Jehovah Dak Alla taʼ Skop

“Żgur li bħalma stħajjilt jien, hekk irid jiġri; u sewwa sew bħalma tajt parir jien, dak hu li se jseħħ.”—ISAIJA 14:24.

1, 2. Ħafna nies xi jgħidu dwar l-​iskop tal-​ħajja?

IN-​NIES kullimkien jistaqsu: “X’inhu l-​iskop tal-​ħajja?” Mexxej politiku tal-​Punent stqarr: “Iktar nies minn qatt qabel qegħdin jistaqsu, ‘Min aħna? X’inhu l-​iskop tagħna?’” Meta gazzetta stħarrġet l-​opinjoni taż-​żgħażagħ rigward il-​mistoqsija taʼ x’inhu l-​iskop tal-​ħajja, tweġibiet tipiċi kienu: “Li tagħmel dak kollu li tixtieq qalbek.” “Li tgħix kull mument billi tgawdi kemm tistaʼ.” “Tagħtiha għat-​tgawdija u għall-​ħela.” “Li jkollok it-​tfal, li tkun kuntent u mbagħad tmut.” Il-​biċċa l-​kbira ħassew li din il-​ħajja biss hemm. Ħadd ma tkellem dwar xi skop fit-​tul għal ħajja fuq l-​art.

² Studjuż Konfuċjan qal: “It-​tifsir aħħari tal-​ħajja jinsab fl-​eżistenza umana u ordinarja tagħna.” Skond dan, in-​nies se jkomplu jitwieldu, jissieltu għal 70 jew 80 sena, imbagħad imutu u jkunu ineżistenti għal dejjem. Xjenzat evoluzzjonarju qal: “Aħna nistgħu nixxennqu għal tweġiba ‘ogħla’​—imma ma teżisti l-​ebda waħda.” Għal dawn l-​evoluzzjonisti, il-​ħajja hi taqbida biex wieħed jibqaʼ ħaj, bil-​mewt li ttemm kollox. Filosofiji bħal dawn jippreżentaw ħarsa bla tama lejn il-​ħajja.

3, 4. Il-​kundizzjonijiet dinjin kif jeffettwaw il-​mod kif ħafna nies iħarsu lejn il-​ħajja?

³ Ħafna jiddubitaw li l-​ħajja għandha skop meta jaraw li l-​eżistenza umana sfat mimlija b’tant miżerja. Fi żmienna, meta l-​bniedem suppost li laħaq quċċata taʼ kisba industrijali u xjentifika, madwar biljun ruħ mad-​dinja kollha huma morda serjament jew huma nutriti ħażin. Miljuni taʼ tfal imutu kull sena minħabba raġunijiet bħal dawn. Jerġaʼ, dan is-​seklu 20 ġarrab erbaʼ darbiet iżjed imwiet mill-​gwerra mill-​erbaʼ mitt sena taʼ qabel f’daqqa. Il-​kriminalità, il-​vjolenza, l-​abbuż tad-​drogi, it-​tkissir tal-​familja, l-​AIDS u mard ieħor trażmess sesswalment​—il-​lista taʼ fatturi negattivi tiżdied. Mexxejja dinjin m’għandhomx soluzzjonijiet għal dawn il-​problemi.

⁴ Minħabba dawn il-​kundizzjonijiet, persuna waħda esprimiet dak li ħafna jemmnu: “M’hemmx skop għall-​ħajja. Ladarba qegħdin jiġru dawn l-​affarijiet ħżiena kollha, allura l-​ħajja ma tantx tfisser wisq.” U raġel imdaħħal fiż-​żmien qal: “Ili nistaqsi għala qiegħed hawn il-​biċċa l-​kbira taʼ ħajti. Jekk hemm skop, ma jinteressanix iżjed.” Għalhekk minħabba li kotriet kbar taʼ nies ma jafux għala Alla jippermetti t-​tbatija, kundizzjonijiet dinjin taʼ niket iġagħluhom li ma jkollhom ebda tama vera għall-​futur.

5. Ir-​reliġjonijiet taʼ did-dinja għala jżidu mal-​konfużjoni dwar l-​iskop tal-​ħajja?

⁵ Saħansitra mexxejja reliġjużi huma maqsumin, u inċerti, dwar l-​iskop tal-​ħajja. Wieħed li kien dekan tal-​Katidral taʼ San Pawl f’Londra qal: “Ħajti kollha ssilitt biex insib l-​iskop taʼ l-​għixien. . . . Fallieli.” Veru, ħafna membri tal-​kleru jgħallmu li fil-​mewt it-​tajbin imorru fis-​sema u l-​ħżiena jmorru f’infern tan-​nar għal dejjem. Imma din il-​ħarsa xorta waħda tħalli lill-​bnedmin fuq l-​art ikomplu fil-​korsa tagħhom taʼ turment. U li kieku kien l-​iskop t’Alla li jkollu nies jgħixu fis-​sema, għala m’għamilhomx biss ħlejjaq tas-​sema mill-​ewwel, bħalma għamel l-​anġli, u b’hekk jeħles lill-​bnedmin minn tant sofferenza? Għalhekk konfużjoni dwar l-​iskop tal-​ħajja fuq l-​art jew li wieħed jiċħad li jemmen li għandha xi skop hija komuni.

Dak Alla Taʼ Skop

6, 7. Il-​Bibbja x’tgħidilna dwar is-​Sovran Universali?

⁶ Madankollu, l-​iktar ktieb distribwit b’mod mifrux fl-​istorja, il-​Bibbja Mqaddsa, jgħidilna li Jehovah, is-​Sovran taʼ l-​univers, hu dak Alla taʼ skop. Jurina li hu għandu skop fit-​tul, fil-​fatt, etern, għall-​bnedmin fuq l-​art. U meta Jehovah ikollu xi skop, ċertament li se jseħħ mingħajr ma jfalli. Bħalma x-​xita tikkaġuna ż-​żerriegħa li tinbet, jgħid Alla, “hekk il-​kelma tiegħi li toħroġ minn fommi se tagħti prova li tkun. Mhix se terġaʼ lura għandi mingħajr riżultati, imma ċertament li se tagħmel dak li fih jien sibt l-​għaxqa, u se jkollha suċċess żgur f’dak li għalih bgħattha.” (Isaija 55:10, 11) Kulma Jehovah jgħid li se jwettaq “hu li se jseħħ.”—Isaija 14:24.

⁷ Aħna l-​bnedmin jistaʼ jkollna fiduċja sħiħa li Dak li Jistaʼ Kollox se jżomm il-​wegħdiet tiegħu, għax Alla “ma jistax jigdeb.” (Titus 1:2; Ebrej 6:18) Meta jgħidilna li se jagħmel xi ħaġa, il-​kelma tiegħu hi garanzija li din se sseħħ. Hija daqs li kieku saret. Hu jiddikjara: “Jiena l-​Wieħed Divin u ma hemm ebda Alla ieħor, lanqas ħadd bħali; il-​Wieħed li qiegħed inħabbar mill-​bidu l-​final, u minn żmien twil ilu l-​affarijiet li ma ntgħamlux; il-​Wieħed li qiegħed jgħid, ‘Il-​parir tiegħi stess se jibqaʼ, u kulma hu għaxqa tiegħi se nagħmel’ . . . Jien saħansitra għedt dan; Jien ukoll se ndaħħal dan. Jien sawwart dan, jien ukoll se nagħmel dan.”—Isaija 46:9-11.

8. Dawk li sinċerament iridu jkunu jafu lil Alla jistgħu jsibuh?

⁸ Iktar minn hekk, Jehovah “ma jixtieqx li xi ħadd jinqered imma jixtieq li kulħadd jasal għall-​indiema.” (2 Pietru 3:9) Minħabba f’dan, hu ma jrid lil ħadd li jkun bla għarfien dwaru. Profeta bl-​isem Ażarija qal: “Jekk tfittxuh [lil Alla], hu se jħalli lilu nnifsu jinstab minnkom, imma jekk titilquh hu se jitlaqkom.” (2 Kronaki 15:1, 2) Għaldaqstant, dawk li sinċerament iridu jkunu jafu lil Alla u l-​iskopijiet tiegħu jistgħu ċertament jagħmlu dan jekk jagħmlu l-​isforz biex ifittxu għalih.

9, 10. (a) X’ġie pprovdut għal dawk li jridu jkunu jafu lil Alla? (b) Tfittxija fil-​Kelma t’Alla x’tgħinna nagħmlu?

⁹ Ifittxu fejn? Għal dawk li verament qegħdin ifittxu lil Alla, hu pprovda l-​Kelma tiegħu, il-​Bibbja. Permezz taʼ l-​ispirtu qaddis tiegħu, l-​istess forza attiva li uża biex joħloq l-​univers, Alla dderieġa rġiel leali biex jiktbu dak li għandna bżonn inkunu nafu dwar l-​iskopijiet tiegħu. Per eżempju, rigward il-​profezija tal-​Bibbja, l-​appostlu Pietru qal: “Il-​profezija f’ebda żmien ma nġiebet bir-​rieda tal-​bniedem, imma bnedmin tkellmu minn Alla waqt li kienu mqanqlin mill-​ispirtu qaddis.” (2 Pietru 1:21) B’mod simili, l-​appostlu Pawlu ddikjara: “L-​Iskrittura kollha hija mnebbħa minn Alla u taʼ benefiċċju għat-tagħlim, għat-​twiddib, biex tiddritta l-​affarijiet, biex tiddixxiplina fit-​tjieba, biex il-​bniedem t’Alla jistaʼ jkun kompetenti għalkollox, mgħammar bis-​sħiħ għal kull xogħol tajjeb.”—2 Timotew 3:16, 17; 1 Tessalonkin 2:13.

¹⁰ Innota li l-​Kelma t’Alla tgħinna nkunu, mhux parzjalment jew b’mod inkomplet, imma ‘kompetenti għalkollox, mgħammrin bis-​sħiħ.’ Tgħin lil dak li jkun ikun ċert dwar min hu Alla, x’inhuma l-​iskopijiet tiegħu, u x’jirrikjedi mill-​qaddejja tiegħu. Dan hu mistenni minn ktieb li l-​awtur tiegħu hu Alla. U huwa l-​uniku sors fejn nistgħu nfittxu biex niksbu għarfien eżatt dwar Alla. (Proverbji 2:1-5; Ġwann 17:3) Billi nagħmlu hekk, ma nibqgħux “iktar trabi, mitfugħin ’il hawn u ’l hinn bħal bil-​mewġ u mġarrin bl-​addoċċ minn kull riħ taʼ tagħlim permezz tal-​qerq tan-​nies, permezz tal-​makakkerija fl-​ippjanar taʼ l-​iżball.” (Efesin 4:13, 14) Is-​salmista esprima l-​ħarsa xierqa: “Il-​kelma tiegħek [t’Alla] hi musbieħ għal sieqi, u dawl għal triqti.”—Salm 119:105.

Irrivelati B’Mod Progressiv

11. Jehovah kif irrivela l-​iskopijiet tiegħu lill-​bnedmin?

¹¹ Fil-​bidunett tal-​familja umana, Jehovah irrivela l-​iskopijiet tiegħu għal din l-​art u għall-​bnedmin taʼ fuqha. (Ġenesi 1:26-30) Imma meta l-​ewwel ġenituri tagħna rrifjutaw is-​sovranità t’Alla, l-​umanità waqgħet fi dlam spiritwali u mewt. (Rumani 5:12) Minkejja dan, Jehovah kien jaf li kien se jkun hemm dawk li jridu jaqduh. Għalhekk, matul is-​sekli, hu rrivela b’mod progressiv l-​iskopijiet tiegħu lill-​qaddejja leali tiegħu. Xi wħud minn dawk li kkomunika magħhom kienu Enok (Ġenesi 5:24; Ġuda 14, 15), Noè (Ġenesi 6:9, 13), Abraham (Ġenesi 12:1-3), u Mosè (Eżodu 31:18; 34:27, 28). Il-​profeta t’Alla Amos kiteb: “Il-​Mulej Sovran Jehovah ma se jagħmel xejn jekk ma jkunx kixef il-​ħaġa kunfidenzjali tiegħu lill-​qaddejja tiegħu l-​profeti.”—Amos 3:7; Danjel 2:27, 28.

12. Ġesù kif xeħet iżjed dawl fuq l-​iskopijiet t’Alla?

¹² Meta l-​Iben t’Alla, Ġesù Kristu, kien fuq l-​art madwar 4,000 sena wara l-​irvell f’Għeden, ħafna iżjed dettalji dwar l-​iskopijiet taʼ Jehovah ġew irrivelati. Dan kien il-​każ b’mod partikulari rigward l-​iskop t’Alla li jistabbilixxi Saltna tas-​sema biex taħkem għal fuq l-​art. (Danjel 2:44) Ġesù għamel dik is-​Saltna t-​tema tat-​tagħlim tiegħu. (Mattew 4:17; 6:10) Hu u d-​dixxipli tiegħu għallmu li taħt is-​Saltna, l-​iskop oriġinali t’Alla għall-​art u għall-​bnedmin kellu jitwettaq. L-​art kellha tiġi mibdula f’ġenna abitata minn bnedmin perfetti, li kellhom jgħixu għal dejjem. (Salm 37:29; Mattew 5:5; Luqa 23:43; 2 Pietru 3:13; Rivelazzjoni 21:4) Barra minn hekk, Ġesù u d-​dixxipli tiegħu wrew x’kellu jseħħ f’dik id-​dinja ġdida bil-​mirakli li Alla tahom il-​qawwa li jwettqu.—Mattew 10:1, 8; 15:30, 31; Ġwann 11:25-44.

13. Rigward il-​modi kif Alla ttratta maʼ l-​umanità, liema bidla seħħet f’Pentekoste tas-​sena 33 E.K.?

¹³ Nhar Pentekoste tas-​sena 33 E.K., 50 jum wara l-​mewt taʼ Ġesù, l-​ispirtu t’Alla ġie mferraʼ fuq il-​kongregazzjoni taʼ segwaċi taʼ Kristu. Din ħadet il-​post taʼ Iżrael mhux leali bħala l-​poplu tal-​patt taʼ Jehovah. (Mattew 21:43; 27:51; Atti 2:1-4) It-​tferriegħ taʼ l-​ispirtu qaddis f’dik l-​okkażjoni kien evidenza li, minn dak iż-​żmien ’il quddiem, Alla kellu jirrivela l-​veritajiet dwar l-​iskopijiet tiegħu permezz taʼ din l-​aġenzija ġdida. (Efesin 3:10) Matul l-​ewwel seklu E.K., il-​qafas organizzazzjonali tal-​kongregazzjoni Kristjana ġie stabbilit.—1 Korintin 12:27-31; Efesin 4:11, 12.

14. Dawk li jfittxu l-​verità kif jistgħu jidentifikaw il-​kongregazzjoni Kristjana vera?

¹⁴ Illum, dawk li jfittxu l-​verità jistgħu jidentifikaw il-​kongregazzjoni Kristjana vera mit-​turija konsistenti tagħha tal-​kwalità predominanti t’Alla, l-​imħabba. (1 Ġwann 4:​8, 16) Tabilħaqq, l-​imħabba taʼ l-​aħwa hija marka li tidentifika tal-​Kristjanità ġenwina. Ġesù qal: “B’dan kulħadd se jkun jaf li intom dixxipli tiegħi, jekk għandkom l-​imħabba bejnietkom.” “Dan hu l-​kmandament tiegħi, li intom tħobbu lil xulxin sewwa sew bħalma ħabbejtkom jien.” (Ġwann 13:35; 15:12) U Ġesù fakkar lis-​semmiegħa tiegħu: “Intom ħbiebi jekk tagħmlu dak li qiegħed nikkmandakom.” (Ġwann 15:14) Mela l-​qaddejja veri t’Alla huma dawk li jgħixu l-​liġi taʼ l-​imħabba. Huma mhux biss jitkellmu dwarha, għax “fidi mingħajr xogħlijiet hi mejta.”—Ġakbu 2:26.

Tidwil

15. Il-​qaddejja t’Alla minn liema ħaġa jistgħu jkunu żguri?

¹⁵ Ġesù bassar li mal-​medda tas-​snin, il-​kongregazzjoni Kristjana vera se tiġi mdawla iżjed u iżjed rigward l-​iskopijiet t’Alla. Hu wiegħed lis-​segwaċi tiegħu: “Dak li jgħin, l-​ispirtu qaddis, li l-​Missier se jibgħat f’ismi, dak il-​wieħed se jgħallimkom l-​affarijiet kollha.” (Ġwann 14:26) Ġesù qal ukoll: “Ħares! jiena magħkom il-​jiem kollha sal-​konklużjoni tas-​sistema taʼ affarijiet.” (Mattew 28:20) B’hekk, tidwil rigward il-​verità dwar Alla u l-​iskopijiet tiegħu jiżdied fost il-​qaddejja t’Alla. Iva, “[i]l-passaġġ taʼ l-​uħud twajbin hu bħad-​dawl qawwi li qiegħed isir iktar u iktar qawwi sakemm il-​jum jiġi stabbilit fis-​sod.”—Proverbji 4:18.

16. It-​tidwil spiritwali tagħna x’jgħidilna dwar fejn ninsabu rigward l-​iskopijiet t’Alla?

¹⁶ Illum, dak id-​dawl spiritwali hu iżjed qawwi minn qatt qabel, għax ninsabu fi żmien meta ħafna profeziji tal-​Bibbja qegħdin jitwettqu jew waslu biex jitwettqu. Dawn juruna li aħna qegħdin ngħixu fl-​“aħħar jiem” taʼ din is-​sistema taʼ affarijiet mill-​agħar. Dan hu l-​perijodu taʼ żmien imsejjaħ “[i]l-konklużjoni tas-​sistema taʼ affarijiet”; dan se jiġi segwit mid-​dinja ġdida t’Alla. (2 Timotew 3:1-5, 13; Mattew 24:3-13) Kif imbassar minn Danjel, is-​Saltna tas-​sema t’Alla dalwaqt se “tfarrak u ġġib fi tmiem lil dawn is-​saltniet kollha [li jeżistu issa], u hija nfisha se tieqaf għal żminijiet indefiniti.”—Danjel 2:44.

17, 18. Liema profeziji grandjużi qegħdin jitwettqu issa?

¹⁷ Fost il-​profeziji li issa qegħdin jitwettqu hi dik li nsibu fil-​vers 14 taʼ Mattew kapitlu 24. Hemm Ġesù qal: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.” Maʼ l-​art kollha, dak ix-​xogħol taʼ ppridkar tas-​Saltna qed isir minn miljuni taʼ Xhieda taʼ Jehovah. U mijiet taʼ eluf taʼ nies qegħdin jingħaqdu magħhom kull sena. Dan hu fi qbil mal-​profezija f’​Isaija 2:2, 3, li tgħid li “fil-​parti finali tal-​jiem” taʼ did-dinja mill-​agħar, nies minn ħafna ġnus kellhom jiġu lejn il-​qima vera taʼ Jehovah, u ‘hu kellu jistruwihom dwar il-​mogħdijiet tiegħu, u huma kellhom jimxu fil-​passaġġi tiegħu.’

¹⁸ Dawn l-​uħud ġodda qegħdin jinġemgħu bħal merħla lejn il-​qima taʼ Jehovah “sewwa sew bħal sħaba,” kif imbassar f’​Isaija kapitlu 60, vers 8. Vers 22 iżid: “Il-​wieħed ċkejken innifsu se jsir elf, u l-​wieħed żgħir ġens setgħani. Jien innifsi, Jehovah, se ngħaġġlu f’waqtu stess.” Dak il-​waqt, l-​evidenza turi, hu issa stess. U wħud ġodda jistgħu jkunu fiduċjużi li f’li jassoċjaw max-​Xhieda taʼ Jehovah, huma ġew f’kuntatt mal-​kongregazzjoni Kristjana vera.

19. Għala ngħidu li wħud ġodda li jassoċjaw max-​Xhieda taʼ Jehovah ġejjin lejn il-​kongregazzjoni Kristjana vera?

¹⁹ Dan għala nistgħu ngħiduh b’ċertezza? Għaliex dawn l-​uħud ġodda, flimkien mal-​miljuni li diġà qegħdin fl-​organizzazzjoni taʼ Jehovah, iddedikaw il-​ħajjiet tagħhom lil Alla u qegħdin jagħmlu r-​rieda tiegħu. Dan jinkludi li huma jgħixu fi qbil mal-​liġi taʼ mħabba divina. Bħala evidenza waħda taʼ dan, dawn il-​Kristjani ‘ħadmu sjufhom f’sikek tal-​moħriet u l-​lanez tagħhom f’imqassijiet taż-​żabra u m’humiex qegħdin jitgħallmu l-​gwerra iktar.’ (Isaija 2:4) Ix-​Xhieda taʼ Jehovah kollha mad-​dinja għamlu dan għaliex jipprattikaw l-​imħabba. Dan ifisser li huma ma jistgħu qatt jerfgħu l-​armi tal-​gwerra kontra xulxin jew kontra xi ħadd ieħor. F’dan huma uniċi​—kuntrarju għar-​reliġjonijiet tad-​dinja. (Ġwann 13:34, 35; 1 Ġwann 3:10-12, 15) Huma ma jinvolvux ruħhom f’nazzjonaliżmu li jifred, għax jifformaw fratellanza globali miżmuma tajjeb flimkien permezz taʼ l-​imħabba, “rabta perfetta taʼ għaqda.”—Kolossin 3:14; Mattew 23:8; 1 Ġwann 4:20, 21.

Il-​Biċċa L-​Kbira Jagħżlu Li Ma Jkunux Jafu

20, 21. Il-​maġġoranza vasta tal-​bnedmin għala jinsabu fi dlam spiritwali? (2 Korintin 4:4; 1 Ġwann 5:19)

²⁰ Fil-​waqt li d-​dawl spiritwali fost il-​qaddejja t’Alla jiddi dejjem iżjed, il-​bqija tal-​popolazzjoni taʼ l-​art qiegħda tinżel f’dalma spiritwali li dejjem tiżdied. Huma ma jafux lil Jehovah jew l-​iskopijiet tiegħu. Il-​profeta t’Alla ddeskriva dan iż-​żmien meta qal: “Ħares! dalma nfisha se tiksi l-​art, u swidija kbira l-​gruppi nazzjonali.” (Isaija 60:2) Dan hu hekk għaliex in-​nies ma jurux interess sinċier f’li jitgħallmu dwar Alla, lanqas ma juru xewqa li jipprovaw jogħġbuh. Ġesù qal: “Issa dan hu l-​bażi għall-​ġudizzju, li d-​dawl ġie fid-​dinja imma l-​bnedmin ħabbew id-​dlam minflok id-​dawl, għax xogħlijiethom kienu mill-​agħar. Għax dak li jipprattika affarijiet vili jobgħod id-​dawl u ma jiġix għad-​dawl, sabiex ix-​xogħlijiet tiegħu jistgħu ma jiġux imċanfrin.”—Ġwann 3:19, 20.

²¹ Individwi bħal dawn m’humiex interessati ġenwinament f’li jsibu x’inhi r-​rieda t’Alla. Minflok, huma jiċċentraw il-​ħajjiet tagħhom f’li jagħmlu r-​rieda tagħhom stess. Billi jinjoraw ir-​rieda t’Alla, huma jpoġġu lilhom infushom f’pożizzjoni perikoluża, għax il-​Kelma tiegħu tiddikjara: “Dak li qiegħed idawwar widintu lil hinn biex ma jismax il-​liġi​—saħansitra t-​talba tiegħu hi xi ħaġa mistmerra.” (Proverbji 28:9) Huma se jbatu l-​konsegwenzi tal-​korsa li għażlu. L-​appostlu Pawlu kiteb: “Tkunux żvijati: Alla m’huwiex wieħed li żżebilħu. Għax kulma bniedem qiegħed jiżraʼ, dan ukoll se jaħsad.”—Galatin 6:7.

22. Kotriet kbar li jridu jkunu jafu lil Alla x’qegħdin jagħmlu issa?

²² Madankollu, hemm kotriet kbar li tassew iridu jkunu jafu r-​rieda t’Alla, li sinċerament ifittxuh, u li jersqu lejh. “Ersqu qrib lejn Alla, u hu se jersaq qrib lejkom,” jgħid Ġakbu 4:8. Dwar uħud bħal dawn Ġesù qal: “Dak li jagħmel dak li hu veru jiġi għad-​dawl, sabiex ix-​xogħlijiet tiegħu jistgħu jintgħamlu jidhru bħala li ġew maħdumin f’armonija m’Alla.” (Ġwann 3:21) U x’futur meraviljuż Alla għamlu l-​iskop tiegħu għal dawk li jiġu għad-​dawl! L-​artiklu li jmiss tagħna se jiddiskuti l-​prospetti eċċitanti. (w94 3/15)

Kif Twieġeb Int?

◻ Ħafna nies x’jgħidu dwar l-​iskop tal-​ħajja?

◻ Jehovah kif jirrivela lilu nnifsu bħala Alla taʼ skop?

◻ Liema tidwil kbir seħħ fl-​ewwel seklu E.K.?

◻ Il-​kongregazzjoni Kristjana vera kif tistaʼ tkun identifikata llum?