Kun Kuntent bil-Kulur tal-Ġilda Tiegħek
● Xi nies fl-Afrika, fin-Nofsinhar tal-Asja, fil-Karibew, u fil-Lvant Nofsani jassoċjaw kulur tal-ġilda iktar ċar mal-prosperità u mal-aħħar moda. Minħabba f’hekk, għadd konsiderevoli taʼ rġiel u nisa f’dawn il-postijiet jużaw prodotti biex jiċċaraw il-kulur tal-ġilda tagħhom—imma kultant saħħithom tħallas qares għal dan.
Xi kremi li jiċċaraw il-ġilda fihom l-idrokinone, kimika li tibbliċja u li tnaqqas il-produzzjoni tal-melanina, u b’hekk tnaqqas il-protezzjoni naturali tal-ġilda kontra r-raġġi ultravjola (UV) li jagħmlu l-ħsara. L-idrokinone jippenetra l-ġilda u jistaʼ jikkaġuna ħsara irriversibbli lit-tessuti li jgħaqqdu l-organi maʼ xulxin. Wieħed mir-riżultati hu x-xjuħija qabel il-waqt. Il-kimika tistaʼ wkoll tikkaġuna l-kanċer. Kremi oħrajn fihom il-merkurju, li hu sustanza velenuża oħra.
Barra minn hekk, l-użu kontinwu taʼ prodotti bħal dawn jistaʼ jikkaġuna raxxijiet li jisfiguraw, tebgħat koroh, u ġilda tant dgħajfa li ma tkunx tistaʼ tiġi meħjuta f’każ taʼ xi ferita. U jekk il-kimiċi f’xi wħud minn dawn il-kosmetiċi jidħlu fid-demm, jistgħu jagħmlu ħsara lill-fwied, lill-kliewi, jew lill-moħħ—saħansitra jistgħu jikkaġunaw ħsara kbira fl-organi.
Ironikament, filwaqt li xi nies li għandhom ġilda skura jridu jiċċarawha, ħafna nies li għandhom ġilda bajda jagħmlu minn kollox biex jismaru. M’għandniex xi ngħidu, li tesponi ruħek għax-xemx b’moderazzjoni jistaʼ jkun taʼ ġid għal saħħtek. Pereżempju, jistaʼ jgħin fil-produzzjoni tal-vitamina D. Imma li tesponi ruħek għax-xemx għal żmien twil, speċjalment meta x-xemx tkun fl-aqwa tagħha, jistaʼ jkun taʼ ħsara. Fil-fatt, meta l-ġilda tismar hija indikazzjoni li tkun diġà ġarrbet xi ħsara u li qed tipprova tipproteġi lilha nfisha milli tiġi esposta għal iktar raġġi UV li jagħmlu l-ħsara. Imma din il-protezzjoni hi limitata. Pereżempju, is-smurija fuq ġilda bajda tipprovdi protezzjoni kontra x-xemx taʼ mhux iktar minn factor erbgħa. Filwaqt li l-użu regulari taʼ kremi protettivi jistaʼ jgħin, ma jipprovdix protezzjoni sħiħa kontra l-ħsara lill-ġilda u ċerti kanċrijiet, inkluż il-melanoma.
B’hekk, l-Organizzazzjoni Dinjija tas-Saħħa tirrikkmanda “li jissaħħaħ il-messaġġ li kulħadd għandu jkun kuntent bil-kulur naturali tal-ġilda tiegħu,” u dan hu pass importanti biex dak li jkun jitqanqal ħalli jipproteġi lilu nnifsu kontra l-ħsara li tistaʼ tikkaġuna x-xemx. Madankollu, dawk li huma verament għorrief jiffokaw fuq dik li l-Bibbja ssejħilha “l-persuna minn ġewwa, fil-qalb,” li, għall-kuntrarju tal-ġilda li tixjieħ, tistaʼ titjieb biż-żmien!—1 Pietru 3:3, 4; Proverbji 16:31.