Meta sseħħ xi traġedja

Minkejja li tagħmel l-​aħjar li tistaʼ biex ikollok żwieġ u familja ferħana, jistgħu jinqalgħu xi affarijiet mhux mistennijin li jagħmluhielek diffiċli biex tibqaʼ ferħan. (Ekkleżjasti 9:11) Alla bi mħabba jipprovdilna għajnuna meta niffaċċjaw diffikultajiet. Jekk tapplika l-​prinċipji Skritturali li ġejjin, int u l-​familja tiegħek se tkunu tistgħu tkampaw, anki meta tħabbtu wiċċkom mal-​iktar sitwazzjonijiet diffiċli.

1 STRIEĦ FUQ ĠEĦOVA

DAK LI TGĦID IL-BIBBJA: ‘Itfaʼ l-​ansjetà kollha tiegħek fuqu, għax hu jimpurtah minnek.’ (1 Pietru 5:7) Dejjem ftakar li qatt mhu t-​tort t’Alla meta jkollok xi inkwiet. (Ġakbu 1:13) Hekk kif tersaq qrib lejh, hu se jgħinek bl-​aħjar mod possibbli. (Isaija 41:10) ‘Ferraʼ qalbek quddiemu.’—Salm 62:8.

Se ssib taʼ faraġ ukoll li taqra u tistudja l-​Bibbja kuljum. B’hekk, se tesperjenza kif Ġeħova “jfarraġna fit-​tribulazzjoni kollha tagħna.” (2 Korintin 1:3, 4; Rumani 15:4) Hu jwiegħed li jagħtik “il-​paċi t’Alla li tisboq kull ħsieb.”—Filippin 4:6, 7, 13.

DAK LI TISTAʼ TAGĦMEL:

• Itlob lil Ġeħova biex jgħinek tibqaʼ kalm u taħseb b’mod ċar

• Ikkunsidra l-​għażliet tiegħek kollha u agħżel l-​aħjar waħda għalik

2 ĦU ĦSIEB TIEGĦEK INNIFSEK U TAʼ FAMILTEK

DAK LI TGĦID IL-​BIBBJA: “Qalb dak li għandu l-​abbiltà li jifhem tikseb l-​għarfien, u widnet l-​għorrief tipprova ssib l-​għarfien.” (Proverbji 18:15) Ikseb il-​fatti kollha. Sir af x’jeħtieġ kull membru tal-​familja tiegħek. Tkellem magħhom u ismagħhom.—Proverbji 20:5.

Xi ngħidu jekk imut xi ħadd għażiż? Toqgħodx tiddejjaq tesprimi kif qed tħossok. Ftakar li anki “Ġesù qabiżlu d-​dmugħ.” (Ġwanni 11:35; Ekkleżjasti 3:4) Li tistrieħ u torqod biżżejjed hu importanti wkoll. (Ekkleżjasti 4:6) Dan se jagħmilhielek iktar faċli biex tkampa maʼ sitwazzjoni stressanti.

DAK LI TISTAʼ TAGĦMEL:

• Tistenniex li sseħħ xi traġedja biex tiħodha drawwa li tikkomunika maʼ familtek. B’hekk, meta jinqalgħu xi problemi, se jħossuhom komdi jitkellmu miegħek

• Tkellem m’oħrajn li forsi għaddew minn sitwazzjoni simili

3 FITTEX L-GĦAJNUNA LI GĦANDEK BŻONN

DAK LI TGĦID IL-​BIBBJA: “Ħabib veru jħobb il-​ħin kollu; huwa ħu mwieled għal meta jkun hemm in-​niket.” (Proverbji 17:17) Ħbiebek ikunu jridu jgħinuk imma forsi ma jkunux jafu x’għandhom jagħmlu. Iżżommx lura milli tgħidilhom dak li verament għandek bżonn. (Proverbji 12:25) Ukoll, fittex għajnuna spiritwali mingħand dawk li għandhom fehma tajba tal-​Bibbja. Il-​gwida li jistgħu jagħtuk mill-​Bibbja se tgħinek.—Ġakbu 5:14.

Se ssib l-​għajnuna li għandek bżonn meta tissieħeb regolarment maʼ nies li tassew għandhom fidi f’Alla u li jafdaw fil-​wegħdi tiegħu. Se ssib faraġ kbir ukoll meta tgħin lil oħrajn li għandhom bżonn l-​inkuraġġiment. Aqsam magħhom il-​fidi li għandek f’Ġeħova u fil-​wegħdi tiegħu. Żomm ruħek okkupat billi tgħin lil nies fil-​bżonn, u tinqatax għalik waħdek imma ibqaʼ qrib taʼ dawk li jħobbuk u jimpurtahom minnek.—Proverbji 18:1; 1 Korintin 15:58.

DAK LI TISTAʼ TAGĦMEL:

• Tkellem maʼ ħabib tal-​qalb u ħallih jgħinek

• Kun speċifiku u onest dwar dak li għandek bżonn