PARTI 5

Erġgħu lura “għand ir-ragħaj u l-indokratur taʼ ruħkom”

Mill-isfidi li ssemmew f’dan il-browxer, esperjenzajt int xi waħda minnhom? Jekk iva, m’intix waħdek. Ħafna qaddejja leali t’Alla—kemm fiż-żmien tal-Bibbja kif ukoll fi żmienna—kellhom sfidi simili. Bħalma huma ġew megħjunin minn Ġeħova biex jegħlbu dawn l-isfidi, anki int tistaʼ tingħata din l-għajnuna.

Ġeħova se jkun hemm għalik hekk kif terġaʼ lura għandu

KUN ċert li Ġeħova se jkun hemm għalik hekk kif terġaʼ lura għandu. Hu se jgħinek tkampa mal-ansjetà, ma tibqax tħossok imweġġaʼ, u ssib il-paċi tal-moħħ u tal-qalb li ġġib magħha kuxjenza nadifa. Imbagħad forsi terġaʼ tħossok imqanqal taqdi lil Ġeħova mal-aduraturi sħabek. Is-sitwazzjoni tiegħek se tkun bħal dik taʼ xi Kristjani tal-ewwel seklu. Lil dawn l-appostlu Pietru kitbilhom: “Kontu bħal nagħaġ, mitlufin; imma issa ġejtu lura għand ir-ragħaj u l-indokratur taʼ ruħkom.”—1 Pietru 2:25.

Li terġaʼ lura għand Ġeħova żgur li hi l-aħjar ħaġa li tistaʼ tagħmel. Għala? Għax se tferraħ il-qalb taʼ Ġeħova. (Proverbji 27:11) Bħalma taf, Ġeħova għandu sentimenti, allura dak li nagħmlu jeffettwah. M’għandniex xi ngħidu, Ġeħova ma jisforzaniex biex inħobbuh u naqduh. (Dewteronomju 30:19, 20) Meta nqimu lil Ġeħova għax inħobbuh, inkunu qed nuru x’hemm f’qalbna. U b’hekk, inkunu qed nagħtuh għotja prezzjuża—l-integrità tagħna—u nferrħulu qalbu. Infatti, xejn ma jistaʼ jitqabbel mal-ferħ li nħossu meta nagħtu lil Ġeħova l-qima li tixraqlu.—Atti 20:35; Rivelazzjoni 4:11.

Oħt Kristjana inattiva tiġi milqugħa mill-qalb lura fil-kongregazzjoni

Iktar minn hekk, meta terġaʼ tibda tqim lil Ġeħova, se tissodisfa l-bżonn spiritwali tiegħek. (Mattew 5:3) B’liema mod? Xi nies madwar id-dinja jistaqsu, ‘Għala qegħdin hawn?’ Huma qed ifittxu b’ħerqa t-tweġibiet għall-mistoqsijiet dwar l-iskop tal-ħajja. Il-bnedmin għandhom dan il-bżonn spiritwali għax Ġeħova hekk ħalaqhom. Hu għamilna b’tali mod li nsibu sodisfazzjon f’li naqduh. Xejn ma jistaʼ jagħmilna iktar kuntenti mill-fatt li nkunu nafu li qed inqimu lil Ġeħova għax inħobbuh!—Salm 63:1-5.

Jekk jogħġbok kun żgur li Ġeħova jridek terġaʼ lura għandu. Kif tistaʼ tkun ċert? Aħseb ftit: Dan il-browxer ġie ppreparat bir-reqqa u b’ħafna talb. Inġieb għal attenzjoni tiegħek, forsi minn xi anzjan Kristjan jew xi sieħeb ieħor fit-twemmin. Imbagħad int tqanqalt taqrah u taġixxi fi qbil mal-messaġġ li fih. Dan kollu hu prova li Ġeħova ma nsiekx. Għall-kuntrarju, hu qiegħed jiġbdek bil-ħlewwa lejh.—Ġwanni 6:44.

Il-ħsieb li Ġeħova qatt ma jinsa lill-qaddejja tiegħu li tbiegħdu minnu jistaʼ jagħtina l-faraġ. Oħt jisimha Donna apprezzat dan il-ħsieb. Hi tgħid: “Jien tbegħedt mill-verità ftit ftit, imma spiss kont nirrifletti fuq Salm 139:23, 24, li jgħid: ‘Fittex fija, O Alla, u sir af lil qalbi. Eżaminani, u sir af il-ħsibijiet li jinkwetawni, u ara jekk hemmx fija triq mimlija wġigħ, u mexxini fit-triq dejjiema.’ Kont naf li posti ma kienx fid-dinja—qatt ma ħassejtni komda hemmhekk—u kont naf li l-organizzazzjoni taʼ Ġeħova kienet il-post fejn kelli nkun. Bdejt nara li Ġeħova qatt ma kien telaqni; kelli biss nerġaʼ lura għandu. U kemm jien kuntenta li għamilt dan!”

“Bdejt nara li Ġeħova qatt ma kien telaqni; kelli biss nerġaʼ lura għandu”

Hija x-xewqa sinċiera tagħna li anki int terġaʼ tesperjenza “l-ferħ taʼ Ġeħova.” (Neħemija 8:10) Qatt mhu se jiddispjaċik jekk terġaʼ lura għand Ġeħova.

Tweġibiet għall-mistoqsijiet li għandek dwar li terġaʼ lura għand Ġeħova

MINN FEJN SE NAQBAD NIBDA?

Xi ħadd li għamel żmien marid fiżikament għandu mnejn ikollu jerġaʼ jaqbad ir-rutina tiegħu taʼ kuljum bil-mod il-mod. Bl-istess mod, int tistaʼ tissaħħaħ bħala Kristjan billi tipprova tieħu minn tal-inqas ftit ikel spiritwali kuljum. Tħossx li għandek tagħmel kollox f’daqqa. Forsi tistaʼ tqattaʼ ftit minuti taqra l-Bibbja jew tismaʼ rekording tagħha, tistudja xi ktieb minn tagħna, tfittex fuq il-Websajt jw.org/mt, jew tara wieħed mill-programmi li hemm fuq jw.org. Ukoll, ipprova mur laqgħa tal-kongregazzjoni malajr kemm jistaʼ jkun. Fuq kollox, itlob lil Ġeħova għall-għajnuna. ‘Itfaʼ l-ansjetà kollha tiegħek fuqu, għax hu jimpurtah minnek.’—1 Pietru 5:7.

“Wara li ma bqajtx nattendi l-laqgħat u noħroġ fil-ministeru, bdejt insibha bi tqila anki biex nitlob. Meta rabbejt il-kuraġġ biex nitlob, iltqajt m’anzjan mill-kongregazzjoni lokali. Hu għenni napprezza li Ġeħova ma kienx qataʼ qalbu minni. L-anzjan tani l-parir biex nibda billi naqra l-Bibbja kuljum. Meta għamilt hekk, ksibt is-saħħa biex nerġaʼ nibda mmur il-laqgħat. Maż-żmien, erġajt bdejt nieħu sehem fil-ministeru. Kemm jien ferħana li Ġeħova qatt ma qataʼ qalbu minni.”—Eeva.

IL-KONGREGAZZJONI KIF SE TILQAGĦNI?

Tistaʼ tkun ċert li l-membri tal-kongregazzjoni se jagħtuk merħba mill-qalb. Minflok ma se jikkritikawk jew jiġġudikawk, huma se juru l-imħabba li għandhom għalik u jagħmlu kulma jistgħu biex jinkuraġġuk.—Ebrej 10:24, 25.

“Bdejt nistħi mmur is-Sala tas-Saltna. Bdejt nhewden dwar kif kienu se jilqgħuni l-aħwa. Meta mort, waħda minn ħutna mdaħħlin fiż-żmien li tiftakarni meta kont nattendi 30 sena ilu, qaltli, ‘Merħba lura, ibni!’ Dan tassew messli qalbi. Ħassejt li kont lura maʼ familti.”—Javier.

“Mort is-Sala tas-Saltna u qgħadt bilqiegħda fl-aħħar ringiela sabiex ħadd ma jinduna bija. Però, ħafna bdew jagħrfuni minn meta kont nattendi bħala tifel. L-aħwa tant laqgħuni u ħaddnuni b’affezzjoni li ħassejt paċi kbira ferm. Ħassejtni bħallikieku kont irritornajt id-dar.”—Marco.

L-ANZJANI KIF SE JGĦINUNI?

L-anzjani se jittrattawk b’qalb tajba. Se jfaħħruk għax-xewqa li għandek li terġaʼ tkebbes “l-imħabba li kellek fil-bidu.” (Rivelazzjoni 2:4) Huma se juru ħniena miegħek u jgħinuk tikkoreġi kwalunkwe żball li stajt għamilt, u dan se jagħmluh “bi spirtu taʼ ħlewwa.” (Galatin 6:1; Proverbji 28:13) L-anzjani għandhom mnejn jagħmlu arranġamenti biex xi ħadd jistudja miegħek, forsi minn xi ktieb bħal Għix Ħajja Ferħana għal Dejjem! jew “Ersaq Qrib Lejn Jehovah.” Kun ċert li l-anzjani se jfarrġuk u jappoġġawk f’kull pass li tagħmel.—Isaija 32:1, 2.

“Matul it-tmien snin li kont inattiv, l-anzjani baqgħu jipprovaw jgħinuni. Darba minnhom, anzjan urieni xi ritratti li kien ħa tagħna t-tnejn. Dawn tant ġabuli memorji sbieħ li xxennaqt għall-ferħ li kont inħoss meta kont naqdi lil Ġeħova. L-anzjani bi mħabba għenuni nerġaʼ naqbad rutina spiritwali.”—Victor.

“Hu se jsaħħek”

Il-ktieb tal-għanjiet Kanta mill-qalb lil Ġeħova, fih għadd t’għanjiet li jmissu l-qalb u li jistgħu jfarrġuk u jinkuraġġuk hekk kif terġaʼ ssir regolari fl-attivitajiet spiritwali tiegħek. Pereżempju, ikkunsidra l-kliem tal-għanja numru 38. Din hi bbażata fuq l-1 Pietru 5:10 u għandha t-titlu “Hu se jsaħħek.”

Mhux għalxejn Alla lilek tak il-verità;

Sejjaħlek minn ġod-dlam għad-dawl sabiħ.

Dan kien għax f’qalbek ra kemm xtaqt int b’mod ħerqan

Li tfittxu w tagħmel kulm’hu sew bis-sħiħ.

Fit-talb wegħʼdtu li tagħmel li jrid hu;

Kif għenek qabel jibqaʼjgħinek żgur.
Lill-maħbub Ibnu, Alla tah mill-qalb għalik;

Tirnexxi jridek żgur, meta tqis dan.

La ma żammx lura l-għotja t’Ibnu tant għażiż,

Bla dubju jagħtik saħħa b’mod kotran.

Xi mħabba w fidi wrejt hu ma jinsiex.

Lil dawk li huma Tiegħu jieħu ħsieb.

(RITORNELL)

Ta’ Alla issa inti, għax xtrak Hu b’demm Ġesù.

Għalhekk se jissodak u jsaħħek; ċert int kun.

Iħarsek u jmexxik kif għamel dejjem żgur hu.

Tassew se jissodak u jsaħħek; ċert int kun.

Biex tismaʼ din l-għanja u għanjiet tas-Saltna oħrajn bl-Ingliż, skenja l-kodiċi jew idħol jw.org.