“Ġeħova, Sibtni!”

Kif rakkontata minn Nelly Lenz

“Intom ix-​Xhieda taʼ Ġeħova?” Din il-​mistoqsija għamiltha lil żewġt irġiel li ġew id-​dar tagħna. “Iva,” wiġbuni. “Jien ukoll!” għedtilhom. Kelli biss 13-il sena u ma kontx nattendi l-​laqgħat fis-​Sala tas-​Saltna. Il-​ġenituri tiegħi ma kinux Xhieda taʼ Ġeħova. Allura, għala għedtilhom li jien waħda minnhom?

KIEKU ma kienx għax-​Xhieda taʼ Ġeħova, jaf lanqas biss twilidt. Ommi ħarġet tqila bija meta kienet tgħix f’Montreal, Quebec, il-​Kanada. Kien għad għandha 17-il sena. Il-​familja tagħha għamlitilha pressjoni kbira biex tagħmel abort, u hi aċċettat.

Ommi riedet tieħu ġurnata franka mix-​xogħol biex tmur tagħmel l-​abort. Milli jidher, il-​mara li kienet timpjegaha, li kienet waħda mix-​Xhieda taʼ Ġeħova, saret taf għala ommi ma riditx tidħol xogħol. Fil-​qosor, hi qalet lil ommi kemm il-​ħajja kienet rigal prezzjuż. (Salm 139:​13-16) Fit-​triq lejn il-​klinika, ommi qagħdet taħseb fuq dak li kienet qaltilha dik li kienet timpjegaha u ddeċidiet li ma tagħmilx l-​abort. Wara li twilidt fl-​1964, ommi daħħlitni f’orfanatrofju.

L-​Ewwel Kuntatt li Kelli mal-​Verità tal-​Bibbja

Meta kelli madwar sentejn, ommi u r-​raġel li kienet għadha kif iżżewġet ħarġuni mill-​orfanatrofju. Waqt li konna noqogħdu f’belt jisimha Sainte-Marguerite-du-Lac-Masson bdew jistudjaw il-​Bibbja max-​Xhieda taʼ Ġeħova u jattendu l-​laqgħat tal-​kongregazzjoni. Iżda ftit wara morna noqogħdu f’Boisbriand, u l-​ġenituri tiegħi ma baqgħux jistudjaw.

Ftit tas-​snin wara, reġgħu bdew jistudjaw. Kont noqgħod nismaʼ x’kien jintqal dwar it-​tama tal-​Bibbja li l-​art għad tkun magħmula ġenna. (Luqa 23:43) Bdejt insir inħobb ħafna lil Ġeħova.

Iżda, darba minnhom ommi qaltli li kienu waqfu jistudjaw max-​Xhieda, u li ma konniex se mmorru iżjed is-​Sala tas-​Saltna. Għall-​ewwel ħadt pjaċir. Bħala tifla taʼ tmien snin, xi drabi kont nara l-​laqgħat naqra twal. Iżda, dik il-​lejla xtaqt nitkellem maʼ Ġeħova fit-​talb, u bżajt li ma kienx se jismagħni.

Il-Ħadd taʼ wara, rajt lill-​ġirien tagħna, li kienu Xhieda taʼ Ġeħova, ħerġin biex imorru s-​Sala tas-​Saltna għal-​laqgħa tagħhom. Jien bdejt nibki u għedt lil Alla, “Għala t-​tfal tagħhom jistgħu jmorru l-​laqgħat u jien ma nistax?” Minkejja dan, il-​kliem taʼ Salm 33:18 kien se jitwettaq: “Ara, għajnejn il-​Mulej fuq dawk li jibżgħu minnu, fuq dawk li jittamaw fit-​tjieba tiegħu.”

Nerġaʼ Nibda Mmur is-​Sala tas-​Saltna

Wara tliet ġimgħat, mort għand il-​ġirien tagħna u għedt lill-​omm, li kien jisimha Lilianne, li ridt nattendi l-​laqgħat. Lilianne spjegatli li dan kien impossibbli peress li ommi ma riditx li jkollha x’taqsam max-​Xhieda taʼ Ġeħova. Iżda jien bqajt ninsisti. Għalhekk ħaditni d-​dar u staqsiet lil ommi jekk kinitx tħallini mmur magħhom. B’sorpriża kbira għalija, ommi aċċettat. Hi qalet li mil-​laqgħat stajt nitgħallem prinċipji tajbin. B’hekk, bdejt immur il-​laqgħa kull nhar taʼ Ħadd.

Għal madwar tliet snin, stajt nattendi l-​laqgħat tal-​kongregazzjoni. Iżda meta għalaqt 11-il sena, il-​ġenituri tiegħi ddivorzjaw, u jien u ommi morna noqogħdu xi mkien ieħor. Għal darb’oħra, tlift kull kuntatt max-​Xhieda taʼ Ġeħova.

Laqgħa Mhix Mistennija

Darba minnhom kont bil-​qiegħda fuq it-​taraġ taʼ barra tad-​dar tagħna meta żewġ Xhieda​—Eddie Besson u Don Fisher—avviċinawni u staqsewni jekk il-​ġenituri tiegħi kinux id-​dar. Meta għedtilhom li ma kinux id-​dar, dawn daru biex jitilqu. Iżda jien tlaqt niġri nilħaqhom, u saret il-​konversazzjoni li rrakkontajt fil-​bidu.

Stajt nifhem għala ż-​żewġt irġiel baqgħu skantati meta semgħuni ngħid li jien kont waħda mix-​Xhieda taʼ Ġeħova. Spjegajtilhom is-​sitwazzjoni tiegħi u tlabthom jerġgħu jiġu fil-​għaxija. X’ħin għedt lil ommi li x-​Xhieda kienu se jiġu jżuruna, hi rrabjat ħafna u qaltli li ma kinitx se ddaħħalhom. Fil-​fatt, għamlet il-​ħsieb li titlaq ’il barra qabel ma jaslu. Bid-​dmugħ f’għajnejja, tlabt lil ommi biex ma toħroġx. Sewwasew kif kienet qed tlesti biex titlaq, daqqet il-​qanpiena tal-​bieb, u ġie Eddie Besson. Immaġinaw il-​ferħ tiegħi meta ommi aċċettat studju tal-​Bibbja!

Fl-aħħar stajt nerġaʼ nibda nattendi l-​laqgħat! Madankollu, inqas minn sena wara ommi reġgħet waqfet tistudja. Din id-​darba, ma ħallitnix ikolli kuntatti max-​Xhieda u rmiet il-​pubblikazzjonijiet kollha tax-​Xhieda taʼ Ġeħova li setgħet issib. Imma rnexxieli naħbi Bibbja, ktieb taʼ l-​għanjiet, żewġ volumi tat-​Torri taʼ l-​Għassa, żewġ Yearbooks of Jehovah’s Witnesses, u l-​ktieb intitolat Il-​Verità li Twassal għal Ħajja Eterna.a Fl-​aħħar studju tiegħi staqsejt lil Eddie Besson xi stajt nagħmel, peress li kont inħobb ħafna lil Ġeħova. Hu inkuraġġieni biex nistudja waħdi u nitlob spiss. Assigurani li Ġeħova kien se jieħu ħsiebi. Jien kelli biss xi 14-il sena.

Nikkonduċi l-​“Laqgħa” Għalija

Minn dakinhar ’il quddiem, kull nhar taʼ Ħadd kont nidħol fil-​kamra tiegħi u nimmaġina li kont qiegħda l-​laqgħa. Kont inkanta l-​għanja “Ibqaʼ Għożż ir-​Rigal!” biex nibda u nispiċċa l-​laqgħa, għax kienet l-​unika għanja tas-​Saltna li stajt niftakar. Sal-​ġurnata taʼ llum, għadni ma nistax inkanta din l-​għanja mingħajr ma ninfaqaʼ nibki. Kont nistudja wkoll artiklu tat-​Torri taʼ l-​Għassa miż-​żewġ volumi li kelli. Kont intemm il-​“laqgħa” tiegħi b’talba. Għalhekk, għalkemm ma kontx għadni nassoċja max-​Xhieda, ħassejt li Ġeħova kien viċin tiegħi.

Meta għalaqt 17-il sena, jien u ommi morna noqogħdu Montreal. Dawk kienu snin diffiċli, għax fid-​dar tagħna ma kinitx tirrenja l-​imħabba.

Misjuba!

Darba minnhom ommi aċċettat il-​ktieb Int Tistaʼ Tgħix Għal Dejjem Fil-​Ġenna Fuq L-​Art mingħand ix-​Xhieda taʼ Ġeħova. Meta mort lura d-​dar, rajtu fuq il-​mejda u bdejt inqalleb fih. Meta rajt li kien fih l-​isem t’Alla, Ġeħova, bdejt nibki u f’qalbi tlabt, “Ġeħova, sibtni!”

Jien ridt nikkuntattja lil ħuti Kristjani. Iżda kif? Ommi qaltli li forsi wieħed mill-​ġirien kien Xhud taʼ Ġeħova. Għalhekk, jien u sejra x-​xogħol mort għand dan il-​ġâr u daqqejt il-​qanpiena. Ġie jiftaħ il-​bieb raġel nofsu rieqed. Kif baqaʼ skantat meta għedtlu li jien kont waħda mix-​Xhieda taʼ Ġeħova u li ridt nitgħammed! Hu rranġali biex nistudja l-​Bibbja m’oħt Kristjana jisimha Josée Miron. Iżda għal darb’oħra ommi bdiet topponi u ma riditnix nistudja l-​Bibbja. Qaltli li biex insir Xhud ridt nistenna sakemm nagħlaq 18-il sena.

Ħajja tal-​Familja bi Prezz?

L-​imgħallem induna li fid-​dar is-​sitwazzjoni tiegħi kienet sejra mill-​ħażin għall-​agħar. Spiss kien jistidinni biex inqattaʼ xi ħin miegħu u maʼ martu fi tmiem il-​ġimgħa. Peress li jien inħobb iż-​żwiemel, spiss konna mmorru flimkien nirkbu ż-​żwiemel. Kont inħoss li għalija l-​imgħallem u martu kienu qishom il-​ġenituri tiegħi.

Darba minnhom l-​imgħallem qalli li hu u l-​mara tiegħu kienu jħobbuni ħafna u li riduni mmur ngħix magħhom. Kien qed joffrili xi ħaġa li dejjem xtaqt​—familja li tħobbni. Iżda kien hemm kundizzjoni waħda​—ridt nieqaf nassoċja max-​Xhieda taʼ Ġeħova. Tawni ġimgħa biex naħseb dwar l-​offerta li għamluli, iżda jien lanqas ġurnata ma kelli bżonn. Tajthom ir-​risposta tiegħi mill-​ewwel. Ġeħova qatt ma kien abbandunani, u jien ma kontx se nabbandunah.

Is-​Servizz Tiegħi lil Alla

Minħabba l-​inkwiet li kelli d-​dar mort noqgħod maʼ missieri tar-​rispett. Hu inkuraġġieni biex inkompli nistudja, u fis-​17 taʼ Diċembru, 1983, fl-​età taʼ 19-il sena, tgħammidt. Kont wisq ferħana meta rajt lil Eddie Besson dakinhar tal-​magħmudija tiegħi. Issa ma kellux l-​iċken dubju f’moħħu li jien kont waħda mix-​Xhieda taʼ Ġeħova!

Madankollu, wara li tgħammidt, l-​attitudni taʼ missieri tar-​rispett inbidlet. Kulmeta kien jarani nitlob, kien jibda jitkellem jgħajjat u anki jwaddabli l-​affarijiet! Ukoll insista li nkompli l-​edukazzjoni sekulari tiegħi. Madankollu, dan kien se jfixkilni fil-​mira li kelli li nsir pijuniera, evanġelizzatriċi full-time. Ma damx ma qalli biex nitlaq mid-​dar. Tani ċekk taʼ 100 dollaru Kanadiż (madwar Lm25) u qalli li meta nasal biex insarrfu nkun naf li Ġeħova ma kienx qed jieħu ħsiebi.

Jien sirt pijuniera fl-​1 taʼ Settembru, 1986 u għad għandi dak iċ-​ċekk​—mhux imsarraf​—sal-​ġurnata taʼ llum! Xi drabi mingħajr karozza kien diffiċli li nagħmel ix-​xogħol taʼ pijuniera f’postijiet fil-​kampanja, iżda xi membri tal-​kongregazzjoni lokali tawni l-​appoġġ u l-​għajnuna tagħhom.

Wara xi żmien, iltqajt maʼ raġel Kristjan qalbu tajba jismu Ruben Lenz u fl-​1989 iżżewwiġna. Bħalissa, Ruben qed jaqdi bħala anzjan tal-​kongregazzjoni f’Milton, Ontario, il-​Kanada, fejn ilna noqogħdu mill-​2002. Iż-​żwieġ tagħna kien barka mill-​akbar fost il-​barkiet kollha li Ġeħova tefaʼ fuqi. Bqajt naqdi fis-​servizz full-time sa l-​1993, meta twieldet l-​ewwel tarbija tagħna, Erika. Ftit iktar minn tliet snin wara, kellna tifel jismu Mika. Wara snin twal taʼ solitudni, Alla Ġeħova berikni b’mod għani u tani familja li tħobbu daqs kemm inħobbu jien.

Għalkemm għal xi żmien meta kont qed nikber kont mifruda min-​nies taʼ Ġeħova, qatt ma neħħejt it-​tama tiegħi f’Alla u bqajt inżomm mat-​tama taʼ ħajja taʼ dejjem f’Ġenna taʼ l-​art. (Ġwanni 3:​36) Kemm jien grata li Ġeħova ‘sabni!’

[Nota taʼ taħt]

[Stampa f’paġna 23]

Riekba fuq iż-​żiemel taʼ l-​imgħallem tiegħi

[Stampa f’paġna 23]

Nelly Lenz maʼ żewġha, Ruben, u t-​tfal, Erika u Mika