Kapitlu Tnax

It-​Tifsira tal-​Magħmudija Tiegħek

1. Il-​magħmudija fl-​ilma għala għandha tkun taʼ interess għal kull wieħed u waħda minna?

ĠESÙ tgħammed fis-​sena 29 E.K. meta ġie mgħaddas minn Ġwanni l-​Għammied fix-​Xmara Ġordan. Jehovah innifsu kien qed jara kollox u esprima l-​approvazzjoni tiegħu. (Mattew 3:​16, 17) B’hekk, Ġesù ħalla mudell biex isegwuh id-​dixxipli kollha tiegħu. Tliet snin u nofs wara, Ġesù ta dawn l-​istruzzjonijiet lid-​dixxipli tiegħu: “Lili ngħatat kull setgħa fis-​sema u fl-​art. Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu.” (Mattew 28:​18, 19) Tgħammidt int fi qbil maʼ dak li kkmanda Ġesù hawnhekk? Jekk le, qed tipprepara biex tagħmel dan?

2. F’konnessjoni mal-​magħmudija, liema mistoqsijiet għandhom bżonn jiġu mwieġba?

² Hu x’inhu l-​każ, fehma ċara dwar il-​magħmudija hija importanti għal kulmin irid jaqdi lil Jehovah u jgħix fid-​dinja l-​ġdida, ġusta u sewwa tiegħu. Mistoqsijiet li jixirqilhom tweġiba jinkludu dawn: Il-​magħmudija tal-​Kristjani llum għandha l-​istess tifsira bħall-​magħmudija taʼ Ġesù? Xi jfisser li titgħammed “fl-​isem tal-​Missier u taʼ l-​Iben u taʼ l-​Ispirtu s-​Santu”? X’jinvolvi li tgħix fi qbil maʼ dak li tfisser il-​magħmudija Kristjana fl-​ilma?

Magħmudijiet Imwettqin minn Ġwanni

3. Għal min kienet limitata l-​magħmudija taʼ Ġwanni?

³ Madwar sitt xhur qabel ma tgħammed Ġesù, Ġwanni l-​Għammied mar jippriedka fid-​deżert tal-​Lhudija jgħid: “Indmu, għax is-​saltna tas-​smewwiet waslet.” (Mattew 3:​1, 2) In-​nies kienu jisimgħu dak li jgħid Ġwanni u jagħtu kas it-​twissija. Kienu jistqarru dnubiethom fil-​pubbliku, jindmu minnhom, u mbagħad imorru għand Ġwanni biex jgħammidhom fix-​Xmara Ġordan. Din il-​magħmudija kienet għal-​Lhud biss.—Luqa 1:​13-16; Atti 13:​23, 24.

4. Għala l-​Lhud fl-​ewwel seklu kellhom bżonn urġenti li jindmu?

⁴ Dawk il-​Lhud kellhom bżonn jindmu b’mod urġenti. Ħdejn il-​Muntanja Sinaj fis-​sena 1513 Q.E.K., missirijiethom kienu daħlu f’patt nazzjonali—qbil formali u solenni—m’Alla Jehovah. Imma minħabba d-​dnubiet kbar tagħhom, huma ma wettqux ir-​responsabbiltajiet tagħhom taħt dak il-​patt, u għalhekk ġew kundannati minnu. Sa żmien Ġesù s-​sitwazzjoni tagħhom kienet kritika. “Jum il-​Mulej u Jum il-​biżaʼ” mbassar minn Malakija kien fil-​qrib. Fis-​sena 70 E.K., dak il-​“Jum” ġie meta l-​armati Rumani qerdu lil Ġerusalemm, it-​tempju tagħha, u ’l fuq minn miljun Lhudi. Qabel dik il-​qerda ntbagħat Ġwanni l-​Għammied, mimli żelu għall-​qima vera, “ħalli jlesti poplu mħejji sewwa għall-​Mulej.” Huma kellhom bżonn jindmu mid-​dnubiet tagħhom kontra l-​patt tal-​Liġi Mosajka u jkunu preparati biex jaċċettaw lil Ġesù, l-​Iben t’Alla, li Jehovah kien se jibagħtilhom biex isalvaw.—Malakija 3:​22-24 (4:​4-6, NW); Luqa 1:17; Atti 19:4.

5. (a) Meta Ġesù mar biex jitgħammed, Ġwanni għala oġġezzjona? (b) X’kienet tissimbolizza l-​magħmudija taʼ Ġesù?

⁵ Fost dawk li ġew għand Ġwanni biex jitgħammdu kien hemm Ġesù nnifsu. Imma għala? Peress li kien jaf li Ġesù ma kellu l-​ebda dnub x’jistqarr, Ġwanni qal: “Jiena hu li jeħtieġ li nitgħammed minnek, u int tiġi għandi?” Imma l-​magħmudija taʼ Ġesù kellha tissimbolizza xi ħaġa differenti. Għalhekk, Ġesù wieġbu: “Inti għalissa ħallik minn dan, għax hekk jixraq nagħmlu biex intemmu s-​sewwa kollu.” (Mattew 3:​13-15) Peress li Ġesù kien mingħajr dnub, il-​magħmudija tiegħu ma kinitx tissimbolizza l-​indiema mid-​dnub; lanqas ma kellu għalfejn jiddedika lilu nnifsu lil Alla, ladarba kien membru taʼ ġens diġà dedikat lil Jehovah. Minflok, il-​magħmudija tiegħu fl-​età taʼ 30 sena kienet unika għalih, u kienet tissimbolizza l-​preżentazzjoni tiegħu nnifsu lil Missieru tas-​sema biex jagħmel ir-​rieda Tiegħu.

6. Kemm kien ħerqan Ġesù biex jagħmel ir-​rieda t’Alla?

⁶ Ir-​rieda t’Alla għal Kristu Ġesù kienet tinvolvi attività f’konnessjoni mas-​Saltna. (Luqa 8:1) Kienet tinvolvi wkoll is-​sagrifiċċju tal-​ħajja umana perfetta tiegħu bħala fidwa u bħala l-​bażi għal patt ġdid. (Mattew 20:28; 26:​26-​28; Lhud 10:​5-​10) Ġesù ħa verament bis-​serjetà dak li kienet tissimbolizza l-​magħmudija tiegħu fl-​ilma. Ma ħalliex interessi oħra jtellfulu l-​attenzjoni tiegħu. Sa tmiem ħajtu fuq l-​art, hu wettaq fedelment ir-​rieda t’Alla, billi għamel l-​ippridkar tas-​Saltna t’Alla x-​xogħol primarju tiegħu.—Ġwann 4:34.

Il-​Magħmudija fl-​Ilma għad-​Dixxipli Kristjani

7. Minn Pentekoste tas-​sena 33 E.K., il-​Kristjani x’intqalilhom biex jagħmlu f’konnessjoni mal-​magħmudija?

⁷ L-​ewwel dixxipli taʼ Ġesù tgħammdu fl-​ilma minn Ġwanni u mbagħad ġew diretti lejn Ġesù bħala membri prospettivi tas-​Saltna fis-​sema. (Ġwann 3:​25-30) Taħt id-​direzzjoni taʼ Ġesù dawn id-​dixxipli wkoll għammdu lil xi wħud, u din il-​magħmudija kellha l-​istess tifsira taʼ dik li wettaq Ġwanni. (Ġwann 4:​1, 2) Madankollu, b’seħħ minn Pentekoste tas-​sena 33 E.K., huma bdew iwettqu l-​inkarigu li jgħammdu “fl-​isem tal-​Missier u taʼ l-​Iben u taʼ l-​Ispirtu s-​Santu.” (Mattew 28:19) Se ssibu tassew taʼ benefiċċju li tirrivedi dan xi jfisser.

8. Xi jfisser li tkun mgħammed “fl-​isem tal-​Missier”?

⁸ Xi jfisser li titgħammed “fl-​isem tal-​Missier”? Ifisser li taċċetta l-​isem, il-​pożizzjoni, l-​awtorità, l-​iskop, u l-​liġijiet tiegħu. Ikkunsidra dan x’jinvolvi. (1) Rigward ismu, Salm 83:19 (83:​18, NW) jgħid: “Jaħweh hu ismek, li int waħdek l-​Għoli fuq l-​art kollha.” (2) Rigward il-​pożizzjoni tiegħu, it-​2 Slaten 19:15 jistqarr: ‘Mulej, int waħdek Alla [veru].’ (3) Dwar l-​awtorità tiegħu, Apokalissi 4:11 jgħidilna: “Jistħoqqlok, Mulej Alla tagħna, li tilqaʼ l-​glorja u l-​ġieħ u s-​setgħa, għax int ħlaqt il-​ħlejjaq kollha, u huma kienu u nħolqu bir-​rieda tiegħek.” (4) Irridu nagħrfu wkoll li Jehovah huwa l-​Għajn tal-​Ħajja, li l-​iskop tiegħu hu li jsalvana mid-​dnub u l-​mewt: “Tiegħek, Mulej, ir-​rebħa [“is-​salvazzjoni,” NW].” (Salm 3:9 [3:​8, NW]; 36:10 [36:​9, NW]) (5) Irridu naċċettaw li Jehovah huwa l-​Leġislatur Suprem: “Il-​Mulej hu l-​imħallef tagħna; il-​Mulej il-​leġislatur tagħna. Il-​Mulej is-​sultan tagħna.” (Isaija 33:22) Ladarba għandu dawn il-​pożizzjonijiet kollha, aħna mħeġġin: “Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.”—Mattew 22:37.

9. Xi jfisser li titgħammed “fl-​isem . . . taʼ l-​Iben”?

⁹ Xi tfisser il-​magħmudija “fl-​isem . . . taʼ l-​Iben”? Tfisser li wieħed jirrikonoxxi l-​isem, il-​pożizzjoni, u l-​awtorità taʼ Ġesù Kristu. Isem Ġesù jfisser “Jehovah Hu Salvazzjoni.” Hu jirċievi l-​pożizzjoni tiegħu mill-​fatt li hu l-​Iben uniġenitu t’Alla, l-​ewwel imwieled mill-​ħolqien t’Alla. (Mattew 16:16; Kolossin 1:​15, 16) Dwar dan l-​Iben, Ġwann 3:16 jgħidilna: “Alla hekk ħabb lid-​dinja [taʼ bnedmin li jistgħu jiġu mifdija] li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” Peress li Ġesù miet leali, Alla rxoxtah mill-​mewt u tah iktar awtorità. Skond l-​appostlu Pawlu, Alla “għollieh,” lil Ġesù, għal pożizzjoni superjuri fl-​univers, it-​tieni wieħed wara Jehovah innifsu. Għalhekk “fl-​isem taʼ Ġesù . . . il-​ħlejjaq kollha jinżlu għarkubbtejhom, u kull ilsien jistqarr: ‘Ġesù Kristu hu l-​Mulej, għall-​glorja taʼ Alla l-​Missier.’” (Filippin 2:​9-11) Dan ifisser li nobdu l-​kmandamenti taʼ Ġesù, li jiġu mingħand Jehovah innifsu.—Ġwann 15:10.

10. Xi jfisser li titgħammed “fl-​isem . . . taʼ l-​Ispirtu s-​Santu”?

¹⁰ Xi jfisser li titgħammed “fl-​isem . . . taʼ l-​Ispirtu s-​Santu”? Ifisser li nagħrfu l-​irwol u l-​attività taʼ l-​ispirtu qaddis. U x’inhu l-​ispirtu qaddis? Huwa l-​forza attiva taʼ Jehovah, li biha jwettaq l-​iskopijiet tiegħu. Ġesù qal lis-​segwaċi tiegħu: “Jiena nitlob lill-​Missier, u hu jagħtikom Difensur ieħor biex jibqaʼ magħkom għal dejjem. L-​Ispirtu tal-​verità.” (Ġwann 14:​16, 17) Dan x’kien se jgħinhom iwettqu? Ġesù qalilhom ukoll: “Meta jiġi fuqkom l-​Ispirtu s-​Santu, intom tirċievu l-​qawwa, u tkunu xhieda tiegħi f’Ġerusalemm, fil-​Lhudija kollha u s-​Samarija u sa truf l-​art.” (Atti 1:8) Permezz taʼ l-​ispirtu qaddis, Jehovah ispira wkoll il-​kitba tal-​Bibbja: “Qatt ma kien li xi profezija ġiet mir-​rieda tal-​bnedmin; imma, meta l-​bnedmin tkellmu f’isem Alla, dan għamluh għax kienu mqanqlin mill-​Ispirtu s-​Santu.” (2 Pietru 1:21) Għalhekk, aħna nirrikonoxxu l-​irwol taʼ l-​ispirtu qaddis meta nistudjaw il-​Bibbja. Mod ieħor li bih nirrikonoxxu l-​ispirtu qaddis hu billi nitolbu lil Jehovah jgħinna nipproduċu “l-​frott taʼ l-​Ispirtu,” li hu “l-​imħabba, l-​hena, is-​sliem, is-​sabar, il-​ħniena, it-​tjieba, il-​fidi, il-​ħlewwa, ir-​rażan.”—Galatin 5:​22, 23.

11. (a) X’inhi t-​tifsira vera tal-​magħmudija fi żmienna? (b) Il-​magħmudija kif tistaʼ titqies bħala li wieħed imut u jerġaʼ jiġi mqajjem?

¹¹ L-​ewwel nies li tgħammdu fi qbil maʼ l-​istruzzjonijiet taʼ Ġesù kienu Lhud u proseliti Lhud, b’seħħ mis-​sena 33 E.K. Ftit wara dan, is-​Samaritani wkoll ngħataw il-​privileġġ li jsiru dixxipli Kristjani. Imbagħad, fis-​sena 36 E.K., is-​sejħa bdiet tinkludi wkoll lil Ġentili mhux ċirkonċiżi. Qabel ma jitgħammdu, is-​Samaritani u l-​Ġentili kellhom jagħmlu dedikazzjoni persunali lil Jehovah biex jaqduh bħala dixxipli taʼ Ibnu. Din baqgħet it-​tifsira tal-​magħmudija Kristjana fl-​ilma sa llum. Tgħaddis komplet taħt l-​ilma huwa simbolu xieraq taʼ din id-​dedikazzjoni persunali, ladarba l-​magħmudija hija difna simbolika. Il-​fatt li tinżel taħt l-​ilmijiet tal-​magħmudija jirrappreżenta li qed tmut għall-​ħajja li kellek qabel. Meta toħroġ mill-​ilma jissimbolizza li qed tieħu l-​ħajja mill-​ġdid biex tagħmel ir-​rieda t’Alla. Din il-​“magħmudija waħda” tapplika għal dawk kollha li jsiru Kristjani veri. Fil-​magħmudija huma jsiru Xhieda Kristjani taʼ Jehovah, ministri ordnati t’Alla.—Efesin 4:5; 2 Korintin 6:​3, 4.

12. Maʼ xiex tikkorrispondi l-​magħmudija Kristjana fl-​ilma, u kif?

¹² Magħmudija bħal din għandha valur kbir taʼ salvazzjoni f’għajnejn Alla. Per eżempju, wara li semma l-​bini taʼ l-​arka minn Noè, li fiha ġew preservati hu u l-​familja tiegħu mid-​Dilluvju, l-​appostlu Pietru kiteb: “Dan l-​ilma kien ifisser il-​magħmudija, li issa ssalva lilkom ukoll. Mhux għax tnaddaf il-​ħmieġ tal-​ġisem, imma għax hi talba lil Alla ħierġa minn kuxjenza safja bis-​saħħa tal-​qawmien taʼ Ġesù Kristu.” (1 Pietru 3:​21, korsiv tagħna.) L-​arka kienet evidenza soda li Noè wettaq lealment ix-​xogħol li tah Alla. Wara li tlesta x-​xogħol taʼ l-​arka, id-​“dinja taʼ dak iż-​żmien tgħarrqet u ntilfet.” (2 Pietru 3:6) Imma Noè u l-​familja tiegħu, “tmienja biss, salvaw bis-​saħħa taʼ l-​ilma.”—1 Pietru 3:20.

13. Minn xiex jiġi salvat Kristjan permezz tal-​magħmudija fl-​ilma?

¹³ Illum, dawk li jiddedikaw lilhom infushom lil Jehovah fuq il-​bażi tal-​fidi fi Kristu rxoxtat jitgħammdu bħala simbolu taʼ din id-​dedikazzjoni. Huma jibqgħu jagħmlu r-​rieda t’Alla għal żmienna u jiġu salvati minn din id-​dinja mill-​agħar preżenti. (Galatin 1:​3, 4) M’għadhomx mexjin lejn il-​qerda mas-​sistema t’affarijiet mill-​agħar taʼ llum. Huma jiġu salvati minnha u jgawdu kuxjenza tajba m’Alla. L-​appostlu Ġwanni jassigura lill-​qaddejja t’Alla: “Id-​dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.”—1 Ġwann 2:17.

Inwettqu r-​Responsabbiltajiet Tagħna

14. Għala l-​magħmudija fiha nfisha m’hijiex garanzija taʼ salvazzjoni?

¹⁴ Nagħmlu ħażin jekk nikkonkludu li l-​magħmudija fiha nfisha hija garanzija taʼ salvazzjoni. Għandha valur biss jekk wieħed ikun verament iddedika lilu nnifsu lil Jehovah permezz taʼ Ġesù Kristu u wara jagħmel ir-​rieda t’Alla, waqt li jibqaʼ leali sa l-​aħħar. “Min jibqaʼ jżomm sħiħ sa l-​aħħar, dan isalva.”—Mattew 24:13.

15. (a) Illum x’inhi r-​rieda t’Alla għall-​Kristjani mgħammdin? (b) Li nkunu dixxipli Kristjani kemm għandu jkun importanti f’ħajjitna?

¹⁵ Ir-​rieda t’Alla għal Ġesù kienet tinkludi l-​mod kif uża ħajtu bħala bniedem. Ħajtu kellha tingħata bħala sagrifiċċju. Fil-​każ tagħna, ġisimna jrid jiġi preżentat lil Alla, u rridu ngħixu ħajja taʼ sagrifiċċju hekk kif nagħmlu r-​rieda t’Alla. (Rumani 12:​1, 2) Ma nkunux qed nagħmlu r-​rieda t’Alla jekk saħansitra kultant, għax irridu, inġibu ruħna bħad-​dinja taʼ madwarna jew niċċentraw ħajjitna madwar miri egoistiċi, waqt li nagħtu biss servizz minimu lil Alla. (1 Pietru 4:​1-3; 1 Ġwann 2:​15, 16) Meta ċertu Lhudi staqsa dwar x’kellu jagħmel biex jikseb il-​ħajja taʼ dejjem, Ġesù rrikonoxxa l-​importanza taʼ li wieħed jgħix ħajja nadifa moralment. Imma mbagħad ipponta lejn xi ħaġa saħansitra iktar importanti: il-​bżonn li tkun dixxiplu Kristjan, segwaċi taʼ Ġesù. Dan irid ikun il-​prijorità fil-​ħajja. Ma jistax jiġi fit-​tieni post wara l-​attivitajiet materjali.—Mattew 19:​16-21.

16. (a) Liema responsabbiltà għandhom il-​Kristjani kollha f’konnessjoni mas-​Saltna? (b) Kif inhu muri f’paġni 116 u 117, liema huma xi modi effettivi fejn nistgħu nagħmlu x-​xogħol tas-​Saltna? (ċ) Is-​sehem minn qalbna kollha fix-​xogħol t’għoti taʼ xiehda jagħti evidenza taʼ liema ħaġa?

¹⁶ Tajjeb li nerġgħu nenfasizzaw li r-​rieda t’Alla għal Ġesù kienet tinkludi attività vitali f’konnessjoni mas-​Saltna t’Alla. Ġesù nnifsu kien maħtur bħala Sultan. Imma waqt li kien fuq l-​art, hu ta wkoll xiehda b’żelu kbir rigward is-​Saltna. Għandna xogħol taʼ xiehda simili x’nagħmlu, u għandna kull raġun biex nieħdu sehem fih b’qalbna kollha. Jekk nagħmlu dan, aħna nuru l-​apprezzament tagħna għas-​sovranità taʼ Jehovah kif ukoll imħabbitna għall-​bnedmin sħabna. (Mattew 22:​36-40) Nuru wkoll li aħna magħqudin m’aduraturi sħabna mad-​dinja kollha, li lkoll huma xandara tas-​Saltna. Flimkien, f’unità globali, aħna nimxu ’l quddiem lejn il-​mira tal-​ħajja taʼ dejjem fuq l-​art, taħt din is-​Saltna.

Diskussjoni Bħala Reviżjoni

• Liema similaritajiet u differenzi hemm bejn il-​magħmudija taʼ Ġesù u l-​magħmudija fl-​ilma llum?

• Xi jfisser li titgħammed “fl-​isem tal-​Missier u taʼ l-​Iben u taʼ l-​Ispirtu s-​Santu”?

• X’hemm involut f’li nwettqu r-​responsabbiltajiet tal-​magħmudija Kristjana fl-​ilma?

[Stampi f’paġna 116, 117]

XI MODI KIF IXXANDAR IS-​SALTNA

Minn bieb għal bieb

Lill-​qraba

Lil sħabek tax-​xogħol

Lil sħabek taʼ l-​iskola

Fit-​toroq

Billi terġaʼ żżur lil dawk li wrew interess

Fl-​istudji tal-​Bibbja fid-​djar