KIF TKAMPA MAL-GĦOLI TAL-ĦAJJA

Oqgħod Attent Kif Tonfoq il-Flus

Meta l-affarijiet jogħlew ikun diffiċli għal kulħadd. Imma m’għandekx għalfejn tħossok bla tama, għax hemm xi affarijiet li tistaʼ tagħmel biex ittejjeb is-sitwazzjoni tiegħek.

GĦALA HU IMPORTANTI

Jekk ma toqgħodx attent kif tonfoq il-flus, jaf ikollok iktar problemi finanzjarji u dan se jżidlek l-anzjetà. Imma hemm xi affarijiet li tistaʼ tagħmel biex jgħinuk tqassam il-flus aħjar, anki jekk ma tantx għandek.

X’TISTAʼ TAGĦMEL

Tixtrix affarijiet li ma taffordjax. Jekk tagħmel hekk, ħa tħossok iktar kalm u preparat jekk jinqalgħu xi spejjeż li ma kontx qed tistenna.

Meta tagħmel budget, se jgħinek biex ma tonfoqx iktar milli taffordja. Wara li tikteb kemm taqlaʼ u l-ispejjeż li għandek, agħmel ċert li tonfoq il-flus fuq dak li vera għandek bżonn. Imbagħad kun ċert li żżomm mal-budget li tkun għamilt, u kun lest li taddatta jekk jinbidlu l-prezzijiet jew il-paga. Ovvjament, jekk int miżżewweġ, ħu d-deċiżjonijiet mal-mara tiegħek.

Ipprova dan: Meta tistaʼ prova ħallas bil-cash flok bil-kard. Xi wħud sabu li meta jagħmlu hekk, iżjed iżommu mal-budget u ma jidħlux f’dejn. Ukoll, kull xahar ħu l-ħin biex tirrivedi l-istatement tal-bank ħa tkun taf kemm infaqt u kemm tfajt flus. Meta tkun taf eżatt kemm għandek flus, se jkun iżjed faċli biex tkun taf x’taffordja.

Jistaʼ jkun diffiċli biex ma tonfoqx iżżejjed. Imma meta jkollok budget se jgħinek. U jaf jgħinek ukoll biex tinkwieta inqas dwar il-flus.

‘Ikkalkula l-ispejjeż.’—Luqa 14:28.

Irsisti biex iżżomm ix-xogħol li għandek. X’inhuma xi affarijiet li tistaʼ tagħmel biex iżżomm ix-xogħol tiegħek? Pereżempju: Asal ix-xogħol fil-ħin. Żomm attitudni pożittiva lejn ix-xogħol tiegħek. Ħu l-inizjattiva, aħdem iebes, u uri rispett. Żomm mar-regoli tax-xogħol, u prova tejjeb l-abbiltajiet tiegħek.

Evita milli tonfoq flus fuq affarijiet li m’għandekx bżonn. Staqsi lilek innifsek, ‘Jiena spiss nonfoq ħafna flus fuq affarijiet li m’għandix bżonn jew fuq affarijiet li mhumiex tajbin għalija?’ Pereżempju, ħafna nies jaħlu l-flus tagħhom fuq id-drogi, logħob tal-flus, sigaretti, u alkoħol. Meta tagħmel dawn l-affarijiet, is-saħħa tiegħek se tbati u anki tistaʼ titlef ix-xogħol tiegħek.

“Ferħan hu min jitgħallem x’inhu l-għerf . . . Hu aħjar li tkun għaref milli jkollok il-fidda jew id-deheb.”—Proverbji 3:13, 14.

Warrab il-flus għal emerġenza. Meta tkun tistaʼ, warrab ammont żgħir taʼ flus għal affarijiet li jistgħu jinqalgħu jew għal emerġenza. Dawn il-flus jistgħu jgħinuk biex tkun moħħok mistrieħ jekk int jew xi ħadd tal-familja jimrad, jitlef ix-xogħol, jew tinqalaʼ xi ħaġa oħra li ma kontx qed tistenna.

“Żmien taʼ inkwiet u affarijiet mhux mistennijin jiġu fuq kulħadd.”—Ekkleżjasti 9:11.

Pariri li Jistgħu Jgħinuk Tfaddal il-Flus

Sajjar l-ikel id-dar.

Jekk taʼ spiss tiekol f’restaurants jew tixtri ikel lest, ħa tonfoq ħafna iżjed. Għalkemm jieħu l-ħin u x-xogħol biex tipprepara l-ikel id-dar, tistaʼ tiffranka ħafna flus. Barra minn hekk, tkun taf iktar x’inti tiekol.

Aħseb qabel tixtri.

Meta tmur tixtri agħmel lista u prova żomm magħha ħalli ma tixtrix affarijiet li ma kontx ippjanajt.
Meta ssib l-affarijiet imraħħsin, jekk tkun tistaʼ ixtri bil-kwantità. Agħmel ċert li għandek post fejn terfaʼ l-affarijiet sew biex jibqgħu tajbin u ma jkunx hemm ħela.
Prova ixtri prodotti li huma irħas u li xorta huma taʼ kwalità tajba.
Jekk fejn toqgħod int tistaʼ tixtri online, għax ma tipprovax tixtri b’dan il-mod? Meta tagħmel hekk tistaʼ ssib offerti tajbin, tevita milli tixtri affarijiet li ma ppjanajtx għalihom, u toqgħod attenta kif tonfoq il-flus.
Meta tistaʼ fittex affarijiet bis-sale u offerti. Qabel tixtri xi ħaġa qabbel il-prezzijiet, ara kemm taħli dawl u ilma, u x’hemm bżonn biex tieħu ħsiebha.

Aħseb qabel tixtri affarijiet ġodda.

Kumpaniji tal-mowbajls u prodotti oħrajn dejjem joħorġu mudelli ġodda biex jaqilgħu iktar flus. Staqsi lilek innifsek: ‘Għandi bżonn nixtri mowbajl ġdid? Jekk iva għandi bżonn nixtrih issa? U għandi bżonn nixtri l-aħħar mudell?’

Sewwi u kompli uża l-affarijiet li għandek.

Żomm l-appliances f’kundizzjoni tajba ħalli jservu iżjed, u jekk ikun jaqbillek sewwihom. Tistaʼ wkoll tiffranka l-flus billi tixtri affarijiet second-hand.

Kabbar l-ikel tiegħek.

Tistaʼ ssib post fejn tkabbar ftit ħaxix u frott? Jekk tagħmel hekk, tistaʼ tnaqqas l-ispejjeż tal-ikel, ikollok xi tbigħ jew x’taqsam m’oħrajn.

“Il-pjanijiet taʼ min jaħdem iebes żgur li jwasslu għal suċċess.”—Proverbji 21:5.

“Noqogħdu attenti għall-prezzijiet tal-affarijiet li nixtru b’mod regulari u kemm-il darba nużaw il-kredit kards.”—Miles, l-Ingilterra.

“Jien u l-familja qabel nagħmlu x-xirja dejjem nagħmlu lista tal-affarijiet li għandna bżonn.”—Jeremy, l-Istati Uniti.

“Aħna dejjem nagħmlu ċert li għandna flus biżżejjed biex nixtru l-affarijiet li ppjanajna għalihom, u nwarrbu flus għal affarijiet li jistgħu jinqalgħu.”—Yael, Iżrael.

“Jien u l-mara għallimna lit-tfal biex l-affarijiet li jinkisru jipprovaw isewwuhom minflok jixtru l-ġodda, pereżempju l-karozza jew l-appliances tad-dar. Barra minn hekk, meta jkollna bżonn xi ħaġa nipprovaw ma nixtrux l-aħħar mudell.”—Jeffrey, l-Istati Uniti.

“Peress li nkabbar il-ħaxix u nrabbi t-tiġieġ nonfoq inqas flus. Jirnexxili wkoll inqassam ftit mill-ħaxix li jkolli.”—Hono, Myanmar.

Raġel qed jiġbor ħaxix differenti minn ġo ġnien.