‘Il-​Verità Teħliskom’

“Tagħrfu l-​verità u l-​verità teħliskom.” Hekk iddikjara Ġesù waqt li kien qed jgħallem lill-​folol fit-​tempju ġewwa Ġerusalemm. (Ġwann 8:32) L-​appostli taʼ Ġesù mill-​ewwel setgħu jidentifikaw it-​tagħlim taʼ Ġesù bħala l-​verità. Huma kienu raw ħafna evidenzi dwar l-​oriġini divina taʼ l-​għalliem tagħhom.

MADANKOLLU, xi wħud illum għandhom mnejn isibuha diffiċli biex jidentifikaw il-​verità li tkellem dwarha Ġesù. Bħal fi żmien il-​profeta Isaija, illum hemm “dawk li jsejjħu tajjeb il-​ħażin, u ħażin it-​tajjeb; u jibdlu d-​dlam mad-​dawl, li jibd­lu l-​morr mal-​ħelu, u l-​ħelu mal-​morr.” (Isaija 5:20) Bid-​diversi opinjonijiet, filosofiji, u stili taʼ ħajja li qed isiru iktar popolari llum, ħafna nies iħossu li kollox hu relattiv u li xejn m’hu verità.

Meta Ġesù qal lill-​udjenza tiegħu li l-​verità se teħlishom, huma wieġbu billi qalulu: “Aħna nisel Abraham, u qatt ma konna lsiera taʼ ħadd. Kif tiġi tgħidilna li nkunu ħielsa?” (Ġwann 8:33) Huma ma ħassewx il-​bżonn li jiġu meħlusin minn xi ħaġa jew xi ħadd. Imma mbagħad Ġesù spjega: “Tassew tassew ngħidilkom, li kull min jagħmel id-​dnub huwa lsir tad-​dnub.” (Ġwann 8:34) Il-​verità li kien qed jitkellem dwarha Ġesù tistaʼ tiftaħ it-​triq għall-​ħelsien mid-​dnub. Ġesù qal: “Jekk l-​Iben jeħliskom, tkunu tabilħaqq ħielsa.” (Ġwann 8:36) Għalhekk, il-​verità li teħles lin-​nies hija l-​verità dwar Ġesù Kristu, l-​Iben t’Alla. Huwa biss permezz tal-​fidi fis-​sagrifiċċju tal-​ħajja umana perfetta taʼ Ġesù li wieħed jistaʼ jinħeles mid-​dnub u l-​mewt.

F’okkażjoni oħra Ġesù qal: “Qaddishom permezz tal-​verità; il-​kelma tiegħek hi l-​verità.” (Ġwann 17:17) Il-​kelma t’Alla kif inhi mfissra fil-​Bibbja hija l-​verità li tistaʼ ġġib ħelsien mis-​superstizzjoni u mill-​qima falza. Il-​Bibbja fiha l-​verità dwar Ġesù Kristu, li twassal lin-​nies biex ipoġġu fidi fih u tiftaħ it-​triq għal tama sabiħa għall-​futur. Hija xi ħaġa meraviljuża li ssir taf il-​verità tal-​Kelma t’Alla!

Kemm huwa vitali li ssir taf il-​verità? Ħafna reliġjonijiet illum, waqt li jistqarru li jsegwu l-​Bibbja, huma influwenzati ferm mill-​filosofiji u t-​tradizzjonijiet tal-​bniedem. Taʼ spiss, il-​mexxejja reliġjużi ma jidhrux li huma daqshekk ikkonċernati dwar l-​eżattezza tal-​messaġġ tagħhom daqs kemm huma dwar l-​aċċettar tiegħu mill-​massa. Xi wħud iħossu li Alla hu sodisfatt bi kwalunkwe forma taʼ qima, sakemm din hija sinċiera. Imma Ġesù Kristu spjega: “Imma tiġi siegħa, anzi issa hi, meta dawk li tassew jaduraw jibdew jaduraw lill-​Missier fl-​ispirtu u l-​verità. Għax il-​missier ukoll, nies bħal dawn ifittex li jadurawh.”—Ġwann 4:23.

Jekk irridu nqimu lil Alla b’mod aċċettabb­li, irridu nkunu nafu l-​verità. Din hija kwistjoni importanti. Il-​ferħ etern tagħna jiddependi minnha. Għalhekk, kulħadd għandu jistaqsi lilu nnifsu: ‘Huwa l-​mod taʼ qima tiegħi aċċettabbli għal Alla? Interessat jien ġenwinament f’li nitgħallem il-​verità tal-​Kelma t’Alla? Jew nibżaʼ minn dak li jistaʼ jirrivela xi eżaminar bir-​reqqa?’