Iż-​Żgħażagħ Jistaqsu . . .

X’Jiġri jekk Jgħidlek Le?

KONT tqisu bħala ħabib. Imma mbagħad laqtek b’mod differenti. Forsi kienu l-​manjieri tajbin tiegħu, jew il-​mod kif tbissimlek meta kien ikellmek, li ġibduk lejh. Kien x’kien il-​każ, għadda ż-​żmien u ma wera ebda interess romantiku fik. Għalhekk int iddeċidejt li tistaqsih jekk hu xtaqx ikun iktar minn sempliċi ħabib. B’diżappunt kbir għalik, bil-​ħlewwa imma b’mod deċiż qallek le.a

Naturalment, tħossok imweġġgħa. Imma tagħmilhomx bi kbar; ipprova żomm ħarsa xierqa. Iva, żagħżugħ qal li m’huwiex interessat f’relazzjoni romantika miegħek. Ftakar, id-​deċiżjoni tiegħu ma tbiddilx il-​valur tiegħek bħala persuna, u lanqas ma tfisser li oħrajn mhux se jkomplu jħobbuk u jirrispettawk. Fil-​fatt, id-​deċiżjoni tiegħu forsi m’għandhiex x’taqsam maʼ dak li jaħseb dwarek bħala persuna imma għaliex għandu miri persunali u prijoritajiet differenti minn tiegħek.

Jekk int Kristjana, forsi tistaʼ tiftakar ukoll li ‘Alla mhux inġust biex jinsa għemilek u l-​imħabba li wrejt għal ismu.’ (Ebrej 6:​10) Sonjab tispjega b’dan il-​mod: “Int għadek taʼ valur. Int tistaʼ tkun t’użu għal Ġeħova bħala persuna mhux miżżewġa.” Ladarba l-​Iktar Għoli u oħrajn iqisuk bħala prezzjuża, għala għandek titlef ir-​rispett lejk innifsek?

Forsi xorta tħoss li ġarrabt falliment jew tibżaʼ li forsi m’intix tajba għaż-​żwieġ. Imma għax m’intix tajba għal dan iż-​żagħżugħ ma jfissirx li m’intix se tkun tajba għal xi ħaddieħor. (Mħallfin 14:3) Għalhekk, minflok ma tqis it-​tfittxija tiegħek għal sieħeb tajjeb bħala falliment, agħraf li l-​isforzi tiegħek irriżultaw f’benefiċċju: Int tgħallimt li dan iż-​żagħżugħ mhux sieħeb tajjeb għalik. Għala ngħidu hekk?

Hu Kien Tajjeb Għalik?

Il-​Bibbja tikkmanda lill-​irġiel miżżewġin biex “iħobbu lin-​nisa tagħhom, bħal ġisimhom stess.” (Efesin 5:​28) Tikkmanda wkoll lill-​irġiel biex ‘jonoraw’ lin-​nisa tagħhom. (1 Pietru 3:7) Issa f’dan il-​każ, iż-​żagħżugħ forsi japprezzak bħala ħabiba. Imma billi qallek le, sa ċertu punt wera li f’dan iż-​żmien hu mhux lest biex iħobbok u jonorak bħala martu. Kellu d-​dritt jieħu din id-​deċiżjoni. Ikkunsidra dan: Jekk iħossu hekk, ikun verament sieħeb tajjeb għalik? Immaġina kemm tkun imdejqa jekk tiżżewweġ lil xi ħadd li ma jħobbokx u ma jgħożżokx kif tidderieġi l-​Iskrittura!

Issa li t-​tamiet tiegħek għal relazzjoni romantika spiċċaw fix-​xejn forsi jkun t’għajnuna jekk terġaʼ tikkunsidra sew lil dan iż-​żagħżugħ. Kultant l-​infatwazzjoni tagħmik għal nuqqasijiet persunali jew spiritwali li forsi jkunu ovvji f’għajnejn ħaddieħor. Per eżempju, vera li ma kienx jaf bis-​sentimenti tiegħek għalih, jew kien hu stess li inkuraġġiek biex dawn is-​sentimenti jikbru billi baqaʼ jassoċja miegħek? Jekk taʼ l-​aħħar kien il-​każ, ma jindikax dan li hu mhux lest ikun raġel miżżewweġ Kristjan li juri konsiderazzjoni u empatija? Jekk iva, huwa tajjeb li sirt taf, għalkemm jistaʼ jkun taʼ wġigħ.

L-emozzjonijiet taʼ Marcia tqanqlu meta żagħżugħ beda juriha attenzjoni speċjali. Meta staqsietu dwar l-​intenzjonijiet tiegħu, hu qalilha li ma kienx interessat f’relazzjoni magħha. X’għenha tkampa mad-​diżappunt tagħha? Hi tgħid, “Billi ħsibt b’moħħi, mhux b’qalbi, stajt inkampa mas-​sentimenti tiegħi.” Billi ftakret f’dak li titlob il-​Bibbja mingħand irġiel miżżewġin hi rrealizzat li hu ma kienx jikkwalifika. Dan għenha tegħleb in-​niket tagħha.

Andrea kellha esperjenza simili maʼ raġel żagħżugħ. Maż-​żmien indunat li l-​azzjonijiet tiegħu lejha wrew nuqqas taʼ maturità. Saret taf li hu ma kienx lest għaż-​żwieġ, u hi grata li Ġeħova fetħilha għajnejha għal dan il-​fatt. Hi tgħid, “Jien nemmen li Ġeħova jistaʼ jipproteġik minn ċirkustanzi li jistgħu jweġġgħuk, imma int trid tafda Fih.” M’għandniex xi ngħidu, f’ħafna każi żagħżugħ jaġixxi kif suppost u jgħid le minħabba raġunijiet li huma taʼ min ifaħħarhom. Ikun xi jkun il-​każ, kif tistaʼ tkampa mas-​sentimenti li jirriżultaw?

X’Tistaʼ Tagħmel dwar is-​Sentimenti Tiegħek

Qalbek għandha mnejn teħtieġ iż-​żmien biex taċċetta l-​fatt li hu qallek le. L-​affezzjoni tiegħek għalih żviluppat biż-​żmien, u biex tonqos din l-​affezzjoni wkoll tirrikjedi ż-​żmien. Huwa rari li sentimenti romantiċi jistgħu jintfew b’xi swiċċ, bħal xi bozza. Forsi jkun hemm ġranet meta tħoss li ma tistax tikkontrollahom! Kun paċenzjuża miegħek innifsek. Mal-​mogħdija taż-​żmien, dawn is-​sentimenti jisparixxu. Imma jekk trid li dawn is-​sentimenti jisparixxu iktar malajr, evita affarijiet li jistgħu jkebbsuhom.

Per eżempju, toqgħodx tikkritika lilek innifsek billi teżamina kull kelma jew ġest li tkun għamilt meta rrivelajt is-​sentimenti tiegħek liż-​żagħżugħ. Jekk toqgħod taħseb dwar dan, għandek mnejn tispiċċa temmen li mhux vera ried jgħid le jew li jekk tipprova mod ieħor forsi tirnexxi. Aċċetta l-​fatt li ma tistax tbiddel dak li jħoss hu. X’aktarx li, anki kieku avviċinajtu b’mod differenti, it-​tweġiba tiegħu xorta kienet tkun le.

Il-fantasiji wkoll jistgħu jkunu taʼ ħsara. Tistaʼ tibda tpinġi stampa f’moħħok fejn it-​tnejn li intom tgħixu ferħanin flimkien għal dejjem. Dawn il-​fantasiji jistgħu jidhru li jserrħuk xi ftit, imma dawn m’humiex reali. Meta jieqfu, terġaʼ tħoss is-​sentimenti taʼ telfa u magħhom terġaʼ tħoss l-​uġigħ tiegħek. Dan iċ-​ċiklu taʼ ferħ u wġigħ li ma tkunx tistaʼ tissaporti jistaʼ jibqaʼ għaddej għal żmien twil sakemm ma tagħmilx sforz biex twaqqfu.

Stinka biex twarrab il-​fantasiji minn moħħok. Meta jibdew, qum u mur imxi mixja. Agħmel xi attività fiżika​—xi ħaġa biex tgħinek tbiddel il-​ħsibijiet tiegħek. Ikkonċentra fuq affarijiet li jibnuk, mhux affarijiet li jġagħluk tħossok dipressa. (Filippin 4:8) Dan jistaʼ jkun diffiċli għall-​ewwel, imma maż-​żmien tirbaħ il-​battalja u ssib il-​paċi.

L-appoġġ mill-​ħbieb tal-​qalb jistaʼ jgħinek. (Proverbji 17:17) Madankollu, Sonja tagħti din it-​twissija: “Mhux se jgħinek jekk l-​uniċi ħbieb tiegħek m’humiex miżżewġin, huma taʼ l-​istess età, u jixtiequ jiżżewġu. Għandek bżonn ukoll ħbieb akbar, li jistgħu jgħinuk tħares lejn l-​affarijiet b’mod xieraq.” U ftakar, hemm xi ħadd li jistaʼ jkun saħansitra taʼ iktar għajnuna biex tegħleb l-​uġigħ li qed tħoss.

Ġeħova​—Ħabib u Appoġġ

Meta raġel leali fiż-​żminijiet tal-​qedem ħassu diżappuntat, hu talab lil Ġeħova għall-​għajnuna. X’kien ir-​riżultat? Hu kiteb: “Meta joktor l-​hemm ġo qalbi, il-​faraġ tiegħek hennieli ruħi.” (Salm 94:19) Ġeħova se jfarrġek u jappoġġak ukoll jekk titolbu bil-​fidi. Andrea hekk għamlet. Hi tgħid, “It-​talb hu importanti ħafna biex jgħinek tegħleb l-​uġigħ u timxi ’l quddiem.” Bl-​istess mod, Sonja tgħid hekk dwar it-​talb, “Jgħinek tistma lilek innifsek u ma tiddependix fuq jekk oħrajn iridukx jew le.”

Ebda bniedem ma jistaʼ jifhem għalkollox is-​sentimenti tiegħek, imma Ġeħova jistaʼ. Hu ħalaq lill-​bnedmin biex jaqsmu l-​imħabba fiż-​żwieġ. Hu jaf il-​qawwa taʼ l-​attrazzjoni romantika, u jaf kif jikkontrollaha. Hu jistaʼ jgħinek tegħleb l-​uġigħ taʼ qalb kbir, għax l-​1 Ġwanni 3:​20 jgħid: “Alla hu akbar minn qlubna u jaf kollox.”

Żomm il-​Bilanċ

Iż-​żwieġ jistaʼ jkun sors taʼ ferħ kbir, imma m’huwiex l-​uniku sors. Dawk kollha li jaqdu lil Ġeħova jistgħu jesperjenzaw il-​ferħ, u l-​miżżewġin m’humiex l-​uniċi nies li jsibu dan il-​ferħ. F’ċerti aspetti, dawk li m’humiex miżżewġin għandhom ċerti vantaġġi li l-​miżżewġin m’għandhomx. Ma jsofrux it-​“tribulazzjoni f’laħamhom” imsemmija fl-​1 Korintin 7:​28. Din it-​tribulazzjoni tirreferi għall-​istress u l-​problemi li jesperjenzaw koppji miżżewġin. Uħud mhux miżżewġin għandhom ukoll iktar libertà persunali u jistgħu faċilment jużaw iktar minn ħajjithom fis-​servizz taʼ Ġeħova. B’hekk, il-​Bibbja tgħallem: “Min jiżżewweġ jagħmel sewwa, imma min ma jiżżewwiġx jagħmel aħjar.” (1 Korintin 7:​38) Anki jekk għandek xewqa kbira biex tiżżewweġ, jekk timmedita fuq dak li tgħallem il-​Bibbja tistaʼ tiġi megħjuna biex iżżomm il-​bilanċ u tagħmel l-​aħjar li tistaʼ fiċ-​ċirkustanzi preżenti tiegħek.

Bis-sinċerità kollha, xi ħbieb forsi jgħidulek, “Tinkwetax, xi darba tiltaqaʼ maʼ xi ħadd meraviljuż.” U huwa minnu li għax żagħżugħ wieħed qallek le ma jfissirx li qatt ma se tiżżewweġ. Però, żagħżugħa Kristjana jisimha Candace tirraġuna b’dan il-​mod: “Jien nafda f’Ġeħova. Ma nistenniex li se jagħtini sieħeb biex jagħmilni ferħana. Imma naf li se jagħtini dak li neħtieġ biex nimla dan il-​vojt.” Billi taħseb b’mod pożittiv għenha biex tegħleb diżappunt romantiku.

F’din id-​dinja, spiss ifallu attentati biex tinbeda relazzjoni romantika, imma dan jistaʼ jingħad ukoll għal ħafna żwiġijiet. Jekk tafda f’Ġeħova u tobdi l-​pariri tiegħu, hu jistaʼ jgħinek tbiddel id-​diżappunt f’ferħ. Jistaʼ jkollok esperjenza bħal dik tas-​Sultan David, li kiteb: “Sidi, quddiemek hi x-​xewqa kollha tiegħi; it-​tnehid tiegħi m’hux moħbi minnek. Għax fik, Mulej, jien nittama; int li twieġeb, Sid u Alla tiegħi.”​—Salm 38:​10, 16 (38:​9, 15, NW).

[Noti taʼ taħt]

[Stampi f’paġna 20]

Ħu vantaġġ mill-​għajnuna li jipprovdi Alla