Konklużjoni Effettiva

GĦANDEK mnejn tkun għamilt riċerka bir-​reqqa u organizzajt il-​materjal għall-​parti prinċipali tat-​taħdita tiegħek. Forsi tkun ippreparajt ukoll introduzzjoni li tqanqal l-​interess. Xorta waħda, hemm bżonn xi ħaġa oħra—konklużjoni effettiva. Tnaqqasx l-​importanza tagħha. Dak li tgħid l-​aħħar spiss jibqaʼ l-​iktar f’moħħ dak li jkun. Jekk il-​konklużjoni tkun batuta, anki dak li ntqal qabilha jistaʼ jitlef ħafna mill-​effettività tiegħu.

Ikkunsidra dan li ġej: Lejn tmiem ħajtu, Ġożwè ta taħdita memorabbli lill-​irġiel ixjeħ tal-​ġens taʼ Israel. Wara li rrakkonta l-​mod kif Ġeħova ttratta maʼ Israel sa minn żmien Abraham, tenna Ġożwè sempliċement il-​punti prinċipali fil-​forma taʼ sommarju? Le. Minflok, b’sentiment profond hu ħeġġeġ lin-​nies: “Ibżgħu minn Ġeħova u aqduh mingħajr nuqqas u bil-​verità.” Aqra għalik innifsek il-​konklużjoni taʼ Ġożwè, kif imniżżla f’​Ġożwè 24:14, 15.

Taħdita oħra taʼ min jinnotaha, misjuba f’​Atti 2:14-​36, ngħatat mill-​appostlu Pietru lil folla f’Ġerusalemm fil-​Festa taʼ Pentekoste tas-​sena 33 E.K. L-​ewwel hu spjega li huma kienu xhieda tat-​twettiq tal-​profezija taʼ Ġoel rigward it-​tferrigħ tal-​ispirtu taʼ Alla. Imbagħad wera kif dan kien konness mal-​profeziji Messjaniċi fis-​Salmi li bassru l-​irxoxt taʼ Ġesù Kristu u l-​fatt li tgħolla għal fuq il-​lemin taʼ Alla. Imbagħad, fil-​konklużjoni tiegħu, Pietru semma biċ-​ċar il-​kwistjoni li kulħadd fl-​udjenza tiegħu kellu bżonn jiffaċċja. Hu qal: “Għalhekk, ħa tkun taf fiċ-​ċert id-​dar kollha taʼ Israel li lil dan Ġesù, li intom sammartuh maʼ zokk, Alla għamlu kemm Mulej u kemm Kristu.” Dawk preżenti staqsew: “Irġiel, aħwa, x’għandna nagħmlu?” Pietru wieġeb: “Indmu, u ħa jitgħammed kull wieħed minnkom f’isem Ġesù Kristu.” (Atti 2:37, 38) Dakinhar madwar 3,000 ruħ fl-​udjenza li kellu, imqanqlin bil-​kbir b’dak li kienu semgħu, ħaddnu l-​verità dwar Ġesù Kristu.

Punti li Trid Iżżomm f’Moħħok. Dak li tgħid fil-​konklużjoni tiegħek għandu jkun relatat direttament mat-​tema tat-​taħdita tiegħek. Għandu jkun bħala konklużjoni loġika tal-​punti prinċipali li tkun żviluppajt. Għalkemm forsi tkun trid tinkludi xi kliem importanti mit-​tema tiegħek, m’hemmx għalfejn terġaʼ ssemmiha kelma b’kelma.

Normalment, l-​iskop tiegħek meta titkellem hu li tinkuraġġixxi lill-​oħrajn biex jieħdu xi tip taʼ azzjoni fuq il-​bażi tal-​informazzjoni li tippreżenta. Wieħed mill-​iskopijiet prinċipali tal-​konklużjoni hu li turihom x’għandhom jagħmlu. Meta għażilt it-​tema tiegħek u l-​punti prinċipali, ikkunsidrajt bir-​reqqa għala l-​materjal se jkun importanti għall-​udjenza tiegħek u x’se jkun l-​iskop tiegħek meta tagħti t-​taħdita? Jekk iva, int taf l-​azzjoni li tridhom jieħdu. Issa trid tispjega x’inhi dik l-​azzjoni u forsi kif jistgħu jwettquha.

Flimkien maʼ li turi lill-​udjenza tiegħek x’għandha tagħmel, il-​konklużjoni tiegħek għandha tipprovdi motivazzjoni. Għandha tinkludi raġunijiet validi għala trid tittieħed azzjoni u forsi l-​benefiċċji li jistgħu jirriżultaw milli wieħed jagħmel dan. Jekk is-​sentenza finali hi maħsuba bir-​reqqa u mpoġġija tajjeb, din se ssaħħaħ it-​taħdita tiegħek kollha kemm hi.

Żomm f’moħħok li t-​taħdita waslet fi tmiemha. Dak li tgħid għandu jindika dan. Il-​pass tiegħek ukoll għandu jkun xieraq. Titkellimx bl-​għaġla sat-​tmiem u mbagħad tieqaf ħesrem. Mill-​banda l-​oħra, tħallix leħnek sempliċement jispiċċa fix-​xejn. Leħnek għandu jkun għoli biżżejjed iżda mhux jgħajjat. L-​aħħar ftit sentenzi għandhom juru li wasalt biex tispiċċa. Int u tgħidhom trid turi ħeġġa u konvinzjoni. Meta tipprepara kif se tagħti t-​taħdita tiegħek, kun żgur li tipprattika l-​konklużjoni tiegħek.

Kemm għandha tkun twila l-​konklużjoni? Din mhix xi ħaġa li trid tiġi determinata biss mill-​ħin. Il-​konklużjoni m’għandhiex tkarkar. Tistaʼ tinduna jekk hijiex taʼ tul xieraq minn kif tirreaġixxi l-​udjenza. Konklużjoni sempliċi, diretta, u pożittiva dejjem tkun apprezzata. Konklużjoni pjuttost itwal li tinkludi tixbiha qasira tistaʼ wkoll tkun effettiva jekk tkun pjanata bir-​reqqa. Qabbel il-​konklużjoni qasira tal-​ktieb kollu kemm hu taʼ Ekkleżjasti, li nsibu f’​Ekkleżjasti 12:13, 14, mal-​konklużjoni tal-​prietka ħafna iqsar taʼ fuq il-​muntanja, imniżżla f’​Mattew 7:24-​27.

Fil-​Ministeru tal-​Għalqa. L-​iktar post fejn ikollok bżonn tagħmel konklużjonijiet hu fil-​ministeru tal-​għalqa. Bil-​preparazzjoni u l-​interess kollu mħabba fin-​nies, int tistaʼ twettaq ħafna ġid. Il-​parir imniżżel fil-​paġni taʼ qabel jistaʼ jkun taʼ benefiċċju meta jiġi applikat anki jekk tadattah għal konversazzjoni bejn tnejn min-​nies.

Konversazzjoni tistaʼ tkun tassew qasira. Il-​persuna jistaʼ jkollha ħafna x’tagħmel. Iż-​żjara tiegħek kollha kemm hi tistaʼ tieħu biss minuta b’kollox. Jekk inhu xieraq, tistaʼ tgħid xi ħaġa hekk: “Nistaʼ nifhem li għandek ħafna x’tagħmel. Iżda ppermettili nħallik bi ħsieb inkuraġġanti. Il-​Bibbja turi li l-​Ħallieq tagħna għandu skop meraviljuż—li jagħmel din l-​art post fejn in-​nies jistgħu jgawdu l-​ħajja għal dejjem. Aħna nistgħu nkunu f’dik il-​Ġenna tal-​art, iżda għandna bżonn nitgħallmu x’jirrikjedi Alla.” Jew tistaʼ sempliċement toffri li terġaʼ tmur f’ħin iktar konvenjenti.

Jekk iż-​żjara tinqataʼ ħesrem minħabba li l-​inkwilin ikun kemxejn goff—saħansitra maledukat—xorta tistaʼ twettaq ħafna ġid. Żomm f’moħħok il-​parir li nsibu f’​Mattew 10:12, 13 u Rumani 12:17, 18. It-​tweġiba ħelwa tiegħek tistaʼ tibdel il-​ħarsa tiegħu lejn ix-​Xhieda taʼ Ġeħova. B’dan tkun għamilt xi ħaġa mill-​aqwa.

Mill-​banda l-​oħra, forsi kellek konversazzjoni sodisfaċenti mal-​inkwilin. Għala ma tirripetix il-​punt prinċipali li tridu jiftakar? Agħtih motivazzjoni biex jagħmel xi ħaġa dwar dak li għedtu.

Jekk tara opportunità għal iktar diskussjoni f’ħin ieħor, agħti l-​persuna raġuni biex tħares ’il quddiem għaliha. Staqsi mistoqsija—forsi waħda li hi diskussa fil-​ktieb Reasoning From the Scriptures, jekk inhu disponibbli b’lingwa li tifhimha, jew xi pubblikazzjoni disinjata biex tikkonduċi studji tal-​Bibbja fid-​dar. Żomm f’moħħok il-​mira tiegħek kif semma Ġesù u kif insibuha miktuba f’​Mattew 28:19, 20.

Qiegħed int tikkonkludi studju tal-​Bibbja fid-​dar? Meta terġaʼ ssemmi t-​tema se tgħin lill-​istudent jiftakar dak li ġie diskuss. L-​użu tal-​mistoqsijiet se jgħin biex il-​punti prinċipali jidħlu f’moħħ l-​istudent, speċjalment jekk ir-​reviżjoni ma tkunx mgħaġġla. Mistoqsija rigward kif il-​materjal studjat jistaʼ jkun taʼ benefiċċju għall-​istudent jew kif jistaʼ jaqsmu maʼ oħrajn tistaʼ tgħinu jaħseb dwar kif jipprattika dak li tgħallem.—Prov. 4:7.

Ftakar—il-​konklużjoni tiegħek tinfluwenza l-​effettività tad-​diskussjoni tiegħek kollha kemm hi.