Kapitlu 57
Mogħdrija għall-Imnikktin
WARA li kkundanna lill-Fariżej għat-tradizzjonijiet tagħhom li kienu jservu għalihom infushom, Ġesù jitlaq mad-dixxipli tiegħu. Mhux wisq qabel, forsi tiftakar, l-attentat tiegħu biex jitlaq ’il hemm magħhom biex jistrieħ ftit ġie interrott meta xi folol sabuhom. Issa, mad-dixxipli tiegħu, hu jitlaq lejn ir-reġjuni taʼ Tir u taʼ Sidon, ħafna mili lejn it-Tramuntana. Dan mid-dehra hu l-uniku vjaġġ li Ġesù jagħmel mad-dixxipli tiegħu lil hinn mill-fruntieri taʼ Iżrael.
Wara li jsib dar biex joqgħod fiha, Ġesù jordna li ħadd m’għandu jkun jaf fejn qegħdin. Madankollu, saħansitra f’dan it-territorju mhux Iżraelit, xi ħadd jinduna bih. Mara Griega, imwielda hawnhekk ġo Feniċja tas-Sirja, issibu u tibda tittallab: “Ikollok ħniena minni, Mulej, Bin David. Binti indemonjata ferm.” Ġesù, madankollu, ma jgħidx kelma waħda bi tweġiba.
Eventwalment, id-dixxipli tiegħu jgħidu lil Ġesù: “Ibgħatha ’l hemm; għaliex hi tibqaʼ tgħajjat warajna.” Billi jispjega r-raġuni tiegħu għala ma tax kasha, Ġesù jgħid: “Ma kont mibgħut ’il quddiem għal ħadd ħlief għan-ngħaġ mitlufa tad-dar taʼ Iżrael.”
Madankollu, il-mara ma ċċedix. Hi tersaq lejn Ġesù u tinxteħet wiċċha fl-art quddiemu. Hi titlob bil-ħerqa, “Mulej, għinni!”
Kif bil-fors li ġiet imqanqla qalb Ġesù bl-appell ħerqan tal-mara! Madankollu, hu jerġaʼ jipponta lejn l-ewwel responsabbiltà tiegħu, biex jimministra lill-poplu t’Alla taʼ Iżrael. Fl-istess waqt, mid-dehra biex jittestja l-fidi tagħha, hu jsemmi kif il-Lhud iħarsu bi preġudizzju lejn dawk taʼ nazzjonalitajiet oħra, billi jgħid: “Mhux sewwa li tieħu l-ħobż tat-tfal u titfgħu lil klieb żgħar.”
Bit-ton taʼ leħen kollu ħniena tiegħu u bl-espressjoni taʼ wiċċu, Ġesù ċertament jirrivela s-sentimenti teneri tiegħu lejn dawk li m’humiex Lhud. Hu saħansitra jrattab il-paragun tal-Ġentili maʼ klieb billi jirreferi għalihom bħala “klieb żgħar,” jew ġriewi. Minflok ma tieħu għaliha, il-mara taċċetta r-referenza taʼ Ġesù għal preġudizzji Lhud u tagħmel l-osservazzjoni umli: “Iva, Mulej; imma tabilħaqq il-klieb iż-żgħar tassew jieklu mill-frak li jaqgħu mill-mejda tas-sidien tagħhom.”
“O mara, kbira hi l-fidi tiegħek,” iwieġeb Ġesù. “Ħalli jiġri lilek kif tixtieq.” U hekk jiġri! Meta tmur lura lejn darha, hi ssib lil bintha fuq is-sodda, imfejqa għalkollox.
Mir-reġjun tal-kosta taʼ Sidon, Ġesù u d-dixxipli tiegħu jgħaddu minn ġol-kampanja, lejn in-naħa taʼ fuq tal-ilmijiet tax-Xmara Ġordan. Huma mid-dehra jaqsmu l-Ġordan x’imkien ’il fuq mill-Baħar tal-Galilija u jidħlu fir-reġjun tad-Dekapolis lejn in-naħa tal-Lvant tal-baħar. Hemmhekk huma jitilgħu fuq muntanja, imma l-folol isibuhom u lil Ġesù jġibulu z-zopop, l-immankati, l-għomja, u t-torox tagħhom, u lil ħafna li huma morda u sfigurati xort’oħra. Huma jitfgħuhom b’mod ġust f’saqajn Ġesù, u hu jfejjaqhom. In-nies jistagħġbu, hekk kif jaraw il-muti jitkellmu, iz-zopop jimxu, u l-għomja jaraw; u huma jfaħħru lil Alla taʼ Iżrael.
Ġesù jagħti attenzjoni speċjali lil wieħed raġel li hu trux u li bil-kemm jistaʼ jitkellem. It-torox spiss jimbarazzaw ruħhom faċilment, speċjalment ġo folla. Ġesù jistaʼ jinnota n-nervi partikulari taʼ dan ir-raġel. Mela Ġesù b’mogħdrija jneħħih minn ġol-folla privatament. Meta jkunu waħedhom, Ġesù jindika x’se jagħmel hu għalih. Hu jpoġġi subgħajh f’widnejn ir-raġel u, wara li jobżoq, imisslu lsienu. Imbagħad, waqt li jħares lejn is-sema, Ġesù jitniehed profondament u jgħid: “Infetaħ.” Għal dan, il-qawwiet taʼ smigħ tar-raġel jiġu rrestawrati, u hu jistaʼ jitkellem b’mod normali.
Meta Ġesù jkun wettaq dan il-ħafna fejqan, il-folol iwieġbu b’apprezzament. Huma jgħidu: “Hu għamel l-affarijiet kollha sewwa. Hu saħansitra jagħmel lit-torox jisimgħu u lill-muti jitkellmu.” Mattew 15:21-31; Mark 7:24-37.
▪ Ġesù għala ma jfejjaqx mill-ewwel lit-tifla tal-mara Griega?
▪ Wara dan, Ġesù fejn jeħodhom lid-dixxipli tiegħu?
▪ Ġesù kif jittrattah b’mogħdrija lir-raġel trux li bil-kemm jistaʼ jitkellem?