Proklamaturi tas-Saltna Jirrapportaw

Alla M’Huwiex Parzjali

IKTAR minn 1,900 sena ilu, l-​appostlu Pietru ta xiehda lill-​uffiċjal taʼ l-​armata Kornelju, billi qal: “Ċertament qiegħed nara li Alla m’huwiex parzjali, imma f’kull ġens il-​bniedem li jibżaʼ minnu u jaħdem it-​tjieba huwa aċċettabbli għalih.” (Atti 10:34, 35) Kornelju wera biżaʼ t’Alla u mħabba għat-​tjieba. Hu aċċetta x-​xiehda mogħtija minn Pietru u sar Kristjan.

L-istess prinċipju jgħodd għal-​lum​—Alla m’huwiex parzjali. Aħna ninnotaw dan minn esperjenza mill-​Ġermanja. Ir-​rapport jgħid:

“Fit-​territorju tal-​kongregazzjoni tagħna, hemm kwartieri kbar taʼ l-​armata Russa. Fl-​1989, ftit wara l-​waqgħa tal-​ħajt taʼ Berlin, l-​anzjani staqsew jekk xi ħadd mill-​pubblikaturi kienx jaf il-​lingwa Russa. Xi wħud minna konna nafu, u morna naħdmu f’dan it-​territorju, li nstab li kien verament taʼ ferħ. Li ġejja hi waħda minn ħafna esperjenzi.

“Kont maʼ pubblikatur mhux mgħammed (issa mgħammed) meta kellimna lil kmandant. Il-​kmandant qagħad jismaʼ dak li kellna xi ngħidu u mbagħad stedinna biex inkellmu lis-​suldati tiegħu. Hu qal li huma jridu jisimgħu dwar Alla u l-​Bibbja wkoll, u għalhekk għamilna appuntament biex nerġgħu niġu.

“Staqsejna lil oħt li titkellem bir-​Russu b’mod fluwenti biex takkumpanjana bħala interpretu. Fil-​kamra fejn jiltaqgħu ġewwa l-​kwartieri, armajna mejda bil-​letteratura u stajna nitkellmu maʼ 68 suldat u nwieġbu l-​mistoqsijiet tagħhom. Wara dan huma b’ferħ aċċettaw 35 ktieb u kważi 100 rivista. Hekk kif ħriġna mill-​kamra fejn jiltaqgħu, rajna gruppi żgħar jiddiskutu l-​letteratura.

“Għamilna appuntament biex nirritornaw fl-​4 taʼ Lulju, 1992. Mal-​wasla tagħna fl–10:50 a.m., il-​gwardjan mal-​kanċell tal-​kwartieri qalilna li s-​suldati kienu qegħdin jistennewna. Maġġur ħadna fil-​kamra fejn jiltaqgħu, u sibna li sinjura li qabel morna kienet irċeviet letteratura mingħandna għal-​librerija, kienet annunzjat il-​miġja tagħna billi waħħlet kartelluni ġewwa l-​kwartieri. Tliet aħwa rġiel taw taħditiet qosra rigward ix-​xogħol tagħna madwar id-​dinja u wrew għala jistaʼ jkollna fiduċja fil-​Bibbja. Imbagħad ittrattajna l-​mistoqsijiet taʼ l-​udjenza, billi weġibna minn fuq il-​Bibbja. Fost il-​mistoqsijiet kien hemm waħda, X’inhi l-​pożizzjoni tax-​Xhieda taʼ Jehovah dwar servizz militari, u hemm xi ħadd minnhom suldat? Din tat lill-​pubblikatur mhux mgħammed li kien akkumpanjani qabel opportunità biex jiddeskrivi l-​karriera tiegħu taʼ 25 sena fil-​militar tal-​Ġermanja tal-​Lvant, l-​aħħar snin bħala kaptan tal-​qawwa taʼ l-​ajru. Hu rrakkonta kif tgħallem dwar Alla u l-​Bibbja u issa ried isir wieħed mix-​Xhieda taʼ Jehovah. Is-​suldati kienu impressjonati b’dak li semgħu. F’sebaʼ minuti l-​letteratura kollha li konna ġibna kienet f’idejn is-​suldati, u ħafna riedu Bibbji. Minn ħanut tal-​kotba aħna stajna nakkwistaw sebaʼ Bibbji bir-​Russu, li huma laqgħu b’apprezzament. Kien ferħ veru li tajna lil dawn l-​uħud bil-​ġuħ spiritwalment informazzjoni Biblika, u nittamaw li huma jaġixxu fuqha.”

Verament, Alla m’huwiex parzjali. Permezz tal-​Kelma tiegħu hu jappella lil nies taʼ qalb onesta huma min huma u huma fejn huma. Hu jistedinhom biex jitgħallmu dwaru u dwar Ibnu, Ġesù Kristu, u ħafna minn kull qasam tal-​ħajja qegħdin jagħmlu hekk.—Ġwann 17:3. (w94 6/1)