Kunu leali lejn xulxin

Ġeħova jirrikjedi li aħna ngħożżu l-​lealtà. (Salm 18:25) Dan hu speċjalment importanti fiż-​żwieġ tiegħek għax fejn m’hemmx lealtà, m’hemmx fiduċja. U l-​fiduċja hi essenzjali biex l-​imħabba tikber.

Illum, il-​lealtà fiż-​żwieġ tinsab fil-​periklu. Biex tipproteġi ż-​żwieġ tiegħek, trid tkun determinat li tagħmel żewġ affarijiet.

1 AGĦTI PRIJORITÀ LIŻ-ŻWIEĠ TIEGĦEK

DAK LI TGĦID IL-BIBBJA: ‘Aċċerta ruħek minn dak li hu iktar importanti.’ (Filippin 1:10) Iż-​żwieġ tiegħek hu wieħed mill-​iktar affarijiet importanti f’ħajtek. Dan jixraqlu li jingħata prijorità.

Ġeħova jridek tiffoka fuq il-​persuna l-​oħra fiż-​żwieġ u ‘tgawdu l-​ħajja’ flimkien. (Ekkleżjasti 9:9) Hu jagħmilha ċara li qatt m’għandkom tittraskuraw lil xulxin, imma minflok it-​tnejn li intom għandkom tfittxu modi kif tferrħu lil xulxin. (1 Korintin 10:24) Agħmel lis-​sieħeb jew lis-​sieħba tiegħek tħossha bżonjuża u apprezzata.

DAK LI TISTAʼ TAGĦMEL:

• Agħmel ċert li tqattgħu ħin flimkien regolarment, billi tagħtu lil xulxin l-​attenzjoni sħiħa tagħkom

• Taħsibx fik imma fikom it-​tnejn

2 ĦARES LIL QALBEK

DAK LI TGĦID IL-​BIBBJA: “Kulmin jibqaʼ jħares lejn mara biex jixtieqha jkun diġà għamel adulterju magħha f’qalbu.” (Mattew 5:28) Jekk xi ħadd jibqaʼ jaħseb dwar affarijiet immorali, sa ċertu punt, ma jkunx leali lejn iż-​żwieġ tiegħu.

Ġeħova jgħid li għandek bżonn ‘tħares lil qalbek.’ (Proverbji 4:23; Ġeremija 17:9) Biex tagħmel hekk, trid toqgħod b’sebaʼ għajnejn għal dak li tara. (Mattew 5:29, 30) Segwi l-​eżempju tal-​patrijarka Ġob, li għamel patt m’għajnejh biex qatt ma jħares b’xenqa lejn mara oħra. (Ġob 31:1) Kun determinat li qatt ma tara l-​pornografija. U kun deċiż li ma jkollok ebda relazzjoni romantika maʼ persuna li mhijiex il-​mara jew ir-​raġel tiegħek.

DAK LI TISTAʼ TAGĦMEL:

• Ħalli lil oħrajn jaraw ċar li int leali għalkollox lejn il-​mara jew ir-​raġel tiegħek

• Ikkunsidra s-​sentimenti tal-​persuna l-​oħra fiż-​żwieġ, u temm minnufih kwalunkwe relazzjoni li ġġegħelha tħossha skomda