Faraġ Għal Dawk fil-​Bżonn

ĦAFNA kkummentaw fuq kif ċerti artikli fit-​Torri Taʼ L-​Għassa jew fl-​Awake! saħħew ir-​relazzjoni persunali tagħhom maʼ Jehovah. Qalet waħda: “Wara li qrajt dan l-​artiklu, ħassejt li Jehovah bis-​setgħa u l-​kobor kollha tiegħu kien preċiż hemmhekk miegħi. Ħassejt li hu persuna vera.” Ittra oħra stqarret: “Qlubna u mħuħna ġew mibdulin tant drammatikament fil-​fehma tagħna dwar Jehovah illi m’aħniex l-​istess persuni. Huwa bħal li kieku xi ħadd naddfielna n-​nuċċalijiet tagħna, u issa nistgħu naraw kollox ċar ferm.”

Xi wħud jiktbu biex jgħidu kif ir-​rivisti jgħinuhom jittrattaw maʼ problemi jew sfidi speċifiċi, u b’hekk jassigurawhom mill-​interess persunali taʼ Jehovah fihom. Waħda qarrejja poġġietha b’dan il-​mod: “Grazzi ħafna talli għal darb’oħra ħallejtuna naraw kemm Jehovah jimpurtah mill-​poplu tiegħu u kemm iħobbu.” Mara fil-​Ġappun li tilfet lil wild fil-​mewt qalet dan dwar artikli fl-​Awake! fuq dak is-​suġġett: “Il-​profondità tal-​ħniena t’Alla ħassejtha ħierġa mill-​paġni, u jien bkejt u bkejt u bkejt. Poġġejt dawn l-​artikli f’post fejn nistaʼ naqrahom immedjatament kulmeta nħossni miżerabbli u waħdi.” Mara oħra bil-​vistu kitbet: “L-​artikli tat-​Torri Taʼ L-​Għassa u taʼ l-​Awake! u l-​ktejjeb “Meta Xi Ħadd Li Tħobb Imut” tawni s-​saħħa li kelli bżonn biex nissaporti ż-​żmien tiegħi taʼ niket.”

L-Iskrittura Mqaddsa hija s-​sors primarju tal-​faraġ. (Rumani 15:4) It-​Torri Taʼ L-​Għassa jżomm mal-​Bibbja bħala l-​awtorità tiegħu, u hekk tagħmel ir-​rivista msieħba miegħu, l-​Awake! Minħabba dan, dawn il-​ġurnali wrew li huma taʼ faraġ u inkuraġġiment għall-​qarrejja tagħhom. (w96 1/15)