Kwalità tal-​Leħen

IN-​NIES huma influwenzati bil-​kbir mhux biss minn dak li jintqal imma wkoll minn kif jintqal. Jekk persuna li tkellmek ikollha leħen pjaċevoli, kordjali, dħuli, u li juri qalb tajba, ma taħsibx li int tkun iktar inklinat li tismaʼ b’mod favorevoli milli jekk ikollha leħen bla sentiment jew aħrax?

Il-​fatt li tiżviluppa l-​kwalità tal-​leħen mixtieqa mhux marbut biss mal-​mod kif jaħdem il-​leħen. Jistaʼ jinvolvi wkoll il-​personalità taʼ dak li jkun. Hekk kif individwu jagħmel progress fl-​għarfien u l-​applikar tal-​verità tal-​Bibbja, il-​bidliet isiru evidenti mill-​mod kif jitkellem. Kwalitajiet divini bħall-​imħabba, il-​ferħ, u l-​qalb tajba huma riflessi f’leħnu. (Gal. 5:22, 23) Minn leħnu wieħed juri kemm jinteressah ġenwinament mill-​oħrajn. Meta l-​gratitudni tieħu post l-​attitudni taʼ li wieħed dejjem jilmenta, kemm il-​kliem li jiġi mlissen u kemm it-​ton tal-​leħen jagħtu evidenza taʼ dan. (Lam. 3:39-​42; 1 Tim. 1:12; Ġuda 16) Anki meta ma tifhimx il-​lingwa mitkellma, jekk individwu wieħed jinstemaʼ arroganti, intolleranti, kritiku, u aħrax u individwu ieħor jinstemaʼ umli, paċenzjuż, qalbu tajba, u kollu mħabba, ma jkunx diffiċli għalik biex tagħraf id-​differenza.

F’ċerti każi, kwalità mhix mixtieqa fil-​leħen tistaʼ tkun minħabba marda li tħassar il-​larinġi taʼ individwu jew minħabba difett fiżiku li jkun wiret. Kundizzjonijiet bħal dawn jistgħu tant ikunu gravi li ma jistgħux jiġu megħlubin għalkollox f’din is-​sistema. Madankollu, ġeneralment jekk dak li jkun jitgħallem juża kif jixraq l-​organi tat-​taħdit ikun jistaʼ jara titjib.

Mill-​bidu nett huwa importanti li nifhmu li l-​karatteristiki tal-​leħen ivarjaw minn persuna għal oħra. Il-​mira tiegħek m’għandhiex tkun li tiżviluppa leħen li jkun jixbah lil taʼ xi ħadd ieħor. Minflok, ikkultiva l-​potenzjal taʼ leħnek stess, bil-​kwalitajiet distintivi tiegħu. X’jistaʼ jgħinek tagħmel dan? Hemm żewġ affarijiet li huma prinċipalment essenzjali.

Ħu Nifs Kif Suppost. Għall-​aħjar riżultati meta tuża leħnek, irid ikollok biżżejjed nifs u trid tikkontrollah kif suppost. Mingħajr dawn l-​affarijiet, leħnek jistaʼ jinstemaʼ dgħajjef, u l-​mod kif tagħti t-​taħdita jistaʼ jkun bl-​iskossi.

L-​akbar parti tal-​pulmuni tiegħek mhijiex fil-​parti taʼ fuq taʼ sidrek; din il-​parti sempliċement tidher akbar minħabba l-​għadam tal-​ispalel. Minflok, il-​pulmuni huma l-​iktar wesgħin eżatt fuq id-​dijaframma. Imqabbda mal-​parti taʼ isfel tal-​kustilji, id-​dijaframma hija muskolu li jissepara s-​sider miż-​żaqq.

Jekk timla biss il-​parti taʼ fuq tal-​pulmuni tiegħek meta tieħu n-​nifs ’il ġewwa, malajr se taqtaʼ nifsek. Leħnek mhux se jkun qawwi biżżejjed, u se tegħja malajr. Biex tieħu n-​nifs kif suppost, trid tpoġġi jew toqgħod wieqaf dritt u żżomm spallejk lura. Agħmel sforz diliġenti biex tevita li timla biss il-​parti taʼ fuq taʼ sidrek meta tieħu n-​nifs biex titkellem. L-​ewwel imla l-​parti taʼ isfel tal-​pulmuni tiegħek. Meta din il-​parti timtela, il-​parti taʼ isfel tal-​kustilji se tespandi mill-​ġnub. Fl-​istess ħin, id-​dijaframma se tinżel ’l isfel, u bil-​mod iċċaqlaq l-​istonku u l-​imsaren, b’tali mod li int tħoss il-​pressjoni taċ-​ċinturin jew taʼ ħwejjeġ oħrajn fuq iż-​żaqq tiegħek. Imma l-​pulmuni mhumiex fiż-​żaqq tiegħek; jinsabu fil-​qafas tas-​sider. Biex tittestja lilek innifsek, poġġi id waħda fuq kull naħa tal-​parti taʼ isfel tal-​kustilji tiegħek. Issa ħu nifs fil-​fond. Jekk qed tieħu n-​nifs kif suppost, mhux se ddaħħal żaqqek ’il ġewwa u tgħolli spallejk. Minflok, se tħoss il-​kustilji jiċċaqalqu ftit ’il fuq u ’l barra.

Issa, aħdem fuq kif toħroġ in-​nifs ’il barra. Taħlix dan in-​nifs billi tħallih joħroġ bil-​ħeffa. Ħallih joħroġ bil-​mod. Tipprovax tikkontrollah billi tissikka griżmejk. Dan iġiegħel lil leħnek jinstemaʼ riġidu jew irqiq iktar min-​normal. Il-​pressjoni mill-​muskoli addominali u mill-​muskoli taʼ bejn il-​kustilji joħorġu l-​arja ’l barra, waqt li d-​dijaframma tinfluwenza kemm toħroġ malajr.

Sewwasew bħalma ġerrej jitħarreġ għal tellieqa, hekk ukoll kelliemi jistaʼ jiżviluppa kontroll xieraq tan-​nifs bl-​eżerċizzji. Oqgħod dritt bi spallejk lura, ħu n-​nifs ħalli timla l-​parti taʼ isfel tal-​pulmuni tiegħek, u ftit ftit ħu n-​nifs ’il barra u bil-​mod għodd kemm tistaʼ f’nifs wieħed. Imbagħad ipprattika l-​qari b’leħen għoli waqt li tieħu n-​nifs bl-​istess mod.

Irrilassa l-​Muskoli Ebsin. Xi ħaġa oħra essenzjali għal kwalità tajba tal-​leħen hi din—irrilassa! Tiskanta kemm titjieb meta titgħallem tirrilassa biex titkellem. Kemm il-​moħħ kif ukoll il-​ġisem iridu jkunu rilassati, għaliex it-​tensjoni tal-​moħħ tikkaġuna tensjoni muskolari.

Irrilassa t-​tensjoni tal-​moħħ billi tikseb il-​ħarsa xierqa dwar is-​semmiegħa tiegħek. Jekk dawn huma nies li tiltaqaʼ magħhom fil-​ministeru tal-​għalqa, ftakar li anki jekk studjajt il-​Bibbja għal ftit xhur biss, int taf affarijiet taʼ valur dwar l-​iskop taʼ Ġeħova li tistaʼ taqsam magħhom. U int qed iżżurhom għax għandhom bżonn l-​għajnuna, kemm jekk jirrealizzaw dan u kemm jekk le. Mill-​banda l-​oħra, jekk qed titkellem f’Sala tas-​Saltna, ħafna minn dawk fl-​udjenza tiegħek huma n-​nies taʼ Ġeħova. Huma l-​ħbieb tiegħek u jriduk tirnexxi. Ħadd fuq l-​art ma jiffaċċja udjenza daqshekk dħulija u maħbuba bħalma niffaċċjaw aħna regolarment.

Irrilassa l-​muskoli taʼ griżmejk billi tiffoka moħħok fuq dawk il-​muskoli u toqgħod attent li tnaqqsilhom it-​tensjoni. Ftakar li l-​kordi vokali tiegħek jivvibraw meta tgħaddi l-​arja minnhom. It-​ton tal-​leħen jinbidel hekk kif il-​muskoli tal-​griżmejn jissikkaw jew jirrilassaw, sewwasew bħalma t-​ton taʼ korda taʼ kitarra jew taʼ vjolin jinbidel meta l-​korda tiġi ssikkata jew maħlula. Meta sserraħ il-​kordi vokali, it-​ton jitbaxxa. Jekk tirrilassa l-​muskoli tal-​griżmejn tgħin ukoll biex iżżomm l-​imnifsejn miftuħin, u dan żgur li jeffettwa l-​kwalità taʼ leħnek.

Irrilassa ġismek kollu—irkopptejk, idejk, spallejk, u għonqok. Dan se jgħin biex ikollok ir-​riżonanza (tip taʼ vibrazzjoni) meħtieġa ħalli leħnek iwassal. Ir-​riżonanza toħroġ meta l-​ġisem kollu jaġixxi bħala tavla li tkabbar il-​ħoss, imma t-​tensjoni ttellef din ir-​riżonanza. It-​ton tal-​leħen li hu prodott mil-​larinġi, jerġaʼ jidwi mhux biss fl-​imnifsejn imma wkoll mal-​istruttura tal-​għadam tas-​sider, is-​snien, is-​saqaf tal-​ħalq, u s-​sinus. Dawn kollha jistgħu jikkontribwixxu għall-​kwalità tar-​riżonanza. Jekk tpoġġi biċċa toqol fuq it-​tavla tal-​ħoss taʼ kitarra, il-​ħoss jitmewwet; it-​tavla ma jrid ikollha xejn xi jfixkilha milli tivvibra jekk se tagħmel riżonanza kif suppost. L-​istess huwa l-​każ bl-​istruttura tal-​għadam taʼ ġisimna, li jinżammu flimkien b’mod sod mill-​muskoli. Bir-​riżonanza int tkun tistaʼ tirregola leħnek sew u tesprimi sentimenti diversi. Se tkun tistaʼ tilħaq udjenza kbira mingħajr ma tagħmel stress fuq leħnek.