Kapitlu 108

Ifallu f’li Jonsbu Lil Ġesù

PERESS li Ġesù kien qed igħallem fit-​tempju u kien għadu kif qal lill-​egħdewwa reliġjużi tiegħu tliet tixbihat li jikxfu l-​ħażen tagħhom, il-​Fariżej jinsabu mgħaddbin u jikkonfoffaw biex jonsbuh f’li jgħid xi ħaġa li għaliha jkunu jistgħu jġiegħlu li jiġi arrestat. Huma jħawru konġura u jibagħtu lid-​dixxipli tagħhom, flimkien maʼ segwaċi tal-​partit taʼ Erodi, biex jippruvaw iwaqqgħuh.

“Għalliem,” dawn l-​irġiel igħidu, “aħna nafu li int tgħid il-​verità u tgħallem il-​mod t’Alla fil-​verità, u ma jimpurtak minn ħadd, għax int ma tħarisx lejn id-​dehra tal-​bnedmin minn barra. Għidilna, għalhekk, x’taħseb int? Huwa skond il-​liġi li tħallas it-​taxxa tar-​ras lil Ċesri jew le?”

Ġesù mhux imqarraq mit-​tifħir tagħhom. Hu jirrealizza li jekk jgħid, ‘Le, m’huwiex legali jew sewwa li tħallsu dit-taxxa,’ hu se jkun ħati taʼ sedizzjoni kontra Ruma. Iżda, jekk igħid, ‘Iva, għandkom tħallsu dit-taxxa,’ il-​Lhud, li jobogħdu s-​sottomissjoni tagħhom lejn Ruma, se jobogħduh. Mela jwieġeb: “Għala tpoġġuni fi prova, ipokriti? Uruni l-​munita tat-​taxxa tar-​ras.”

Meta jġibulu waħda, hu jistaqsi: “L-​immaġni u l-​iskrizzjoni taʼ min hi din?”

“Taʼ Ċesri,” iweġbuh.

“Ħallsu lura, għalhekk, l-​affarijiet taʼ Ċesri lil Ċesri, imma l-​affarijiet t’Alla lil Alla.” Tajjeb, meta dawn l-​irġiel jisimgħu din it-​tweġiba minn Ġesù taʼ vera mgħallem, jiskantaw. U jmorru u jerħulu waħdu.

Meta jaraw id-​disfatta tal-​Fariżej f’li jġibu xi ħaġa kontra Ġesù, is-​Sadduċej, li jgħidu li m’hemmx irxoxt, jersqu lejh u jistaqsu: “Għalliem, Mosè qal, ‘Jekk xi raġel imut mingħajr tfal, ħuh irid jieħu lil martu fiż-​żwieġ u jtellaʼ nisel għal ħuh.’ Issa kien hemm sebat aħwa magħna; u l-​ewwel wieħed iżżewweġ u miet, u, billi ma kellux nisel, ħalla lil martu għal ħuh. Ġara l-​istess ukoll mat-​tieni u t-​tielet, sas-​sebaʼ wieħed. Fl-​aħħarnett il-​mara mietet. Għaldaqstant, fl-​irxoxt, mart liema wieħed mis-​sebgħa se tkun hi? Għax kollha ħaduha.”

Bi tweġiba Ġesù jgħid: “Mhux għalhekk intom żballjati intom, għax la tafu l-​Iskrittura u lanqas il-​qawwa t’Alla? Għax meta jqumu mill-​imwiet, la l-​irġiel ma jiżżewġu u lanqas in-​nisa ma jingħataw fiż-​żwieġ, imma huma bħal anġli fis-​smewwiet. Imma dwar il-​mejtin, li huma jiġu mqajmin, ma qrajtux fil-​ktieb taʼ Mosè, fir-​rakkont dwar il-​pjanta tax-​xewk, kif Alla qallu, ‘Jien dak Alla taʼ Abraham u Alla taʼ Iżakk u Alla taʼ Ġakobb’? Huwa Alla, mhux tal-​mejtin, imma tal-​ħajjin. Intom żballjati ferm.”

Għal darb’oħra l-​folol huma mistagħġba bit-​tweġiba taʼ Ġesù. Saħansitra wħud mill-​iskribi jammettu: “Għalliem, int tkellimt sewwa.”

Meta l-​Fariżej jaraw li Ġesù sikket lis-​Sadduċej, jiġu għandu fi grupp wieħed. Biex iġarrbuh iżjed, wieħed Skrib fosthom jistaqsi: “Għalliem, liema hu l-​akbar kmandament fil-​Liġi?”

Ġesù jwieġeb: “L-​ewwel hu, ‘Ismaʼ, O Iżrael, Jehovah Alla tagħna huwa Jehovah wieħed, u int trid tħobb lil Jehovah Alla tiegħek b’qalbek kollha u b’ruħek kollha u b’moħħok kollu u b’saħħtek kollha.’ It-​tieni hu dan, ‘Int trid tħobb lil ġarek bħalek innifsek.’ M’hemm ebda kmandament ieħor akbar minn dawn.” Fil-​fatt, Ġesù jżid: “Fuq dawn iż-​żewġ kmandamenti hi mdendla l-​Liġi sħiħa, u l-​Profeti.”

“Għalliem, int sewwa għedt fi qbil mal-​verità,” jaqbel miegħu l-​iskrib. “‘Huwa Wieħed, u m’hemm ebda ieħor għajrU’; u din li wieħed iħobbu b’qalbu kollha u bil-​fehma kollha tiegħu u bis-​saħħa kollha tiegħu u din li wieħed iħobb lil ġaru bħalu nnifsu tiswa ferm iktar mill-​offerti maħruqa kollha u mis-​sagrifiċċji kollha.”

Billi jara li l-​iskrib wieġeb b’intelliġenza, Ġesù jgħidlu: “M’intix ’il bogħod mis-​saltna t’Alla.”

Għal tlett ijiem issa​—il-​Ħadd, it-​Tnejn, u t-​Tlieta​—Ġesù kien qed igħallem fit-​tempju. In-​nies semgħuh bil-​ferħ, iżda l-​mexxejja reliġjużi jridu joqtluh, imma s’issa l-​attentati tagħhom ma rnexxewx. Mattew 22:​15-40; Mark 12:​13-34; Luqa 20:20-40.

▪ Liema konfoffa jħawru l-​Fariżej biex jonsbu lil Ġesù, u x’kien jirriżulta kieku kellu jagħti iva jew le bħala tweġiba?

▪ Ġesù kif iħarbat l-​attentati tas-​Sadduċej biex jonsbuh?

▪ Il-​Fariżej liema attentat ieħor jagħmlu biex iġarrbu lil Ġesù, u x’inhu r-​riżultat?

▪ Matul il-​ministeru finali tiegħu f’Ġerusalemm, Ġesù għal kemm-il ġurnata jgħallem fit-​tempju, u b’liema effett?