Lill-​Qarrejja Tagħna

MINN din il-​ħarġa ’l quddiem, se jkun hemm xi tibdil fil-​mod kif se jkun imqassam Stenbaħ! Għalkemm ċerti affarijiet se jkunu differenti, ħafna affarijiet se jibqgħu l-​istess.

Stenbaħ! għad għandu l-​istess għan li kellu għal ħafna għaxriet taʼ snin. Kif hemm spjegat f’paġna 4, “din ir-​rivista tiġi pubblikata għat-​tidwil tal-​familja kollha.” Stenbaħ! se jibqaʼ jinforma lill-​qarrejja tagħna u jżommhom konxji taʼ x’qed jiġri fid-​dinja madwarna billi jeżamina ġrajjiet fid-​dinja, jitkellem dwar nies taʼ diversi kulturi, jiddeskrivi l-​meravilji fil-​ħolqien, jiddiskuti s-​saħħa, jew jispjega x-​xjenza għal min m’huwiex midħla tagħha.

Fil-ħarġa tat-​22 t’Awissu, 1946, l-​Awake! wiegħed: “L-​għan ewlieni taʼ din ir-​rivista se jkun li żżomm kemm jistaʼ jkun mal-​verità.” Fi qbil maʼ dik il-​wegħda, Stenbaħ! dejjem ħabrek biex jippubblika informazzjoni li hija bbażata fuq il-​fatti. Sabiex dan ikun possibbli, isiru riċerki dettaljati għall-​artikli tiegħu, u dawn jiġu ċċekkjati bir-​reqqa sabiex jiġi żgurat li kollox huwa preċiż kif suppost. Imma dan il-​ġurnal wera wkoll kemm ‘iżomm mal-​verità’ b’mod tassew iktar importanti.

Stenbaħ! dejjem idderieġa lin-​nies lejn il-​Bibbja. Madankollu, b’seħħ minn din il-​ħarġa, Stenbaħ! se jkun fih ħafna iktar artikli bbażati mill-​Bibbja milli kellu qabel. (Ġwanni 17:17) Stenbaħ! se jkompli jkun fih artikli li juru kif il-​pariri prattiċi tal-​Bibbja jistgħu jgħinuna ngħixu ħajja li jkollha sinifikat u suċċess fiż-​żmien taʼ llum. Per eżempju, hemm ħafna gwida mill-​Bibbja provduta fis-​serje “Iż-​Żgħażagħ Jistaqsu . . . ” u “Il-​Ħarsa tal-​Bibbja,” li se jibqgħu jidhru regolarment f’dan il-​ġurnal. Barra minn hekk, Stenbaħ! se jibqaʼ jidderieġi lill-​qarrejja tiegħu lejn il-​wegħda fil-​Bibbja għad-​dinja l-​ġdida fil-​paċi li dalwaqt se tieħu post is-​sistema dinjija taʼ bla liġi li hawn bħalissa.​—Rivelazzjoni 21:3, 4.

X’se jkun hemm iktar differenti? B’seħħ minn din il-​ħarġa, Stenbaħ! se jiġi pubblikat darba fix-​xahar bil-​maġġorparti mit-​82 lingwa li bihom jiġi pubblikat (b’ħafna lingwi, qabel kien jiġi pubblikat darbtejn fix-​xahar).a Is-​sezzjoni “Ħarsa Lejn id-​Dinja,” li ilha tidher regolarment sa mill-​1946, se tibqaʼ tidher f’kull ħarġa imma se titnaqqas minn żewġ paġni għal paġna waħda. F’paġna 31 qed nintroduċu wkoll sezzjoni ġdida interessanti li se tidher regolarment u li jisimha “Int Kif Twieġeb?” Din x’se jkun fiha, u kif tistaʼ tużaha?

Ħu ftit ħin biex tagħti daqqa t’għajn f’paġna 31 taʼ din il-​ħarġa. Xi sezzjonijiet minn din il-​paġna se jolqtu lill-​qarrejja ż-​żgħar; oħrajn se jittestjaw il-​memorja taʼ studenti tal-​Bibbja li għandhom iktar esperjenza. Is-​sezzjoni “Meta fl-​Istorja?” se tgħinek tibni linja kronoloġika li turi meta għexu ċerti karattri Bibliċi u meta ġraw l-​iktar ġrajjiet importanti. Filwaqt li t-​tweġibiet għas-​sezzjoni “Minn Din il-​Ħarġa” se jkunu jistgħu jinkisbu hekk kif wieħed jaqra r-​rivista, it-​tweġibiet għall-​maġġorparti mill-​mistoqsijiet l-​oħra se jidhru fuq paġna speċifika fl-​istess ħarġa, u se jkunu stampati rashom ’l isfel. Għala ma tagħmilx ftit riċerka qabel ma taqra t-​tweġibiet, u mbagħad taqsam dak li tgħallimt m’oħrajn? Tistaʼ wkoll tuża dan l-​aspett ġdid, “Int Kif Twieġeb?” bħala bażi għal diskussjonijiet mill-​Bibbja fil-​familja jew fi grupp.

Xi 60 sena ilu, Stenbaħ! għamel din il-​wegħda: “Rigward is-​suġġetti diskussi, din ir-​rivista se tagħmel li tistaʼ biex tittratta l-​informazzjoni minn ħarsa globali iktar milli minn ħarsa lokali. Se tappella għal nies onesti minn kull pajjiż. . . . Il-​materjal u l-​kontenut tar-​rivista . . . se jkunu informattivi, edukattivi, u interessanti għal għadd kbir taʼ nies, kemm kbar kif ukoll żgħar.” Il-​qarrejja minn madwar id-​dinja kollha jaqblu li Stenbaħ! żamm dik il-​wegħda. Aħna niżgurawkom li hekk se jkompli jagħmel.

Il-​Pubblikaturi

[Nota taʼ taħt]

[Stampi f’paġna 3]

L-​isem The Golden Age li ngħata fl-​1919 inbidel għal Consolation fl-​1937, u għal Awake! fl-​1946

[Stampi f’paġna 4 ]

“Stenbaħ!” ilu għal żmien twil jidderieġi lill-​qarrejja lejn il-​Bibbja

[Sorsi]

Armamenti: U.S. National Archives photo; tifel bil-​ġuħ: WHO photo by W. Cutting