Programm Biex Tiżviluppa l-​Abbiltà Bħala Kelliemi u Għalliem

SEW jekk int żagħżugħ u sew jekk int imdaħħal fiż-​żmien, sew jekk int raġel u sew jekk int mara, dan il-​kors jistaʼ jgħinek tesprimi ruħek b’mod iktar effettiv u jgħinek ukoll tkun iktar kwalifikat bħala għalliem tal-​Kelma taʼ Alla.

L-​inkarigi għal dawk li huma miktubin fl-​Iskola tal-​Ministeru Teokratiku jingħataw mill-​indokratur tal-​iskola. Fit-​tliet paġni li jmiss, se ssib il-​formola tal-​pariri tiegħek. In-​numri maġenb id-​diversi punti jaqblu mal-​istudji fil-​paġni li jiġu wara. F’dawn l-​istudji se ssib spjegazzjoni taʼ x’jinvolvi li tkun tas-​sengħa f’dawn l-​aspetti tat-​taħdit u tat-​tagħlim u għala kull wieħed minnhom huwa importanti. Se ssib ukoll direzzjoni siewja dwar kif twettaq dak li jkun qed jiġi suġġerit.

Il-​kuluri fuq il-​formola tal-​pariri jindikaw liema punti japplikaw għall-​inkarigi li jinvolvu (1) qari lill-​udjenza, (2) turija bi tnejn min-​nies jew iktar, jew (3) taħdita lill-​kongregazzjoni. L-​indokratur tal-​iskola jagħtik il-​punt li għandek taħdem fuqu. Ikun aħjar li taħdem fuq il-​punti wieħed wieħed. Int se tibbenefika jekk tagħmel it-​taħriġ suġġerit fl-​aħħar tal-​istudju li jkun ngħatalek. Jekk turi li rnexxielek tapplika l-​parir fl-​istudju li ngħatalek, il-​ħu li jagħti l-​pariri se jagħtik punt ieħor fuqiex taħdem.

Jekk l-​inkarigu tiegħek huwa turija, int se jkollok bżonn toħloq sitwazzjoni. F’paġna 82 hemm lista taʼ diversi sitwazzjonijiet, iżda m’intix marbut maʼ din il-​lista. Il-​ħu li jagħti l-​pariri jistaʼ jissuġġerilek li tipprova tuża sitwazzjoni partikulari sabiex tikseb l-​esperjenza, jew għandu mnejn iħalli l-​għażla f’idejk.

Il-​qari taʼ dan il-​ktieb flimkien maʼ li tagħmel it-​taħriġ li fih jistgħu jgħinuk bil-​kbir biex tagħmel progress, anki meta ma tkunx qed tipprepara xi inkarigu tal-​iskola. Forsi tistaʼ tkopri studju differenti kull ġimgħa, bejn wieħed u ieħor.

Ilek kemm ilek tieħu sehem fl-​iskola jew fil-​ministeru tal-​għalqa, dejjem hemm lok għal titjib. Jalla tibbenefika bis-​sħiħ mill-​edukazzjoni li toffri l-​Iskola tal-​Ministeru Teokratiku.