Iż-​Żminijiet Inbidlu

X’FERĦ żgur li kien hemm f’li tgħix f’Iżrael tal-​qedem taħt ir-​renju glorjuż tas-​Sultan leali Salamun! Kienet era taʼ paċi, prosperità, u hena. Matul iż-​żmien li Salamun appoġġja lealment il-​vera qima, Jehovah bierek lin-​nazzjon b’mod abbundanti. Lis-​Sultan Salamun, Alla tah mhux biss ġid kbir imma wkoll “qalb għarfa u li tifhem” sabiex Salamun jaħkem fit-​tjieba u l-​imħabba. (1 Slaten 3:12) Tistqarr il-​Bibbja: “Is-​slaten kollha taʼ l-​art kienu qegħdin ifittxu wiċċ Salamun biex jisimgħu l-​għerf tiegħu, li dak Alla veru kien poġġa f’qalbu.”—2 Kronaki 9:23.

Lill-poplu, Jehovah tah sigurtà, paċi, u abbundanza t’affarijiet tajbin. Il-​Kelma t’Alla tgħid: “Ġuda u Iżrael kienu ħafna, bħall-​frak tar-​ramel li hemm ħdejn il-​baħar fil-​kotra, jieklu u jixorbu u jithennew.” Kemm litteralment kif ukoll figurattivament, in-​nies “komplew jgħammru fis-​sigurtà, kulħadd taħt id-​dielja tiegħu stess u taħt it-​tina tiegħu stess . . . il-​jiem kollha taʼ Salamun.”—1 Slaten 4:20, 25.

Iż-żminijiet inbidlu. Il-​ħajja llum m’għandhiex x’taqsam maʼ dawk il-​jiem henjin taʼ żmien ilu. Kuntrarju għal żmien Salamun, problema kbira ferm illum hija l-​faqar. Saħansitra fi ġnus għonja, hemm il-​faqar. Per eżempju, kemm fl-​Istati Uniti kif ukoll fl-​Unjoni Ewropea, kważi 15 fil-​mija tan-​nies jgħixu fil-​faqar, jinnota l-​Programm Taʼ Żvilupp Tal-​Ġnus Magħquda.

Rigward l-​istampa globali, The State of the World’s Children 1994, rapport mill-​UNICEF (United Nations Children’s Fund), josserva li wieħed minn kull ħamsa tal-​popolazzjoni dinjija jgħix f’faqar assolut, u jżid jgħid li l-​ħajja għall-​maġġoranza tal-​foqra tad-​dinja qed “issir dejjem iktar iebsa u ddisprata.”

F’xi pajjiżi, inflazzjoni m’għola s-​sema żżid mad-​diffikultajiet tal-​foqra. Qalet waħda mara minn pajjiż Afrikan: “Tara xi ħaġa fis-​suq, u tgħid, ‘OK, ħa mmur id-​dar u nġib il-​flus biex nixtriha.’ Tmur lura siegħa wara biex jgħidulek li ma tistax tixtriha għax il-​prezz għadu kemm żdied. X’se tagħmel persuna? Dan huwa tassew taʼ qtigħ il-​qalb.”

Mara oħra minn hemmhekk qalet: ‘Biex insalvaw, ninsew dwar bżonnijiet oħrajn. Kif inġibu l-​ikel huwa issa l-​preokkupazzjoni tagħna.’

Skond il-​Ġnus Magħquda, il-​futur ma tantx jidher sabiħ. L-​UNICEF, per eżempju, tistma li jekk il-​bixra tal-​popolazzjoni preżenti tkompli, in-​numru taʼ nies foqra madwar id-​dinja se jiżdied b’erbaʼ darbiet “matul għomor wieħed.”

Madankollu, minkejja li l-​kundizzjonijiet ekonomiċi u soċjali dejjem jeħżienu, il-​qaddejja t’Alla għandhom għalfejn iħossuhom ottimisti. Għalkemm jgħixu fost dawk li jħarsu lejn il-​futur b’pessimiżmu dejjem jiżdied, il-​qaddejja t’Alla jħarsu lejn il-​futur b’ferħ u fiduċja. L-​artiklu li jmiss se jesplora r-​raġunijiet għala. (w95 8/1)

[Sors taʼ l-​Istampa f’paġna 3]

De Grunne/Sipa Press