Il-​Ħarsa tal-​Bibbja

Għandhom l-​Ikoni Jintużaw fil-​Qima?

KULL 15 t’Awissu, fuq il-​gżira Griega taʼ Tínos issir ċelebrazzjoni reliġjuża kbira. Eluf taʼ nies jinġabru biex jagħtu venerazzjoni lil Marija, omm Ġesù, u l-​ikona tagħha, li jintqal li għandha qawwiet mirakolużi.a Xogħol taʼ referenza mill-​Knisja Griega Ortodossa jispjega: “B’fidi u devozzjoni speċjali aħna nonoraw l-​Iktar Qaddisa Theotokos, Omm il-​Mulej tagħna, u nitolbu għall-​protezzjoni, il-​kenn, u l-​għajnuna tagħha. Aħna nfittxu l-​għajnuna tal-​Qaddisin li jagħmlu xogħol taʼ l-​għaġeb​—irġiel u nisa Qaddisin​—għall-​bżonnijiet spiritwali u fiżiċi tagħna . . . B’devozzjoni kbira nbusu u nqimu r-​relikwi mqaddsa tagħhom u l-​ikoni sagri.”

Ħafna oħrajn li jgħidu li huma Kristjani jappartjenu lil denominazzjonijiet li jieħdu sehem f’atti simili taʼ qima. Iżda huwa l-​użu taʼ l-​ikoni fil-​qima appoġġat mit-​tagħlim tal-​Bibbja?

Il-​Kristjani tal-​Bidu

Ikkunsidra x’ġara madwar is-​sena 50 E.K. meta l-​appostlu Pawlu żar Ateni, belt fejn kien hemm enfasi kbira fuq l-​użu tax-​xbihat fil-​qima. Pawlu spjega lil dawk f’Ateni li Alla “ma jgħammarx f’tempji magħmulin bl-​idejn, lanqas m’hu moqdi minn idejn il-​bnedmin bħallikieku jeħtieġ xi ħaġa . . . Għalhekk, . . . m’għandniex nimmaġinaw li d-​Divin hu bħad-​deheb jew il-​fidda jew il-​ġebel, bħal xi ħaġa skolpita bl-​arti u bl-​invenzjoni tal-​bniedem.”​—Atti 17:​24, 25, 29.

Attwalment, twissijiet bħal dawn dwar l-​użu taʼ l-​idoli huma komuni fl-​Iskrittura Griega Kristjana, imsejħa wkoll it-​Testment il-​Ġdid. Per eżempju, l-​appostlu Ġwanni wissa lill-​Kristjani: “Ħarsu ruħkom mill-​idoli.” (1 Ġwanni 5:21) Pawlu kiteb lill-​Korintin: “Xi ftehim għandu t-​tempju t’Alla maʼ l-​idoli?” (2 Korintin 6:16) Qabel ma saru Kristjani, ħafna wħud fl-​ewwel seklu kienu jużaw ix-​xbihat reliġjużi fil-​qima tagħhom. Pawlu fakkar lill-​Kristjani f’Tessalonika dwar dan meta kiteb: “Dortu lejn Alla mill-​idoli tagħkom biex titjassru għal Alla ħaj u veru.” (1 Tessalonikin 1:9) Bla dubju, dawk il-​Kristjani kien se jkollhom l-​istess ħarsa dwar l-​ikoni bħalma kellhom Ġwanni u Pawlu.

Il-​“Kristjani” Jibdew Jużaw l-​Ikoni

L-​Encyclopædia Britannica tgħid “li matul l-​ewwel tliet sekli tal-​Knisja Kristjana, . . . ma kienx hemm arti Kristjana, u ġeneralment il-​knisja opponiet b’kemm kellha saħħa. Per eżempju, Klement taʼ Lixandra kkritika l-​arti reliġjuża (pagana) minħabba li kienet tinkuraġġixxi lin-​nies biex iqimu dak li nħoloq minflok lill-​Ħallieq.”

Allura, l-​użu taʼ l-​ikoni kif sar daqshekk popolari? Il-​Britannica tkompli: ‘Lejn in-​nofs tat-​tielet seklu tfaċċat l-​arti tat-​tpinġija u bdiet tintuża u tiġi aċċettata fil-​Knisja Kristjana, iżda kien hemm oppożizzjoni qawwija f’xi kongregazzjonijiet. Kien biss meta l-​Knisja Kristjana saret il-​knisja imperjali Rumana taħt l-​Imperatur Kostantinu fil-​bidu tar-​rabaʼ seklu li l-​istampi bdew jintużaw fil-​knejjes u bdew jiġu aċċettati bħala prattika komuni fil-​Knisja “Kristjana.”’

Prattika komuni fost il-​ħafna pagani li bdew jgħidu li huma Kristjani kienet li jqimu l-​pitturi taʼ l-​imperatur. “Fi qbil mal-​qima taʼ l-​imperatur,” jispjega John Taylor fil-​ktieb tiegħu Icon Painting, “in-​nies kienu jqimu l-​pittura tiegħu mpinġija fuq il-​kanvas jew l-​injam, u din il-​prattika wasslet malajr għall-​venerazzjoni taʼ l-​ikoni.” Għalhekk, il-​qima pagana taʼ l-​istampi nbidlet bil-​venerazzjoni taʼ l-​istampi taʼ Ġesù, Marija, l-​anġli, u l-​“qaddisin.” Dawn l-​istampi li bdew jintużaw fil-​knejjes bdew bil-​mod il-​mod jidħlu fid-​djar taʼ miljuni taʼ nies, u bdew jiġu meqjumin hemmhekk ukoll.

Il-​Qima “bl-​Ispirtu u l-​Verità”

Ġesù qal lis-​semmiegħa tiegħu li l-​qaddejja t’Alla għandhom iqimuh “bl-​ispirtu u l-​verità.” (Ġwanni 4:24) Għalhekk, meta persuna sinċiera tfittex biex issir taf il-​verità dwar l-​użu taʼ l-​ikoni fil-​qima, din għandha ddur lejn il-​Kelma t’Alla biex issir taf sew dwar dan is-​suġġett.

Per eżempju, fil-​Bibbja nsibu dak li qal Ġesù: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.” (Ġwanni 14:6) Pawlu ddikjara li “hemm Alla wieħed, u medjatur wieħed bejn Alla u l-​bnedmin, Kristu Ġesù, bniedem,” u li “Kristu . . . jitlob bil-​ħniena għalina.” (1 Timotju 2:5; Rumani 8:​34) Dawn l-​irwoli taʼ Ġesù jieħdu tifsir iktar ċar meta naqraw li Kristu jistaʼ “jsalva għalkollox lil dawk li qed jersqu lejn Alla permezz tiegħu, għax hu dejjem ħaj biex jitlob bil-​ħniena għalihom.” (Ebrej 7:25) Għandna nitolbu lil Alla f’isem Ġesù Kristu. L-​ebda persuna oħra, u żgur li l-​ebda ikona bla ħajja, ma tistaʼ tissostitwih. Għarfien bħal dan mill-​Kelma t’Alla jistaʼ jgħin lil xi ħadd li qed ifittex il-​verità biex isib it-​triq ħalli jqim “lill-​Missier bl-​ispirtu u l-​verità” u jesperjenza l-​barkiet li jiġu minn dan il-​mod taʼ qima superjuri. Tabilħaqq, bħalma qal Ġesù, “il-​Missier qed ifittex nies bħal dawn biex iqimuh.”—Ġwanni 4:23.

[Noti taʼ taħt]

[Sors taʼ l-​Istampa f’paġna 20]

Boris Subacic/AFP/Getty Images