʼ ’l fuq li saħansitra għatta l-​arbli tad-​dawl! Għalhekk, kellhom jiksbu d-​dgħajjes u dawn użawhom biex ifittxu l-​vittmi, jitimgħuhom, u jiħduhom lura f’postijiet ħielsa mill-​periklu.

L-awtoritajiet lokali sellfu d-​dgħajjes u apparat ieħor lix-​Xhieda, li offrew li jmorru jgħinu f’postijiet fejn ftit nies kienu se jażżardaw imorru. Għall-​ewwel, uffiċjal taʼ l-​armata ma riedx iħalli lix-​Xhieda jagħmlu tfittxija perikoluża bħal din. Madankollu, meta ra kemm kienu qalbiena, hu qalilhom: “Naf ċert li intom lesti tużaw il-​ħelikopters, jekk ikun hemm bżonn, biex issalvaw lin-​nies tagħkom. Il-​vetturi tagħna huma disponibbli biex tieħdu lin-​nies tagħkom fejn tixtiequ.”

Sid taʼ ħanut ried ikun jaf għala xi Xhieda kienu qed jixtru l-​ilma tal-​flixkun fi kwantitajiet kbar. Huma spjegawlu li dan għamluh għal ħuthom spiritwali u għal oħrajn li kellhom bżonnu. Ir-​raġel iddeċieda li jagħtihom il-​fliexken kollha taʼ l-​ilma li kellu​—mingħajr ħlas. Il-​jum taʼ wara reġaʼ ta ammont konsiderevoli ieħor taʼ ilma. F’ħanut ieħor, raġel li kien qed jixtri staqsa lix-​Xhieda għala kienu qed jixtru daqshekk ikel. Meta sar jaf li dan kien għall-​vittmi taʼ l-​għargħar, hu tahom donazzjoni biex jixtru iktar.

Għalkemm kważi 3,500 familja tax-​Xhieda tilfu l-​affarijiet materjali minħabba Isidore, ħadd minnhom ma kien nieqes jew mejjet. Xorta waħda, minħabba li kien hemm 331 dar tax-​Xhieda li ġarrbu l-​ħsara jew inqerdu għalkollox, kien hemm bżonn taʼ programm biex jerġaʼ jsir il-​bini mill-​ġdid. Ix-​Xhieda li kellhom l-​esperjenza fil-​bini żaru kull dar u Sala tas-​Saltna biex jaraw kemm ġarrbu ħsarat. Sa llum, saru t-​tiswijiet fuq xi 258 dar u reġgħu nbnew 172 dar. Ukoll, id-​19-il Sala tas-​Saltna li ġarrbu l-​ħsara qed jerġgħu jinbnew.

Anzjan f’kongregazzjoni waħda fl-​istat taʼ Yucatán tqanqal biex jgħid: “Kont qrajt fil-​pubblikazzjonijiet tagħna dwar ix-​xogħol li jsir biex tingħata għajnuna f’każ taʼ diżastru f’pajjiżi oħra. Madankollu, hi xi ħaġa differenti ħafna li tara dan b’għajnejk stess. Il-​fidi tiegħi u taʼ ħafna aħwa oħra ssaħħet meta rajna b’liema ħeffa u interess ngħatajna għajnuna mill-​organizzazzjoni taʼ Jehovah u ħutna l-​għeżież.”

Waħda mara qalet: “Mhux li kien il-​knisja tiegħi tat l-​għajnuna bħalma tajtu intom ix-​Xhieda.” U mara oħra, li ġiet salvata mix-​Xhieda, qalet: “Grazzi għax-​Xhieda taʼ Jehovah, m’aħniex mejtin. Urewna mħabbithom billi meta darna kienet taħt l-​ilma huma rriskjaw ħajjithom biex isalvawna.”

Tempesta Tolqot il-​Korea

Fil-​31 t’Awissu u l-​1 taʼ Settembru, 2002, it-​Tempesta Rusa laqtet parti kbira mill-​Korea. Song-pil Cho, li jaqdi bħala anzjan f’kongregazzjoni, qal: “Kont qisni qiegħed nieħu doċċa. U x-​xita baqgħet nieżla, u nieżla, u nieżla.” Niżlet iktar minn 870 millimetru xita f’inqas minn 24 siegħa​—l-​iktar darba li qatt niżlet xita f’ġurnata waħda f’dan il-​post.

Skond The Korea Herald, mal-​ġens kollu għerqu xi 28,100 dar u 849.87 kilometru kwadru għelieqi. Xi 70,000 ruħ kellhom bilfors jiġu evakwati. It-​tempesta qatlet 301,000 annimal tal-​merħliet, għarrqet 126 vapur, u waqqgħet mijiet t’arbli tad-​dawl. Iktar minn 180 ruħ ġew rapportati mejtin jew nieqsa. Fosthom kien hemm tnejn mix-​Xhieda taʼ Jehovah.

Bħalma ġara fl-​Ewropa u fil-​Messiku, ix-​Xhieda taʼ Jehovah aġixxew fil-​pront. Il-​kontribuzzjonijiet tax-​Xhieda bdew jaslu mill-​pajjiż kollu. Dawn kienu jinkludu ħwejjeġ, kutri, u bżonnijiet oħra. Xorta waħda, xi membri tal-​kongregazzjoni kienu jgħixu fl-​inħawi li spiċċaw imwarrba u iżolati. Xi toroq inqerdu għalkollox, u xi pontijiet tkissru. Ma kienx hemm elettriku jew servizz tat-​telefon. Allura, ġew organizzati xi gruppi biex imorru jfittxu lin-​nies bil-​mixi u jagħtu l-​għajnuna meħtieġa. Song-pil Cho, li ħadem maʼ wieħed mill-​gruppi li taw l-​għajnuna, jiddeskrivi post wieħed fejn għenu: “Sebaʼ pontijiet u biċċiet kbar mit-​triq kienu nqerdu għalkollox. Meta fl-​aħħar wasalna fiċ-​ċentru, kullimkien kont tara d-​djar li ġarrbu l-​ħsara jew li nqerdu. Kien hemm riħa tinten pesta, u l-​annimali mejtin kont tarahom maʼ kullimkien. Imma kemm fraħna meta ltqajna mas-​sitt aħwa Kristjani tagħna! Kienu tilfu kulma kellhom materjalment, imma kollha kienu għadhom qawwijin u sħaħ.”

Fil-fatt, ix-​Xhieda taʼ Jehovah kienu preparati sew għad-​diżastru. Peress li huma mdorrijin bl-​għargħar fl-​istaġun tal-​monsun, il-​Kumitat Reġjonali tal-​Bini tagħhom fl-​inħawi taʼ Seoul kien diġà beda jorganizza l-​għajnuna għal diżastru li setaʼ jseħħ. Mill-​1997, għamel sessjonijiet taʼ taħriġ kull sena sabiex il-​volontieri jkunu lesti biex jagħtu l-​għajnuna jekk tinqalaʼ xi emerġenza.

Fit-2 taʼ Settembru, il-​ħaddiema mill-​kumitat li jagħtu l-​għajnuna waslu fil-​belt taʼ Kangnŭng, li tinsab mal-​kosta tal-​lvant, u waqqfu l-​kwartieri ġenerali fis-​Sala taʼ l-​Assemblea tax-​Xhieda taʼ Jehovah lokali. X’kienet l-​ewwel prijorità? Li jagħtu ilma nadif lil dawk li salvaw. Meta jkun hemm għargħar qawwi, il-​kanen taʼ l-​ilma ġeneralment iġarrbu l-​ħsara; l-​ilma taʼ l-​għargħar ikun imniġġes ħafna. Il-​kumitat ħejja trakkijiet kbar bit-​tankijiet mimlijin bl-​ilma biex jintbagħtu fl-​inħawi li ġew effettwati.

Wara li l-​ilma taʼ l-​għargħar ibatti, kollox jispiċċa mgħotti b’tajn oħxon li jinten. Minkejja dan, ġie żviluppat mod effettiv għat-​tindif. Peress li kważi d-​djar kollha fl-​inħawi huma magħmulin mis-​siment, il-​kmamar tagħhom jitqaxxrulhom il-​karta taʼ mal-​ħajt u l-​linolju taʼ maʼ l-​art u jiġu mlaħalħin bl-​ilma bi pressa qawwija.

L-ilma taʼ l-​għargħar iħassar kważi l-​apparat kollu li jaħdem bl-​elettriku. Madankollu, jekk fi ftit jiem elektrixin kwalifikat iżarma l-​apparat bħal xi friġġ jew xi bojler, u mbagħad inaddafhom sew, inixxifhom, u jerġaʼ jwaħħalhom f’posthom, f’ħafna każi dawn jibqgħu jaħdmu. Il-​Kumitat Reġjonali tal-​Bini huwa organizzat biex jagħmel xogħlijiet bħal dawn. Il-​bojlers li ma jkollhomx għalfejn jinbidlu jintużaw biex inixxfu d-​djar. Dan il-​proċess jieħu bejn ħmistax u tliet ġimgħat.

Il-ħwejjeġ u l-​kutri li ssirilhom il-​ħsara minħabba l-​ilma taʼ l-​għargħar ukoll iridu jinħaslu sew fi żmien ftit jiem sabiex ikunu jistgħu jibqgħu jintużaw. Volontieri minn kongregazzjoni lokali tax-​Xhieda taʼ Jehovah għenu biex jiġbru l-​affarijiet li tħammġu taʼ ħuthom Kristjani. Kienet biċċa xogħol diffiċli biex ineħħu t-​tajn li kien daħal sew fil-​ħwejjeġ​—u l-​ħasil kellu jsir bl-​idejn f’nixxiegħa taʼ ilma verament kiesaħ. Wara li ġurnalist sar jaf b’dan ix-​xogħol imqanqal mill-​imħabba, ġie pubblikat ritratt kbir fil-​gazzetta lokali li kien juri lix-​Xhieda jagħmlu dan ix-​xogħol.

L-għargħar diżastruż li seħħ fl-​Ewropa, fl-​Amerika taʼ Fuq, u l-​Asja qered id-​djar, il-​proprjetà, u l-​ħajjiet taʼ ħafna bnedmin innoċenti. Għalkemm dawn il-​ġrajjiet huma verament traġiċi, huma komuni fl-​“aħħar” taʼ din is-​sistema dinjija, li huwa karatterizzat minn “żmien iebes.” (2 Timotju 3:1) Dawn id-​diżastri jistgħu wkoll iservu bħala tfakkira drammatika taʼ dan il-​fatt: Il-​Kristjani veri jħobbu lil xulxin u lil ġarhom. Imħabba mhix egoista bħal din hija xi ħaġa li ebda maltempata ma tistaʼ tkissirha.

[Stampa f’paġna 18]

IL-​ĠERMANJA​—Dar meqruda mill-​maltemp

[Stampi f’paġna 19]

IL-​ĠERMANJA​—Iktar minn 2,000 volontier taw l-​għajnuna fil-​pront

[Stampi f’paġna 20]

L-​AWSTRIJA​—Isewwu s-​Sala tas-​Saltna tagħhom f’Ottensheim

Xellug: Grupp taʼ volontiera jerġgħu lura minn Au, fejn għenu lix-​Xhieda lokali u lill-​ġirien tagħhom

[Stampi f’paġna 21]

IL-​MESSIKU​—Lemin: Kumitat li joffri l-​għajnuna jipprovdi l-​ilma tajjeb għax-​xorb lil dawk li salvaw mill-​maltemp;

Taħt: Jibnu dar mill-​ġdid

[Stampi f’paġna 23]

KOREA​—Mix-​xellug għall-​lemin: Parti mgħarrqa minn belt; tindif bl-​ilma bi pressa qawwija; ħasil tal-​ħwejjeġ f’nixxiegħa fil-​qrib