Kapitlu 41
F’Nofs Kontroversja
FTIT wara li jkun mistieden fid-dar taʼ Xmun, Ġesù jibda t-tieni dawra taʼ ppridkar fil-Galilija. Fl-ewwel dawra tiegħu hu kien akkumpanjat mill-ewwel dixxipli tiegħu, Pietru, Indri̇̀, Ġakbu, u Ġwanni. Imma issa t-12-il appostlu, kif ukoll xi nisa, jakkumpanjawh. Dawn jinkludu lil Marija Maddalena, Susanna, u Ġovanna, li żewġha huwa uffiċjal tas-Sultan Erodi.
Iktar ma Ġesù jintensifika l-pass tal-ministeru tiegħu, iktar tikber il-kontroversja rigward l-attività tiegħu. Raġel ippossessat minn demonju, u li hu agħma u mutu, jinġieb għand Ġesù. Malli Ġesù jfejqu, b’mod li jinħeles mill-kontroll tad-demonju u jistaʼ kemm jitkellem u kemm jara, l-folol jibqgħu mbellhin. Jibdew igħidu: “Jistax dan forsi jkun Bin David?”
Il-folol jinġabru f’għadd tant kbir madwar id-dar fejn qed joqgħod Ġesù li hu u d-dixxipli tiegħu lanqas biss jistgħu jieklu ikla. Minbarra dawk li jqisuh bħala forsi li hu l-imwiegħed “Bin David,” hemm ukoll skribi u Fariżej li ġew it-triq kollha minn Ġerusalemm biex joħorġuh taʼ giddieb. Meta l-qraba taʼ Ġesù jisimgħu dwar dan il-għagħa kollu madwar Ġesù, jiġu biex jaħtfuh. Għal liema raġuni?
Sewwa, saħansitra ħut Ġesù stess għadhom ma jemmnux li hu l-Iben t’Alla. Ukoll, it-tqanqil pubbliku u l-inkwiet li ħoloq ma kien jixbah xejn lill-karattru taʼ Ġesù li kienu jafu huma meta kien għadu qed jikber f’Nazzaret. Għalhekk, huma jemmnu li hemm xi ħaġa serjament ħażina f’moħħ Ġesù. “Tilef moħħu,” huma jikkonkludu, u jridu jaħtfuh biex jiħduh lil hemm.
Iżda l-evidenza hi ċara li Ġesù fejjaq lir-raġel indemonjat. L-iskribi u l-Fariżej jafu li ma jistgħux jiċħdu l-fatt li dan ġara. Mela biex igiddbu lil Ġesù huma jgħidu lin-nies: “Dan il-baħbuħ ma jkeċċix lid-demonji ħlief permezz taʼ Belżebub, il-ħakkiem tad-demonji.”
Billi jaf x’qed jaħsbu, Ġesù jsejjaħ lill-iskribi u l-Fariżej għandu u jgħidilhom: “Kull saltna maqsuma kontra tagħha nfisha tiġi f’ħerba, u kull belt jew dar maqsuma kontra tagħha nfisha mhix se tieqaf. Bl-istess mod, jekk Satana jkeċċi lil Satana, hu sar maqsum kontra tiegħu nnifsu; kif, mela, se tieqaf saltnatu?”
X’loġika tal-għaġeb! Peress li l-Fariżej igħidu li xi nies minn fosthom ġieli keċċew demonji, Ġesù jistaqsi wkoll: “Jekk inkeċċi lid-demonji permezz taʼ Belżebub, permezz taʼ min ikeċċuhom uliedkom?” Fi kliem ieħor, l-akkuża li għamlu huma kontra Ġesù għandha sewwa sew tiġi applikata għalihom iktar milli għalih. Ġesù mbagħad iwissi: “Imma jekk hu permezz tal-ispirtu t’Alla li jien inkeċċi lid-demonji, is-saltna t’Alla tassew għaddietkom.”
Biex juri b’tixbieha li t-tkeċċija tiegħu tad-demonji hi evidenza tal-qawwa tiegħu fuq Satana, Ġesù jgħid: “Kif jistaʼ xi ħadd jinvadi d-dar taʼ raġel b’saħħtu u jaħtaf l-affarijiet li jistgħu jitħarrku tiegħu, jekk l-ewwel ma jorbotx lir-raġel b’saħħtu? U mbagħad se jisraq mid-dar tiegħu. Dak li mhux fuq in-naħa tiegħi huwa kontra tiegħi, u dak li ma jiġborx miegħi jxerred.” Huwa ċar li l-Fariżej huma kontra Ġesù, u b’hekk juru li huma l-aġenti taʼ Satana. Huma qegħdin ixerrdu lill-Iżraeliti ’l bogħod minnu.
Għaldaqstant, Ġesù jwissi lil dawn l-opponenti sataniċi li “d-dagħa kontra l-ispirtu mhux se jinħafer.” Hu jispjega: “Kulmin ilissen kelma kontra Bin il-bniedem, se jinħafirlu; imma kulmin jitkellem kontra l-ispirtu qaddis, mhux se jinħafirlu, le, mhux f’din is-sistema taʼ affarijiet u lanqas f’dik li ġejja.” Dawk l-iskribi u l-Fariżej ikkommettew dak id-dnub li ma jinħafirx billi attribwew b’mod malizzjuż lil Satana dak li jidher ċar li sar bl-operazzjoni mirakoluża tal-ispirtu qaddis t’Alla. Mattew 12:22-32; Mark 3:19-30; Ġwann 7:5.
▪ It-tieni dawra taʼ Ġesù kif inhi differenti mill-ewwel waħda?
▪ Il-qraba taʼ Ġesù għala jippruvaw jaħtfuh?
▪ Il-Fariżej kif jippruvaw igiddbu l-mirakli taʼ Ġesù, u Ġesù kif jiċħad dak li jgħidu?
▪ Taʼ liema ħaġa huma ħatja dawk il-Fariżej, u għala?