Fil-Lvant u fil-Punent, Jehovah Isaħħaħ lin-Nies Tiegħu

F’TERRITORJI fejn ix-​xogħol taʼ l-​ippridkar huwa pprojbit, f’artijiet li huma mifnijin bil-​vjolenza, u f’pajjiżi fejn riċentement ġiet imneħħija l-​projbizzjoni​—tabilħaqq, maʼ l-​għalqa dinjija kollha—Jehovah ikompli jipprovdi lix-​Xhieda tiegħu b’“qawwa iktar min-​normal.”—2 Korintin 4:7.

Il-​Prosperità Taħt Projbizzjoni

F’arċipelagu tal-​Lvant Imbiegħed, ix-​xogħol taʼ l-​ippridkar ilu issa taħt projbizzjoni għal 17-il sena. Huma x-​Xhieda skuraġġiti? Xejn affattu! F’Mejju li għadda, laħqu quċċata ġdida taʼ 10,756 pubblikatur, li minnhom 1,297 kienu qegħdin jaqdu bħala ministri full-time. Hekk kif il-​kundizzjonijiet tad-​dinja jiddeterjoraw, in-​nies tal-​gżira huma iktar u iktar inklinati biex jisimgħu l-​verità. Għalhekk kienu qegħdin jirrapportaw 15,654 studju tal-​Bibbja li jiġu kondotti fid-​djar taʼ persuni interessati. Ftit qabel, 25,395 attendew laqgħat li ġew organizzati baxx baxx biex jikkommemoraw il-​mewt taʼ Ġesù.

Meta l-​Konvenzjonijiet Distrettwali “Tagħlim Divin” ġew organizzati​—mill-​ġdid b’mod diskret skond iċ-​ċirkostanzi lokali—​l-aħwa ferħu ħafna meta rċevew, fil-​lingwa tagħhom, il-​kopji tagħhom taʼ l-​istess pubblikazzjonijiet ġodda li kienu saru fl-​Istati Uniti. It-​tradutturi, il-​proofreaders, u oħrajn kienu offrew volontarjament biex jaħdmu iżjed sigħat sabiex huma setgħu jippreparaw il-​pubblikazzjoni ġdida prinċipali, bil-​mijiet taʼ paġni tagħha, preċiż fil-​ħin. U stamperija li mhix tas-​Soċjetà kienet lesta bil-​qalb kollha li tagħmel ix-​xogħol sabiħ taʼ l-​istampar u l-​illegar. Id-​delegati tal-​Konvenzjoni ferħu mhux ftit meta rċevew il-​pubblikazzjoni, imżejna b’iktar minn elf stampa kkuluriti. Ħafna uffiċjali governattivi jirrispettaw lix-​Xhieda taʼ Jehovah, u l-​oppożizzjoni tiġi prinċipalment mill-​kleru tal-​Kristjaneżmu. Huwa ttamat li l-​projbizzjoni dalwaqt se tiġi mneħħija.

Xi Ngħidu Għall-​Amerki?

Ix-​Xhieda taʼ Jehovah f’dawn il-​pajjiżi tal-​Punent huma uniti maʼ ħuthom fil-​Lvant f’li jittrattaw b’kuraġġ il-​problemi tagħhom, u l-​ispirtu qaddis taʼ Jehovah igħinhom biex jegħlbu s-​sitwazzjonijiet diffiċli. Ħu, per eżempju, ir-​rapport li ġej minn pajjiż taʼ l-​Amerka Latina fejn dawk li jikkontrollaw il-​produzzjoni u s-​suq tad-​drogi jivvjaġġaw regolarment fil-​ġungli.

Grupp taʼ Xhieda marru b’karozza tal-​linja għal ġo territorju iżolat. Hekk kif niżlu mill-​karozza tal-​linja, innotaw triq żgħira fil-​ġenb li minn ġor-​raħal kienet tagħti għal xi mkien. Mela l-​ħamest aħwa marru jaraw sa fejn kienet twassal din it-​trejqa mħarbta, billi ħallew lill-​aħwa nisa u lit-​tfal jaħdmu fir-​raħal. Ħu wieħed jirrakkonta:

“Sagħtejn mixi f’din it-​triq irriżulta fi ftit li xejn djar. Imbagħad, tmienja min-​nies armati u mgħammdin f’daqqa waħda ħarġu mill-​masġar. Xi wħud minnhom kellhom machine guns u oħrajn skieken. Xi nqalaʼ issa? Bdejna nistaqsuhom x’riedu, imma qalulna biex noqogħdu kwieti u ma nitkellmux​—sempliċement nibqgħu mexjin. Hekk għamilna! Wara sagħtejn oħra mixi f’dik il-​ġungla densa u fl-​imsaġar sibna ruħna f’biċċa art bla siġar li kienet ovvjament kamp armat. Gwardji armati bi xkubetti kienu kullimkien. Fiċ-​ċentru kien hemm dar mibnija b’mod diċenti li lejha ġejna diretti.

“Hekk kif qgħadna bil-​qiegħda ġejna indirizzati minn wieħed li milli jidher kien il-​kap tal-​kamp. Kien liebes pulit, kien edukat, u kellu ċerta dinjità. Hu pponta subgħajh lejn wieħed mill-​grupp taʼ aħwa tagħna u qallu biex iqum bil-​wieqfa. Imbagħad staqsieh: ‘X’jidhirlek mill-​grupp tagħna?’ Billi rrealizza fejn konna, il-​ħu wieġeb: ‘Sewwa, aħna nafu dwar il-​grupp tagħkom, imma m’għandna l-​ebda interess fih, u lanqas f’ebda grupp ieħor politiku. L-​unika raġuni għala qegħdin hawn hu biex nippridkaw dwar is-​Saltna t’Alla Jehovah bi Kristu Ġesù. Din dalwaqt se teqred il-​gvernijiet politiċi kollha taʼ din is-​sistema taʼ affarijiet u se ġġib barkiet meraviljużi għal nies fuq din l-​art taħt kundizzjonijiet taʼ ġenna​—xi ħaġa li l-​ebda bniedem jew grupp taʼ rġiel ma jistgħu jagħmlu.’

“L-​attitudni tar-​raġel inbidlet. Hu beda jistaqsi xi mistoqsijiet. ‘Fejn tgħallimthom dawn l-​affarijiet kollha? Kif kont ippreparat biex titkellem hekk?’ Għal siegħa u nofs, stajna nagħtu xiehda tajba dwar il-​kundizzjonijiet tad-​dinja u nuru li l-​Bibbja tidentifika l-​unika tama għall-​umanità. Aħna spjegajna wkoll Rumani kapitlu 13​—li aħna nobdu lill-​awtoritajiet li jkunu fil-​poter, imma meta jkun hemm konflitt bejn il-​Kelma taʼ Jehovah u tagħhom, nobdu lil Alla tagħna, Jehovah, l-​ewwel. Fl-​aħħar, offrejnielu l-​kotba li kellna. Hu ħa tlieta minnhom u Bibbja u, b’sorpriża kbira għalina, tana kontribuzzjoni għalihom. Qalilna li kien se jaqrahom.

“Imbagħad, il-​kap għamel sinjal lil wieħed mill-​irġiel biex joħroġna ’l barra mill-​kamp. Malajr tlaqna lura minn fejn ġejna, billi rringrazzjajna lil Jehovah għar-​rebħa li kellna f’għalqa oħra taʼ l-​għoti taʼ xiehda.”

Fl-​Afrika Mbiċċra Bil-​Ġlied

Nofs triq bejn il-​Lvant Imbiegħed u l-​Punent imbiegħed jinsab il-​Kontinent Afrikan. Il-​gwerer taʼ bejn it-​tribujiet biddlu lil xi pajjiżi hemmhekk fi rwiefen kbar taʼ vjolenza. Fil-​Liberja, in-​nies taʼ Jehovah kienu għal darb’oħra effettwati profondament meta faqqgħet il-​gwerra ċivili. Għall-​ewwel kien hemm il-​ġlied fil-​belt kapitali u madwarha matul Ottubru u Novembru 1992. Imbagħad, hekk kif il-​gwerra nfirxet ’il fuq mal-​pajjiż, kongregazzjonijiet sħaħ ġew sfrattati hekk kif l-​aħwa ħarbu lejn il-​bosk mal-​bqija tal-​popolazzjoni. Madankollu, iż-​żelu tagħhom baqaʼ ma naqasx. Hekk kif ħarbu, huma ppridkaw, u dan irriżulta f’xiehda grandjuża li ġiet mogħtija fil-​partijiet l-​iktar remoti taʼ ġewwa nett.

Kongregazzjoni waħda taʼ aħwa li kellhom jaħarbu bnew Sala tas-​Saltna temporanja f’nofs masġar tas-​siġar tal-​gomma. F’belt qrib il-​front tal-​ġlied, matul il-​jum il-​popolazzjoni ċivili kienet taħrab għal ġo l-​imsaġar tal-​gomma fil-​qrib biex tiskansa l-​bombi mill-​ajru. L-​aħwa lokali (inklużi ħafna pubblikaturi maħrubin mill-​kapitali, Monrovja) organizzaw il-​ministeru taʼ l-​għalqa u wieħed setaʼ jarahom regolarment jippridkaw lill-​eluf li kienu qegħdin jistkennu taħt is-​siġar tal-​gomma! Kull darba li kien joqrob xi ajruplan, l-​aħwa rġiel u nisa kienu jaqbżu ġo xi gandott li kien fil-​qrib u mbagħad, meta jkun għadda l-​periklu, ikomplu bl-​ippridkar tagħhom.

Ħaġa taʼ l-​għaġeb, dawk il-​pubblikaturi tal-​kongregazzjoni li jgħoddu iktar minn elf u li jistgħu jwasslu r-​rapport tagħhom lis-​Soċjetà għandhom bejn wieħed u ieħor, minkejja dawn il-​kundizzjonijiet taʼ gwerra ċivili, 18.1 sigħat fil-​għalqa tal-​ministeru u 3,111-il studju tal-​Bibbja li qegħdin jiġu kondotti kull xahar.

Fl-Afrika matul dawn l-​aħħar erbaʼ snin, restrizzjonijiet fuq ix-​xogħol tax-​Xhieda taʼ Jehovah ġew imneħħijin fi 18-il pajjiż. U x’ferħ kbir! Nhar it-​12 t’Awissu, il-​projbizzjoni li kienet ġiet imposta fuq ix-​Xhieda fil-​Malawi f’Ottubru tal-​1967, ġiet imneħħija. L-​ippridkar bil-​moħbi tal-​aħbar tajba dejjem kien baqaʼ miexi ’l quddiem, imma issa x-​Xhieda jistgħu jimxu ’l quddiem fil-​libertà, għalkemm se jkollhom jistennew l-​irxoxt biex jilqgħu lura mill-​ġdid lill-​ħafna mseħbin għeżież tagħhom li kienu ġew maqtulin mill-​oppressuri.

Fil-Mozambique ftehim għall-​paċi beda jseħħ fl-​4 t’Ottubru, 1992. Territorji li qabel ma kinux jistgħu jintlaħqu minħabba l-​gwerra qerrieda tas-​16-il sena li għaddew qegħdin jiġu milħuqin. Fl-​inħawi taʼ Carioco, ġiet stabbilita mill-​ġdid il-​komunikazzjoni maʼ 375 aħwa rġiel u nisa li kienu tilfu kull kuntatt maʼ l-​organizzazzjoni matul is-​sebaʼ snin taʼ qabel. Assemblea speċjali taʼ jum wieħed inżammet f’Milange, il-​kapitali tad-​distrett li qabel kien magħruf bħala l-​post fejn kien hemm kamp tal-​konċentrament u ċentru taʼ “tagħlim mill-​ġdid” (bl-iskop li jbiddlu l-​fehma) tax-​Xhieda taʼ Jehovah, li ħafna minnhom kienu refuġjati mill-​Malawi. Total sorprendenti taʼ 2,915-il persuna attendew, inkluż l-​amministratur tal-​belt, li ta merħba lix-​Xhieda taʼ Jehovah. Mela dak li kien qabel iċ-​ċentru taʼ “tagħlim mill-​ġdid” sar ċentru taʼ tagħlim divin għal dak il-​jum.

Missjunarju jikteb: “Dwar l-​aħwa tagħna li sabu rwieħhom f’kampijiet tar-​refuġjati fil-​Provinċja taʼ Tete, ġiet magħmula osservazzjoni interessanti minn rappreżentant taʼ l-​UNHCR (United Nations High Commissioner for Refugees.) Hu qal li x-​Xhieda taʼ Jehovah kienu organizzaw il-​kampijiet tagħhom stess, isseparati minn gruppi oħrajn. ‘Il-​kamp tagħhom,’ huwa qal, ‘kien l-​uniku wieħed immexxi tajjeb,’ billi żied, ‘Ix-​Xhieda taʼ Jehovah huma nodfa, organizzati, u edukati.’ Imbagħad hu offrieli biex jeħodni bl-​ajruplan sal-​bosk ħa nara b’għajnejja stess. Mill-​ajru, il-​pilota wrieni żewġ kampijiet. Wieħed kien traskurat u maħmuġ, bi djar mibnijin bit-​tajn kollha f’xulxin mingħajr ippjanar taʼ xejn. L-​ieħor kien imqassam tajjeb, bi djar b’toroq li jisseparaw u jifformaw f’ringieli. Id-​djar kellhom dehra nadifa, bi btieħi miknusin tajjeb. Xi wħud kienu saħansitra miżbugħin biż-​żebgħa li għamlu huma stess. ‘Aqtaʼ liema wieħed hu tan-​nies tagħkom?’ qal il-​pilota. Kien ferħ kbir għalija li niltaqaʼ maʼ l-​aħwa f’dan il-​kamp. Hemm issa tmien kongregazzjonijiet f’dan ir-​raħal tax-​Xiehda.”

Ġo “L-​Art Taʼ L-​Ajkla”

Le, din m’hijiex l-​ajkla taʼ l-​Istati Uniti! Bejn il-​Lvant u l-​Punent hemm pajjiż Ewropew, l-​Albanija, li ismu bil-​lingwa uffiċċjali, Shqipëria, ifisser “L-​Art Taʼ L-​Ajkla.” Riċentement, projbizzjoni krudili fuq ix-​Xhieda taʼ Jehovah li damet sejra għal 50 sena f’dan il-​pajjiż ġiet imneħħija, u huma jistgħu jingħaqdu maʼ ħuthom mil-​Lvant u mill-​Punent f’li jgawdu l-​libertà tal-​qima. Huma verament qegħdin ‘jixtru ż-​żmien opportun.’ (Efesin 5:16) L-​ewwel assemblea fl-​istorja taʼ l-​Albanija, assemblea taʼ jum wieħed, ġiet miżmuma fit-​Teatru Nazzjonali, fil-​kapitali, Tiranë, il-​Ħadd, 21 taʼ Marzu. Is-​Sibt fil-​għaxija grupp taʼ 75 Xhud volontier ittrasformaw post tal-​laqgħat li kien qiegħed jaqaʼ biċċiet f’Sala taʼ l-​Assembleat nadifa tazza. Il-​management baqaʼ mbellah! U taʼ min jinnota li minn dawk il-​75 volontier, 20 biss kienu mgħammdin!

It-temp ma setax ikun aħjar. Hekk kif waslu d-​delegati minn barra, il-​merħba​—l-​iktar permezz taʼ tislim bl-​idejn u tgħanniq—​għamlet lil dak il-​jum speċjali taʼ assemblea speċjali ħafna. B’idejn merfugħin ’il fuq lejn is-​sema, Ħuna Nasho Dori għamel it-​talba tal-​ftuħ. Hu ġie mgħammed fl-​1930 u issa hu kważi għami għalkollox. Il-​programm kien ippreżentat bl-​Albaniż, il-​parti l-​kbira minn pijunieri speċjali barranin. Il-​585 li attendew kantaw il-​għanja “Dedikazzjoni Kristjana”​—waħda mis-​sitta li kienu ġew tradotti fl-​Albaniż għall-​okkażjoni—​hekk kif 41 aħwa rġiel u nisa ġodda mxew lejn il-​pixxina li aħwa Griegi li ġew għall-​okkażjoni kienu b’qalb tajba armaw fis-​sala. X’differenza! Qabel, li jkollok Bibbja kien ifisser kampijiet b’xogħol iebes, u l-​laqgħat kienu limitati għal gruppi taʼ żewġ jew tliet persuni.

L-għada taʼ l-​assemblea, l-​uffiċċju tal-​Watch Tower irċieva telefonata mid-​direttur tat-​teatru. Normalment hu ma tantx jagħti kas dwar min juża t-​teatru. Dak hu x-​xogħol tal-​viċi direttur. Imma hu qal: “Kelli bil-​fors inċempel biex nirringrazzjakom. Qatt ma rajt dan il-​post daqshekk nadif. Kieku kelli niddeskrivih, kont ngħid li żiffa mis-​sema niżlet fuq it-​teatru tagħna l-​bieraħ. Kull meta tixtiequ tużaw il-​faċilitajiet tagħna, jekk jogħġobkom erġgħu ejjew, u lilkom nagħtukom preferenza. Kos qiegħed ngħid, imissna nħallukom tużawh kull tliet xhur bla ħlas.”

Ix-Xhieda reġgħu lura lejn l-​ibliet tagħhom imsaħħin u grati u bdew jippreparaw għall-​Mafkar tal-​mewt taʼ Ġesù. 15-il ġurnata biss wara, nhar it-​Tlieta, 6 t’April, l-​ewwel Mafkar bil-​miftuħ ġie ċċelebrat f’sebaʼ postijiet.

Fil-belt taʼ Berat, l-​attendenza għal-​laqgħat żdiedet għal madwar 170, u l-​qassis lokali għandu dillirju. Wieħed u għoxrin mit-​33 pubblikatur tas-​Saltna f’Berat ġew imgħammdin fl-​assemblea. Berat irrapportat 472 li attendew il-​Mafkar. Attendenzi oħrajn tal-​Mafkar kienu wkoll jispikkaw, fil-​biċċa l-​kbira minħabba l-​eżempju mill-​aħjar mogħti minn pijunieri speċjali.

Fl-iktar belt Kattolika taʼ l-​Albanija, Shkodër, fejn hemm bażilika, il-​knisja bdiet tistampa ittra taʼ kull xahar, u kull ħarġa ddiskutiet “Kif Tevita Lix-​Xhieda Taʼ Jehovah.” L-​aħħar ħarġa qalet: “Ix-​Xhieda taʼ Jehovah invadew Shkodër”! L-​armata kbira ħafna taʼ żewġ Xhieda hemmhekk ġabru 74 persuna taʼ manjieri tajbin u serji għall-​Mafkar. Wara li semgħu t-​taħdita tal-​Mafkar, 15-il familja talbu għal studji tal-​Bibbja fid-​dar! F’belt oħra, Durres, fejn hemm armata taʼ erbaʼ Xhieda, kien hemm attendenza sabiħa taʼ 79.

Minħabba oppożizzjoni minn żgħażagħ Kattoliċi, li heddu li jkeċċu lix-​Xhieda ’l barra bil-​ġebel, il-​laqgħa tal-​Mafkar f’Kalmeti i Vogel, raħal fil-​muntanja kellha tiġi ttrasferita għal dar taʼ wieħed mill-​aħwa lokali, fejn bil-​paċi attendew 22. Hemm ħames pubblikaturi f’dan il-​grupp, li minnhom tlieta kienu mgħammdin fl-​assemblea f’Tirana.

Fi Vlorë żewġt irġiel żgħażagħ irċevew kopja taʼ The Watchtower, qrawha, u kitbu lis-​Soċjetà: “Issa aħna qegħdin insejħu lilna nfusna Xhieda taʼ Jehovah minħabba l-​verità li tgħallimna minn The Watchtower. Jekk jogħġobkom ibagħtulna l-​għajnuna.” Żewġ pijunieri speċjali ġew mibgħutin hemmhekk, u wieħed minn dawn l-​irġiel żgħażagħ malajr sar jikkwalifika bħala pubblikatur. Kien hieni li jkun fost l-​64 li attendew il-​Mafkar fi Vlorë.

Ħu Albaniż li tgħallem il-​verità fl-​Istati Uniti rritorna fl-​1950 lejn il-​belt fejn twieled li jisimha Gjirokastër, fejn hu qeda kemm felaħ sa ma miet. Hu żara ż-​żrieragħ taʼ verità f’qalb ibnu. Meta l-​projbizzjoni ġiet imneħħija, dan ibnu talab lill-​Watch Tower Society għall-​għajnuna. Persuna interessata oħra li kienet tgħix f’raħal lejn it-​Tramuntana kienet ukoll kitbet għall-​għajnuna, u għalhekk erbaʼ pijunieri speċjali ġew mibgħutin hemmhekk. L-​Erbgħa fil-​għodu taʼ wara l-​Mafkar, wieħed minnhom ċempel lill-​uffiċċju tas-​Soċjetà f’Tiranë: “Ma stajtx inżomm milli ngħidilkom x’għamel l-​ispirtu taʼ Jehovah. Aħna tant aħna henjin. Il-​Mafkar kien suċċess.” L-​attendenza kienet 106, inkluża l-​armata tagħhom taʼ sebaʼ pubblikaturi tas-​Saltna!

Xi ngħidu għat-​total taʼ l-​attendenza tal-​Mafkar? Fl-​1992, meta kien hemm biss 30 pubblikatur tas-​Saltna, l-​attendenza kienet 325. Issa, fl-​1993, il-​131 pubblikatur ġabru 1,318 li attendew. F’dawn is-​sentejn, l-​attendenza kienet għaxar darbiet in-​numru taʼ pubblikaturi! Kemm hu eċċitanti li tara “ċ-​ċkejken . . . [i]sir elf” f’perijodu tant qasir!—Isaija 60:22.

“Tawwal Il-​Ħbula Tat-​Tinda Tiegħek”

Hekk kif ix-​xogħol taʼ l-​ippridkar tax-​Xhieda taʼ Jehovah jespandi maʼ l-​erbat irkejjen tal-​globu, toħroġ l-għajta: “Agħmel il-​post tat-​tinda tiegħek iktar spazjuż. U ħallihom iġebbdu ’l barra d-​drappijiet tat-​tinda tat-​tabernaklu grandjuż tiegħek. Iżżommx lura. Tawwal il-​ħbula tat-​tinda tiegħek, u agħmel dawk il-​kavilji tat-​tinda tiegħek b’saħħithom. Għax lejn il-​lemin u lejn ix-​xellug int se taħrab ’il barra.” (Isaija 54:2, 3) Din il-​ħarba ’l barra fit-​“tabernaklu grandjuż” t’Alla​—irrappreżentat mill-​kongregazzjoni mad-​dinja kollha taʼ adoraturi tiegħu—​tabilħaqq kienet tidher fl-​Ewropa tal-​Lvant, speċjalment fl-​artijiet taʼ dik li qabel kienet l-​Unjoni Sovjetika. Wara li sostna lill-​qaddejja tiegħu matul l-​għaxriet taʼ snin taʼ rażna, Jehovah qiegħed issa jipprovdi lix-​Xhieda tiegħu b’enerġija dinamika meħtieġa biex jespandu u jsaħħu lill-​organizzazzjoni.

Ġewwa Moska, fir-​Russja, f’Locomotive Stadium, mit-​22-25 taʼ Lulju, quċċata taʼ 23,743 attendew konvenzjoni internazzjonali li tibqaʼ tissemma mis-​serje “Tagħlim Divin” tas-​sena l-​oħra. Min setaʼ jimmaġina li dan kien possibbli, saħansitra sentejn ilu? Imma hemm kienu! Iktar minn 1,000 ruħ ġew mill-​Ġappun u mill-​Korea, kważi 4,000 mill-​Istati Uniti u mill-​Kanada, kif ukoll eluf oħrajn minn iktar minn 30 art tas-​South Pacific, taʼ l-​Afrika, taʼ l-​Ewropa, u taʼ inħawi oħrajn​—verament laqgħa tal-​Lvant u l-​Punent. Kemm kien inkuraġġanti għal dawn kollha li jitħalltu liberament maʼ iktar minn 15,000 minn ħuthom irġiel u nisa Russi! Ħadd ma setaʼ jżomm il-​ferħ tagħhom.

Total taʼ l-​għaġeb taʼ 1,489 Xhieda ġodda ġew imgħammdin. Il-​magħmudija ġiet ippubblikata mill-​mezzi tax-​xandir madwar id-​dinja, inkluża stampa mill-​aħjar fuq il-​paġna taʼ quddiem taʼ The New York Times. L-​applaws irbombja b’qawwa kbira matul il-​magħmudija, imma ġie ssuperat matul it-​taħdita finali, meta l-​kelliemi rringrazzja lill-​4,752 volontieri u uffiċjali li kienu għenu biex il-​konvenzjoni tkun suċċess, u żied: “Fuq kollox, aħna niżżu ħajr lil Jehovah!” Iva, l-​ispirtu taʼ Jehovah kien żamm lura oppożizzjoni qawwija mir-​reliġjonisti Ortodossi u pprovda l-​enerġija vitali li għamlet lill-​konvenzjoni realtà kommoventi.

Il-kbir kien għadu ġej, madankollu, fil-​belt Ukranjana taʼ Kiev, bejn il-​5 u t-​8 t’Awissu. Mill-​ġdid, volontieri minn jeddhom irrinovaw kompletament l-​istadium, u din is-Sala tas-​Saltna ġganteska akkomodat quċċata taʼ attendenza taʼ 64,714-il ruħ. Għal darb’oħra, ix-​Xhieda ġew mil-​Lvant u mill-​Punent, u mill-​postijiet taʼ bejniethom. It-​taħdidiet prinċipali ġew interpretati fi 12-il lingwa. Madwar 53,000 delegat, li waslu bl-​ajru, bil-​ferrovija, jew bil-​karozza tal-​linja, riedu jiġu milqugħin fl-​istazzjonijiet u fl-​ajruporti u jiġu ttrasportati lejn l-​akkomodazzjonijiet tagħhom f’lukandi, skejjel, djar privati, u fuq vapuri. Dan kollu ġie mwettaq bi spiża minima u b’ordni u effiċjenza taʼ organizzazzjoni li ġabet espressjonijiet taʼ stagħġib u tifħir mingħand il-​pulizija militari tal-​belt.

Il-programm kommoventi tal-​konvenzjoni laħaq il-​quċċata tiegħu f’magħmudija li damet sejra għal sagħtejn u nofs sħaħ. Total taʼ 7,402 aħwa rġiel u nisa ġodda b’hekk issimbolizzaw id-​dedikazzjoni tagħhom lil Jehovah, waqt li l-​applaws irbombja u reġaʼ rbombja maʼ l-​istadium tant vast. Dan kien iktar mill-​quċċata rekord li kienet taʼ 7,136 meta 253,922 ruħ inġabru flimkien għall-​konvenzjoni fi New York City fl-​1958.

Hekk kif dan il-​perijodu taʼ ġġudikar issa jersaq ’il quddiem lejn il-​final tiegħu, uħud bħal ngħaġ mil-​Lvant, mill-​Punent, u saħansitra mill-​“iktar parti ’l bogħod taʼ l-​art” qegħdin jiġu miġburin f’unità li qatt ma kien hawn bħalha fl-​istorja kollha tal-​bniedem. Tabilħaqq, “folla kbira . . . mill-​ġnus u t-​tribujiet u l-​popli u l-​ilsna kollha” qegħdin jingħaqdu maʼ l-​Iżrael spiritwali t’Alla f’li jiddikjaraw il-​fidi tagħhom fis-​sagrifiċċju prezzjuż taʼ rahan taʼ Ġesù, il-​pedament taʼ dak kollu li qiegħed jiġi mwettaq fl-​ivvindikar tas-​sovranità taʼ Jehovah.—Atti 1:8; Rivelazzjoni 7:4, 9, 10. [w94 1/1]

[Stampi f’paġni 8, 9]

Il-​Lvant jiltaqaʼ mal-​Punent f’Moska u fi Kiev