Kapitlu Wieħed

L-​Unità fil-​Qima fi Żmienna—Xi Tfisser?

1, 2. (a) Liema attività mqanqla qed isseħħ fi żmienna? (b) X’tama meraviljuża għandhom in-​nies taʼ qalb onesta?

MADWAR il-​globu hemm attività mqanqla lejn l-​unità fil-​qima. Din qed tgħaqqad flimkien miljuni taʼ nies minn kull ġens, tribù, u lsien. Kull sena dawn dejjem qed jiżdiedu. Fil-​Bibbja huma identifikati bħala “xhieda” taʼ Jehovah u jissejħu “kotra kbira.” ‘Lejl u nhar qed jaqdu’ lil Alla. (Isaija 43:​10-12; Apokalissi 7:​9-15) Għala jagħmluh dan? Għax għarfu li Jehovah huwa l-​uniku Alla veru. Dan iqanqalhom biex jgħixu ħajjithom fi qbil mal-​livelli ġusti u sewwa tiegħu. Ukoll, huma tgħallmu li qed ngħixu fl-​aħħar jiem taʼ din id-​dinja preżenti mill-​agħar, li dalwaqt Alla se jeqridha, u minflokha se jkun hawn dinja ġdida magħmula ġenna.—2 Timotju 3:​1-5, 13; 2 Pietru 3:​10-13.

² Il-​Kelma t’Alla twiegħed: “Ftit ieħor, u l-​ħażin ma jkunx aktar . . . Imma l-​ġwejdin għad jirtu l-​art, u bi sliem kotran jitgħaxxqu.” (Salm 37:​10, 11) “Il-​ġusti jirtu l-​art, u jgħammru fiha għal dejjem.” (Salm 37:29) “[Alla] jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:4.

3. Kif qed tintlaħaq l-​unità vera fil-​qima?

³ Dawk li issa qed jingħaqdu fil-​qima vera jifformaw l-​ewwel residenti taʼ din id-​dinja l-​ġdida. Huma tgħallmu x’inhi r-​rieda t’Alla u qed iwettquha b’ħilithom kollha. Biex juri l-​importanza taʼ dan, Ġesù qal: “Din hi l-​ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.” (Ġwann 17:3) L-​appostlu Ġwanni kiteb: “Id-​dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.”—1 Ġwann 2:17.

Xi Tfisser Verament

4. (a) Xi jfisser verament il-​ġbir taʼ tant nies għall-​qima magħquda fi żmienna? (b) Il-​Bibbja kif tiddeskrivih dan il-​ġbir?

⁴ Xi jfisser verament il-​ġbir taʼ tant nies għall-​qima magħquda fi żmienna? Hija evidenza ċara li ninsabu ferm qrib it-​tmiem taʼ din id-​dinja mill-​agħar, u eżatt wara dan se tibda d-​dinja l-​ġdida t’Alla. Qed naraw b’għajnejna stess it-​twettiq tal-​profeziji Bibliċi li bassru dan il-​ġbir importanti. Waħda minn dawn il-​profeziji tgħid: “Għad jiġri fl-​aħħar jiem li l-​għolja taʼ dar il-​Mulej [il-qima vera u kbira tiegħu] togħla ’l fuq mill-​qċaċet tal-​muntanji [’il fuq minn kwalunkwe xorta taʼ qima oħra] . . . Lejha għad jiġu l-​popli kollha, kotra sħiħa taʼ ġnus għad jiġu u jgħidu: ‘Immorru u nitilgħu fuq l-​għolja tal-​Mulej, lejn id-​dar taʼ Alla taʼ Ġakobb, biex jgħallimna triqatu, biex aħna nimxu fi triqtu.’”​—Mikea 4:​1, 2; Salm 37:34.

5, 6. (a) Kif jistaʼ jingħad li l-​ġnus qed iduru lejn Jehovah? (b) Liema mistoqsijiet għandna nistaqsu lilna nfusna?

⁵ Filwaqt li m’humiex ġnus sħaħ li qed jippreżentaw ruħhom fid-​dar spiritwali taʼ Jehovah għall-​qima, hemm miljuni taʼ individwi mill-​ġnus kollha li qed jagħmlu dan. Hekk kif jitgħallmu dwar l-​iskop kollu mħabba u l-​personalità sabiħa t’Alla Jehovah li tiġbdek lejh, huma jitqanqlu mill-​fond taʼ qalbhom. B’umiltà huma jipprovaw isibu dak li Alla jirrikjedi minnhom. It-​talba tagħhom hi bħal dik tas-​salmista li qal: “Għallimni nagħmel ir-​rieda tiegħek, għax int Alla tiegħi.”—Salm 143:10.

⁶ Tara int lilek innifsek fost il-​kotra kbira taʼ nies li Jehovah qed jgħaqqad flimkien f’qima magħquda? Qiegħed turi r-​reazzjoni tiegħek għall-​istruzzjoni li rċivejt mill-​Kelma tiegħu u li int tassew tapprezza li Jehovah huwa s-​Sors taʼ dan it-​tagħlim? Sa liema punt ‘timxi fi triqtu’?

Kif Tinkiseb

7. (a) Sa liema punt għad trid tintlaħaq l-​unità fil-​qima? (b) Għala huwa urġenti li wieħed isir aduratur taʼ Jehovah issa, u kif nistgħu ngħinu lil oħrajn jagħmlu dan?

⁷ L-​iskop taʼ Jehovah għall-​ħlejjaq intelliġenti kollha tiegħu huwa li jingħaqdu fil-​qima vera. Kemm nixxennqu għal dak il-​jum meta dawk kollha ħajjin se jqimu lill-​uniku Alla veru! (Salm 103:​19-22) Imma qabel ma dan jistaʼ jseħħ, Jehovah irid jelimina lil dawk kollha li jirrifjutaw li jagħmlu r-​rieda ġusta u sewwa tiegħu. Kollu mogħdrija, hu jwissi minn qabel dwar dak li jkun se jagħmel, sabiex in-​nies kullimkien jistaʼ jkollhom l-​opportunità li jbiddlu l-​mod kif jaġixxu. (Isaija 55:​6, 7) B’hekk, fi żmienna lin-​nies taʼ “kull ġens, tribù, lsien u poplu,” qed isirilhom dan l-​appell urġenti: “Ibżgħu minn Alla u agħtuh glorja, għax ġiet is-​siegħa tal-​ħaqq tiegħu, u inxteħtu agħtu qima lil dak li għamel is-​sema u l-​art u l-​baħar u l-​għejun taʼ l-​ilmijiet.” (Apokalissi 14:​6, 7) Aċċettajtha int din l-​istedina? Jekk iva, huwa l-​privileġġ tiegħek li tistieden lil oħrajn biex isiru jafu u jqimu lil Alla veru.

8. Wara li nitgħallmu t-​tagħlim bażiku tal-​Bibbja, liema progress ieħor irridu nipprovaw nagħmlu b’ħilitna kollha?

⁸ M’huwiex l-​iskop taʼ Jehovah li jaċċetta qima mingħand nies li jgħidu li jemmnu fih u fl-​istess ħin ikomplu jiġru wara l-​interessi tagħhom stess. Alla jrid li n-​nies ‘jagħrfu sewwa r-​rieda tiegħu’ u dan juruh bil-​mod kif jgħixu ħajjithom. (Kolossin 1:​9, 10) B’hekk, nies grati li jitgħallmu t-​tagħlim bażiku tal-​Bibbja għandhom jimxu ’l quddiem lejn il-​maturità Kristjana. Ix-​xewqa tagħhom hi li jsiru jafu lil Jehovah b’mod iktar intimu, li jkabbru l-​għarfien tagħhom billi jħaffru fil-​fond fil-​Kelma tiegħu, u japplikawha iktar bis-​sħiħ f’ħajjithom. Huma jipprovaw jirriflettu l-​kwalitajiet taʼ Missierna tas-​sema u jħarsu lejn l-​affarijiet bħalma jħares lejhom hu. Dan iqanqalhom biex isibu modi kif jieħdu sehem fix-​xogħol taʼ salvazzjoni li Jehovah qed jorganizza fuq l-​art fi żmienna. Hija din ix-​xewqa tiegħek ukoll?—Mark 13:10; Lhud 5:12–6:3.

9. B’liema modi l-​unità vera hija possibbli issa?

⁹ Il-​Bibbja turi li dawk li jaqdu lil Jehovah iridu jkunu poplu magħqud. (Efesin 4:​1-3) Din l-​unità għandha teżisti minn issa, avolja qed ngħixu f’dinja maqsuma u għadna nitħabtu bl-​imperfezzjonijiet tagħna stess. Ġesù talab bil-​ħrara biex id-​dixxipli kollha tiegħu jkunu ħaġa waħda, u jgawdu l-​unità vera. Dan xi jkun ifisser? L-​ewwelnett, li huma jkollhom relazzjoni tajba maʼ Jehovah u maʼ Ibnu. It-​tieni, li jkunu magħqudin bejniethom. (Ġwann 17:​20, 21) Għal dan l-​għan, il-​kongregazzjoni Kristjana sservi bħala l-​organizzazzjoni li permezz tagħha Jehovah jistruwixxi lill-​poplu tiegħu.

Liema Fatturi Jikkontribwixxu għall-​Unità?

10. (a) X’niżviluppaw meta nużaw il-​Bibbja personalment biex nirraġunaw fuq it-​tweġibiet għall-​mistoqsijiet li jeffettwawna? (b) Analizza l-​fatturi li jikkontribwixxu għall-​unità Kristjana billi twieġeb il-​mistoqsijiet imniżżlin f’dan il-​paragrafu.

¹⁰ Issa se naraw sebaʼ fatturi li jikkontribwixxu għall-​unità fil-​qima. Hekk kif twieġeb il-​mistoqsijiet li hemm magħhom, aħseb ftit dwar kif kull punt jeffettwa r-​relazzjoni tiegħek maʼ Jehovah u mal-​Kristjani sħabek. Jekk tirraġuna fuq dawn il-​punti u tfittex l-​iskritturi li huma ċitati, imma mhux kwotati, dan se jgħinek tiżviluppa l-​għerf divin, l-​abbiltà taʼ ħsieb, u d-​dehen—kwalitajiet li lkoll kemm aħna għandna bżonn. (Proverbji 5:​1, 2; Filippin 1:​9-11) Ikkunsidra dawn il-​fatturi wieħed wieħed.

(1) Aħna nagħrfu l-​fatt li Jehovah għandu d-​dritt jgħidilna x’inhu tajjeb u x’inhu ħażin. “Ittama fil-​Mulej b’qalbek kollha, u tafdax fl-​għaqal tiegħek. Fih aħseb f’kull ma tagħmel, u hu jwittilek triqatek.”—Proverbji 3:​5, 6.

Għala għandna nfittxu l-​pariri u l-​gwida taʼ Jehovah meta nieħdu d-​deċiżjonijiet? (Salm 146:​3-5; Isaija 48:17)

(2) Aħna għandna l-​Kelma t’Alla biex tiggwidana. “Il-​kelma taʼ Alla, li intom smajtu mingħandna, lqajtuha mhux bħala kelma taʼ bniedem, iżda bħala kelma taʼ Alla, kif tassew hi, dik il-​kelma li qiegħda taħdem fikom li emmintu.”—1 Tessalonikin 2:13.

Liema periklu hemm meta sempliċement nagħmlu dak li “nħossu” li hu tajjeb? (Proverbji 14:12; Ġeremija 10:​23, 24; 17:9)

Jekk ma nkunux nafu x’pariri tagħti l-​Bibbja dwar xi ħaġa partikulari, x’għandna nagħmlu? (Proverbji 2:​3-5; 2 Timotju 3:​16, 17)

(3) Aħna lkoll nibbenefikaw mill-​istess programm taʼ ikel spiritwali. “Uliedek ilkoll ikunu mgħallma mill-​Mulej.” (Isaija 54:13) “Naraw kif nistgħu nħajjru lil xulxin għall-​imħabba u għall-​għemil tajjeb. Ma ninqatgħux mil-​laqgħat tagħna flimkien, kif ħadu d-​drawwa jagħmlu xi wħud; agħmlu l-​qalb lil xulxin; u dan wisq aktar għandkom tagħmluh, aktar ma taraw li qiegħed joqrob il-​Jum [tal-qerda].”—Lhud 10:​24, 25.

Liema benefiċċji hemm għal dawk li jieħdu vantaġġ sħiħ mill-​arranġamenti taʼ Jehovah għall-​ikel spiritwali? (Isaija 65:​13, 14)

(4) Ġesù Kristu, u mhux xi bniedem, huwa l-​Mexxej tagħna. “Tħallux min isejjħilkom Rabbi, għax l-​Imgħallem tagħkom wieħed hu, u intom ilkoll aħwa. U ssejjħu lil ħadd missierkom fuq din l-​art, għax il-​Missier tagħkom wieħed hu, dak li hu fis-​smewwiet. Hekk ukoll tħallux min isejjħilkom mexxejja, għax il-​mexxej tagħkom wieħed hu, il-​Messija.”—Mattew 23:​8-10.

Għandu xi ħadd minna jaħseb li hu superjuri għal ħaddieħor? (Rumani 3:​23, 24; 12:3)

(5) Aħna nħarsu lejn il-​gvern tas-​Saltna t’Alla bħala l-​unika tama għall-​umanità. “Mela itolbu hekk: ‘Missierna, li inti fis-​smewwiet, jitqaddes ismek, tiġi saltnatek, ikun li trid int, kif fis-​sema, hekkda fl-​art.’ Mela fittxu l-​ewwel is-​Saltna u l-​ġustizzja taʼ Alla.”—Mattew 6:​9, 10, 33.

Li ‘nfittxu l-​ewwel is-​Saltna’ kif jgħinna nipproteġu l-​unità tagħna? (Mikea 4:3; 1 Ġwann 3:​10-12)

(6) L-​ispirtu qaddis jipproduċi fl-​aduraturi taʼ Jehovah il-​kwalitajiet li huma vitali għall-​unità Kristjana. “Il-​frott taʼ l-​Ispirtu huma: l-​imħabba, l-​hena, is-​sliem, is-​sabar, il-​ħniena, it-​tjieba, il-​fidi, il-​ħlewwa, ir-​rażan.”—Galatin 5:​22, 23.

X’irridu nagħmlu sabiex l-​ispirtu t’Alla jipproduċi l-​frott tiegħu ġewwa fina? (Atti 5:32)

Il-​fatt li jkollna l-​ispirtu t’Alla kif jinfluwenza r-​relazzjoni tagħna mal-​Kristjani sħabna? (Ġwann 13:35; 1 Ġwann 4:​8, 20, 21)

(7) L-​aduraturi veri t’Alla kollha jieħdu sehem fl-​ippridkar taʼ l-​aħbar tajba tas-​Saltna tiegħu. “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.”—Mattew 24:14.

X’għandu jqanqalna biex inkunu rridu nieħdu sehem sħiħ f’din l-​attività taʼ l-​ippridkar? (Mattew 22:​37-39; Rumani 10:10)

11. X’effett se jkollu fuqna meta napplikaw il-​veritajiet Bibliċi f’ħajjitna?

¹¹ Meta nqimu lil Jehovah f’unità nersqu iktar qrib tiegħu u jgħinna ngawdu sħubija rifreskanti mal-​kredenti sħabna. Salm 133:1 jgħid: “Kemm hi ħaġa sabiħa u ħelwa, li l-​aħwa jgħammru flimkien [f’unità]!” Kemm huwa rifreskanti li naħarbu mid-​dinja bl-​egoiżmu, l-​immoralità, u l-​vjolenza kollha tagħha u nissieħbu fil-​laqgħat maʼ dawk li verament iħobbu lil Jehovah u jobdu l-​liġijiet tiegħu!

Nevitaw Affarijiet li Jġibu l-​Firda

12. Għala għandna bżonn nevitaw spirtu taʼ indipendenza?

¹² Sabiex ma nħassrux l-​unità globali prezzjuża tagħna, irridu nevitaw l-​affarijiet li jġibu l-​firda. Waħda minnhom hi l-​ispirtu taʼ indipendenza minn Alla u mil-​liġijiet tiegħu. Jehovah jgħinna nevitawh billi jirrivela lil dak li vvintah, Satana x-​Xitan. (2 Korintin 4:4; Apokalissi 12:9) Satana hu dak li influwenza lil Adam u Eva biex jinjoraw dak li kien qal Alla u biex jieħdu deċiżjonijiet kontra r-​rieda Tiegħu. Ir-​riżultat kien gwaj għalihom u għalina. (Ġenesi 3:​1-6, 17-19) Din id-​dinja hija mimlija bl-​ispirtu taʼ indipendenza minn Alla u mil-​liġijiet tiegħu. Għalhekk, għandna bżonn irrażżnu dan l-​ispirtu ġewwa fina.

13. X’se juri jekk aħniex nippreparaw sinċerament għall-​ħajja fid-​dinja l-​ġdida, ġusta u sewwa t’Alla?

¹³ Per eżempju, ikkunsidra l-​wegħda taʼ l-​għaġeb li Jehovah se jbiddel din id-​dinja preżenti mill-​agħar maʼ smewwiet ġodda u art ġdida fejn “tgħammar il-​ġustizzja.” (2 Pietru 3:13) M’għandux dan iqanqalna biex nibdew nippreparaw ħalli ngħixu f’dak iż-​żmien meta se jirrenjaw il-​ġustizzja u s-​sewwa? Dan ifisser li nagħtu kas il-​parir sempliċi tal-​Bibbja: “Tħobbux id-​dinja u anqas dak li hemm fiha. Jekk xi ħadd iħobb id-​dinja, l-​imħabba tal-​Missier ma tgħammarx fih.” (1 Ġwann 2:15) Għaldaqstant, aħna naħarbu l-​ispirtu taʼ din id-​dinja—l-​attitudni indipendenti, l-​interess żejjed fina nfusna, l-​immoralità, u l-​vjolenza. Aħna npoġġu fil-​prattika d-​drawwa li nagħtu widen lil Jehovah u li nobduh minn qalbna, minkejja kwalunkwe inklinazzjoni opposta tal-​ġisem imperfett tagħna. Ħajjitna kollha tagħti evidenza li l-​ħsibijiet u l-​motivi tagħna huma diretti lejn li nagħmlu r-​rieda t’Alla.—Salm 40:9 (40:​8, New World Translation).

14. (a) Għala huwa importanti li naħtfu l-​opportunità issa biex nitgħallmu dwar it-​triqat taʼ Jehovah u nsegwuhom f’ħajjitna? (b) L-​iskritturi ċitati fil-​paragrafu xi jfissru għalina personalment?

¹⁴ Meta jasal iż-​żmien maħtur biex Jehovah jeqred din is-​sistema t’affarijiet mill-​agħar u lil dawk kollha li jippreferu t-​triqat tagħha, hu mhux se joqgħod jitnikker. Mhux se jtawwal iż-​żmien jew ibiddel il-​livelli tiegħu biex jissodisfa lil dawk li għadhom qed jipprovaw iżommu mad-​dinja filwaqt li jitgħallmu r-​rieda t’Alla u jagħmluha b’nofs qalb. Issa huwa ż-​żmien għall-​azzjoni! (Luqa 13:​23, 24; 17:32; 21:​34-36) Għalhekk, kemm nifirħu meta naraw il-​kotra kbira taħtaf din l-​opportunità prezzjuża, hekk kif tfittex bil-​ħerqa l-​istruzzjoni li Jehovah jipprovdi permezz tal-​Kelma u l-​organizzazzjoni tiegħu u f’unità timxi fi triqatu lejn id-​dinja l-​ġdida! U iktar ma nitgħallmu dwar Jehovah, iktar se nħobbuh u iktar inkunu rridu naqduh.

Diskussjoni Bħala Reviżjoni

• X’inhu l-​iskop taʼ Jehovah rigward il-​qima?

• Wara li nkunu ħadna t-​tagħlim bażiku tal-​Bibbja, liema progress ieħor irridu nipprovaw nagħmlu b’ħilitna kollha?

• X’nistgħu nagħmlu individwalment biex inkunu f’unità m’aduraturi oħrajn taʼ Jehovah?

[Stampa f’paġna 4]

‘Il-​ġwejdin jirtu l-​art u bi sliem kotran jitgħaxxqu’