Jum Jehovah Huwa Qrib

“Isimgħu dan, xjuħ, agħtu widen, intom ilkoll li tgħammru fil-​pajjiż!”—ĠOEL 1:2.

1, 2. Minħabba liema sitwazzjoni f’Ġuda kellu Jehovah jnebbaħ lil Ġoel biex ilissen il-​profezija qawwija tiegħu?

“AH X’JUM dan! Għax fil-​qrib jum il-​Mulej, jasal bħal riefnu mingħand Xaddaj [“Min jistaʼ kollox,” Karm Żammit].” Xi tħabbira drammatika dik! Dan kien il-​messaġġ t’Alla għall-​poplu tiegħu mogħti mill-​profeta tiegħu Ġoel.

² Dan il-​kliem f’Ġoel 1:15 ġie ddokumentat f’Ġuda, x’aktarx madwar is-​sena 820 Q.E.K. Dakinhar il-​pajjiż kien miksi b’għoljiet imħaddrin. Kien hemm frott u qamħ bl-​abbundanza. Il-​mergħat kienu kbar u mimlijin ħaxix. Madankollu, kienet qiegħda sseħħ xi ħaġa ħażina ferm. Il-​qima lejn Bagħal iffjorixxiet f’Ġerusalemm u fl-​art taʼ Ġuda. In-​nies kienu jieħdu sehem f’orġji taʼ sokor quddiem dan l-​alla falz. (Qabbel it-2 Kronaki 21:4-6, 11.) Kien Jehovah se jħalli dan kollu jibqaʼ għaddej?

3. Jehovah dwar xiex wissa, u l-​ġnus għal liema ħaġa għandhom jippreparaw?

³ Il-​ktieb Bibliku taʼ Ġoel ma jħalli l-​ebda dubju dwar it-​tweġiba. Alla Jehovah kien se jivvindika s-​sovranità tiegħu u jissantifika lill-​isem qaddis tiegħu. Il-​jum il-​kbir taʼ Jehovah kien fil-​qrib. Imbagħad Alla kien se jesegwixxi ġudizzju fuq il-​ġnus kollha fil-​“Wied taʼ Ġosafat.” (Ġoel 4:12 [Ġoel 3:12, NW]) Ħallihom iħejju għall-​gwerra kontra Dak li Jistaʼ Kollox, Jehovah. Aħna wkoll qed niffaċċjaw il-​jum il-​kbir taʼ Jehovah. Mela ejjew nagħtu ħarsa iktar mill-​qrib lejn il-​kliem profetiku taʼ Ġoel għal żmienna u fil-​passat.

Invażjoni mill-​Insetti

4. Kemm kellha tkun kbira l-​ġrajja li wissa dwarha Ġoel?

⁴ Permezz tal-​profeta tiegħu, Jehovah jgħid: “Isimgħu dan, xjuħ, agħtu widen, intom ilkoll li tgħammru fil-​pajjiż! Ġrat xi ħaġa hekk fi żmienkom, jew fi żmien missirijietkom? Għiduha lil uliedkom, u wliedkom lil uliedhom, u wliedhom lin-​nisel taʼ warajhom.” (Ġoel 1:2, 3) L-​anzjani u n-​nies kollha setgħu jistennew xi ħaġa li bħalha ma kinitx ġrat matul ħajjithom jew fi żmien missirijiethom. Tant kellha tkun xi ħaġa mhux tas-​soltu li kienu se jibqgħu jitkellmu dwarha sat-​tielet ġenerazzjoni! X’kienet din il-​ġrajja rimarkevoli? Biex insiru nafu, ejjew nimmaġinaw li ninsabu lura fi żmien Ġoel.

5, 6. (a) Iddeskrivi l-​kastig li Ġoel ipprofetizza dwaru. (b) Min kien is-​Sors taʼ dak il-​kastig?

⁵ Ismaʼ! Ġoel jismaʼ tkarwita fil-​bogħod. Is-​sema jiddallam, u dak il-​ħoss li jwaħħax jiżdied hekk kif id-​dalma tkompli tinfirex. Imbagħad tinżel sħaba qisha duħħan. Din hija armata taʼ miljuni taʼ insetti. U x’ħerba jikkaġunaw! Issa, ikkunsidra Ġoel 1:4. Dawn l-​insetti li jinvadu m’humiex illimitati għall- ġradijiet li jtiru u jpassu. Dan mhux kollox! Fi triqithom, ukoll, hemm qtajjaʼ mġewħin taʼ ġradijiet li ma jtirux u li jitkaxkru. Billi ġarrhom ir-​riħ, il-​ġradijiet jaslu f’daqqa waħda, u l-​ħoss tagħhom huwa bħal dak taʼ karrijiet. (Ġoel 2:5) Peress li dawn jieklu ħafna, miljuni minnhom jistgħu malajr ibiddlu post qisu ġenna f’xagħri.

⁶ Fi triqithom ukoll hemm id-​dud tal-​ħaxix​—il-​kamla u l-​friefet meta jkunu għadhom larvi. Armati kbar taʼ dud tal-​ħaxix imġewħin jistgħu jieklu l-​weraq tal-​veġitazzjoni biċċa, biċċa, werqa, werqa, sakemm il-​pjanti jkunu kważi mneżżgħin mill-​weraq tagħhom. U ħafna minn dak li jħallu warajhom, jikluh il-​ġradijiet. U dak li jħallu l-​ġradijiet, ilaqqtuh il-​wirdien li jiġru ħafna. Imma innota dan: F’Ġoel kapitlu 2, vers 11, Alla jidentifika l-​armata tal-​ġradijiet bħala t-​“truppi tiegħu.” Iva, hu kien is-​Sors tal-​kastig tal-​ġradijiet li kellhom iħarbtu l-​pajjiż u jikkaġunaw ġuħ kbir. Meta? Preċiż qabel ‘jum il-​Mulej.’

“Qumu mir-​Rqad, ja Sakranazzi”

7. (a) X’kienet il-​kundizzjoni tal-​mexxejja reliġjużi taʼ Ġuda? (b) Il-​mexxejja tal-​Kristjaneżmu taʼ żmienna kif inhuma fi stat simili għal dak tal-​mexxejja reliġjużi taʼ Ġuda?

⁷ Ġemgħa taʼ nies bla ġieħ, il-​mexxejja reliġjużi taʼ Ġuda jiġu identifikati meta joħroġ il-​kmand: “Qumu mir-​rqad, ja sakranazzi, u ibku! Intom li tixorbu l-​inbid, newwħu lkoll għall-​inbid ġdid, li twarrbilkom minn maʼ fommkom!” (Ġoel 1:5) Iva, is-​sakranazzi spiritwali taʼ Ġuda ntqalilhom biex ‘iqumu,’ biex jiġu f’sensihom. Imma taħsibx li dan huwa biss parti mill-​istorja tal-​qedem. Bħalissa, qabel il-​jum il-​kbir taʼ Jehovah, il-​kleru tal-​Kristjaneżmu b’mod figurattiv tant huma mimlijin bl-​“inbid ġdid” li bilkemm huma konxji taʼ dan il-​kmand mingħand l-​Iktar Għoli. Kemm se jkunu sorpriżi meta jiġu mqajmin mis-​sakra spiritwali tagħhom mill-​jum taʼ Jehovah, kbir u li jqanqal il-​biżaʼ!

8, 9. (a) Ġoel kif jiddeskrivihom il-​ġradijiet u l-​effett tal-​kastig tagħhom? (b) Illum, il-​ġradijiet lil min jirrappreżentaw?

⁸ Ħares lejn dik l-​armata kbira taʼ ġradijiet! “Għaliex għall-​pajjiż tiegħi telaʼ poplu, qawwi u bla għadd; snienu, snien taʼ ljun, u għandu d-​dras taʼ ljunessa. Il-​qasam tad-​dwieli tiegħi għamlu ħerba, is-​siġar tiegħi tat-​tin tertaqhom; qaxqaxhom għalkollox u rmiehom, il-​friegħi tagħhom bjadu. Olfoq, kif tagħmel xebba liebsa x-​xkejjer, għall-​għarus taʼ żgħożitha!”—Ġoel 1:6-8.

⁹ Hija din biss profezija dwar “poplu” taʼ ġradijiet, qatgħa taʼ ġradijiet, li jinvadu lil Ġuda? Le, tfisser ħafna iktar minn hekk. Kemm f’Ġoel 1:6 u kemm f’Apokalissi 9:7, il-​poplu t’Alla huwa rrappreżentat minn ġradijiet. L-​armata tal-​ġradijiet taʼ żmienna m’hi ħadd ħlief it-​“truppi” tal-​“ġradijiet” midlukin taʼ Jehovah, li magħhom issa ngħaqdu mal-​5,600,000 min-​“nagħaġ oħra” taʼ Ġesù. (Ġwann 10:16) M’intix ferħan int li tagħmel parti minn din il-​ġemgħa kbira t’adoraturi taʼ Jehovah?

10. X’inhu l-​effett tal-​kastig tal-​ġradijiet fuq Ġuda?

¹⁰ F’Ġoel 1:9-12, naqraw dwar l-​effetti tal-​kastig tal-​ġradijiet. Waħda wara l-​oħra, il-​qtajjaʼ jġibu ħerba kompleta fuq il-​pajjiż. Billi jonqoshom il-​qamħ, l-​inbid u ż-​żejt, il-​qassisin żleali ma jistgħux ikomplu l-​qadi tagħhom. Anki l-​art titnikket, għax il-​ġradijiet neżżgħuha mill-​qamħ, u s-​siġar tal-​frott tħallew mingħajr frott. Billi d-​dwieli huma rrovinati, m’hemmx iktar inbid għal dawk l-​adoraturi taʼ Bagħal legligin, li kienu wkoll sakranazzi spiritwali.

‘Agħtu fuq Sidirkom, Qassisin’

11, 12. (a) Min huma dawk li jsostnu li huma l-​qassisin t’Alla llum? (b) Il-​mexxejja reliġjużi tal-​Kristjaneżmu kif inhuma effettwati mill-​kastig tal-​ġradijiet taʼ żmienna?

¹¹ Ismaʼ x’inhu l-​messaġġ t’Alla għal dawk il-​qassisin stinati: “Ilbsu x-​xkejjer, qassisin, u olfqu [“agħtu fuq sidirkom,” NW], ixhru, qaddejja taʼ l-​artal!” (Ġoel 1:13) Fl-​ewwel twettiq tal-​profezija taʼ Ġoel, qassisin Levitiċi kienu jaqdu ħdejn l-​artal. Imma xi ngħidu għat-​twettiq finali? Illum, il-​kleru tal-​Kristjaneżmu assumew l-​awtorità li jaqdu ħdejn l-​artal t’Alla, fil-​waqt li jsostnu li huma l-​ministri tiegħu, il-​“qassisin” tiegħu. Madankollu, x’inhu jiġri issa li l-​ġradijiet t’Alla taʼ żmienna qegħdin fi triqithom?

¹² Meta l-​“qassisin” tal-​Kristjaneżmu jaraw in-​nies t’Alla fl-​azzjoni u jisimgħu t-​twissija tagħhom taʼ ġudizzju divin, taqbadhom ferneżija. Jibdew jagħtu fuq sidirhom bid-​dwejjaq u d-​dagħdigħa li jkollhom minħabba l-​effett devastanti tal-​messaġġ tas-​Saltna. U jokorbu hekk kif jonqsulhom il-​merħliet tagħhom. Bil-​mergħat tagħhom imneżżgħin, ħallihom iqattgħu l-​lejl fl-​ixkejjer, jibku t-​telf tagħhom minħabba li naqsilhom id-​dħul taʼ flus tagħhom. Dalwaqt, se jitilfu xogħolhom ukoll! Fil-​fatt, Alla jgħidilhom biex jitnikktu l-​lejl kollu għax tmiemhom jinsab fil-​qrib.

13. Il-​Kristjaneżmu bħala grupp se jwieġbu b’mod favorevoli għat-​twissija taʼ Jehovah?

¹³ Skond Ġoel 1:14, l-​unika tama għalihom hi li jindmu u jgħajtu “lill-​Mulej [“Jehovah għall-​għajnuna,” NW].” Nistgħu aħna nistennew li l-​klassi kollha kemm hi tal-​kleru tal-​Kristjaneżmu ddur lejn Jehovah? Dażgur li le! Individwi minn fosthom għandhom mnejn iwieġbu għat-​twissija taʼ Jehovah. Imma l-​istat spiritwali mġewwaħ taʼ dawn il-​mexxejja reliġjużi u l-​parruċċani tagħhom bħala klassi se jkompli. Il-​profeta Għamos bassar: “‘Ara, għad jiġi żmien, oraklu taʼ Sidi l-​Mulej, meta nibgħat il-​ġuħ fl-​art; mhux il-​ġuħ tal-​ħobż, lanqas l-​għatx għall-​ilma, iżda għas-​smigħ tal-​kelma tal-​Mulej.’” (Għamos 8:11) Mill-​banda l-​oħra, kemm aħna grati għall-​festa spiritwali abbundanti li Alla bl-​imħabba jipprovdilna permezz taʼ l-​“irsir leali u diskret”!—Matt. 24:45-47, NW.

14. Il-​kastig tal-​ġradijiet taʼ liema ħaġa huwa ħabbâr?

¹⁴ Il-​kastig tal-​ġradijiet kien u għadu ħabbâr taʼ xi ħaġa. Taʼ xiex? Ġoel jgħidilna ċar u tond: “Ah, x’jum dan! Għax fil-​qrib jum il-​Mulej, jasal bħal riefnu mingħand Xaddaj [“Min Jistaʼ Kollox,” KŻ].” (Ġoel 1:15) L-​invażjonijiet mad-​dinja kollha mill-​armata tal-​ġradijiet t’Alla llum jindikaw biċ-​ċar li l-​jum taʼ Jehovah kbir u li jqanqal il-​biżaʼ hu fil-​qrib. Żgur li dawk kollha li qalbhom hija retta qed jixxennqu għal dak il-​jum speċjali taʼ rendikont meta se jiġi esegwit il-​ġudizzju divin fuq dawk mill-​agħar u Jehovah se joħroġ rebbieħ bħala s-​Sovran Universali.

15. Minħabba l-​qagħda tal-​biki tal-​pajjiż, dawk li jagħtu kas it-​twissijiet divini kif jirreaġixxu?

¹⁵ Bħalma juri Ġoel 1:16-20, l-​ikel kien spiċċa f’Ġuda tal-​qedem. L-​istess ġralu l-​ferħ. L-​imħażen kienu żvojtaw għalkollox, u l-​imtâmar kellhom jiġu mwaqqgħin. Billi ma kellhomx fejn jirgħu minħabba li l-​ġradijiet kienu kielu l-​ħaxix kollu, il-​bhejjem iġġerrew mifxulin u nqerdu mrieħel sħaħ taʼ nagħaġ. Xi gwaj dak! Fost kundizzjonijiet bħal dawn, x’għamel Ġoel? Skond vers 19, hu qal: “Jien ngħajjat lilek, Mulej!” Illum, ukoll, ħafna huma li jagħtu kas it-​twissijiet divini u jgħajtu bil-​fidi lil Alla Jehovah.

“Jum il-​Mulej Wasal”

16. Dawk “li jgħammru fil-​pajjiż” għala għandhom jitriegħdu?

¹⁶ Isimgħu dan il-​kmand mingħand Alla: “Doqqu t-​tromba f’Sijon, semmgħu l-​aħbar minn fuq il-​muntanja mqaddsa tiegħi! Ħa jitriegħdu dawk kollha li jgħammru fil-​pajjiż.” (Ġoel 2:1) Għala kellhom jirreaġixxu b’dak il-​mod? Il-​profezija twieġeb: “Għax Jum il-​Mulej wasal, għax hu fil-​qrib! Jum taʼ dlam u taʼ swied, jum taʼ sħab u taʼ ċpar magħqud. Fuq il-​muntanji jinfirex bħal sħaba sewda.” (Ġoel 2:1, 2) Jeżisti sens reali t’urġenza konness mal-​jum il-​kbir taʼ Jehovah.

17. Il-​pajjiż u n-​nies taʼ Ġuda kif ġew effettwati mill-​kastig tal-​ġradijiet?

¹⁷ Immaġina l-​impatt tal-​viżjoni tal-​profeta hekk kif il-​ġradijiet, li ma jieqfu qatt, jagħmlu ħerba minn dik li tassew kienet qisha l-​ġnien t’Għeden. Agħti widen għad-​deskrizzjoni taʼ l-​armata tal-​ġradijiet: ‘Id-​dehra tagħha bħal dehra taʼ żwiemel; u bħal żwiemel tal-​ġiri, hekk ilebbtu. Bħal ħsejjes taʼ karrijiet jaqbżu fuq qċaċet il-​muntanji, bħat-​tfaqqigħ taʼ lsien in-​nar iqabbad il-​qasbija, bħal armata qawwija mqassma għall-​battalja. Għad-​dehra tagħha l-​popli jitkexkxu, l-​uċuħ kollha jisfaru.’ (Ġoel 2:4-6) Matul il-​kastig tal-​ġradijiet fi żmien Ġoel, id-​diqa taʼ l-​adoraturi taʼ Bagħal żdiedet, u l-​fawra taʼ l-​ansjetà kienet tistaʼ tidher fuq wiċċhom.

18, 19. L-​attività tan-​nies t’Alla llum kif tixbah lill-​kastig tal-​ġradijiet?

¹⁸ Xejn ma waqqaf lill-​ġradijiet organizzati u li ma jgħajjew qatt. Huma ġrew “bħal nies qalbiena” u anki xxabbtu mas-​swar. Jekk xi wħud minnhom ‘inxteħtu qalb l-​armi, l-​oħrajn ma warrbux minn posthom.’ (Ġoel 2:7, 8) Xi stampa profetika ħajja taʼ l-​armata preżenti taʼ ġradijiet figurattivi t’Alla! Illum, ukoll, l-​armata tal-​ġradijiet taʼ Jehovah tibqaʼ għaddejja dritt. L-​ebda ‘sur’ taʼ oppożizzjoni ma jżommhom lura. Ma jikkompromettux l-​integrità tagħhom lejn Alla, imma huma lesti li jiffaċċjaw il-​mewt, bħalma għamlu eluf taʼ Xhieda li ‘nxteħtu qalb l-​armi’ għax irrifjutaw li jsellmu lil Hitler matul il-​ħakma tal-​Ġermanja Nazista.

¹⁹ L-​armata tal-​ġradijiet t’Alla taʼ żmienna tat xiehda bir-​reqqa fil-​“belt” tal-​Kristjaneżmu. (Ġoel 2:9, KŻ) Huma għamlu hekk madwar id-​dinja. Xorta għadhom jegħlbu l-​ostakli kollha u jidħlu f’miljuni taʼ djar, javviċinaw lin-​nies fit-​triqat, ikellmuhom bit-​telefon, u jikkuntattjawhom bi kwalunkwe mod possibbli hekk kif jiddikjaraw il-​messaġġ taʼ Jehovah. Tabilħaqq, qassmu biljuni taʼ pubblikazzjonijiet dwar il-​Bibbja u għad iridu jqassmu ħafna, ħafna iktar fil-​ministeru bla waqfien tagħhom​—kemm pubblikament u kemm minn dar għal dar.—Atti 20:20, 21.

20. Min qiegħed jappoġġja lill-​ġradijiet taʼ żmienna, u b’liema riżultati?

²⁰ Ġoel 2:10 juri li qatgħa kbira ħafna taʼ ġradijiet hija bħal sħaba li tistaʼ ddallam ix-​xemx, il-​qamar, u l-​kwiekeb. (Qabbel Isaija 60:8.) Hemm xi dubju dwar min hemm wara din l-​armata militari? Fost l-​istorbju tal-​ġradijiet, nisimgħu dan il-​kliem taʼ Ġoel 2:11: “U l-​Mulej isammaʼ leħnu f’ras it-​truppi tiegħu. Għax bla għadd qtajjietu, għax hu qawwi dak li jagħmel l-​ordni tiegħu, għax Jum il-​Mulej hu kbir, tal-​biżaʼ wisq, u min jiflaħ għalih?” Iva, Alla Jehovah qiegħed jibgħat lill-​armata militari tiegħu taʼ ġradijiet issa​—qabel il-​jum il-​kbir tiegħu.

‘Il-​Mulej m’Huwiex Jiddawwar’

21. X’se jirriżulta meta ‘jum il-​Mulej jasal bħal ħalliel’?

²¹ Bħal Ġoel, l-​appostlu Pietru tkellem dwar il-​jum il-​kbir taʼ Jehovah. Hu kiteb: “Jasal, tabilħaqq, jum il-​Mulej bħal ħalliel; jintemmu mbagħad is-​smewwiet bi ħsejjes kbar, jinħallu bin-​nar l-​elementi tad-​dinja, u l-​art b’kull ma fiha tkun maħruqa min-​nar.” (2 Pietru 3:10) Taħt l-​influwenza taʼ Satana x-​Xitan, is-​“smewwiet” governattivi mill-​agħar jaħkmu fuq l-​“art”, jiġifieri, l-​umanità mbiegħda minn Alla. (Efesin 6:12; 1 Ġwann 5:19) Dawn is-​smewwiet u l-​art simboliċi m’humiex se jifilħu għas-​sħana tar-​rabja divina matul il-​jum il-​kbir taʼ Jehovah. Minflok se jiġu ssostitwiti mis-​‘smewwiet ġodda u art ġdida, li fihom tgħammar il-​ġustizzja li aħna qed nistennew skond il-​wegħda tiegħu.’

22, 23. (a) Kif għandna nirreaġixxu għall-​mod mimli ħniena li bih Jehovah qed juri l-​paċenzja? (b) Kif għandna nirreaġixxu għall-​fatt li l-​jum taʼ Jehovah huwa tant qrib?

²² Bid-​distrazzjonijiet u l-​provi tal-​fidi kollha li nsibu llum il-​ġurnata, aħna nistgħu ninsew l-​urġenza taʼ żminijietna. Imma hekk kif il-​ġradijiet simboliċi qegħdin jagħfsu iktar ’il quddiem, ħafna nies qegħdin iwieġbu għall-​messaġġ tas-​Saltna. Għalkemm Alla ħalla żmien għal dan, ma rridux inħalltu l-​paċenzja tiegħu maʼ dewmien. “Mhux għax jiddawwar il-​Mulej li jtemm il-​wegħdiet tiegħu, kif jaħsbu xi wħud, imma qiegħed jistabar bikom għax ma jridx li xi ħadd jintilef, imma li kulħadd jersaq għall-​indiema.”—2 Pietru 3:9.

²³ Waqt li nistennew il-​jum il-​kbir taʼ Jehovah, ejjew nieħdu bis-​serjetà l-​kliem taʼ Pietru ddokumentat fit-2 Pietru 3:11, 12: “Ladarba hekk kollox għandu jintemm, araw daqsxejn kif għandkom iġġibu ruħkom, kemm għandha tkun qaddisa u tajba ħajjitkom, waqt li tistennew b’ħerqa kbira l-​miġja tal-​Jum taʼ Alla. Hu minħabba f’dan il-​Jum li s-​smewwiet jinħarqu u jinħallu, u l-​elementi tad-​dinja jinqerdu bin-​nar.” Dawn l-​atti u għemejjel ċertament jinkludu li aħna nlaħħqu maʼ l-​armata tal-​ġradijiet taʼ Jehovah billi jkollna sehem konsistenti u sinjifikanti fl-​ippridkar taʼ l-​aħbar tajba tas-​Saltna qabel ma jiġi t-​tmiem.—Mark 13:10.

24, 25. (a) Int kif twieġeb għall-​privileġġ li jkollok sehem fix-​xogħol taʼ l-​armata taʼ ġradijiet taʼ Jehovah? (b) Liema mistoqsija mimlija tifsir iqajjem Ġoel?

²⁴ L-​armata taʼ ġradijiet t’Alla m’hijiex se twaqqaf ix-​xogħol tagħha sakemm ifaqqaʼ l-​jum taʼ Jehovah kbir u li jqanqal il-​biżaʼ. L-​istess eżistenza taʼ din il-​qawwa taʼ ġradijiet li ħadd ma jwaqqafhom, hija prova rimarkevoli li l-​jum taʼ Jehovah hu fil-​qrib. M’intix ferħan li qiegħed taqdi fost il-​ġradijiet midlukin t’Alla u dawk imseħbin magħhom fl-​attakk finali qabel il-​jum taʼ Jehovah kbir u li jqanqal il-​biżaʼ?

²⁵ Kemm se jkun kbir il-​jum taʼ Jehovah! Mhux taʼ b’xejn li tqum il-​mistoqsija: “Min jiflaħ għalih?” (Ġoel 2:11) Din il-​mistoqsija u ħafna oħrajn se jiġu kkunsidrati fiż-​żewġ artikli li jmiss.

Tistaʼ Tispjega?

◻ Jehovah għala wissa dwar kastig taʼ insetti fuq Ġuda?

◻ Fit-​twettiq modern tal-​profezija taʼ Ġoel, min huma l-​ġradijiet taʼ Jehovah?

◻ Il-​mexxejja tal-​Kristjaneżmu kif jirreaġixxu għall-​kastig tal-​ġradijiet, u xi wħud minnhom kif jistgħu jiskappaw mill-​konsegwenzi tiegħu?

◻ Kemm kien estensiv il-​kastig tal-​ġradijiet matul is-​seklu 20, u sakemm se jdum sejjer?

[Stampa f’paġna 9]

Il-​kastig taʼ l-​insetti kien ħabbâr taʼ xi ħaġa saħansitra agħar

[Sors]

Siġra Mqaxqxa: ritratt tal-​FAO/G. Singh

[Stampa f’paġna 10]

Alla Jehovah qiegħed jappoġġja l-​kastig tal-​ġradijiet taʼ żmienna

[Sors taʼ l-​Istampa f’paġna 8]

Ġurad: ritratt tal-​FAO/G. Tortoli; qatgħa taʼ ġradijiet: ritratt tal-​FAO/Desert Locust Survey