Ikel taʼ Malajr għall-​Insetti

● L-​insetti jħobbu jieklu ikel li jinstab faċilment u li jkun fih ħafna kaloriji. Sors konvenjenti għalihom hu l-​wiċċ taʼ fjura. Bħall-​ħwienet li jbigħu ikel taʼ malajr, il-​fjuri jirreklamaw il-​preżenza tagħhom b’kuluri jgħajtu. Peress li jsibu l-​fjuri attraenti, l-​insetti jistrieħu fuq il-​fjuri, fejn ikunu jistgħu jieklu l-​polline jew jixorbu n-​nektar.

Peress li jkunu partikolarment bla saħħa wara lejl kiesaħ, dawn il-​ħlejjaq li għandhom demmhom kiesaħ ikollhom bżonn l-​enerġija tax-​xemx biex jiġu f’tagħhom. Ħafna fjuri joffru lill-​insetti dak kollu li għandhom bżonn—ikel nutrittiv u post fejn ikunu jistgħu jilagħqu x-​xemx. Ejja nagħtu titwila lejn eżempju familjari.

Il-​margerita hija fjura komuni li tikber fil-​biċċa l-​kbira mill-​Ewropa u l-​Amerika taʼ Fuq. Forsi ma tidhirx li hi speċjali, imma jekk tieħu l-​ħin biex tifliha, tara ħafna attività. Din il-​margerita toffri post ideali għall-​insetti biex jibdew il-​ġurnata. Il-​petali bojod jirriflettu s-​sħana tax-​xemx, u ċ-​ċentru safrani joffri post tajjeb taʼ mistrieħ fejn l-​insetti jkunu jistgħu jixorbu l-​enerġija tax-​xemx.a

Biex iż-​żjara tkun saħansitra iktar appetituża, iċ-​ċentru tal-​margerita hu mimli polline u nektar, ikel nutrittiv li jsaħħaħ lil ħafna insetti. X’post aħjar jistaʼ jsib insett biex ikollu kolazzjon tajjeb u jgawdi x-​xemx?

B’hekk, ħafna insetti differenti jistrieħu fuq il-​margeriti matul il-​ġurnata. Tistaʼ tara ħniefes, friefet kuluriti, spalluti, grillijiet, u dubbien taʼ kull tip. Naturalment, jekk m’intix wieħed li tosserva, forsi qatt ma tinnota dawn il-​“ħwienet affaxxinanti li jbigħu ikel taʼ malajr” lill-​insetti.

Għalhekk, meta terġaʼ tmur fil-​kampanja, għala ma tagħmilx sforz biex teżamina xi ftit minn dawn l-​ekosistemi tal-​margerita li ma jagħtux fl-​għajn? Jekk tagħmel hekk, l-​esperjenza x’aktarx li tkabbarlek l-​apprezzament tiegħek għall-​Ħallieq li ddisinjahom kollha.

[Nota taʼ taħt]