Kapitlu 1
Li Tgħix Għal Dejjem M’huwiex Biss Ħolma
1, 2. Għala huwa diffiċli temmen li n-nies jistgħu jgħixu għal dejjem henjin fuq l-art?
HENA fuq l-art—donnu li ma tistax titgawda lanqas saħansitra għal żmien qasir. Il-mard, ix-xjuħija, il-ġuħ, il-kriminalità—biex insemmu biss ftit mill-problemi—taʼ spiss jagħmlu l-ħajja miżerabbli. Mela, tistaʼ tgħid int, li titkellem dwar li wieħed jgħix għal dejjem fil-ġenna fuq l-art ifisser li tagħlaq għajnejk għall-verità. Tistaʼ tħoss li huwa ħela taʼ żmien li titkellem dwarha, li l-ħajja taʼ dejjem hija biss ħolma.
2 Bla dubju l-maġġoranza tan-nies jaqblu miegħek. Mela, allura, għala nistgħu nkunu daqshekk ċerti li int tistaʼ tgħix għal dejjem fil-ġenna fuq l-art? Għala nistgħu nemmnu li l-ħajja taʼ dejjem m’hijiex biss ħolma?
GĦALA NISTGĦU NEMMNU
3. X’juri li Alla jrid li l-bnedmin ikunu henjin fuq l-art?
3 Nistgħu nemmnu għaliex Qawwa Suprema, Alla li Jistaʼ Kollox, ħejja l-art b’dak kollu li huwa meħtieġ biex inħossuna sodisfatti. Hu għamel l-art perfetta għalina! U ħalaq ir-raġel u l-mara bl-aħjar mod biex ikunu jistgħu jgawdu l-ħajja bis-sħiħ fuq din l-art darna—għal dejjem.—Salm 115:16.
4. Ix-xjenzati x’tgħallmu dwar il-ġisem uman li juri li dan ġie magħmul biex jgħix għal dejjem?
4 Ix-xjenzati ilhom jafu dwar il-qawwa tal-ġisem uman li jġedded lilu nnifsu. B’mod taʼ l-għaġeb iċ-ċelloli tal-ġisem jiġu mibdulin jew imsewwijin, skond il-bżonn. U donnu li dan il-proċess taʼ tiġdid għandu jkompli għal dejjem. Imma ma jkomplix, u din hija xi ħaġa li x-xjenzati ma jistgħux jispjegaw. Għadhom ma jistgħux jifhmu għalkollox għala n-nies jixjieħu. Jgħidu li, taħt kundizzjonijiet xierqa, il-bnedmin għandhom ikunu jistgħu jgħixu għal dejjem.—Salm 139:14.
5. X’tgħid il-Bibbja dwar l-iskop t’Alla għall-art?
5 Madankollu, huwa verament l-iskop t’Alla li n-nies jgħixu henjin fuq l-art għal dejjem? Jekk inhu hekk, mela l-ħajja taʼ dejjem m’hijiex biss xewqa jew ħolma—żgur li trid tiġi! Il-Bibbja, il-ktieb li jitkellem dwar l-iskopijiet t’Alla, x’tgħid dwar dan? Issejjaħ ’l Alla “Dakli sawwar l-art u Dak li għamilha,” u żżid: “Hu l-Wieħed li stabbiliha fis-sod, li ma ħalaqhiex sempliċement għal xejn, li sawwarha saħansitra biex tkun abitata.”—Isaija 45:18.
6. (a) Kif inhuma l-kundizzjonijiet fuq l-art illum? (b) Huwa dan il-mod kif Alla jridu li jkun?
6 Jidhirlek int li l-art issa qiegħda tiġi abitata bil-mod li Alla riedha li tkun? Veru, in-nies qegħdin jgħixu fi kważi kull parti taʼ l-art. Imma qegħdin huma jgħixu henjin flimkien bħala familja magħquda, bil-mod it-tajjeb li l-Ħallieq tagħhom ried għalihom? Illum id-dinja hija maqsuma. Hemm il-mibgħeda. Hemm il-kriminalità. Hemm il-gwerer. Miljuni taʼ nies huma bil-ġuħ u morda. Oħrajn għandhom inkwiet taʼ kuljum dwar djar, xogħol u spejjeż. U xejn minn dawn l-affarijiet ma jġib ġieħ ’l Alla. Biċ-ċar, allura, l-art m’hijiex tkun abitata bil-mod li Alla li Jistaʼ Kollox riedha li tkun fil-bidu.
7. X’kien l-iskop t’Alla għall-art meta ħalaq l-ewwel koppja umana?
7 Wara li ħalaq l-ewwel koppja umana, Alla poġġiehom f’ġenna taʼ l-art. Hu riedhom igawdu l-ħajja fuq l-art għal dejjem. L-iskop tiegħu għalihom kien li jifirxu l-ġenna tagħhom maʼ l-art kollha. Dan jidher mill-istruzzjonijiet li tahom: “Agħtu l-frott u siru ħafna u imlew l-art u rażżnuha.” (Ġenesi 1:28) Iva, l-iskop t’Alla kien li maż-żmien l-art kollha tinġab taħt il-kontroll taʼ familja tajba taʼ bnedmin li lkoll jgħixu flimkien fil-paċi u fl-hena.
8. Għalkemm l-ewwel koppja m’obdewhx ’l Alla, għala nistgħu nkunu żguri li l-iskop t’Alla għall-art ma nbidilx?
8 Għalkemm l-ewwel koppja umana m’obdewhx ’l Alla u b’hekk taw prova li ma kienx jistħoqqilhom li jgħixu għal dejjem, l-iskop oriġinali t’Alla ma tbiddilx. Irid jitwettaq! (Isaija 55:11) Il-Bibbja twiegħed: “It-twajbin infushom se jkollhom pussess taʼ l-art, u se jgħammru għal dejjem fuqha.” (Salm 37:29) Il-Bibbja spiss titkellem dwar l-arranġament t’Alla li jagħti ħajja taʼ dejjem lill-bnedmin li jaqduh.—Ġwann 3:14-16, 36; Isaija 25:8; Rivelazzjoni 21:3, 4.
IX-XEWQA LI TGĦIX—FEJN?
9. (a) Normalment in-nies liema xewqa jkollhom? (b) Xi trid tfisser il-Bibbja meta tgħid ‘Alla poġġa l-eternità ġewwa mħuħhom’?
9 Nistgħu nkunu tassew henjin li huwa l-iskop t’Alla li aħna ngħixu għal dejjem. Għax aħseb ftit: Kieku kellek tiddeċiedi, f’liema data kont tagħżel li tmut? Ma tistax tagħżel waħda, hux tassew? Int ma tridx tmut, u lanqas ebda bniedem normali ieħor li jħossu xi naqra b’saħħtu ma jrid imut. Alla għamilna bix-xewqa li ngħixu, mhux bix-xewqa li mmutu. Dwar il-mod li Alla għamel il-bnedmin, il-Bibbja tgħid: “Hu saħansitra poġġa l-eternità ġewwa mħuħhom.” (Ekkleżjasti 3:11, Byington) X’ifisser dan? Ifisser li normalment in-nies jixtiequ jibqgħu jgħixu u jgħixu, mingħajr ma jmutu. Minħabba din ix-xewqa għal futur bla tmiem, il-bnedmin ilhom ħafna jfittxu xi mod kif jistgħu jibqgħu żgħażagħ għal dejjem.
10. (a) Ix-xewqa naturali tal-bniedem hija li jgħix għal dejjem fejn? (b) Għala nistgħu nkunu fiduċjużi li Alla se jagħmilha possibbli għalina li ngħixu għal dejjem fuq l-art?
10 Fejn normalment jixtiequ li jgħixu n-nies għal dejjem? Huwa fejn huma draw jgħixu, hawnhekk fuq l-art. Il-bniedem kien magħmul għall-art, u l-art għall-bniedem. (Ġenesi 2:8, 9, 15) Il-Bibbja tgħid: “Hu [Alla] sejjes l-art fuq il-postijiet stabbiliti tagħha; m’hijiex se tintgħamel tixxengel għal żmien indefinit, jew għal dejjem.” (Salm 104:5) Ladarba l-art ġiet magħmula biex isservi għal dejjem, allura l-bniedem ukoll imissu jgħix għal dejjem. Żgur li Alla taʼ mħabba mhux se joħloq il-bnedmin bix-xewqa li jgħixu għal dejjem u mbagħad ma jagħmilhiex possibbli li jaqtgħu dik ix-xewqa!—1 Ġwann 4:8; Salm 133:3.
IT-TIP TAʼ ĦAJJA LI TIXTIEQ
11. X’tgħid il-Bibbja biex turi li n-nies jistgħu jgħixu għal dejjem f’saħħa perfetta?
11 Ħares lejn il-paġna li ġejja. X’tip taʼ ħajja qegħdin igawdu dawn in-nies? Tixtieq tkun wieħed minnhom? Iva, dażgur, tgħid int! Ara kemm jidhru b’saħħithom u fl-aħjar tagħhom! Kieku jgħidulek li dawn in-nies ilhom jgħixu għal eluf taʼ snin, kont temmnu dan? Il-Bibbja tgħidilna li x-xjuħ jerġgħu jsiru żgħażagħ, il-morda jfiqu u z-zopop, l-għomja, it-torox u l-muti se jkollhom il-mankamenti tagħhom kollha mfejqin. Meta kien fuq l-art Ġesù Kristu għamel ħafna mirakli billi fejjaq lill-morda. Billi għamel dan kien qiegħed juri kif, f’dan iż-żmien glorjuż li m’huwiex ’il bogħod, dawk kollha li jkunu jgħixu se jingħataw mill-ġdid ħajja perfetta.—Ġob 33:25; Isaija 33:24; 35:5, 6; Mattew 15:30, 31.
12. X’kundizzjonijiet naraw f’dawn l-istampi?
12 Ara xi ġmiel taʼ ġnien! Bħalma wiegħed Kristu, din hija tassew ġenna, simili għal dik li tilfu l-ewwel raġel u mara diżubbidjenti. (Luqa 23:43) U innota l-paċi u l-armonija li jeżistu. Nies taʼ kull razza—is-suwed, il-bojod, is-sofor—qegħdin jgħixu bħala familja waħda. Saħansitra l-annimali huma mansi. Ara t-tifel jilgħab maʼ l-iljun. Imma m’għandux għalfejn jibżaʼ. Rigward dan, il-Ħallieq jiddikjara: “Mal-gidi l-lijupard innifsu se jimtedd, u l-għoġol u l-iljun żagħżugħ muxgħar u l-annimal mitmugħ sewwa lkoll flimkien; u naqra taʼ tifel ċkejken se jkun mexxej fuqhom. . . . U saħansitra l-iljun se jiekol it-tiben sewwa sew bħall-gendus. U t-tarbija li qiegħda terdaʼ ċertament li se tilgħab fuq il-ħofra tal-kobra.”—Isaija 11:6-9.
13. X’se jispiċċa minn fuq l-art meta jitwettqu l-iskopijiet t’Alla?
13 Fil-ġenna li Alla għandu ppjanata għall-bnedmin, se jkun hemm kull raġuni biex wieħed ikun hieni. L-art se tipproduċi ħafna affarijiet tajbin għall-ikel. Ħadd iżjed ma qatt se jkun bil-ġuħ. (Salm 72:16; 67:6) Il-gwerer, il-kriminalità, il-vjolenza, saħansitra l-mibgħeda u l-egoiżmu, se jkunu affarijiet taʼ l-imgħoddi. Iva, se jkunu spiċċaw għal dejjem! (Salm 46:8, 9; 37:9-11) Temmen int li dan kollu huwa possibbli?
14. X’iġiegħlek temmen li Alla se jġib tmiem għat-tbatija?
14 Sewwa, aħseb ftit: Kieku kellek il-poter, kont int ittemm l-affarijiet kollha li jġibu t-tbatija fuq il-bnedmin? U kont int iġġib il-kundizzjonijiet li għalihom tixxennaq il-qalb tal-bniedem? Dażgur li kont. Missierna tas-sema kollu mħabba se jagħmel preċiżament hekk. Se jissodisfa l-bżonnijiet u x-xewqat tagħna, għax Salm 145:16 jgħid dwar Alla: “Int qiegħed tiftaħ idek u qiegħed tissodisfa x-xewqa taʼ kull ħaġa ħajja.” Imma dan meta se jseħħ?
BARKIET GRANDJUŻI HUMA FIL-QRIB
15. (a) L-aħħar tad-dinja x’se jkun ifisser għall-art? (b) X’se jkun ifisser għan-nies ħżiena? (ċ) X’se jkun ifisser għal dawk li jagħmlu r-rieda t’Alla?
15 Biex jagħmel possibbli dawn il-barkiet mill-aħjar fuq l-art, Alla jwiegħed li se jtemm kemm il-ħażen kif ukoll lil dawk li jagħmluh. Fl-istess waqt, hu se jipproteġi lil dawk li jaqduh, għax il-Bibbja tgħid: “Id-dinja qiegħda tgħaddi u l-istess ix-xewqa tagħha, imma dak li jagħmel ir-rieda t’Alla jibqaʼ għal dejjem.” (1 Ġwann 2:17) X’bidla se tkun dik! L-aħħar tad-dinja m’huwiex se jkun ifisser it-tmiem taʼ l-art tagħna. Minflok, bħalma ġara fid-dilluvju mad-dinja kollha taʼ żmien Noè, se jkun ifisser it-tmiem tan-nies ħżiena biss u tal-mod taʼ ħajja tagħhom. Imma dawk li qegħdin jaqdu ’l Alla se jibqgħu ħajjin wara t-tmiem. Imbagħad, fuq art imnaddfa, se jgawdu libertà minn dawk kollha li jridu jaħqruhom u jgħakksuhom.—Mattew 24:3, 37-39; Proverbji 2:21, 22.
16. Liema ġrajjiet kienu mbassrin għall-“aħħar jiem”?
16 Imma xi ħadd jistaʼ jgħid: ‘Il-kundizzjonijiet sejrin għall-agħar, mhux għall-aħjar. Kif nistgħu nkunu żguri li din il-bidla grandjuża hija qrib?’ Ġesù Kristu bassar ħafna affarijiet li s-segwaċi futuri tiegħu kellhom joqogħdu għassa għalihom biex jindunaw li kien wasal il-waqt li Alla jġib tmiem għad-dinja. Ġesù qal li l-aħħar jiem taʼ din is-sistema kellhom ikunu mmarkati b’affarijiet bħalma huma gwerer kbar, skarsezzi taʼ ikel, terremoti kbar, żjieda fl-illegalità u żjieda fin-nuqqas taʼ mħabba. (Mattew 24:3-12) Jerġaʼ, il-Bibbja tgħid ukoll: “Fl-aħħar jiem żminijiet kritiċi li iebes biex issib tarfhom se jkunu hawnhekk.” (2 Timotew 3:1-5) M’humiex dawn l-istess kundizzjonijiet li qegħdin inġarrbu issa?
17. Xi nies li jużaw moħħhom x’kienu qegħdin jgħidu dwar il-kundizzjonijiet tal-lum?
17 Ħafna nies li jistudjaw il-ġrajjiet tad-dinja jgħidu li bidla kbira qiegħda tifforma ruħha. Per eżempju, l-editur tal-Miami, U.S.A., Herald, kiteb: “Kull min għandu naqra sens komun jistaʼ jgħaqqad flimkien il-ġrajjiet katakliżmiċi tal-ftit snin li għaddew u jara li d-dinja tinsab f’xifer storiku. . . . Dan se jbiddel għal dejjem il-mod taʼ ħajja tal-bnedmin.” Simili għal dan, il-kittieb Amerikan Lewis Mumford qal: “Iċ-ċivilizzazzjoni sejra għan-niżla. Ħaġa ċerta. . . . Fl-imgħoddi meta ċ-ċivilizzazzjonijiet marru għan-niżla, kien relattivament fenomenu lokali. . . . Issa, li d-dinja hija iktar marbuta u miżmuma flimkien permezz tal-komunikazzjonijiet moderni, meta ċ-ċivilizzazzjoni titlaq għan-niżla, il-pjaneta kollha taqaʼ.”
18. (a) Il-kundizzjonijiet tad-dinja x’juru dwar il-futur? (b) Liema ħaġa se tieħu post il-gvernijiet preżenti?
18 L-istess kundizzjonijiet fid-dinja llum juru li issa qegħdin ngħixu fiż-żmien meta l-qerda taʼ din is-sistema sħiħa t’affarijiet waslet biex isseħħ. Iva, dalwaqt ferm issa Alla se jnaddaf l-art minn kull min irid jeqridha. (Rivelazzjoni 11:18) Hu se jneħħi l-gvernijiet preżenti sabiex jiftaħ it-triq għall-gvern tiegħu taʼ tjieba biex jaħkem fuq l-art kollha. Huwa dan il-gvern tas-Saltna li għalih Ġesù għallem lis-segwaċi tiegħu jitolbu.—Danjel 2:44; Mattew 6:9, 10.
19. Jekk irridu ngħixu għal dejjem, xi rridu nagħmlu?
19 Jekk tħobb il-ħajja u trid tgħix għal dejjem fuq l-art taħt il-ħakma t’Alla, allura għandek tgħaġġel biex tieħu għarfien eżatt dwar Alla, l-iskopijiet tiegħu u l-ħtiġijiet tiegħu. Ġesù Kristu qal f’talba ’l Alla: “Dan ifisser il-ħajja taʼ dejjem, li jieħdu għarfien dwarek, l-uniku Alla veru, u dwar il-wieħed li int bgħatt, Ġesù Kristu.” (Ġwann 17:3) X’ferħ li nkunu nafu li nistgħu ngħixu għal dejjem—li dan m’huwiex biss ħolma! Imma biex ingawdu din il-barka mill-aħjar mingħand Alla għandna bżonn nitgħallmu dwar għadu li qiegħed jipprova jżommna lura milli ngawdu din il-barka.
[Stampa f’paġna 8, 9]
Kellu Alla l-intenzjoni li d-dinja tkun hekk?
[Stampa ta’ paġna sħiħa f’paġna 11]