Ftakar Biex Tgħid Grazzi!

META kienet l-​aħħar darba li rċivejt nota taʼ ringrazzjament? Meta kienet l-​aħħar darba li bgħatt nota int?

F’din id-​dinja taʼ komunikazzjoni bil-​kompjuter saret xi ħaġa rari ħafna biex tara messaġġi taʼ gratitudni miktubin bl-​idejn. Imma, li tgħid “grazzi” bil-​miktub hu mod speċjali kif tgħid lil dak li jkun li tapprezza l-​qalb tajba tiegħu. Dawn li ġejjin huma xi suġġerimenti dwar kif tistaʼ tagħmel dan.

1. In-​nota iktibha b’idek biex tkun iktar persunali.

2. Uża l-​isem personali tal-​individwu li trid tirringrazzja.

3. Jekk irċivejt rigal, semmi r-​rigal u għid kif biħsiebek tużah.

4. Erġaʼ rringrazzja lill-​persuna fl-​aħħar tan-​nota.

Nota taʼ ringrazzjament tħalli impressjoni tajba fuq min jirċiviha.

Mela darb’oħra, meta xi ħadd jurik ospitalità, ikun ħanin miegħek, jew jagħtik rigal, uri li l-​isforzi tiegħu huma apprezzati. Ftakar biex tgħid grazzi!

[Kaxxa/Stampa f’paġna 11]

Għażiża Zija Mary,

Grazzi ħafna tal-​iżveljarin li tajtni! Diġà bdejt nużah, minħabba li spiss nibqaʼ rieqed. Ħadt pjaċir narak il-​ġimgħa li għaddiet, u nittama li wasalt id-​dar qawwija u sħiħa. Inħarsu ʼl quddiem li ma ndumux ma nerġgħu narawk.

Grazzi għal darb’oħra tar-​rigal utli li tajtni!

In-​neputi tiegħek,

John

[Stampa]

(1)

[Kaxxa f’paġna 11]

SUĠĠERIMENTI

● Tirreferix għal għotjiet taʼ flus direttament. Pereżempju, minflok ma tispeċifika l-​ammont li rċivejt, tistaʼ tgħid: “Grazzi tal-​għotja ġeneruża tiegħek. Qed nippjana biex nużaha għal . . . ”

● Inkludi biss informazzjoni li hi relatata mal-​għotja u l-​apprezzament tiegħek għaliha. Dan ma jkunx il-​ħin biex toqgħod tirrakkonta fid-​dettall dwar il-​vaganza tas-​sajf tiegħek jew biex tirrakkonta li reċentement kellek tidħol l-​isptar.

● Tgergirx dwar xi problemi li kellek bir-​rigal. Pereżempju, ma tkunx qalbek tajba jekk tikteb, “Grazzi tat-​towster—imma ma toqgħodlix fuq il-​bank tal-​kċina!”

[Kaxxa f’paġna 11]

Il-​Bibbja tinkuraġġina biex inkunu grati. (Luqa 17:11-​19) Twissina biex ‘nitolbu bla waqfien’ lil Alla, u żżid tgħid: “Roddu ħajr f’kollox.”—1 Tessalonikin 5:17, 18.