Huwa t-​Talb Tiegħek Imħejji “Bħal Inċens”?

“Ikun it-​talb tiegħi bħal inċens quddiemek.”—SALM 141:2.

1, 2. Il-​ħruq taʼ l-​inċens liema ħaġa kien jissimbolizza?

ALLA JEHOVAH kkmanda lill-​profeta tiegħu Mosè, biex jipprepara inċens sagru għall-​użu fit-​tabernaklu li Iżrael kien juża għall-​qima. Ir-​riċetta divina kienet tirrikjedi taħlita taʼ erbaʼ ħxejjex aromatiċi. (Eżodu 30:34-38) Tassew li kienet tfuħ.

² Il-​patt tal-​Liġi li ddaħħal fih il-​ġens taʼ Iżrael kien jinkorpora l-​ħruq taʼ l-​inċens kuljum. (Eżodu 30:7, 8) Kellu l-​użu taʼ l-​inċens xi sinjifikat speċjali? Iva, għax is-​salmista kanta: “Ikun it-​talb tiegħi bħal inċens quddiemek [Alla Jehovah]; ikunu jdejja merfugħa ’l fuq bħas-​sagrifiċċju fil-​għaxija.” (Salm 141:2) Fil-​ktieb t’Apokalissi, l-​appostlu Ġwanni jiddeskrivi lil dawk madwar it-​tron t’Alla bħala li kellhom bwieqi tad-​deheb mimlijin bl-​inċens. U r-​rakkont ispirat jgħid “li huma t-​talb tal-​qaddisin.” (Apokalissi 5:8) Għalhekk, mela, il-​ħruq taʼ inċens ifuħ kien jissimbolizza talb aċċettabbli offrut mill-​qaddejja taʼ Jehovah bil-​lejl u bi nhar.—1 Tessalonikin 3:10; Lhud 5:7.

3. X’għandu jgħinna nħejju t-​talb tagħna “bħal inċens” quddiem Jehovah?

³ Biex it-​talb tagħna jkun aċċettabbli għalih, irridu nitolbu lil Alla f’isem Ġesù Kristu. (Ġwann 16:23, 24) Imma kif nistgħu ntejbu l-​kwalità tat-​talb tagħna? Ara, li nikkunsidraw xi eżempji Skritturali għandu jgħinna nippreparaw it-​talb tagħna bħal inċens quddiem Jehovah.—Proverbji 15:8.

Offri Talb b’Fidi

4. Il-​fidi kif inhi marbuta maʼ talb aċċettabbli?

⁴ Biex it-​talb tagħna jitlaʼ għand Alla bħal inċens ifuħ, irridu nitolbu b’fidi. (Lhud 11:6) Meta anzjani Kristjani jsibu lil xi ħadd marid spiritwalment li jkun lest jaċċetta l-​għajnuna Skritturali tagħhom, “it-​talba [tagħhom] tal-​fidi ssalva lill-​marid.” (Ġakbu 5:15) Talb offrut b’fidi jogħġob lil Missierna tas-​sema, kif ukoll l-​istudju tal-​Kelma t’Alla bit-​talb. Is-​salmista wera attitudni mill-​aħjar meta kanta: “Nerfaʼ jdejja lejn il-​kmandamenti tiegħek, u naħseb fuq il-​preċetti tiegħek. Fehma tajba u għerf għallimni, għax jien nemmen fil-​kmandamenti tiegħek.” (Salm 119:48, 66) Ejjew ‘nerfgħu jdejna ’l fuq’ f’talb umli u neżerċitaw fidi billi nikkonformaw mal-​kmandamenti t’Alla.

5. X’għandna nagħmlu jekk jonqosna l-​għerf?

⁵ Nassumu li jonqosna l-​għerf meħtieġ biex nittrattaw xi prova. Forsi m’aħniex ċerti jekk xi profezija partikulari tal-​Bibbja hijiex qiegħda titwettaq issa. Minflok ma nħallu lil din il-​ħaġa tiżbilanċjana spiritwalment, ejjew nitolbu għall-​għerf. (Galatin 5:7, 8; Ġakbu 1:5-8) M’għandniex xi ngħidu, ma nistgħux nistennew li Alla jweġibna b’xi mod spettakolari. Irridu nuru s-​sinċerità tat-​talb tagħna billi nagħmlu dak li hu jistenna mill-​poplu tiegħu kollu. Huwa neċessarju għalina li nagħmlu studju taʼ l-​Iskrittura li jibni l-​fidi bil-​għajnuna taʼ pubblikazzjonijiet ipprovduti permezz taʼ “l-​irsir leali u diskret.” (Mattew 24:45-47, NW; Ġożwè 1:7, 8) Irridu wkoll navanzaw fl-​għarfien billi nipparteċipaw fil-​laqgħat tal-​poplu t’Alla fuq bażi regulari.—Lhud 10:24, 25.

6. (a) Ilkoll kemm aħna x’għandna nirrealizzaw dwar żmienna u dwar it-​twettiq taʼ profeziji tal-​Bibbja? (b) Flimkien mat-​talb tagħna għat-​taqdis taʼ isem Jehovah, x’għandna nagħmlu?

⁶ Illum, xi Kristjani qegħdin isegwu interessi u karrieri li bihom jissuġġerixxu li m’għadhomx konxji li aħna issa qegħdin ’il ġewwa sew fiż-​“żmien taʼ l-​aħħar.” (Danjel 12:4) Sħabhom fit-​twemmin jistgħu bix-​xieraq jitolbu li dawn it-​talin ikebbsu mill-​ġdid il-​fidi tagħhom, jew jinforzawha, fl-​evidenza Skritturali li l-​preżenza taʼ Kristu bdiet fl-​1914 meta Jehovah ħatru bħala Sultan tas-​sema u li hu qiegħed jaħkem f’nofs l-​għedewwa tiegħu. (Salm 110:1, 2; Mattew 24:3) Ilkoll kemm aħna għandna nirrealizzaw li ġrajjiet imbassrin bħalma huma l-​qerda tar-​reliġjon falza​—“Babilonja l-​Kbira”—​l-attakk sataniku taʼ Gog taʼ Magog fuq il-​poplu taʼ Jehovah, u l-​ħelsien li se jġibilhom Alla li Jistaʼ Kollox fil-​gwerra taʼ Armageddon jistgħu jfaqqgħu għal għarrieda b’mod li jaħsdek u jistgħu jseħħu kollha f’perijodu taʼ żmien komparattivament qasir. (Apokalissi 16:14, 16; 18:1-5; Eżekjel 38:18-23) Mela ejjew nitolbu għall-​għajnuna t’Alla biex nibqgħu mqajmin spiritwalment. Jalla lkoll kemm aħna nitolbu bil-​ħerqa għat-​taqdis taʼ l-​isem t’Alla, għas-​Saltna tiegħu biex tiġi, u għar-​rieda tiegħu biex issir fl-​art bħalma ssir fis-​sema. Iva, jalla nkomplu neżerċitaw fidi u nagħtu evidenza li t-​talb tagħna hu sinċier. (Mattew 6:9, 10) Tabilħaqq, jalla dawk kollha li jħobbu lil Jehovah jfittxu l-​ewwel is-​Saltna u t-​tjieba tiegħu u jkollhom l-​akbar sehem possibbli fl-​ippridkar taʼ l-​aħbar tajba qabel ma jiġi t-​tmiem.—Mattew 6:33; 24:14.

Faħħar u Iżżi Ħajr lil Jehovah

7. X’jimpressjonak fit-​talba taʼ David li parti minnha hija ddokumentata fl-​1 Kronaki 29:10-13?

⁷ Mod importanti kif inħejju t-​talb tagħna “bħal inċens” huwa billi nesprimu tifħir mill-​qalb u gratitudni lejn Alla. Is-​Sultan David offra talb bħal dan meta hu u l-​poplu taʼ Iżrael ikkontribwew għall-​bini tat-​tempju taʼ Jehovah. David talab: “Mbierek int, Mulej, Alla taʼ Iżrael, missierna, minn dejjem għal dejjem. Tiegħek, Mulej, il-​kobor u l-​qawwa, il-​ġieħ, is-​sebħ u t-​tifħir: kull ma hemm fis-​sema u fl-​art. Tiegħek is-​saltna, Mulej, int kap fuq kulħadd. Minnek l-​għana u s-​sebħ; int taħkem fuq kollox. F’idejk il-​qawwa u s-​saħħa; f’idejk is-​setgħa li tkabbar u ’l kulħadd issaħħaħ. U issa nfaħħruk, Alla tagħna, u nsebbħu l-​isem glorjuż tiegħek.”—1 Kronaki 29:10-13.

8. (a) Liema kliem taʼ tifħir f’Salmi 148 sa 150 imisslek qalbek b’mod speċjali? (b) X’se nagħmlu jekk naqblu mas-​sentimenti espressi f’Salm 27:4?

⁸ Xi ġmiel t’espressjonijiet taʼ tifħir u taʼ ringrazzjament! It-​talb tagħna forsi ma jkunx daqstant elokwenti, imma jistaʼ jkun daqstant mill-​qalb. Il-​ktieb taʼ Salmi huwa mimli b’talb taʼ ringrazzjament u tifħir. Kliem mirqum taʼ tifħir jinsab f’Salmi 148 sa 150. Il-​gratitudni lejn Alla hija espressa f’ħafna Salmi. “Ħaġa waħda tlabt lill-​Mulej,” kanta David. “Ħaġa waħda nfittex: li ngħammar f’dar il-​Mulej tul il-​jiem kollha taʼ ħajti; biex nitgħaxxaq bil-​ħlewwa tal-​Mulej jien u nħares lejn it-​tempju tiegħu.” (Salm 27:4) Ejjew naġixxu fi qbil maʼ dan it-​talb billi nipparteċipaw b’mod żeluż fl-​attivitajiet kollha tal-​ġemgħat taʼ Jehovah. (Salm 26:12) Li nagħmlu dan u li nimmeditaw fuq il-​Kelma t’Alla kuljum se jagħtina ħafna raġunijiet biex navviċinaw lil Jehovah b’tifħir mill-​qalb u gratitudni.

Fittex b’Umiltà l-​Għajnuna taʼ Jehovah

9. Kif talab is-​Sultan Asa, u b’liema riżultat?

⁹ Jekk qegħdin naqdu lil Jehovah b’qalbna kollha bħala x-​Xhieda tiegħu, nistgħu nkunu ċerti li hu jismaʼ t-​talb tagħna għall-​għajnuna. (Isaija 43:10-12) Ikkunsidra lis-​Sultan Asa taʼ Ġuda. L-​ewwel għaxar snin mir-​renju tiegħu taʼ 41 sena (977-​937 Q.E.K.) kienu mimlijin paċi. Imbagħad armata taʼ miljun raġel taħt Żeraħ il-​Kusi [l-Etjopjan], invadiet lil Ġuda. Għalkemm fl-​għadd kienu ssuperati bil-​kbir, Asa u l-​irġiel tiegħu ħarġu biex jiffaċċjaw lill-​invażuri. Madankollu, qabel il-​battalja, Asa talab bil-​ħerqa. Hu rrikonoxxa l-​qawwa taʼ Jehovah biex jeħles lill-​poplu tiegħu. Waqt li talab bil-​ħniena għall-​għajnuna, is-​sultan qal: “Fuqek nistrieħu; f’ismek ġejna kontra din il-​kotra. Mulej inti Alla tagħna; ma jkunx hemm bniedem aqwa minnek!” Ir-​riżultat kien rebħa totali hekk kif Jehovah salva lil Ġuda minħabba l-​kbir ismu. (2 Kronaki 13:23–14:1-14 [2 Kronaki 14:1-15, NW]) Kemm jekk Alla jeħlisna minn xi prova u kemm jekk isaħħaħna biex nissaportuha, ma hemm ebda dubju li hu jismagħna meta nitolbuh bil-​ħniena għall-​għajnuna.

10. Meta ma nkunux nafu kif nittrattaw xi kriżi partikulari, it-​talba tas-​Sultan Ġosafat kif tistaʼ tkun t’għajnuna?

¹⁰ Jekk ma nafux kif nittrattaw xi kriżi partikulari, nistgħu nkunu fiduċjużi li Jehovah se jismaʼ l-​petizzjonijiet tagħna għall-​għajnuna. Dan ngħata stampa tiegħu fi żmien is-​Sultan Ġudean, Ġosafat, li fis-​sena 936 Q.E.K. beda r-​renju tiegħu taʼ 25 sena. Meta Ġuda kienet mhedda mill-​forzi magħqudin taʼ Mowab, Għammon, u r-​reġjun tal-​muntanji taʼ Xegħir, Ġosafat talab bil-​ħniena: “Alla tagħna, ma tagħmilx int ħaqq minnhom? Għax aħna ma għandniex saħħa quddiem din il-​kotra hekk kbira li ġejja kontra tagħna, u aħna ma nafux x’għandna nagħmlu; imma għajnejna huma fik!” Jehovah wieġeb din it-​talba umli, billi ġġieled għal Ġuda u tefaʼ konfużjoni kbira qalb is-​suldati taʼ l-​għadu u dawn bdew joqtlu lil xulxin. Bħala riżultat, il-​ġnus dawramejt saru beżgħanin, u f’Ġuda rrenjat il-​paċi. (2 Kronaki 20:1-30) Meta jonqosna l-​għerf meħtieġ biex niffaċċjaw xi kriżi, nistgħu nitolbu bħal Ġosafat: ‘Ma nafux x’għandna nagħmlu, imma għajnejna huma fik, Jehovah.’ L-​ispirtu qaddis jistaʼ jġagħalna niftakru xi punti Skritturali li jkunu bżonnjużi biex tissolva l-​problema, jew Alla jistaʼ jgħinna b’mod li jisboq id-​dehen uman.—Rumani 8:26, 27.

11. X’nistgħu nitgħallmu dwar it-​talb mill-​azzjonijiet taʼ Neħemija f’konnessjoni mas-​swar taʼ Ġerusalemm?

¹¹ Forsi jkollna nipperseveraw fit-​talb għall-​għajnuna mingħand Alla. Neħemija tnikket, beka, sam, u talab għal ġranet sħaħ dwar is-​swar imġarrfin taʼ Ġerusalemm u l-​istat imwiegħer taʼ l-​abitanti taʼ Ġuda. (Neħemija 1:1-11) Milli jidher it-​talb tiegħu telaʼ għand Alla bħal inċens ifuħ. Darba minnhom, is-​Sultan Persjan Artasersi staqsa lil Neħemija, li kien jidher dipress: “X’inhu li qiegħed titlobni?” Jgħidilna Neħemija: “[Malajr] jien tlabt lil Alla tas-​smewwiet.” Dik it-​talba qasira u siekta twieġbet, għax Neħemija tħalla jwettaq ix-​xewqa taʼ qalbu billi jmur Ġerusalemm u jibni mill-​ġdid is-​swar imġarrfin tagħha.—Neħemija 2:1-8.

Ħalli lil Ġesù Jgħallmek kif Titlob

12. Fi kliemek stess, kif tiġbor fil-​qosor il-​punti prinċipali tat-​talba mudell taʼ Ġesù?

¹² Mit-​talb kollu ddokumentat fl-​Iskrittura, it-​talba mudell ippreżentata bħala inċens ifuħ minn Ġesù Kristu hija istruttiva b’mod speċjali. Il-​Vanġelu taʼ Luqa jgħid: “Wieħed mid-​dixxipli [taʼ Ġesù] qallu: ‘Mulej, għallimna nitolbu, bħalma Ġwanni wkoll għallem lid-​dixxipli tiegħu.’ U qalilhom: ‘Meta titolbu, għidu, “Missier, jitqaddes ismek tiġi Saltnatek. Ħobżna taʼ kuljum agħtina kuljum. U aħfrilna dnubietna, għax aħna wkoll naħfru lil kull min hu ħati għalina, u la ddaħħalniex fit-​tiġrib.”’” (Luqa 11:1-4; Mattew 6:9-13) Ejjew nikkunsidraw din it-​talba, li l-​iskop tagħha ma kienx biex tiġi rripetuta bl-​amment imma biex isservi taʼ gwida.

13. Kif tispjega s-​sinjifikat tal-​kliem, “Missier, jitqaddes ismek”?

¹³ “Missier, jitqaddes ismek.” Il-​qaddejja dedikati taʼ Jehovah għandhom il-​privileġġ speċjali li jindirizzawh bħala Missier. Bħalma l-​ulied javviċinaw bla biżaʼ lil missier ħanin kulmeta jkollhom l-​iċken problema, aħna għandna nqattgħu ħin regolarment f’talb lil Alla b’dinjità u b’rispett kbir. (Salm 103:13, 14) It-​talb tagħna għandu jirrifletti t-​tħassib tagħna dwar it-​taqdis taʼ isem Jehovah għax nixxennqu li narawh ħieles mit-​tmaqdir kollu li ntefaʼ fuqu. Iva, irridu li isem Jehovah jinżamm separat u jitqies bħala qaddis, jew sagru.—Salm 5:12 [Salm 5:11, NW]; Salm 63:4, 5 [Salm 63:3, 4, NW]; Salm 148:12, 13; Eżekjel 38:23.

14. X’ifisser li titlob, “Tiġi Saltnatek”?

¹⁴ “Tiġi Saltnatek.” Is-​Saltna hija l-​ħakma taʼ Jehovah espressa permezz tal-​gvern Messjaniku tas-​sema f’idejn Ibnu u “l-​qaddisin” imseħbin maʼ Ġesù. (Danjel 7:13, 14, 18, 27; Apokalissi 20:6) Dalwaqt se “tiġi” kontra l-​avversarji kollha fuq l-​art tas-​sovranità t’Alla, billi lil dawn tneħħihom min-​nofs. (Danjel 2:44) Imbagħad ir-​rieda taʼ Jehovah se ssir fuq l-​art, saħansitra bħalma ssir fis-​sema. (Mattew 6:10) X’ferħ se jġib dan lill-​ħlejjaq kollha li qegħdin jaqdu lealment lis-​Sovran Universali!

15. Li nitolbu lil Jehovah għal “ħobżna taʼ kuljum” x’jindika?

¹⁵ “Ħobżna taʼ kuljum agħtina kuljum.” Li nitolbu lil Jehovah għall-​ikel “taʼ kuljum” jindika li ma nitolbuhx għal proviżjonijiet bil-​gzuz imma biss għall-​ħtiġijiet tagħna taʼ kuljum. Għalkemm nafdaw f’Alla biex jipprovdilna, aħna naħdmu wkoll u nużaw kwalunkwe mezzi xierqa disponibbli għalina sabiex niksbu l-​ikel u neċessitajiet oħrajn. (2 Tessalonikin 3:7-10) M’għandniex xi ngħidu, għandna nirringrazzjaw lill-​Provditur tagħna tas-​sema għaliex l-​imħabba, l-​għerf, u l-​qawwa tiegħu qegħdin wara dawn il-​proviżjonijiet—Atti 14:15-17.

16. Kif nistgħu nirċievu l-​maħfra t’Alla?

¹⁶ “Aħfrilna dnubietna, għax aħna wkoll naħfru lil kull min hu ħati għalina.” Ladarba aħna imperfetti u midinbin, ma nistgħux inżommu kompletament mal-​livelli perfetti taʼ Jehovah. Għaldaqstant, għandna bżonn nitolbu għall-​maħfra tiegħu fuq il-​bażi tas-​sagrifiċċju li Ġesù ħallas bħala prezz għall-​fidwa. Imma jekk irridu li “Semmiegħ it-​talb” japplika l-​mertu taʼ dak is-​sagrifiċċju għal dnubietna, irridu nkunu nedmin u lesti li nirċievu kwalunkwe dixxiplina li jagħtina. (Salm 65:2; Rumani 5:8; 6:23; Lhud 12:4-11) Iktar minn hekk, nistgħu nistennew li Alla jaħfrilna biss jekk “aħna wkoll naħfru lil kull min hu ħati għalina,” dawk li jidinbu kontra tagħna.—Mattew 6:12, 14, 15.

17. X’ifisser il-​kliem, “La ddaħħalniex fit-​tiġrib”?

¹⁷ “La ddaħħalniex fit-​tiġrib.” Il-​Bibbja xi drabi tgħid li Jehovah jikkaġuna l-​affarijiet, meta hu sempliċement ikun qed jippermettihom. (Rut 1:20, 21) Alla ma jittantaniex biex nikkommettu d-​dnub. (Ġakbu 1:13) It-​tentazzjonijiet biex nagħmlu l-​ħażin joriġinaw mix-​Xitan, mil-​laħam midneb tagħna, u minn did-dinja. Satana huwa t-​Tentatur li jipprova jimmanuvrana biex nidinbu kontra Alla. (Mattew 4:3; 1 Tessalonikin 3:5) Meta nagħmlu l-​petizzjoni, “La ddaħħalniex fit-​tiġrib,” inkunu qed nitolbu lil Alla biex ma jħalliniex naqgħu meta nkunu ttantati biex ma nobduhx. Hu jistaʼ jiggwidana biex ma nċedux u nintrebħu minn Satana, il-​“wieħed mill-​agħar.”—Mattew 6:13; 1 Korintin 10:13.

Aħdem fi Qbil mat-​Talb Tiegħek

18. Kif nistgħu naħdmu fi qbil mat-​talb tagħna għal żwieġ u ħajja tal-​familja henjin?

¹⁸ It-​talba mudell taʼ Ġesù kopriet punti prinċipali, iżda aħna nistgħu nitolbu dwar kwalunkwe ħaġa. Per eżempju, nistgħu nitolbu dwar ix-​xewqa tagħna għal żwieġ hieni. Biex inżommu l-​kastità saż-​żwieġ, nistgħu nitolbu għall-​kontroll fuqna nfusna. Imma mbagħad ejjew naħdmu fi qbil mat-​talb tagħna billi nevitaw letteratura u divertiment immorali. Ejjew inkunu determinati wkoll li ‘niżżewġu biss fil-​Mulej.’ (1 Korintin 7:39; Dewteronomju 7:3, 4) Meta mbagħad niżżewġu, inkunu rridu naħdmu fi qbil mat-​talb tagħna għall-​hena billi napplikaw il-​pariri t’Alla. U jekk għandna t-​tfal, m’huwiex biżżejjed li nitolbu li huma jkunu qaddejja leali taʼ Jehovah. Irridu nagħmlu kulma nistgħu biex innaqqxu l-​veritajiet t’Alla fi mħuħhom permezz taʼ studju tal-​Bibbja u billi nattendu magħhom regolarment għal-​laqgħat Kristjani.—Dewteronomju 6:5-9; 31:12; Proverbji 22:6.

19. X’għandna nagħmlu jekk inkunu qed nitolbu dwar il-​ministeru tagħna?

¹⁹ Qegħdin aħna nitolbu għal barkiet fil-​ministeru? Mela ejjew naġixxu fi qbil maʼ talb bħal dan billi nieħdu sehem sinjifikanti fix-​xogħol taʼ l-​ippridkar tas-​Saltna. Jekk nitolbu għal opportunitajiet biex ngħinu lil oħrajn jaqbdu t-​triq għall-​ħajja taʼ dejjem, għandna bżonn inżommu dettalji bil-​miktub taʼ wħud li wrew interess u nkunu lesti li nsibu ħin fl-​iskeda tagħna biex nikkonduċu studji tal-​Bibbja fid-​djar. Xi ngħidu jekk għandna x-​xewqa li nidħlu għax-​xogħol taʼ l-​ippridkar full-time bħala pijunier? Allura ejjew nieħdu passi fi qbil mat-​talb tagħna billi nżidu l-​attività tagħna taʼ l-​ippridkar u billi nieħdu sehem fil-​ministeru mal-​pijunieri. Li nieħdu dawn il-​passi se juri li qegħdin naħdmu fi qbil mat-​talb tagħna.

20. L-​artiklu li jmiss liema ħaġa se jikkunsidra?

²⁰ Jekk qed naqdu lil Jehovah fedelment, nistgħu nkunu fiduċjużi li hu se jwieġeb it-​talb tagħna li jkun fi qbil mar-​rieda tiegħu. (1 Ġwann 5:14, 15) Ċertament li slitna ħafna punti taʼ benefiċċju billi eżaminajna xi talb iddokumentat fil-​Bibbja. L-​artiklu li jmiss se jikkunsidra linji oħrajn taʼ gwida Skritturali għal dawk li jixtiequ jħejju t-​talb tagħhom “bħal inċens” quddiem Jehovah.

Int kif Twieġeb?

◻ Għala għandna noffru talb b’fidi?

◻ Liema rwol għandhom ikollhom fit-​talb tagħna t-​tifħir u r-​radd il-​ħajr?

◻ Għala nistgħu nfittxu b’fiduċja għall-​għajnuna taʼ Jehovah bit-​talb?

◻ Liema huma xi punti prinċipali tat-​talba mudell?

◻ Kif nistgħu naħdmu fi qbil mat-​talb tagħna?

[Stampa f’paġna 12]

Bħas-​Sultan Ġosafat, xi drabi għandu mnejn ikollna nitolbu: ‘Ma nafux x’għandna nagħmlu, imma għajnejna huma fik, Jehovah’

[Stampa f’paġna 13]

Titlob int fi qbil mat-​talba mudell taʼ Ġesù?