Il-​Ħarsa tal-​Bibbja

Hemm Alla Wieħed Biss li Hu Veru?

MOLEK, Għastarot, Bagħal, Dagon, Merodak, Żews, Erme, u Artemi huma ftit mill-​allat irġiel u nisa msemmijin b’isimhom fil-​Bibbja. (Levitiku 18:21; Mħallfin 2:13; 16:23; Ġeremija 50:2; Atti 14:12; 19:24) Però, Ġeħova biss huwa identifikat fl-​Iskrittura bħala Alla li Jistaʼ Kollox. F’għanja taʼ rebħa, Mosè dderieġa lill-​poplu tiegħu biex jgħanni: “Min hu bħalek, [“Ġeħova,” NW] fost l-​allat?”—Eżodu 15:11.

B’mod ċar, il-​Bibbja turi li Ġeħova hu ogħla mill-​allat l-​oħra kollha. Imma xi rwol għandhom dawn l-​allat li huma inqas minnu? Huma dawn, u għadd bla limitu t’allat oħra li ġew meqjumin tul iż-​żmien, allat veri li jiġu taħt Alla li Jistaʼ Kollox, Ġeħova?

Allat Immaġinarji

Il-​Bibbja tidentifika lil Ġeħova bħala l-​uniku Alla veru. (Salm 83:19 [83:​18, NW]; Ġwanni 17:3) Il-​profeta Isaija niżżel bil-​miktub kliem Alla stess meta qal: “Qabli qatt ma ssawwar xi alla, u lanqas warajja qatt ma jkun hemm. Jiena, jiena [“Ġeħova,” NW], u ħliefi m’hemmx salvatur.”—Isaija 43:​10, 11.

L-allat l-​oħra kollha m’humiex biss inferjuri għal Ġeħova. Ħafna drabi lanqas biss jeżistu—huma biss allat immaġinati mill-​bniedem. Il-​Bibbja tirreferi għal dawn l-​allat bħala “xogħol idejn il-​bniedem . . . li la jaraw, la jisimgħu, la jieklu u lanqas ixommu.” (Dewteronomju 4:28) Il-​Bibbja tgħallem ċar u tond li Ġeħova hu l-​uniku Alla veru.

Mhux taʼ b’xejn li l-​Iskrittura tagħti twissija qawwija kontra l-​qima lil xi alla ieħor jekk mhux lil Ġeħova. Per eżempju, fl-​ewwel wieħed mill-​Għaxar Kmandamenti li ngħataw lil Mosè, il-​ġens taʼ Iżrael tal-​qedem intqallu biex ma jqim lil ebda alla ieħor. (Eżodu 20:3) Għala?

L-ewwelnett, huwa insult kbir għall-​Ħallieq meta individwu jqim alla li lanqas biss jeżisti. L-​aduraturi taʼ dawn l-​allat foloz huma deskritti fil-​Bibbja bħala li “bidlu l-​verità t’Alla mal-​gidba u qiemu u taw servizz sagru lill-​ħolqien minflok lill-​Ħallieq.” (Rumani 1:25) Spiss dawn l-​allat immaġinarji huma rappreżentati minn idoli magħmulin minn materjali li jinsabu fin-​natura, bħall-​metall jew l-​injam. Ħafna allat huma marbutin maʼ ċerti aspetti tan-​natura, bħas-​sajjetti, l-​oċeani, u r-​riħ. Mela żgur li min iqim lil dawn l-​allat foloz ikun qed juri diżrispett kbir lejn Alla li Jistaʼ Kollox.

Il-Ħallieq ma jġerragħhomx lill-​allat foloz u l-​idoli tagħhom. Però, il-​kliem taʼ diżapprovazzjoni minn Alla hu primarjament dirett lill-​popli li għamlu dawn l-​allat foloz. Hu jesprimi s-​sentimenti tiegħu b’mod qawwi bil-​kliem: “L-​idoli tal-​ġnus m’humiex ħlief deheb u fidda, xogħol taʼ id il-​bniedem: għandhom il-​fomm, u ma jitkellmux; għandhom l-​għajnejn, u ma jarawx; għandhom il-​widnejn, u ma jisimgħux; anqas nifs ma għandhom fi mnifsejhom. Bħalhom ikunu dawk li jagħmluhom, u dawk kollha li jittamaw fihom.”—Salm 135:​15-18.

Hemm raġuni oħra għala l-​Bibbja tagħti twissija qawwija kontra l-​qima lejn xi ħaddieħor jew xi ħaġa oħra għajr Alla Ġeħova. Din il-​qima tkun ħela enormi taʼ ħin u sforz. Il-​profeta Isaija b’mod xieraq qal: “Min hu li jsawwar alla u jfassal xbieha tal-​fondut li ma tiswa għal xejn?” (Isaija 44:10) Il-​Bibbja tgħid ukoll li “kollha frugħa l-​allat tal-​popli.” (Salm 96:5) L-​allat foloz m’huma xejn, u min iqim lix-​xejn m’hu se jikseb xejn.

Ġesù, l-​Anġli, u x-​Xitan

Kultant l-​Iskrittura tirreferi għal persuni reali bħala allat. Però, jekk neżaminawh bir-​reqqa, it-​terminu “alla” f’dawn l-​okkażjonijiet ma jingħadx biex jirreferi għal dawn l-​individwi bħala li għandhom jiġu meqjumin daqslikieku kienu allat. Minflok, fil-​lingwi oriġinali li bihom inkitbet il-​Bibbja, it-​terminu “alla” kien jintuża wkoll biex jiddeskrivi individwu qawwi jew xi ħadd li hu divin jew marbut mill-​qrib m’Alla li Jistaʼ Kollox.

Per eżempju, xi versi fil-​Bibbja jirreferu għal Ġesù Kristu bħala alla. (Isaija 9:​5, 6 [9:​6, 7, NW]; Ġwanni 1:​1, 18) Ifisser dan li Ġesù għandu jingħata qima? Ġesù nnifsu qal: “Qim lil Ġeħova Alla tiegħek, u lilu biss agħti servizz sagru.” (Luqa 4:8) Jidher ċar li għalkemm Ġesù hu kbir fil-​qawwa u divin, il-​Bibbja ma ssemmix li għandu jingħata qima.

Anki l-​anġli jiġu msejħa “wħud bħal xi alla.” (Salm 8:6, 5, NW; Ebrej 2:7) Minkejja dan, imkien fl-​Iskrittura ma nsibu li l-​bnedmin huma inkuraġġiti jagħtu qima lill-​anġli. Fil-​fatt, f’okkażjoni minnhom, l-​appostlu Ġwanni, li kien imdaħħal fiż-​żmien, tant baqaʼ skantat bil-​preżenza t’anġlu li nxteħet f’riġlejh jagħtih qima. Però l-​anġlu wieġbu: “Oqgħod attent! Tagħmilx hekk! . . . Qim lil Alla.”—Rivelazzjoni 19:10.

L-appostlu Pawlu ddeskriva lix-​Xitan bħala “l-​alla taʼ din is-​sistema.” (2 Korintin 4:4) Bħala “l-​ħakkiem taʼ din id-​dinja,” ix-​Xitan inkuraġġixxa l-​qima t’għadd kbir t’allat foloz. (Ġwanni 12:31) Għalhekk, kull tip taʼ qima li jingħata lil allat magħmulin mill-​bniedem, fil-​fatt, hu qima li tingħata lil Satana. Imma Satana m’huwiex alla li jixraqlu l-​qima tagħna. Huwa ħakkiem li inkariga lilu nnifsu, wieħed li ħa l-​ħakma taħt idejh bla ebda jedd. Maż-​żmien, hu nnifsu, kif ukoll il-​forom kollha taʼ qima falza, se jiġu eliminati. Meta dan iseħħ, il-​bnedmin kollha—iva, il-​ħolqien kollu—se jirrikonoxxu għal dejjem li Ġeħova hu l-​uniku Alla ħaj u veru.—Ġeremija 10:10.

ĠIELI STAQSEJT?

◼ Il-​Bibbja x’tgħallem dwar il-​qima taʼ l-​idoli?​—Salm 135:​15-18.

◼ Għandhom Ġesù u l-​anġli jiġu meqjumin bħala allat?—Luqa 4:8.

◼ Min hu l-​uniku Alla veru?—Ġwanni 17:3.

[Stampi f’paġna 29]

Stampi mix-​xellug għal-​lemin: Marija, l-​Italja; alla tal-​qamħirrum tal-​Maja, il-​Messiku u l-​Amerika Ċentrali; Għastarot, Kangħan; idolu tas-​superstizzjoni, Sierra Leone; Budda, il-​Ġappun; Chicomecóatl, Azteki, il-​Messiku; il-​falkun Ħorus, l-​Eġittu; Żews, il-​Greċja

[Sors]

Alla tal-​qamħirrum, il-​falkun Ħorus, u Żews: Photograph taken by courtesy of the British Museum